Matiu 7
7
Tabu Haidamiu au Fakasadi.
Matiu 7:1-6
(Luka 6:37-38; Luka 6:41-42)
1Tabu haidam u fakasadi, ibe um hinaga Yaubada i fakasam. 2Haba Yaubada ya fakasamiu gonogonowana doha haidamiu emi fafakasadi, lufa somo ami fapaisowadi haba ai lisimiu Yaubada doha ya ginauli. 3Paꞌana somo hidam matana muꞌalina wa ita, na um matam yai mwadale laꞌilaꞌi hige u modeꞌen?
4Sidohana be wa libalau hidam lebena, uwen,
<<Haga u laoma be matam muꞌalina ya kamfahi?>>
Na um matam yai oyagi mwadalena otana?
5Um doga bwalabwalana! Bwaꞌibwaꞌina mate matam yai mwadalena u kamfahi, mulina haba matam ya nega na hidam matana muꞌalina wa kamfahi.
6Ginauli fafatabudi tabu ꞌwayowa u feledi. Doꞌata sa timuli bui haba sa nalim. Yo em giniꞌuba matapoudi tabu u pei lawedi salai ai nuwanuwadi. Doꞌata sa bwaꞌi golugoludi.
Anꞌeta, Yoꞌo, Oiꞌoi
Matiu 7:7-12
(Luka 11:9-13)
7Au anꞌetai, Yaubada haba ya felemiu; au yoꞌoi, haba ami lobahi; au oiꞌoi, haba edaꞌeda ya soꞌe. 8Sai ya anꞌetai haba ya felen; sai ya yoꞌoi haba ya lobahi, yo edaꞌeda haba sa soꞌe yena sai ya oiꞌoi. 9Ibe sai natum fwalawa ya anꞌeta haba umeꞌehu wa felen? 10O, yena hama ya anꞌetai, haba weso wa felen be ya an? 11Yena nuwamiu yai auwen, <<Ai tau heyaya,>> inmoho nanatumiu ainauya loloho ami feledi. Lisina yai Tamamiu Galewa yai ai lisina somo ami anꞌetai haba ainauya loholoho ya felemiu.
12Lisina yai, somo ami fanuhadi dodoga haba ai lisimiu sa ginauli, umi hinaga bena ai lisidi ami ginauli doha. Paꞌana peloweta dodogadi edi liba, yo Mose ena laugagayo aniyodi wananaha logedi itete.
Edaꞌeda Mwakomwakokona yo Laꞌilaꞌi
Matiu 7:13-14
(Luka 13:24)
13Edaꞌeda hafohafona kiukiu ainiya au luhulau, paꞌana peꞌi edaꞌedana#7:13 Uliꞌuli haisa tiyen, <<Oyagi Alaꞌalana.>> Alina Suau yai tiyen, <<mate arinai.>> mate ya taliya na dodoga boludi sa laulau watan.
14Inmoho, mwahuli edaꞌeda hafohafona ya kiu, yo aba launa, ya mwatiti. Dodoga fisa moho haba sa lau watan.
Oyagi yo Uluna
Matiu 7:15-20
(Luka 6:43-44)
15Ami ita komakoman, peloweta bwalabwaladi lisidi yai. Sa laoma lisimiu nenedi doha sipi, inmoho ganahewadi yai doha ꞌwayoꞌwayowa manamanabaladi.
16Edi abiꞌabi yai haba ami ita lobahidi. Mahina luguna nulinulina ibege i fuwa be uluna doha kuhou. Na kuhou ibege i fuwa be waen. 17Logena, oyagi loholohona haba uluna loholohona, na oyagi heyayana haba uluna ya heyaya. 18Na oyagi tubutubu loholohona, ibege anꞌanina heyaheyayadi i toledi, yo oyagi heyayana ibege i fuwa loholoho. 19Be oyagi laꞌi hige i fuwa loholoho, haba oina be gabu goluna. 20Lisina yai, peloweta bwalabwala edi laulau yai haba ami ita lobahidi.
Yau Hige ya Sibaimiu
Matiu 7:21-23
(Luka 13:25-27)
21Ibege mahudoꞌimiu safaluma auwen, <<Guyau, Guyau!>> Haba ibege Galewa Aba Baꞌisa Nuꞌuna u luhu sola. Inmoho, Salumadi Tamagu Galewa yai, ena nuwatuhu sa lau watan mate haba sa luhu sola Galewa Aba Baꞌisa Nuꞌuna yai.
22Fakasa fuyana ya mahano, dodoga boludi haba sa libama lisigu, tiyen,
<<Guyau, Guyau! Hesam yai Yaubada libana ꞌe libalibaen, hesam yai yaluwa heyayadi ꞌe liba duidi, yo noꞌo abiꞌabidi hinaga ꞌe ginaulidi.>>
23Haba alinadi E bui, yawa,
<<Yau hige ya sibaimiu. Au lau hudoꞌi, umi dodoga heyaheyayamiu!>> (Samsi 6:8)
Tau Luma Abi Luwaga
Matiu 7:24-27
(Luka 6:47-49)
24Yena sai egu liba ya atahiyen, e ya awaꞌabiyen mate, in doha doga sonosonogana ena luma bwanali hewana yai ya faꞌobiyo.#7:24 O tawa, <<Somo yai bwanali e ume'ehu haisa edi aba ota'ota.>>
25Usa ya usa, bolowada sa wewe, yo hwayahwayau lumana ya famwahimwahiu. Inmoho hige i guli, paꞌana bwanali hewana yai ya ginauli.
26Inmoho sai egu liba te ya atahiyen, na ya moꞌa peiyedi mate, in doha doga yauyaulena, ena luma gelegele yai moho ya ginauli. 27Usa ya usa, bolowada ya wewe, yo hwayahwayau ya towa be lumana ya fadihodiho. Yofede ya guli be ya dem lopalopa.
Yesu ena Gigibwali
Matiu 7:28-29
28Libadi Yesu ya libaedi mulina yai mate ena lau faꞌata yai dodoga sa noꞌo, 29paꞌana ena lau faꞌata doha sai maꞌena dudulai na hige doha laugagayo tau lau faꞌataina.
Currently Selected:
Matiu 7: Buhutu
Highlight
Share
Copy
Want to have your highlights saved across all your devices? Sign up or sign in
© 2024, SIL Global. All Rights Reserved.
