التكوين 7
7
بداية العالم
مولانا يsسلَك النبي نوح وعايلتو من الطوفان
1ومن فم ڮال الله تعالى للنبي نوح: ادخل فالسفينة انتا وكل أسرتك، بيَّلي اجبرتك وحدك صالح فهاذا الجيل. 2واڮبظ امعاك من كل نوع من الحيوانات لحلال اسبع اذكور واسبع ناثي، والحيوانات اللي ماهم احلال تڮبظ من كل نوع أثنين من الذكور وأثنين من الناثي. 3واملي تڮبظ من كل نوع من الطيور اسبع اذكور واسبع ناثي اياك يبڮا جنسهم اعلى لارض. 4بيَّلي عاڮب اسبعة أيام لاهي انمشّي اسحاب اعلى لارض، ولاهي اتم ماشة مدة 40 يوم فليل وانهار، اياك انفرق كل مخلوق حي ڮط خلڮتو من اعلى لارض. 5وعدل النبي نوح كل شي اطلب منو الله تعالى. 6وكان النبي نوح فهاذا الوقت عندو 600 سنة وقت امجي طوفان اعلى لارض. 7وادخل النبي نوح فالسفينة هو وأولادو واعيالو واعليات أولادو اياك يسلكو من ما الطوفان. 8ودخلو املي الحيوانات لحلال والحيوانات اللي ماهم احلال والطيور والحيوانات اللي يزحفو اعلى اكروشتهم. 9وجاو للنبي نوح ودخلو فالسفينة اعلى شكل أزواج اذكر ونيثي كيف ما اطلب مولانا من النبي نوح. 10وعاڮب اسبعة أيام جا الطوفان اعلى لارض.
11فسنة 600 من حياة نوح فالشهر الثاني فاليوم 17 من الشهر، انفجرت المياه اللي كانت عميقة فالتراب وانفتحو ابواب السما. 12ونزلت اسحاب اعلى لارض فليل وانهار مدة 40 يوم. 13وفذاك اليوم نفسو ادخل النبي نوح فالسفينة هو وأولادو، سام وحام ويافث واعيال نوح واعليات أولادو الثلاثة. 14وكان امعاهم من كل نوع من حيوانات لخلا والحيوانات اللي يُربّاو والحيوانات اللي يزحفو اعلى اكروشتهم والطيور. 15من كل المخلوقات الحيين جاو للنبي نوح ودخلو فالسفينة اعلى شكل أزواج 16اذكر ونيثي من كل مخلوق كيف ما اطلب مولانا من النبي نوح. وعاڮب ذاك اڮفل الله تعالى باب السفينة.
17وواصل الطوفان مشيه اعلى لارض مدة 40 يوم، ورڮب ما الطوفان السفينة فوڮ لارض. 18وكانت المياه الياسرة اتواصل مشيها اعلى لارض والسفينة ماشة فوڮ الما. 19وانزادت المياه حته يلين غطات لكدا لكبار كاملين اللي تحت السما. 20وواصلت المياه مشيها يلين الحڮ طولها اعلى الفوڮ اسبع امتار فوڮ لكدا لكبار. 21وماتو كل المخلوقات الحيين اللي كانو موجودين اعلى لارض من الطيور وحيوانات لخلا والحيوانات اللي يُربّاو والزواحف والبشر. 22ومات كل مخلوق حي يتنفس اعلى لارض. 23وفرق مولانا من اعلى سطح لارض كل مخلوق اسوا من البشر والحيوانات والزواحف واطيور السما، كاملين فرقو من لارض ولا ابڮا ماهو نوح واللي امعاه فالسفينة. 24وابڮات المياه موجودة اعلى لارض مدة 150 يوم.
Currently Selected:
التكوين 7: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
