Luk 22
22
Jiudas 'e 'oloa maelana Jisas
(Matiu 26:1-5; Mak 14:1-2; Jon 11:45-53)
1Na faafangaa 'ana berete ne a'i ta 'isi laala kera 'alangia 'ana Tathafaafi 'e kwaikarangi na'a. 2Ma to'a naana'o 'ana fo'alaa ma to'a ni to'odoo 'ana biibiranga keka lio uria ta tathalaa ura thaungilana tha Jisas, sulia kera ma'u 'ana figua 'eri. 3Sui Saetana ka kothofia tha Jiudas, na kera 'alangia 'ana 'Iskariot, te'e wane 'ana taafulu wane ma roo wane 'ana disaepol nia baa ki. 4Tha Jiudas ka lae 'i sana wane naana'o ki 'ana fo'alaa ma wane ki na keki lio sulia na Bi'u Abu tha God, fasia keki ngata sulia ra'ulana tha Jisas. 5Keka se'ethaathala ma keka ala faafia falelana si malefo 'i fana. 6Nia ka ala faafia, ma ka lio na'a ura ta si manga na kai falea Jisas 'i 'abada si manga ne a'i ta figua si too kaakali nia.
Faafanga 'ii'isi
(Matiu 26:17-25; Mak 14:12-21; Jon 13:21-30)
7Fa bongi 'ana berete na 'e a'i ta 'isi laala na 'e fula ura afufulaa 'ana Pas'ofa sifisifi. 8Jisas ka arasia tha Pita ma tha Jon ka sore'a, “Lae moko kwaithathai 'ana fanga ura Tathafaafi fakulu'a.”
9Keka soeto'ona, “Fei na 'o thathamia miki kwaithathai 'ania?”
10Nia ka sore'a, “Si manga na 'o kotho 'i laa ma'e toaa 'eri, te'e wane 'e ngali kafo kai fulato'omaro'a. Lae buira ura luma na 'e kotho 'i ei, 11moko sore'a sana wane 'ana luma 'eri, ‘Wane ni to'odoo 'e soeto'ona mai: Nii fei na kade'e bi'u fasi kwai 'ania faafangaa 'ana Tathafaafi bia na disaepol nau ki?’ 12Nia kai faatania na kade bi'u 'ana luma 'eri ne ni 'i aa na 'e kwaithathai sui na'a. Moko kwaithathai 'ana faafanga kula 'eri.”
13Kero lae ma keko fulato'ona bona'a mala tha Jisas 'e fa'arongo keero'a. Keko kwaithathai 'ana faafangaa 'ana Tathafaafi 'i kula 'eri.
Faafanga Abu
(Matiu 26:26-30; Mak 14:22-26; 1 Korinthian 11:23-25)
14Si manga 'e fula na'a fana faafanga 'eri, Jisas bia disaepol nia ki keka 'ono reri na'a kalia tefolo 'eri. 15Ma nia ka sore'a 'i sada, “Nau ku thathamia 'asia na'a kwai 'ania si faafanga ne'e bi kamalu'a, sui fata'i na se'efiia ka fulato'oku. 16Sulia ku fa'arongo kamalu'a, nau kwasi 'ania la'u na fanga ne'e laalae ka fulato'ona bo'o mamanalana 'i laa na 'inotoa tha God.”
17Ma nia ka ngalia na tiitiu ni ku'u, ka tangoa tha God, sui ka sore'a, “Ngalia ma muka ukalia ma'alutamalu'a. 18Sulia ku fa'arongo kamalu'a, nau sa kwa ku'u la'u 'ana waen ne'e laalae ka fula si manga na 'inotoa tha God ka lae mai.”
19Nia ka ngalia na berete, tangoa tha God sui ka niia, ma ka falea 'i fada ka sore'a, “Na se'eku na ku falea famalu'a. Muka ilia fana manatato'okulaa.”
20'Una 'eri la'u bo'o, 'i buira fangalaa nia ka ngalia na tiitiu ni ku'ulaa, ka sore'a, “Na tiitiu ne'e na alaofua faalu 'ana 'abuku, na 'e igwa 'i famalu'a. 21Sui 'abe'e wane na kai fale nau fana ma'alimae, 'e nii bii nau 'ana tefolo ne'e. 22Kaluwane imole kai lae mala God 'e ala faafia. Sui 'e ta'aa 'i fana wane 'eri na 'e usi 'ani nia fana ma'alimae nia ki!” 23Keka thafali soeto'oda kwailiu ura ni tei ada na kai ilia si doo 'eri.
Na olisuusu'ulaa sulia na 'inotoa
(Matiu 20:25-26; Mak 10:42-43)
24Te'e olisuusu'ua ka tata'e ma'alutada ura tei ada na 'e ba'ita ka talu kera sui. 25Jisas ka sore'a 'i sada, “Na king 'ana Gentael ki, kera too 'ana suukwa'ia ura orolana to'a kera, sui keka 'alangi kera 'i tala'ada 'ana to'a kwaimaani figua. 26Sui kamalu'a 'e a'i musi 'una 'eri. Tei na 'e ba'ita ma'alutamalu'a kai 'uria ta kaliwela, ma tei na kai soredoo kai 'uria na wanenira. 27Ma tei na 'e ba'ita, wane na 'e 'ono kalia tefolo, mada na wane na 'e raa 'ana fanga ma kai fale 'ana to'a kalia tefolo? Wane na 'e 'ono kalia bona'a tefolo. Sui nau ku lae mai mala wane na raa 'ana fanga. 28Kamalu'a mulu too bi nau 'ana si manga 'ana ilito'oa nau ki. 29Nau ku falea la'u bo'o 'i famalu'a na gwaunga'ilaa 'ana 'inotoa, mala maka nau 'e falea la'u bo'o na gwaunga'ilaa 'ana 'inotoa 'i faku. 30Fasi muka fanga ma muka ku'u 'ana tefolo nau 'i laa na 'inotoa nau ma muka 'ono 'ana 'inotolaa, muka soredoo sulia na taafulu ma roo kule'e wane ne'e ki 'i 'Israel.”
Jisas 'e sore'a tha Pita kai tofe nia
(Matiu 26:31-35; Mak 14:27-31; Jon 13:36-38)
31“Saemon, rongoa si mai, tha Saetan 'e gani uria kai ukali kamalu'a mala na wit kera ukalia tadina fasia. 32Sui ma nau ku fo'a uri 'oe, Saemon, fasi fito'oa 'oe 'e a'i si feda. Si manga na 'o oli la'u mai 'oko fa'asuukwa'ia na do'oramu ki.”
33Sui nia ka sore'a, “Lord, nau ku kwaithathai uria na kwai lae bii 'oe la dele ma ura maea.”
34Sui Jisas ka lu'ua 'una 'eri, “Ku fa'arongo 'oe Pita, sui fata'i kuukua ka a'i 'i thaathalana dani, 'oe 'oki tofe ulu si manga, na 'o dora 'ani nau,”
35Sui Jisas ka soeto'oda, “A'i musi ngalia bo'o ta wa'i malefo, ta wa'i mada ta sadolo si manga ku fale kamalu'a, sui mulu 'ato'ia ta si doo ba?”
Keka sore'a, “A'i bo'o.”
36Nia ka sore'a 'i sada, “Sui manga 'eri mada sa 'o too 'ana ta wa'i malefo, 'oko ngalia, ma ta wa'i la'u bo'o. Ma mada sa 'osi too 'ana ta nini ni firulaa, usi 'ana to'oni ba'ita 'oe 'oko usia ta doo. 37Keekeda abu 'e sore'a: ‘Kera te'ema'i nia biia na to'a abula ta'aa,’ ma ku fa'arongo kamalu'a na doo 'eri kai fuli bona'a 'ani nau. Iu, taa na kera kedaa suli nau kai mamana bona'a.”
38Ma disaepol nia ki keka sore'a, “Rikia Lord, roo nini ni firulaa ki ne'e.”
Nia ka sore'a, “Tala'ana na'a neri!”
Jisas 'e fo'a gwauna tolo 'i 'Olifs
(Matiu 26:36-46; Mak 14:32-42)
39Jisas 'e 'akwasia kade bi'u baa ka lae na'a gwauna fa tolo 'i 'Olifs bia disaepol nia ki, mala na kai ilia ngado. 40Si manga 'e fula kula 'eri, nia ka sore'a sada, “Mulu fo'a fasi musi thada laa ilito'oa.”
41Nia ka sukani lae kau, boururu ka fo'a, 42“Maka mada sa 'o thathamia, ngalia na tiitiu 'ana se'efiia ne'e fasi nau, sui thathamilaa nau 'e a'i, talito'ona thathamilaa 'oe 'ana kai fuli.” 43Ma 'ensolo fasi hefen ka fula mai sana ma ka fa'asuukwa'i nia. 44Ma nia too 'ana se'efiia ba'ita ma nia ka fo'a fiifii, ma 'ii'idalana ki ka thada mala 'abu uri tha'egano. 45Si manga na 'e tata'e fasi fo'alaa, ma ka oli kau sana disaepol nia ki, nia ka rikia keki biinga, sulia kera feda 'asia na'a fasia liodilalaa. 46Nia ka soeto'oda, “Ura taa na muka biinga? Tata'e ma muka fo'a fasia musi thada laa ilito'oa.”
Kera kania tha Jisas
(Matiu 26:47-56; Mak 14:43-50; Jon 18:3-11)
47Si manga na kai ngata bana te'e figua keka ta'e mai, tha Jiudas, te'e wane 'ana taafulu ma roo disaepol ki na 'e talai kera mai. 'E fali mai sana tha Jisas ma ka nono'ia. 48Sui Jisas ka soeto'ona, “Jiudas, 'o falengania kaluwane imole 'ana nono'ilaa?”
49Si manga 'aina disaepol nia ki kera rikia taa na 'e fuli, keka sore'a, “Lord, 'ufita miki kwa'eda biia nini ni firu laa kamali'a ki?” 50Ma te'e wane ada ka kwa'ea wanenira na wane naana'o 'ana wanenifo'a ki, ka kasia alinga a'ola nia.
51Sui Jisas ka sore'a, “Doo 'eri ka sui na'a!” Ma nia ka suana alingana wane baa ma ka guraa bona'a.
52Sui Jisas ka sore'a sana na wane naana'o ki 'ana wanenifo'a ki, ma to'a ni liolaa sulia Biu Abu tha God, ma 'aina wane naana'o 'eki, na kera lae mai uri nia, “Ma nau wane ku talaia ta firua ne'e fasi muka lae mai biia na nini ni firulaa ma subi ki? 53Fa thato ki sui bana ku too bii kamalu'a la Biu Abu tha God, ma kamalu'a musi kani nau bo'o. Sui mena 'ana, si manga kamalu'a ne'e, si manga roorodo'aa 'e raa.”
Tha Pita 'e tofea tha Jisas
(Matiu 26:57-58,69-75; Mak 14:53-54,66-72; Jon 18:12-18,25-27)
54Sui keka ra'u nia, keka tole nia keka lae na'a, ma keka tolea ura luma wane naana'o 'ana wanenifo'a ki. Pita ka thafa 'isi daa bana buri. 55Ma te'e era kera fa'atharua 'i laa lalabata 'eri ma tei to'a keka 'ono kalia. Tha Pita 'e lae kau ka 'ono bii kera. 56Te'e thariniraa ka riki nia kai 'ono kalia era 'eri. Nia ka lio ka riki thaito'omana ma ka sore'a, “Wane ne'e 'e too la'u bo'o bia Jisas.”
57Ma Pita ka tofea, “Kini ne'e, nau a'i kwasi thaito'omana wane 'eri.” 58'E a'i si tau bo'o, ruana imole 'e riki nia ka sore'a, “'Oe ta wane 'i ada la'u bo'o ne'e.”
Pita ka sore'a, “Wele'e, nau 'e a'i ne'e.”
59Sui ta kade'e si manga ka tatha na'a, uula wane ka suusu'u ka 'una 'eri, “Mamana na'a, wane ne'e 'e too biia tha Jisas, sulia nia fasia Galili la'u bo'o.”
60Sui Pita ka sore'a, “Wele'e, nau ku dora 'ania taa na 'oki ngata sulia nena!” Si manga 'eri bana kai ngata neri, na kuukua ka a'i. 61Lord 'e bulasi ma ka lio kokota bona'a kau uria tha Pita. Si manga 'eri tha Pita ka onoto'ona, na ba'ea ba na Lord 'e 'aratania 'i sana, “Sui fata'i na kukua ka a'i tara'ena, 'oe 'oki tofe nau ulu si manga.” 62Ma nia ka kotho kau maa ma ka isigwau ba'ita.
Kera kwa'ea tha Jisas
(Matiu 26:59-68; Mak 14:55-65; Jon 18:19-24)
63Ma to'a na kera lio sulia tha Jisas keka thafali 'oniongaa, ma keka kwa'e nia. 64Keka kani su'usia maana sui keka soeto'ona, “'Oki fa'arongo fasi, tei na kwa'e 'oe neri?” 65Ma keka sore'a la'u doo ta'a 'oro ki suli nia.
66'U'usungadia 'e fula, na ofufua 'ana wane naana'o ki, 'aina to'a naana'o 'ana wanenifo'a ki ma to'a ni to'odoo 'ana biibiranga, kera ofu mai, ma keka tolea mai tha Jisas 'i sada. 67Keka sore'a, “Mada sa 'oe na Kraest, 'oko fa'arongo kamali'a.”
Jisas ka sore'a, “Mada sa kwa fa'arongo kamalu'a, sa muka fa'amamane nau a'i. 68Ma mada sa kwa soeto'omulu'a, kamalu'a sa muka lu'u nau 'e a'i. 69Sui 'e 'ita 'i manga 'eri ka oli 'ala'a, kaluwane imole kai 'ono 'ana bali 'aba a'ola 'ana tha God na 'e suukwa'i ka tatha.”
70Keka soeto'ona te'e fau, “'Oe kaluwane tha God ne'e?”
Nia ka lu'u kera, “Tala 'amalu'a na mulu sore'a.”
71Sui keka sore'a, “Ura taa ni la'u na kuki rofe ura ta si ba'ea ni fa'amamanelaa? Kulu tala rongoa bona'a fasia fokona 'i tala'ana.”
Currently Selected:
Luk 22: MLU
Highlight
Share
Copy
Want to have your highlights saved across all your devices? Sign up or sign in
© 2024, SITAG
