التكوين 23
23
بركة النبي إبراهيم
النبي إبراهيم يشرّف من خلال الشعوب اللي احذاه وقت موت أعيالو
1وعاشت سارة 127 سنة من لعمر. 2وماتت فقرية حبرون فارض كنعان. وجا النبي إبراهيم امتكدر اياك ينوح اعلى سارة. 3وإلين ڮام النبي إبراهيم من ڮدام جثمان سارة ڮال للحيثيين: 4آنا خاطر وضيف عندكم وطالبكم تعطوني اقبر ندفن فيه أعيالي اللي ماتت. 5وڮالولو الحيثيين: 6اسمع يا شيخنا انتا مولانا عدلك زعيم بينا، اڮبظ تدفن أعيالك فازين اقبورنا، ما فينا حد لاهي يحكمك عن تدفن أعيالك فقبرو. 7وڮام النبي إبراهيم اركع ڮدام الحيثيين أهل لبلاد يشكرهم. 8وڮالهم النبي إبراهيم: إلى عدتو تبغوني اصا ندفن أعيالي، فاسمعوني واتوسطولي فعفرون ول صوحر 9اياك يبيعلي امغارة المكفيلة اللي يملك واللي اعلى زر احريثتو، ويبيعهالي بسعرها كامل اياك انعدلها مدفنلي. 10وفذا الوقت كان عفرون الحيثي ڮاعد امع اجماعتو وڮال للنبي إبراهيم ڮدام كل الحيثيين اللي اجتمعو عند بوابة لمدينة: 11لا يا شيخي اسمعلي، لاهي نعطيك احريثتي ولمغارة اللي فيه هدية مني لك. وشعبي شاهد اعلى ذا، وادفن فيها أعيالك. 12واركع النبي إبراهيم يشكر الحيثيين مرة اخرا. 13وڮال النبي إبراهيم لعفرون ڮدام الحيثيين: حڮلا اسمعني، آنا نبغي ندفع صوڮ لحريثة واڮبل مني هاذا اياك انڮد ندفن أعيالي فيه. 14وجاوبو عفرون وڮالّو: 15اسمعني يا شيخي، هاذي لارض قيمتها 5 كيلوات من الفظة، وهاذا لمبلغ بلا قيمة بيني وبينك، وادفن أعيالك. 16واڮبل النبي إبراهيم لمبلغ اللي اعرض اعليه عفرون واوزن النبي إبراهيم لعفرون 5 كيلوات من الفظة ڮدام الحيثيين حسب الوزنة اللي متعارف اعليها عند تجارهم.
17وصبحت احريثة عفرون اللي فالمكفيلة اللي اڮريب من ممرا ولمغارة اللي فيها وكل الصدر اللي لحريثة 18للنبي إبراهيم وهاذا اشهد اعليه كل الحيثيين اللي اجتمعو عند بوابة لمدينة. 19وعاڮب ذاك ڮام النبي إبراهيم وادفن أعيالو سارة فامغارة المكفيلة اڮريب من ممرا اللي هي حبرون فابلاد كنعان. 20واملك النبي إبراهيم من الحيثيين لحريثة ولمغارة اللي فيها وعادو مدفنلو.
Currently Selected:
التكوين 23: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
