Acak 27
27
Jakob ökwalö gum k'Ecau
1Ï karë na dong Icaka otii ëka wangë ödökö na görü, na ba dökï römö nënö pïny, ën ocwodo wode na dit Ecau ëka okobo nïnë nï, “Woda.”
Ecau ögamö nï, “An enene apap.”
2Icaka okobo nïnë nï, “An dong atii ökö, ëka ba angeo nïnö më thööna. 3Kobedini dong, kwany jamini më dwar—ocwe athërö ëka atum ëk ïcïdh ï lum ïdwar lee mörö nïna. 4Yüb nïna koth cem na mït na an amarö ëka ikel nïna acam, ëk amii gumna na bara athöö.”
5Ï caa nön Rebeka onwongo tye ka winyo ka Icaka twak kï wode Ecau. Ï karë n'Ecau dong öcïdhö ï lum më dwarö lee ëk ekel, 6Rebeka okobo both wode Jakob nï, “Nën, an awinyo apapni kobo both omeru Ecau nï, 7‘Kel nïna ringo lee mörö ëka ïyüb nïna na mït më acama, ëk an amii gumna ï nyim Rwoth na bara athöö.’ 8Dong, woda, winy na bër ëka ïtïm gin na an akobo nini. 9Cïdh ï kin rom kï dyegi ëk ikel nïna nyi dyegi arïö n'öcwëë ëk ayüb n'apapni na mït kite na ën marö ködë. 10Cë iter both apapni öcam ëk omii gum mërë na ën bara öthöö.”
11Jakob okobo both aya mërë Rebeka nï, “Ëntö ömëra Ecau kome opong yer, ëka an koma pwöth. 12Cë ka apapna oguda? Arömö nen calö ngat na bwölö ën ëka römö kelo cen nakaka gum.”
13Aya mërë okobo nïnë nï, “Woda, ëk cen obin ï koma. Tïm gin na an akobo nini këkën, cïdhï ëka ikelgï nïna.”
14Cë Jakob öcïdhö ëka onwongo dyegi cë okelo both aya mërë, cë Rebeka öyübö cem na mït kite na Icaka marö ködë. 15Cë Rebeka ökwanyö böng na bëcö ka wode na dit Ecau n'onwongo tye ï öt, ëka ömïö wode na tïdï Jakob oruko. 16Ën thon oumo cïngë ëka kanya yer ope ïë kï ï ngute k'adëla dyegi. 17Cë ën ömïö cem na mït ëka kwon na ën öyübö both wode Jakob.
18Jakob öcïdhö both apap mërë ëka okobo nï, “Apapna!”
Icaka ögamö nï, “Eyo woda, nga ënön?”
19Jakob okobo both apap mërë nï, “An abedo Ecau athïn kaöni. An atïmö kite na in ikobo nïna ködë. Yaa malö ibed abeda ëka ïcam ringo leena ëk ïmïa gumni.”
20Icaka openyo ën nï, “Woda! Inwongo nïngö pïöpïö?”
Jakob ögamö nï, “Rwoth Obangani ömïa anwongo.”
21Cë Icaka okobo both Jakob nï, “Woda, bin na cwök ëk agudi, ëk ange ka in ibedo woda Ecau adyer onyo pe.”
22Jakob öcïdhö na cwök both apap mërë Icaka, cë Icaka ogudo ën ëka okobo nï, “Dwoni cal kï dwön Jakob, ëntö cingi obedo cïng Ecau.” 23Ën ba ongeo Jakob pïën cïngë onwongo obedo yer calö cïng ömïn mërë Ecau, cë Icaka ömïö Jakob gum. 24Icaka dökï openyo ën nï, “Adyer in ibedo woda Ecau?”
Jakob ögamö nï, “An ënön.”
25Cë ën okobo nï, “Woda, kel ringo leeni nön mörö acam, ëk amii gumna.”
Jakob okelo bothe cë ën öcamö ëka okelo thon köngö ölök mörö cë Icaka ömadhö. 26Cë apap mërë Icaka okobo nïnë nï, “Bin kany, woda, ëk ïnödh lema.”
27Cë ën öcïdhö, ëka önödhö lem apap mërë. Ï karë na Icaka ongweo ngwec böng mërë, ömïö ën gum nakun kobo nï,
“Eyo, ngwece ka woda
cal kï ngwece pwodho
na Rwoth dong ömïö gum.
28Ëk Obanga omii thoi më polo
ëka lönyö më lobo
bël na büp ëka pig ölök na nyen.
29Ëk rok otii nini
ëka jïï oryebere pïny më wöröni.
Bed rwoth ï nyim utmegoni,
ëk awope ka ayani oryebere pïny më wöröni.
Ëk jö na lami, ëlamgï
ëka jö na mii gum, ëmïïgï gum.”
30Kinge na Icaka dong otyeko mïö gum ëka Jakob dong öcïdhö ökö kï bothe, ömïn mërë Ecau othuno kï ï dwar. 31Ën thon öyübö cem na mït ëka otero both apap mërë. Cë okobo n'apap mërë nï, “Apapna, yaa malö ibed abeda ëka ïcam ringo leena ëk ïmïa gumni.”
32Apap mërë Icaka openyo ën nï, “In ïnga?”
Ecau ögamö nï, “An wodi Ecau, kaöni.”
33Icaka kome ömyël rwök ï karë na ën onwongo nï Ecau ënön cë okobo nï, “Nga kara n'ödwarö ringo lee ëka okelo nïna? An pod acamö acama ëka amïö gum na bara in ibino ëka dong adyer bino bedo kï gum!”
34Ï karë n'Ecau owinyo köp k'apap mërë, ën oredo kï koko rwök na cwinye cwer nakun kobo both apap mërë nï, “Apapna, mïa an thon gum!”
35Ëntö Icaka okobo nïnë nï, “Omeru obino öbwöla ëka otero gumni ökö.”
36Ecau okobo nï, “Pathï Jakob ënön adyer?#27:36 Jakob gönyö nï ömakö opunye (ï carolok, ën bwölö jö). Ën dong öbwöla wang arïö. Ën otero twëröna na calö kaö, ëka kobedini dökï otero gumna!” Cë ën openyo apap mërë nï, “Ba ïwëkö nïna gum mörö?”
37Icaka ögamö dhö Ecau nï, “An amïö ën obedo rwoth ï nyimi ëka amïö wede mërë kïbëc obedo etic mërë. Amïö ën kal ëka pig ölök na nyen. Dong ngö na an arömö tïmö nini, woda?”
38Ecau okobo both apap mërë nï, “Apapna, in itye kï gum acël këkën? Apapna, mïa an thon gum!” Cë Ecau okok rwök.
39Apap mërë Icaka ögamö dhögë nï,
“Kabedoni bino bedo
na bor kï lobo na cëgö cem,
na bor kï thoi më polo na malö.
40In ibino kwö kï pala abadëni
ëka ibino tic pï omeru.
Ëntö ka in ibino jëm nïnë,
in ibino bedo agönya kï bothe.”
Jakob ölüü yo both Laban
41Ecau obedo k'adagë ï kom Jakob pïën apap mërë ömïö ën gum mërë ökö. Cë okobo ën kënë nï, “Nïnö më kumo pï thöö ka apapna dong cwök, cë abino neko ömëra Jakob ökö.”
42Ï karë n'ekobo both Rebeka ngö na wode na dit Ecau okobo, ën ocwodo Jakob wode na tïdï ëka okobo nïnë nï, “Omeru Ecau ödïö cwinye kï thama më nekoni. 43Kobedini dong, woda, tïm gin na an akobo. Lüü ökö yo both ömëra Laban na tye ï Aran. 44Bed bothe pï karë mörö naka ka omeru cwinye dong okwe. 45Ka omeru cwinye dong okwe ëka wie dong owil ökö kï ï kom ngö na in ïtïmö ï kome, cë an abino oro köp bothi ëk idwogi cen kï kunön. Pïngö an amïtö rwenyo un jö arïö ï nïnö acël?”
46Cë Rebeka okobo both Icaka nï, “An dong adhero kï kit kwö k'anyira ka jö Kit ökö. Ka Jakob bino nyömö dhakö kï kin mon më lobo ni, kï ï kin mon ka jö Kit calö man, cë kwöna dong bino bedo na köny mërë ope.”
Currently Selected:
Acak 27: ThurM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
