Matiu 4

Yesu ana Lauꞌita

Matiu 4:1-11

(Maleko 1:12-13; Luka 4:1-13)

1Na habahim Yaluwa Tabuna Yesu ya foyahi lawen nuꞌu pitapitalina yai be Satani haba ya lauꞌita. 2Lahai 40 yo iꞌipa 40 ganahewadi yai hige somo laꞌi gadona yai i lidi.

3Na habahim Satani ya laoma lisina be iyen,

Yena um Yaubada Natuna, umeꞌehu te u falibadi be ti falen fwalawa.

4Yofede, Yesu iyen,

Uliꞌuli Tabuna iyen,

<<Doga ibege fwalawa ibona i anꞌanniꞌi. Inmoho, Yaubada ena liba mahudoꞌina ya libaedi mate gonowana haba ya mwahuli.>> (Diutelonomi 8:3)

5Habahim Satani Yesu ya foya lawen Yelusalem, Siti Fafatabuna, be Dubu Laꞌilaꞌi hewana yai ya faꞌobiyo. 6Na ya faliba iyen,

Yena um Yaubada Natuna, u dago, paꞌana Uliꞌuli Tabuna iyen,

<<Yaubada haba ena anelu ya falibadi,

be ai nimadi haba sa kapupum,

be ibege ahem ai umeꞌehu u oiyedi.>> (Samsi 91:11-12)

7Alinana Yesu ya bui, iyebom,

Inmoho Buka Tabuna hinaga iyen,

<<Tabu Yaubada em Guyau lauꞌita yai u tole.>> (Diutelonomi 6:16)

8Ofiꞌofina mate Satani Yesu ya lawen tuꞌa lofalofana yai be nuꞌu mahudoꞌina yo edi loholoho ya faꞌita.

9Diyabolo#4:9 <<Diyabolo>> hesana hesa mate <<Satani.>> iyen,

<<Ginaulidi ni haba E felem, yena wa tulibono be wa fadebasaegu.>>

10Yesu iyen,

U lau hudoꞌi, Diyabolo! Buka Tabuna iyen,

<<Yaubada em Guyau ibona moho bena wa fadebasae yo ena wa paisowa!>> (Diutelonomi 6:13)

11Yofede Diyabolo, Yesu ya lau afulen; na anelu sa laoma be sa saguhi.

Yesu Ana Paisowa ya Fatubu Galili yai

Matiu 4:12-17

(Maleko 1:14-15; Luka 4:14-15)

12Yesu ya atahiyen mate Diyon sa falau deli, yofede ya lau Galili. 13Nasaleta yai hige i miya. Ya lau Kapanayum yai ya miya, taon hesa Galili Gabogabona sadaina yai, Sebulun yo Nafatali nuꞌudi yai. 14Debana yai Peloweta Isaiya ena liba ya fawananaha, iyen,

15Sebulun yo Napatali Nuꞌudi,

edaꞌeda ya lau gabogabo,

Diyodan tefana yai,

Galili, taꞌowawa edi nuꞌu!

16Dodoga kamumu yai sa miyamiya

haba mala laꞌilaꞌi sa ita.

Salumadi sa miyamiya peꞌi nuꞌuna kamukamumuna yai

mala haba ya sina ai lisidi. (Isaiya 9:1-2) *

17Lahaina yai Yesu ena wasa ya lauguguyaꞌen fatubu, iyen,

Nuwamiu au buidi, paꞌana Galewa Aba Baꞌisa Nuꞌuna ya sigisigima!

Tau Hama Fati Yesu ya Yogaidi

Matiu 4:18-22

(Maleko 1:16-20; Luka 5:1-11)

18Yesu mate Galili Gabogabona#4:18 <<Galili Gabogabona>> hoꞌowana mate ya laꞌi. Inmoho, hige alita,>> hoꞌowa moho. gelegelena yai ya laulau na, tau hamahama luwaga ya itadi, Saimon, hesana hesa Pita, yo hidana Endulu, sa hagihagida.

19Yesu ya falibadi iyen,

Au lau watanigu, haba sidohana doga onaꞌonana E fatalahamiu.

20Yofede edi hagida sa luhu afuledi na sa lau watan.

21Ya aulaha boda hinaga, Sebedi nanatuna luwaga Diyemsi yo Diyon ya itadi. Iti mate edi waga yai ma tamadi, edi hagida sa abiꞌabi nonohaidi. Yesu ya yogaidi, 22yofede, edi waga yo tamadi sa luhu afuledi, na maꞌedi sa lau.

Yesu ya Lau Faꞌata, ya Lauguguya, yo ya Lau Famwahuli

Matiu 4:23-25

(Luka 6:17-19)

23Yesu Galili mahudoꞌina ya fataꞌiꞌili, be Diusi edi aba oiꞌoigogo yai ya lau faꞌata, yo Galewa Aba Baꞌisa Nuꞌuna wasana loholohona ya lauguguyaꞌen yo dodoga adi asiyebo hudoꞌi-hudoꞌi ya faloholohodi. 24Wasana ya tadada Siliya Nuꞌuna mahudoꞌina yai, be salumadi sa asiyebo yo kamkamna hudoꞌi-hudoꞌi sa abidi, yaluwa heyaheyayadi, peꞌipeꞌi bubu yo dabidabidi mate dodoga sa ledima be mahudoꞌidi Yesu ya faloholohodi. (Matiu 17:15)

25Baiwa laꞌilaꞌi Galili yai yo <<Taon Safuhudohudoꞌi>>#4:25 <<Taon Safuhudohudoꞌi>> hesana hesa Alina Giliki yai mate <<Dekapolisi.>> yai, Yelusalem yai, Diudeya yo Diyodan tefa dohedohena nuꞌudi sa lau watan.

Currently Selected:

Matiu 4: Buhutu

Highlight

Copy