التكوين 9
9
بداية العالم
بداية العهد امبين مولانا والبشر عاڮب الطوفان
1وبارك مولانا النبي نوح وأولادو وڮالهم: اثمرو واكثارو واملاو لارض. 2حيوانات لخلا اللي فلارض واطيور السما والزواحف وحوت لبحر كاملين لاهي يخافو منكم ويرهبوكم، بيهلي مولانا اعطاكم السلطة اعليهم. 3وكيف ما اعطيتكم الصدر لخظر كيفت اطعام لكم، ظرك عاطيكم الحيوانات. 4يغير لا توكلو أي لحم مزال الدم فيه بيهلي الدم هوا اللي يمثل الحياة. 5يغير دمكم انتوما لاهي انعاقب اعليه كل حيوان سفكو، واملي كل إنسان لاهي نكتلو اعلى حياة خوه لإنسان بيهلي هو كيفتو. 6ومن يسفك الدم لإنسان لاهي ينسفك دمو، بيهلي مولانا خلڮ لإنسان اعلى شي من صيفاتو. 7يغير انتوما اثمرو واكثارو فلارض. 8وكلم مولانا النبي نوح وامعاه أولادو وڮالّو: 9آنا ظرك لاهي انعدل عهدي امعاكم وامع نسلكم اللي جاي اوراكم. 10وامع كل مخلوق حي امعاكم من الطيور والحيوانات اللي يُربّاو وكل حيوانات لخلا، وكل اللي خاظ من السفينة وكل مخلوق حي اعلى لارض. 11ولاهي انعدل عهدي امعاكم ولا تيت لاهي نسمح باعلن اتفرق مياه الطوفان كل مخلوق حي مرة اخرا، ولا تيت لاهي نسمح باعلن الطوفان يجي ويخسر لارض مرة اخرا.
12وڮال مولانا: هاذي هي علامة العهد اللي لاهي انعدل بيني وبينكم وكل مخلوق حي امعاكم فكل لاجيال، 13لاهي اندير خط الندية فالسما ويعود علامة العهد امبيني وامبين لارض. 14وإلين انمشّي السحاب فوڮ لارض ويظهر خط الندية فالسما، 15نتذكر العهد اللي امبيني وبينكم وامع كل نوع من مخلوق حي، ولا تتحول المياه شور طوفان يهلك كل مخلوق حي. 16وإلين يظهر خط الندية فالسما لاهي انشوفو ونتذكر العهد اللي لاهي يدوم إلى الأبد امبيني وامبين المخلوقات الحية كاملين اللي اعلى لارض. 17وڮال مولانا للنبي نوح: هاذي هي علامة العهد اللي عدلتو امع كل مخلوق حي اعلى لارض.
18هاذو هوما أولاد نوح اللي خاظو من السفينة: سام وحام ويافث. وحام هو بو كنعان. 19هوما أولاد النبي نوح الثلاثة ونسلهم هو اللي انتشر فكل جيهات لارض.
20واشتغل النبي نوح فلحريثة واحرث اصدر العنب اللي يُعدل منو عصير العنب. 21واشرب من عصير العنب واسكر واتعرا فخيمتو. 22وشاف حام بو كنعان عورة بوه وامشا وعلم اخوتو. 23واڮبظو سام ويافث حولي وداروه اعلى اكتافهم ودخلو شور بوهم النبي نوح فالخيمتو، وهوما كانو ماشين اعلى لورا وسترو عورة بوهم. وكانو وجوهتهم صادين اعلى الجيهة لخرا اياك ما يشوفو عورة بوهم. 24وإلين اوعا النبي نوح من سكرو واعرف اللي عدلّو ولو الصغير، 25ڮال: ملعون كنعان ولاهي يعود أحقر من اعبيد اخوتو. 26وڮال املي: يا ربي وإلهي بارك سام واجعل كنعان عبد لو. 27ووسع حدود يافث، ويسكن فاخيام سام ويعود كنعان عبد لو. 28وعاش النبي نوح عاڮب الطوفان 350 سنة. 29وإلين اتوفا النبي نوح كان عندو 950 سنة.
Currently Selected:
التكوين 9: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
