Matiu 21

Wiki ofiꞌofina

Yesu Doha Kin ya Lau Yelusalem

Matiu 21:1-3

(Maleko 11:1-3; Luka 19:28-31)

1Yesu maꞌana hewahewali Yelusalem nuꞌuna sa hanahanaui, sa laoma taon kiukiu hesa hesana Betifegi, Oliwe Uduhulina yai. Amainiya Yesu ana hewali luwaga ya dui bwaꞌiyedi, 2na ya fatalahadi iyen

Au lau nuꞌu hesa matamiu yai, amainiya ni, haba donki hesa ma natuna ami lobahidi. Donkidi au tatadi be au ledima ai lebegu, 3na yena sai somo ya libaen, au faliba auwen,

<<Baꞌisa ya fanuhadi,>> na maꞌesega haba ya fatamalidi.

4 Peloweta dogana ena liba fasunuma mate ahoꞌite ya fawananaha iyen,

5Saiyon natuna tineꞌeu au faliba, auwen,

<<Em kin ya laolaoma lisim hola u ita,

Doga nuwa lidilidina, ya awa donki yai,

yo donki gubugubufwauna hewana yai.>> (Sekalaiya 9:9; Isaiya 62:11; Diyon 9:9)

6Yofede, ana hewali luwaga Yesu somo ya fatalahadi mate sa ginauli watan. 7Be donki ma natuna gubugubufwauna sa ledima, yo edi leli sa hesedi dagiladi yai na Yesu leli hewadi yai ni ya taꞌai.

Dodoga adi Leli sa Hesedi Edaꞌeda yai

Matiu 21:8-9a

(Maleko 11:6-10; Luka 19:35-36; Diyon 12:12-17)

8Dodoga boludi adi leli ginaulidi sa hesedi edaꞌeda yai, na haisa oyagi lagadi sa talafahidi be sa hesedi edaꞌeda yai hinaga.

9Baiwa sa bwaꞌi yo sa mulita sa yogayoga, tiyen,

Hosana!#21:9 Diusi alinadi hesa hesana <<Alina Alamaiya. Na alinadi yai te <<Hosana aniyona mate <<U fofofahimai!>> e <<U famwahulimai!>> Um Deiwidi Natuna!#21:9 <<Deiwidi Natuna aniyona wananahana mate <<Deiwidi ana Hiti Mulita>> wananahana.

Um, Yaubada hesana yai wa laoma, (Samsi 118:26)

Sai Guyau hesana yai ya laoma,

Guyau haba ya faloholoho!

Hosana! Hewa wananaha yai.

10Lahaina yai Yesu ya mahano lau Yelusalem yai, dodoga mahudoꞌidi Duhu Balabalamumu yai mate sa tauhiti be tiyen,

Sai itete?

11Yofede baiwa tiyen,

Itete mate Yesu Nasaleta edi peloweta, Galili yai ya laoma.

Yesu Tau Uneꞌune ya Lau Weꞌaidi

Matiu 21:12-13

(Maleko 11:15-17; Luka 19:45-46; Diyon 2:13-22)

12Yesu ya lau edi Antalasam Lumana Laꞌilaꞌi ganana ganahewana yai, be dobidobina yai tau uneꞌune mahudoꞌidi amainiya ya lau weꞌaidi. Loma edi moni tau lau senisi be Diusi edi moni haba sa feledi, edi hatahata ya anbuinidi, yo salumadi ataiꞌa doha waliliya sa uneꞌuneꞌedi, edi aba taꞌai ya buidi hinaga.

13Na ya falibadi iyen,

Buka Tabuna yai sa uli mate Yaubada iyen,

<<Egu Dubu Tabuna mate hesana Aba Laulauꞌuꞌula Lumana.>> (Isaiya 56:7)

Inmoho umi mate ami ginauli doha tau angafu edi aba alasimo. (Delamaiya 7:11)

14Yofede, matatoutou yo tau dabidabi sa laoma lisina Dubu Tabuna yai; be ya faloholohodi. 15Inmoho maihalana yai antalasam babaꞌisadi yo laugagayo tau lau faꞌataendi ginauli loloho Yesu ya ginaulidi sa itadi, yo wawaya sa yogayoga Dubu Tabuna dobidobina yai tiyen,

Hosana, um Deiwidi Natuna.

Be sa manabala Yesu lisina yai.

16Sa fatiꞌoi tiyen,

Wawaya sa libaliba ni wa atahi lobahidi?

Yesu iyen,

I, nuwana Uliꞌuli Tabuna hige au fatili mate?

<<Wawaya nom haꞌa sa dabu, yo hola ma nomnomdi haꞌa ami fatalahadi be, moꞌadi yai Yaubada sa fafadebasae.>> (Samsi 8:2)

17Habahim ya lau afuledi, na ya lau Betani duhu balabalamumuna ganamulina be maihonana amainiya ya eno.

Yesu Oyagi Kuhou ya Kawamananaꞌen

Matiu 21:18-22

(Maleko 11:12-18; Luka 13:6-9)

18Ma hwalahwalalana Yesu ya fuyo Yelusalem, na ya guliyam. 19Oyagi kuhou ya ita edaꞌeda sadaina yai. Yofede ya lau be ya ita, na hige i fuwa. Luguna moho. Ya libalau oyagi wa lisina, iyen,

Ibege u fuwa boda!

Yofede, kuhou wa ya hohoya be ya peꞌi.

20Tau famuli watanina sa ita, be sa noꞌo, na tiyen,

Sidohana be oyagi kuhou te ya hohoya be, ya peꞌi feufeula?

21Yesu alinadi ya bui iyen,

E falibamiu, yena ami kawawananaha yo tabu au nuwa luwaluwaga, gonowana haba ami ginauli doha somo oyagi te lisina yai E ginauli. Yo hige oyagi te iyabona, gonowana haba hinaga ami libalau tuꞌa te lisina, auwen,

<<U aulaha, be u lau ai gabogabo u peim.>>

Haba emi liba ya lau watan.

22Yena ami kawawananaha, lauꞌuꞌula yai somo ami anꞌetai, haba ami abi. (1 Diyon 5:14-15)

Yesu ena Dudulai, Sai ya Felen?

Matiu 21:23-27

(Maleko 11:27-33; Luka 20:1-8)

23Yesu ya luhulau Dubu Tabuna dobidobina yai be, ya laulau faꞌata. Yofede, Tau Antalasam Baꞌibaꞌisadi yo babada sa laoma lisina, be sa fatiꞌo lau lisina, tiyen,

Dudulai somo wa fapaisowa be laulau te wa ginaulidi? Yo sai dudulai ya felem?

24Alinadi Yesu ya bui iyen,

Egu fatiꞌo esega haba E fatiꞌoimiu. Yena egu bui ami felegu, mate haba dudulai somo debana yai be laulau te E ginaulidi, emi E liba.

25 Diyon ena babasito Galewa yai ya laoma, e dodoga lisidi yai?

Ibodi hola sa lau fadosi, be tiyen,

Yena tawa, <<Galewa yai,>> haba ya fatiꞌoida, iyen, <<Paꞌana somo be Diyon hige au kawawananahaꞌen?>>

26Inmoho, ibe tawa, <<Dodoga lisidi yai.>> Mate bena te ita komakoman dodoga lisidi, paꞌana iti mahudoꞌidi edi nuwatuhu mate Diyon, in peloweta.

27Yofede, Yesu alinana sa bui, tiyen,

Hige ai sibai.

Yesu iyen,

Yau hinaga laulau te E ginaulidi gigibwalina somo yai E abi ibege ya falibamiu.

Taumoho Nanatuna Luwaga

Matiu 21:28-32

28Haga heyaheyason te au fadosi? Taumoho hudoꞌi nanatuna luwaga. Ya lau tau tuwaha lisina, be ya faliba iyen,

<<Natugu, doꞌata u lau ai waen gabuna u paisowa.>>

29Natuna ya kaikulahai, iyen,

<<E ꞌwaiyoꞌo!>>

Muli yai, nuwana ya bui, be ya lau.

30Habahim, tamadi ya lau natuna hesa lisina, be libana gonogonowana ya faliba be tau mulita iyen,

<<I, tamagu, haba E lau.>>

Inmoho, hige i lau.

31Tataudi luwaga tausomo tamadi ena nuwatuhu ya lau watan?

Alinana sa fafuyo, tiyen,

<<Bwaꞌibwaꞌina.>>

Yesu ya falibadi iyen,

E falibamiu mate, takesi tau tano yo wawahin matamata heyayadi haba Yaubada ena Aba Baꞌisa sa luhu sola, habahim umi.

32Diyon ya laoma lisimiu, be dudulai edaꞌedana bena ya faꞌitamiu, inmoho, hige au kawawananaha, na takesi tau tano yo wawahin matamata heyayadi sa kawawananahaꞌen. Yo hinaga ami ita mulina yai, hige au nuwabui yo hige au kawawananahaꞌen.

Gabu Tau Ita Watanina Heyaheyasonidi

Matiu 21:33-43

(Maleko 12:1-12; Luka 20:9-19)

33Yesu iyen,

Hola au ataꞌatahi na heyaheyason hesa emi ya dede. Fuya maꞌesega, tanohi tanuwagana waen gabuna ya umahi, ya gana fataꞌiꞌili, waen aba folofolona ya sala, na habahim aba itaꞌita wata lumana ya faꞌobiyo. Muliyai waen tau paisowadi haisa, nimadi yai ya toledi, be waen gabuna sa ita watan, na ya lau ya lauwasi, nuꞌu hesa yai.

34Waen wa uludi fuya losina yai, ena paisowa tau abidi ya duidi be bena ena tefana sa abiyama.

35Waen tau paisowaina, gabu tanuwaga wa ena tau paisowa sa tohaidi: hesa sa pidili, hesa sa tala funuhi na, hesa sa lau umeꞌehui. 36Fuya hesa haisa hinaga ya duidi, matabahim begadi sa ouli, hige doha bwaꞌibwaꞌina. Inmoho laulauna gonogonowana, waen tau paisowaina mate fayofayo tau abidi sa abi madaidi.

37Ofiꞌofina mate natuna ya dui na iyen,

<<Nuwana haba natugu ti faꞌatitiyen.>>

38Tau paisowa wa natuna sa ita, sa fanuwa libaliba tiyen,

<<Gabu tanuwagana natuna itete. Haba te lau funuhi, na ena gabu te tanuwagai!>>

39Yofede sa tohai, be sa lawen gabu ganamulina yai. Amainiya sa tala funuhi.

40Yesu ya fatiꞌo lau ana hewahewali lisidi. Iyen,

Yena waen gabuna tanuwagana ya laoma, somo haba ya ginauli, tau paisowa ai lebedi?

41Tiyen,

Dodoga heyaheyayadi ni haba ya tala funuhidi, na gabuna haba ya tole tau ita wata haisa nimadi yai, be haba yena losi fuyana yai maihala dudulaina yai ena tefa sa felen.

42Yesu ya falibadi, iyen,

Buka Tabuna somo ya libaen ami fatili o higeꞌe? Libana doha ite:

<<Umeꞌehu luma tau faꞌobiyona sa ꞌwaiyoꞌoen

doha ginauli gaibu mate,

ya bui be dodoga edi loholoho.#21:42 Uliꞌuli hesa yai tiyen <<Ya famala kona umeꞌehuna,>> na uliꞌuli hesa tiyen <<In haba umeꞌehu tubetubehina yai ya lau.>> Na aniyona mate <<umeꞌehu ya loholoho diꞌoi.>>

Itete Yaubada ya ginauli;

te ita mate te noꞌonoꞌoen!>> (Samsi 118:22-23)

43Lisina yai E falibamiu, umi Yaubada ena dodoga inmoho haba emi dudulai ya abifahi be nu'u tausomo Yaubada sa awa'abiyen ya feledi. 44Doga sai ya beꞌu umeꞌehu te ai hewana, mate haba ya lubi pwaipwai. Na yena umeꞌehu te ya beꞌu, doga laꞌi ai hewana mate haba ya tapwaipwai be ya falen afusa.#21:44 Uliꞌuli haisa lausoisoi 44 te sa tole, na haisa higeꞌe.

45Tau Antalasam Baꞌibaꞌisadi yo Falesiya Yesu ena heyaheyason sa atahiyedi, be sa sibai mate, iti edi laulau ya libalibaedi. 46Yofede, edaꞌeda sa yoꞌo bena Yesu sa au. Inmoho, dodoga sa ouli be sa ꞌwasabuwedi, paꞌana dodoga edi nuwatuhu bena haga Yesu mate, peloweta hesa.

Currently Selected:

Matiu 21: Buhutu

Highlight

Copy