Чапарзабазул ишал 4
4
4 бетӀер
Пётрги Иоаннги судалда цере чӀезарула
1Гьедин халкъалъе хабар бицунел гьел ругеб мехалъ, рачӀун тӀаде щвана кашишзабиги, Мукъадасаб Рукъ цӀунулел рагъухъабазул бетӀерги, саддукеялги. 2Пётрицаги Иоанницаги халкъалъе вагӀза гьабулеб букӀиналъги, ГӀисал мисал бачун, хваралъуса рахъинаризе рукӀин хӀакъаб бугилан чӀезабулеб букӀиналъги ццидахинарун рукӀана гьел. 3Гьез ккун вачун жанив тӀамуна гьев кӀиявго. Сардилъ мех букӀиндал, рогьинегӀан туснахъалъур тана гьел. 4Амма гьезухъ гӀенеккарал гӀемерисел гӀадамал гьез бицаралда божана, гьедин гьезул агьлуялда щуазаргогӀанасев чи гӀуна.
5Гьале нахъисеб къоялъ радал Иерусалималда данделъана чӀухӀби-хӀакимзабиги диниял гӀалимзабиги. 6Гьенир рукӀана бищунго кӀудияв кашиш Гьаннаги, гьелго кашишзабазул тухумалъул Кайафаги, Иоаннги, Александрги ва цогидалги. 7КӀиявго чапарги цеве чӀезавун, гьез гьикъана кинаб къудраталдалъун ва лъил цӀаралдалъун нужеца доб иш гьабурабилан.
8Илагьияб РухӀалъ цӀурав Пётрица гьезда абуна:
– Я, гьаб халкъалъул чӀухӀби-хӀакимзаби! 9Гьев гӀажизав-загӀипав чи кин сахлъаравилан жакъа нужеца нижеда гьикъулеб бугелъул, 10нужеда киназдаго ва Исраилил тӀолабго халкъалдаги лъан букӀа: нужеца хъанчида ван хвезавурав, хваралъуса Аллагьас вахъинавурав Назареталдаса МасихӀ ГӀисал цӀаралдалъун сахлъун нужеда цеве вахъун чӀун вуго гьев чи. 11Гьев ГӀиса вуго къадалъ лъезецин ярагьунарилан нужеца – къадахъабаз – нахъе рехараб, амма цололъ лъезе ккараб гамачӀ. 12Гьесдалъун гурони хвасарлъи гьечӀо. Гьалъаб зобалда гъоркь гӀадамазе кьурал цӀаразда гьоркьоб цоги батӀияб цӀар гьечӀо, жиндалъун нилъ хвасарлъулеб.
13Пётрилги Иоаннилги хӀинкъунгутӀи бихьун, гьел гӀалимзаби гуреллъи, гӀадатиял гӀадамал рукӀин бичӀчӀун хӀикмалъун хутӀана гьел. Гьебмехалъ ракӀалде щвана Пётрги Иоаннги ГӀисада цадахъ рукӀараллъи. 14Гьез сахлъизавурав чи гьенив жидеда аскӀов чӀун вихьидал, гьев кӀиясдаго дандечӀун абизе рагӀи батичӀо гьезда. 15Суд гьабулеб рокъоса къватӀире гьелги гъун, гьезие щибдай гьабилаян ургъизе лъугьана гьел. 16«ТӀолабго Иерусалималъул халкъалда лъалеб буго хӀакъикъаталдаги гьез якъинаб мугӀжизат бихьизабураблъи. Гьеб гьереси гьабун бажариларо нилъехъа, – ян абулеб букӀана гьез. – 17Амма халкъалда гьоркьоб гьеб хабар хадубккунги тӀибитӀичӀого букӀине ГӀисал цӀар рехсон тӀокӀаб лъиданиги гаргадугейилан хӀинкъизарун лъикӀ гьел».
18АхӀун жанирегун, гьезда лъазабуна тӀокӀаб ГӀисал цӀар бахъугеян ва гьесул цӀаралдалъун вагӀза гьабугеян. 19Амма Пётрицаги Иоанницаги гьезие жаваб кьуна:
– Нужецаго пикру гьабе: Аллагьасда цебе битӀараб букӀинищ, гьесухъ гӀенеккичӀого, нужехъ гӀенекки? 20Нижедаго бихьарабги рагӀарабги бицинчӀого чӀезе кӀоларо нижеда.
21-22Халкъалъукьа хӀинкъун чӀухӀби-хӀакимзабазда кӀвечӀо гьезие кинаб бугониги тамихӀ гьабизе ва, дагьалги цӀакъ хӀинкъизеги гьарун, нахъе риччана. Жив сахлъиялдалъун мугӀжизат загьирлъарав дов чи вукӀана кӀикъого соналдасаги цӀикӀкӀараб гӀумруялъул чи. Гьесухъ ралагьун киназго Аллагьасе рецц гьабулеб букӀана.
Иман лъуразул дугӀа
23КъватӀире риччараб мехалъ Пётрги Иоаннги жидерго агьлуялъухъе ана; чӀахӀиял кашишзабазги чӀухӀби-хӀакимзабазги жидеда абунщинабги гьезда бицана. 24Гьазул хабар рагӀидал гьеб агьлуялъ киназго цадахъ Аллагьасде гьари бана:
– Зобал рижарав, ракьал рижарав, ралъадал рижарав ва гьенир ругелщиналги рижарав нижер БетӀергьан! 25Дур лагълъун кколев нижер кӀудияв эмен Давудил кӀалдиб лъун дуца Илагьияб РухӀалдалъун абун букӀана:
«Халкъал щай ццидахун ругел,
Къавмаз щай гӀантал жал гьарулел ругел?
26РачӀун цолъана ракьалда ругел парччахӀзабиги
ЧӀухӀби-хӀакимзабиги
БетӀергьанасда дандечӀезе,
Гьесул МасихӀида дандечӀезе».
27ХӀакъикъаталдаги Гьеродги, Понтий Пилатги, мажусиялги, Исраилил халкъги гьаб шагьаралда цолъана дур МасихӀлъун кколев илагьияв вакил ГӀисада дандечӀезе. 28Цолъана цебеккунго дур къудраталъ ва дур къадаралъ бихьизабун букӀараб хӀукму тӀубазабизе. 29Я, БетӀергьан! Гьале гьез нижее хӀинкъаби кьолел руго. ХӀинкъичӀого дур калам халкъалда лъазабизе къуват кье дурго лагъзадерие. 30Дур илагьияв вакил ГӀисал цӀаралдалъун унтарал-щокъал сахлъизаризе, гӀаламатал ва мугӀжизатал рихьизаризе квербакъе нижее!
31Гьеб гьари-дугӀаялда муридал ругеб мехалъ гьел данделъун рукӀараб бакӀ гьаргьадана, Илагьияб РухӀалъ цӀуна гьел ва хӀинкъичӀого Аллагьасул калам халкъалда лъазабизе лъугьана.
Иман лъураз магӀишат дандбала
32Иман лъуразул гьеб кӀудияб агьлуялъул рухӀалги ракӀалги цолъун рукӀана. Жиндирго букӀараб боцӀи-бечелъиялда лъицаниги абулароан гьаб дир бугилан, кинабго гӀахьалаб букӀана гьезул. 33Чапарзабазин абуни, кӀудияб къудраталдалъун нугӀлъи гьабулеб букӀана ТӀадегӀанав ГӀиса хваралъуса вахъун вихьанин жидедаян. Ва кӀудияб баркат лъун букӀана гьел киназдаго. 34БетӀербахъи загӀипав чиги гьезда гьоркьов вукӀинчӀо. Щайгурелъул гӀемерисезул букӀана хур-ахги, мина-рукъги. Гьез гьеб бичулаан 35ва щвараб гӀарацги чапарзабазухъе кьолаан. Цинги гьезги, къваригӀарасе къваригӀарабгӀан бикьун, киназего кьолаан. 36Барнаба абун чапарзабаз тӀокӀцӀар кьурав (гьелъул магӀна ккола «РакӀбатизабулев») Кипралдаса Юсуп абулев цо левитас жиндирго хур бичана, 37гьелъухъ щвараб гӀарацги чапарзабазухъе кьуна.
Currently Selected:
Чапарзабазул ишал 4: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
