Wenía 36
36
Esaupa merávo ivo yoã
1Naaivo yoãro Esaú, ãwẽ ane wetsa Edom, ato ãwẽ revomati yoã.
2Askái Canaã maĩ shavo ravé akĩ ninivarãki. Adaro, heteu yora, Elomnẽ vake. Wetsaro Oolibama, Anapa vake, Zibeão heveu yorã shokó. 3Askávai txipo, Basemate, Ismaẽl vake ninivarãsho aĩ aoki. Aaivo ãwẽ aĩro Nebaiotẽ aweshavo. 4Aská akĩ aĩ ashõ, Adamẽsho, Elifaz meraki, Basemate ivomẽshoro Reuel meraki. 5Askámaĩnõ Oolibama ivomẽshoro Jeús, Jalão, Corá aatii meraóki. Naarasĩro Esaupa vake venevakerasĩ Canaã mainamã nishõ atõ ãwẽ merati.
6Askávai Esaú anosho tekii, ãwẽ aĩvorasĩ, ãwẽ vakerasĩ, ãwẽ inárasĩ, Canaã mainamã nishõ ãwẽ merakenaa awerasĩ aká, kawivaĩi kaí, ora ãwẽ take Jacó enekésho nii kaí. 7Awesáma, atõ awe ãtsai, mai ichtóchtasho, atõ inárasĩ mashkái. 8Askásho, Esaú, ãwẽ ane wetsa Edom, mató keyáka Seirnamã nii kati.
9Askái naatíiro Esaupa merávo, edomita yorarasĩ, mató keyáka Seirnamã shokoarasĩ.
10Ãwẽ vake venevakerasĩni anero naatíi. Esaupa Adamẽsho meratiro Elifaz. Reuelro Basematemẽsho ãwẽ merati aká. 11Naatíiro Elifaznẽ vake venevakerasĩ, Temã, Omar, Zefo, Gaetã, Quenaz aatíi. 12Askái Elifaz, ãwẽ rakãa aĩvo, Timnamẽsho, vake wetsa meraki, ãwẽ anero Amaleque. Askái atovo katsésero Ada Esaupa aĩ wetsa ivõ vavavo.
13Askámaĩnõ Reuel vake venevakerasĩro naatíi, Naate, Zerá, Samá, Mizá aatíi. Askái naatíiro Basematemẽsho revoa, Esaupa aĩ wetsa ivo.
14Askámaĩnõ naa vake venevakerasĩro Esaupa Oolibamamẽsho merati, Jeús, Jalão, Corá aatíi. Askái Oolibamaro Anapa vake aĩvake, Anapa paparo Zibeão aká.
15Naarasĩro Esaupa ato revomaa kakáyarasĩ. Ãwẽ vake vevokéro Elifaz. Ãatõ vake venevakerasĩro naatíi, Temã, Omar, Zefo, Quenaz, 16Corá, Gaetã, Amaleque, aatíi. Aatíiro Adamẽsho revoa kakáyarasĩ, Edom mainamãsho pakétivo.
17Askámaĩnõ Esaupa vake wetsa Reuẽl vake venevakerasĩro naatíi. Kakáyarasĩro Naate, Zerá, Samá, Mizá aatíi. Atovoro Reuẽl ato revomaa, Edom mainamãsho pakétivo, Esaupa aĩ Basematẽ vavavo.
18Askámaĩnõ naarasĩro Esaupa aĩ wetsa Oolibamã vake venevakerasĩ. Kakáyarasĩro Jeús, Jalão, Corá aatíi. Kakáya naatíiro Anapa vake aĩvake Oolibamamẽsho revoarasĩ.
19Naarasĩ katsésero Esaú, Edom akĩ atõ anea ivomẽsho revoa kakáyarasĩ.
Seirpa merávo ivo yoã
20Naarasĩro Seir, horeu yorã vake venevakerasĩ, Edomnamã shokoyavo, Lotã, Sobal, Zibeão, Aná, 21Disom, Eser, Disã aatíi. Atovo katsésero horeũ kakáyarasĩ, Edom mainamã.
22Naarasĩro Lotãne vake venevakerasĩ, Hori, Hemã aká. Askámaĩnõ Timnaro Lotãne take aĩvake.
23Naarasĩro Sobãl vake venevakerasĩ, Alvã, Manaate, Ebal, Sefô, Onã aatíi.
24Naarasĩro Zibeãone vake venevakerasĩ, Aiá, Aná aká. Naaivo Anáro ãwẽ papa Zibeãone jumentorasĩ wasi ato pimanõ iinã kawivaĩi kakĩ, askata wenẽnamã wakapasha shanaka tsaóa ivo meramtáya.
25Naarasĩro Anapa vakerasĩ, venevake ivoro Disom, aĩvakero Oolibama aatíi.
26Naarasĩro Disomne vake venevakerasĩ, Hendã, Esbã, Itrã, Querã aatíi.
27Naarasĩro Esẽr vake venevakerasĩ, Bilã, Zaavã, Acã aatíi.
28Naarasĩro Disãne vake venevakerasĩ, Uz, Arã aatíi.
29Naarasĩro horeu yorarasĩnĩ kakáyavorasĩ, Lotã, Sobal, Zibeão, Aná
30Disom, Eser, Disã, aatíiro horeu yorã kakáyarasĩ, Seir mainamã.
Edom maitioi kakáyavo, Edom shavá naki kakáyavo aká ivo yoã
31Naaivo kakáyarasĩro Edom maitioi kakáya ipawayavorasĩ, Israel yorarasĩni kakáya shovikatsa vevo.
32Beláro, Beorpa vake venevake, Edomnamã kakáya, ãwẽ anõ kania cidade anero “Dinabá.”
33Anosho Belá vopimaĩnõ Jobabe, Zerapa vake, ãwẽ shanẽne niakéi. Zeráro Bozranamã niá yora.
34Anosho Jobabe vopiómaĩnõ, temanita yora Husã, ãwẽ shanẽne niokeói.
35Anosho Husã vopiómaĩnõ, Hadade, ãwẽ shanẽne niokeói, ãwẽ anõ kania cidade anero “Avite.” Hadadẽ paparo Bedade, midianita yorarasĩ ato keyokeãmtáya, Moabe mainamãsho.
36Anosho Hadade vopiómaĩnõ, Samlá ãwẽ shanẽne niokeói, ãwẽ anõ kania cidade anero “Masreca.”
37Anosho Samlá vopiómaĩnõ, Saul, ãwẽ shanẽne niokeói, ãwẽ anõ kania cidade anero “Reobote”, Eufrates waka orakama.
38Anosho Saul vopiómaĩnõ, Baal-Hanã, Acbõ vake, ãwẽ shanẽne niokeói.
39Anosho Baal-Hanã, Acbõ vake, vopiómaĩnõ, Hadar#36.39 Hebraicõ vana wichánamãro wetsã anero “Hadar”, wetsã akáro “Hadade” aká ãwẽ shanẽne niokeói, ãwẽ anõ kania cidade anero “Paú”, ãwẽ aĩni anero “Meetabel”, Matredẽ vake, Me-Zaabẽ shokó.
40Naaivo mai naki kakáyarasĩro Esaupa ato revomaa. Atõ anerasĩ ikítõsevi ikí, aaivo nawavo, aaivo nawavo ikí, atõ mai askásevi, ipá oa aká. Askásho atõ anerasĩro naatíi, Timna, Alva, Jetete 41Oolibama, Elá, Pinom, 42Quenaz, Temã, Mibzar, 43Magdiel, Irã aatíi. Askásho Edom mai naki kakáyarasĩ, arí shavá ivopakesho shokovo. Askáti Esaú, edomita yorarasĩ revomayãtáya.
Currently Selected:
Wenía 36: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
