Luka 5

Jisu ichi shürhaw

1Ichi ge mutchugulye gapulotsüñe, Tawgyew ichi shi-ñu na dzütsüküĝütsü, sünda ibó ge Gannesrat go huĝülyi üdze to gudzu, sese ana a da. 2Sese i huĝülyi üdze ge lü ksü vyedo hohu, seyo tromaw-dzükrüw na ná tromaw na tchegüdramkoi, 3se lü namko ye a ye se Simon ichi ye lyimyoalye, i í hudze ge me latrülyeweñe küĝüñe che, Sündalye i lü a ĝyolye i nüna ná shi-ñu trukülye. 4I ñu trufiahuwñe, sese i Simon i che, “Ĝyuw ge la jike, seyo tchü lügyejomeje bá tromaw ye majo dabe.” 5Simon i í chetcho, “He Tabrawwa, no yakülyi ñegimütrü kuw koĝiw dawye ha malügyelafibi, sedamje ba cheda, tromaw mamkoime.” 6Se i süna dawñe, ichi tromaw ye tchü aña-ŝütchüw malgrulalyebi tromaw ye gaĝaladjew. 7Sündaw i í draw naje damche, sena utro lü ge duw ná, age djeñe latunoweñe damche; seyo sena je djekutsüñe, se lü ksü ye gudze-gulüŝüahuw lagu vye sünda lü yeje mülajo dadjew latchuĝyo vye. 8Sündawñe se na holyebi Simonñe Peturus naksü Jisu üshitrü ye gaañe che, “He Tawgyewwa, notrüĝañ yo katrülyewe, hado cheme no lalo nüna bame!” 9Naksüdra yo na je mavyenghuatsü, hado cheme tchü ye gutchuĝoa dabi sei holyeñe; 10Seyo sünatchombo Jabdi í üsaw Yakub ñe Yohonna naksü je, se na Simon í shürhaw, mavyenghuatsü dawñe Jisu i Simon í chetcho, “Dju ĝejoda, ayogo ba nüna ná tsülajo dawe.” 11Sündawñe na lü ye hudza ge lakulye seyo sa a tralye ífum ífum kase.

Kori í güdraw daihuw

12I utro ñetrü ge dului sese, se süge ĝoĝo yo tsafoahuw nüna a ye jiku, sünda i Jisu í hohulye uvro ye gakülyea, Sündalye küĝüñe che, “He Tawgyewwa! Ba dagyojoñe vyedameje nó ba muchoadügyefiŝome.” 13I ügzü yedjüñe dadülye che, “Bá muchogüdraweñe, no ana tsüdame.” Sündawñe ichi se ĝoĝo tsado ye seŝügudo ye kagüdrüatsü. 14Sündawñe i í trudrüse, “Djusaje djutruwe, seŝo kañe babraw ba mügaw na shewe, seyo ba künda güdraw mucholawme se fo ye, se hadamje Musa i djüvyelyedo se ñu ye ídru ge ifo truwe.” 15Seŝo í dawfo nabó ŝüpyo tüĝa-zeĝitsü, seyo ŝüpyo nünapu ye ichi ge shi-ñu dzüjoñe seyo so naw na mucholajoñe ichi ye keĝitsü. 16Seŝo i nüna ñiw ge utroga kagañe küĝüñgudru.

Jisu udru yo lagwa go mim í dagyoihu

17Ahua ye ana a datcho, i shi-ñu trumkotchoi sese, Faresi ñe dakyew kikyew na seyo sa a ĝogloñda, se na Galili seyo Yahudi go küña ñetrü duluma sego na, seyo Yerusalem go je jiku; sünda naw na dagyoijoye tawgyew í ĝagra gokyew ye idra ye duse. 18Seyo howe kagua na külyi-ĝüdjew naw nüna a ye, ñeltsüdru ge lalyi, seyo na í ĝütrü ge la jikuñe lamyoañe seyo Jisu ivro ye vyejoñe daahi. 19Seyo na upu mutchusübyeñe ñelunge la majimyofiwñe, na ñelütsü udru ge lyilyiñe seyo ñeltsü tahalye, í ĝütrü nadra ye Jisu uvro ye ulungko ye kikülyeaha. 20Jisu i na umsow lutuksüw vyedo ye holyeñe che, “he nüna bá lalo ye muchoajemme.” 21Sündawñe shizew-ñuzew nañe Faresi naĝütchü cheĝi, “he i djubajema Tawgyew í mow uw zehi ye? Tawgyew í tralye dju lalo na muchoifiwa?” 22Jisu i nalu ge vyedo danghulye ná che, “djo djolu ge ha vyemkoiya? 23Hado vyedoña? Ana chejoma, djo lalo ná mujoadama, semome ana ma ‘gudzug seyo kutro djeg?’ 24Seŝo ye ana dada djo danghujo dawe nüna yo sakülyedo saw í druguw drulyiw ayo lalo tchegüdraijoje dawfiw.” Sünda i se külyi-ĝüdjea nado í che, “no ba chemkoi me, gudjuwe seyo bá ĝütrü ye lalye ba ñe ge la kabi.” 25I jeañe ütrü a gudzu, seyo hayo sa a í gudru dama se í lolalye, Tawgyew í trolye í nudzoĝ ñe ge kajebi. 26Sündawñe vyew na mavyenghuatsü ñe Tawgyew í trotsü, sündalye ŝüpyo ĝeñe che, “yow ñi sama a ñu hohu jeba.”

Matti í balaw

27Seyo sefum a i ñepsü ge jihua, seyo Levi ñe ñido a ye patso law nüna ye patso ñe ye ĝyodo hohu, sünda í che, “nófum kasewe.” 28Sündawñe i vyew tratsülye ífum kase.

Lalo nadra tsasaw

29Sünada levi i í ñe ge vyedow a djülye; seyo sünda se patso law nañe seyo nüna utroa upua nañe üŝa ĝyoñe ava tsa, ŝüpyo upu deamia. 30Seyo Faresi nañe seyo shizew-ñuzew nañe í shürhaw na ana cheñe zekütso-zemrhü “ba ye patso law seyo lalobraw nadra hado ĝyoñe üŝa tsa-tu daiya?”

Luhuŝüw-lukrow ĝyow ge Jisu i dzüw

31Jisu i na chetcho, “müga ñachi ge so manaw na majijome, seŝo so naw na jijome. 32No nüna güdraw na mowme, lalobraw ná nadrü nalu laguudoijoñe balaw kakuwme.” 33Seyo sena chetcho, “Yohon í shürhaw na ye ŝüpyo uw yo matsa-matuw küĝüñe ĝyoiwa, seyo sünambó Feresi nachi go na je, seŝo bá shürhaw na ye tsa-tuiwa.” 34Jisu i na chetcho, “hawa ba name gzü jiw nüna ná gzübraw ye nadra dulu sese, matsa matudügyefijoma? 35Seŝo se ñeto kakujome, sayo sa a gzübraw ye nayo utroga dajome, sese na se ñeto ge matsa-matuw dajome.” 36Ná i zeĝaw a ze tru, “dju nüna yo gye ükün yo taĝañe dju matüpsüwme, semome ükün ye taĝajobabi sedamje se tüpsüdo ye je gye üme üdra makamyoĝijo. 37Seyo dju je tsühu ükün ye dzaĝi üme gye mapyujo, semome tsü ükün ye se dzaĝi üme yebó byoĝalye kasuajo, seyo dzaĝi je mau lyajo. 38Seŝo tsü ükün ye dzaĝi ükün ge pyujo du. 39Kagua nüna na tsühu üme ye tulye ükün ye matuĝoñjo, hado chemeje na truibi, üme ye ufomdodaŝo cheñe.”

Currently Selected:

Luka 5: HBe

Highlight

Copy