Luka 6
6
Jisu küĝüjo Tawgyew
1Sündalye küĝümdrü ñeto kutchodabi sese i vi goŝü dañe kamkoi sese, seyo í shürhaw na pu ye trükülyelalye, ügzüku yo shükrüñe tsa tsa ka. 2Sese Faresi namko yo na hadamje kakülyetcho, “djo süna chiĝa hado dawwa, sena küĝüw ñeto kulai ye madafiwjo?” 3Jisu i ná trutcho, “hawa djo he í mangüma? Dawud i luhuŝüda sese üdra yo nadra ha dawma? 4I kündañe Tawgyew ichi ñe ge jima, seyo lapsü djüdo go odje na lañe tsa, sena bó mügaw ná tralye djusaje matsafijo, seyo ídra yo naje djüdalubi? 5I ná chetcho,” Nüna üsaw ye küĝümdrü ñeto ge je Tawgyew bamme.
Küĝüw ñeto se sonaw ná dagyow
6Sünda ahua ye küĝüw ñeto kuw sese i ñegru ge jiñe shi-ñu trutchoñe da ĝyo; seyo sa a nüna a duw ye ügzü fuvro go krosdzüada. 7Shizew-ñuzewñe Faresi na í hadamje zeñe ñu jojoñe hoksü ĝyo, i küĝüw ñeto ge je muchoahima mamuchoa hojoñe. 8Seŝo ibó nalu vyedo dãhuñda; Sündada i se ügzü kroado nüna í che, “Pülyig, umko a gudzug.” I pülyiñe gudzu. 9Jisu i í chetcho, “No djo he dzüime küĝüw ñeto ge ha dafijo, uw dajoma mo mau dajoma; luvyu ye ĝaksüjoma mo maĝaksüjoma?” 10Seyo sünda i vyew ná hozeĝiatsülye, se nüna í che, “Bagzü ye vro ge djüwe” i süna da, sündawñe ügzü ye muchoañe uw lya. 11Seŝo sena ñepsü ge kuhuatcholye naĝütchü poĝitcho, ñi he Jisu idra ha dañelye?
Shürhaw ĝü yo ksü
12Seyo se ñeto bó i pudru ge küĝüw katrükralye, seyo Tawgyew í küĝüw sese akülya ñeto küĝüñetoa. 13Ñetoatchowñe i í shürhaw ná balalye namko ye ĝü yo ksü ye pola, sündalye ná prerit ñe ñitsü. 14Sünda sena heimme; Simon í ñiñi ye i Patras ñe je vye; seyo í ñuw Andriyas, seyo Yakub, seyo Yohonna, seyo Fillipus, seyo Bertulme, 15Seyo Matti, seyo Tomas, seyo Halfais í saw Yakub tcho, seyo Simon tcho se í Jeletes je chew, 16Seyo Yakub í saw Yahuda, seyo Yahuda tcho Iskriyoti, se i í tsadrüahuw lyikülye.
Jisu i nüna ná truñe dagyow
17Sündawñe na ídra kagalye no üpra a ye gudzutsü, sünda ichi sh ürhaw na upu mutchu, seyo Yahudiya na vyew, seyo Yerusalem, seyo Sor, seyo Sidon go sütüĝülü üdza ge küña ñetrü ma sego ŝüpyo nüna upu na je, 18Sena se í shi-ñu truw í seyo naso naw ná muchoañe dagyojoñe ichi ge jikutsü. Seyo chigüje na maw da vyedo na je ujoñe jiku. 19Seyo vyew na í dadüjoñe vyetsü, hado cheme íso go ĝagra na kahuañe ná muchoaha.
Gaĝüze shi-ñu
20Sündawñe i í shürhaw nachi ge hoñe che,
“Ŝüvzüw me bá, ñeto do ye,
Hado cheme Tawgyew ichi ñetrü ye bachi me.”
21“Ŝüvzüw me bá je, dju luhusüw ma,
Hado cheme ĝaksüjome,
Ŝüvzüw me bá, dju ksei ma;
Hado cheme tchüjome.”
22“Ŝüvzüw me bá, dju nüna üsaw íbo
Bá mau dajome,
Seyo bá lahuajome, seyo bá tchüĝo-hoĝojome,
Seyo bá ñiñi danghulye vyetsü djogjome.
23“Sehu ñeto lüshüñe gyojo dawe, hado cheme, hojo dawe babó sorgo ge lapsü dume. Í bupye-ñipye ñihow kew nadra je süna dawbabi cheiwa.
Dzüngawhuw shi-ñu
24Seŝo tui me bá, dju bo-luko duma,
Hado cheme ba bá lu vyew apyew pajebi.
25Tui me bá dju hesahe ĝaksüwdadama,
Hado cheme ba luhuŝüjome,
Tui me bá, dju hesahe tchüi ma,
Hado cheme duhu pajome seyo ksejome,
26Tui me bá, nüna na bádru ge uw uw chejo me,
Hado cheme bupye-ñipye na mülaw ñihow üdra je ana dawbaba.
Vyeñiw na je nülvowe
27“Seŝo dzüvodo djó no chei me, bá vyeñido na nülvow dawe; bá dju mau daiba sena uw dajo dawe. 28Bá dju chemui ma, sená gaĝüze djüjo dawe; bá dju zeamei ma, senábo küĝüijo dawe. 29Dju bákrumo ge tcheima, ichi ge krumo a go je djüwe; seyo dju bachi güfaw laĝaima, se í bá gye djulawe djuchewe. 30Dju damje bá prüima sená djüwe; seyo bachi gañ laĝaimeje, í djuprüwe. 31Seyo ba nüna ná bá küna daweñe vyedama, baje ná süna dajo dawe.
32“Seŝo ba bá nülvow dai ná akasa ba nülvow dame je, ba ha dew dawwa? Hado chemeje lalo dado na je, ná dju nülvow daima na je sená nülvow daŝoi. 33Ba bá dju uw daihi ma sená akasa uw daijobame, bá ha dew chejowa? Hado chemeje lalo daw na je süna bó daŝoi. 34Seŝo ba í chi gudzumeje, nachi go patchojoñe vyemeje, ba ha dewwa? Hado cheme lalo daw naĝütchü je chi bó gudzuŝoi. 35Seŝo bá vyeñido nadra nülvow dawe, seyo uw dawe, seyo patchojoñe mavyew chi gudzujo dawe; seyo babó dew lapsü lyijome; seyo ba Tawgyew í üsañe chejome, hado chemeje i se nabó dju maŝüvzüdügyejome, dju kew nadru ge nülvoi me 36Baw küna nülvosüw ma, sünambo ba je nülvo dawe.
Udru ge dju truchoawe
37“Külü dju jowe, sündame badru ge je külü majojome; trudañe djuchewe, badru ge je truda machejome; aloijoda, sündameje bá je alojome. 38Djüjo dawe, sündame bá je djüjome; nüna na düsdzü, dzüsdzüñe sosoñe seyo gusuñe badru ge suijome, hado cheme ha chi yo ba tsoima, se chi yo babó je seiyo tsojome.”
39Sündatcholye i ná zeĝaw a yo chetcho; “hawa ñiĝew ye, ñiĝew í ĝabo shefijoma? Hawa naksü noĝu ge magaajoma? 40Chi dajo na nudzoĝ chi darüw na yo madewfojome, seŝo djudamje dagro dama, i í chi dadrüw i vyedujome. 41Ba bá ñuw ichi iñi go gashüsado shobosa í hado hoiya, seyo bá nudzoĝ bá ñi go sholbosa duw ye madanghuma? 42Seyo ba bá nudzoĝ bañi go sholbosa mahomeje, ba bá ñuw ichi í künda chefijowa, ‘no ñuwwa! Mola bañi go gashüdo ye lahuajoma?’ He dakulyutchüwba, uvromashü bachi iñi go sholbosa lahuavzüwe, sündameje sese bachi üñuw ichi iñi go gashüdo ye hohulye lahuahifijome.
Shoñ í hosüjo ye üje yo
43“Ha shoñ uw a je ñimma, sheje ha madaĝiw jew, seyo ha madaĝiw shoñ je ñima, shejo uw jew. 44Küña shoñ ma sena nachi üje yo hosüjo; hado cheme nüna na gralye go lufuje mapyowme, seyo ksüfije go angur mapyofijome. Shoñ küña duma, nudzoĝ üje yo hosüwme; hado cheme. 45Nüna uw na nudzoĝ lu go ñu uw chehuahi; seyo nüna mau na nudzoĝ lu go mau ñu na mau yo chehuaha; hado cheme lu ge ha gudama se i namdzu go kahuaha.
Ñe daw nüna sama ksü yo duw
46“Ba nó ñu chew ná madzümeje, senameje hado nó ‘He Tawgyewwa, he Tawgyewwa,’ chehiyiya. 47Dju damje nochi ge jikuhi ye, seyo nó ñu í dzühulyeñe zew dzüime, no bá trujome, i dju vyeduwma? 48I se nüna i vyeduwme, djuma na ñe damkoi sese nogüdzü ye ĝyuw chigalye kunu ge ñekrü dzuñe, seyo hutchuĝo-ĝolüŝü ye idru yo da kaaha, seŝo í madañifiw; hado chemeje i lyow yo dada. 49Seŝo dju dzhutcholyeñe zew madzüma, se i se nüna vyeduwme, dju nogüdzü ye ñekru lyow madaw dabama, se udru ge hutchuĝo-ĝolüŝü kame, i sebyo seĝyo ngüañe seyo sei gaañe ganü-gaĝaw lya.”
Currently Selected:
Luka 6: HBe
Highlight
Share
Copy
Want to have your highlights saved across all your devices? Sign up or sign in
