التكوين 11
11
بداية العالم
اخلاڮة لغات العالم
سلسلة نسب النبي نوح يلين النبي أبرام
1وكانت الناس كاملة اللي فلارض تتكلم بلغة وحدة ويستخدمو كلمات يعرفوهم كاملين. 2واخلڮ اعلن يلين رحلت الناس شور الشرق جبرو واد فارض شنعار واتسعو فيه. 3وڮالو امبيناتهم: وهاو نڮبظو الطوب ونشووه بالنار. واستخدمو الطوب بل لحجار ونوع من الطين لمتين بل الطين العادي. 4وڮالو: وهاو نبنو لروصنا مدينة وبرج يوصل طولو للسما ونعطو لروصنا هوية اياك ما نتفرڮو فكل جيهات لارض. 5وانزل الله تعالى اياك يشوف لمدينة والبرج اللي كانو الناس يبنوهم. 6وڮال الله تعالى: يلين عادو وهوما شعب واحد ويتكلمو بلغة وحدة، بداو يعدلو هاذا، ماهو لاهي يصعاب اعليهم يعدلو أي شي اوخر ينواو يعدلوه. 7ننزلو اصا وانخلطو لغتهم اياك كلهم ما يفهم لغة لوخر. 8وشتتهم الله تعالى من فم فلارض كاملة ووڮفو عن بناء لمدينة. 9ولذا السبب اُسمات لمدينة بابل اللي معناها الله تعالى خلط لغة العالم كامل. ومن فم شتتهم الله تعالى فكل جيهات لارض.
10وهاذي لاحة سجل أولاد سام: يلين عاد سام عندو 100 سنة اجبر أرفكشاد عاڮب الطوفان بسنتين. 11وعاش سام عاڮب ذاك 500 سنة واجبر فيها أولاد اخرين وامنات.
12وإلين عاد عندو أرفكشاد 35 سنة اجبر شالح. 13وعاش أرفكشاد عاڮب ذاك 403 سنوات اجبر فيها أولاد اخرين وامنات.
14وإلين عاد عندو شالح 30 سنة اجبر عابر. 15وعاش شالح عاڮب ذاك 403 سنوات اجبر فيها أولاد اخرين وامنات.
16وإلين عاد عندو عابر 34 سنة اجبر فالق. 17وعاش عابر عاڮب ذاك 430 سنة اجبر فيها أولاد اخرين وامنات.
18وإلين عاد عندو فالق 30 سنة اجبر رعو. 19وعاش فالق عاڮب ذاك 209 سنوات اجبر فيهم أولاد اخرين وامنات. 20وإلين عاد عندو رعو 32 سنة اجبر سروج. 21وعاش رعو عاڮب ذاك 207 سنوات اجبر فيها أولاد اخرين وامنات.
22وإلين عاد عندو سروج 30 سنة اجبر ناحور. 23وعاش سروج عاڮب ذاك 200 سنة اجبر فيها أولاد اخرين وامنات.
24وإلين عاد عندو ناحور 29 سنة اجبر تارح. 25وعاش ناحور عاڮب ذاك 119 سنة اجبر فيها أولاد اخرين وامنات.
26وإلين عاد عندو تارح 70 سنة اجبر أبرام وناحور وهاران.
27وهاذا سجل أولاد تارح: تارح اجبر أبرام وناحور وهاران، وهاران اجبر لوط. 28ومات هاران سابڮ بوه تارح فلارض اللي اخلڮ فيها شور أور الكلدانيين. 29واتعرس كل من أبرام وناحور وكان اسم اعيال أبرام ساراي واسم اعيال ناحور مِلْكَةُ منت هاران اللي اجبر مِلْكَةُ ويسكة. 30وكانت ساراي عاڮر ما اتخلي التركة. 31واڮبظ تارح ولو أبرام وول ولو لوط ول هاران وساراي اعيال ولو أبرام وامشاو فابلد من أور الكلدانيين واعدين ارض كنعان. يغير يلين لحڮو حاران سكنو فم. 32ومات تارح فحاران يلين كان عندو 205 سنوات.
Currently Selected:
التكوين 11: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
