खास चेलों 15
15
यरूशलेम नगर मा लोगु का खातिर एक सभा
1अर फिर यहूदिया मुलक बटि कुछ लोग अन्ताकिया नगर मा ऐनी, अर बिस्वासी भै-बैंणो तैं सिखौण लगि गैनी अर ऊंन बोलि, “सुणा, अगर तुम परमेस्वर का सेवक मूसा का दियां नियम-कानूनों का मुताबिक अगर खतना का रिवाज तैं पूरु नि करवैल्या, त तुम लोगु तैं बचयै नि जाण।” 2तब पौलुस अर बरनबास की ऊं लोगु का दगड़ा मा ईं बात का बानो वाद-विवाद ह्वे, अर यू वाद-विवाद कुछ जादा ही बढी गै। तब बिस्वासी समुदाय का लोगु न ये सवाल का जबाब तैं पौण का बानो पौलुस अर बरनबास तैं अर ऊंका दगड़ा मा बिस्वासी समुदाय का कुछ और लोगु तैं यरूशलेम नगर कू भेजि, ताकि ऊ उख जैके खास चेलों अर अध्यक्षों बटि ईं बात को जबाब पै सैका। 3तब समुदाय का कुछ लोग ऊंतैं छुड़णु खुणि कुछ दूर तक गैनी। अर यू लोग फीनीके अर सामरिया मुलकों बटि ह्वेके गैनी, अर उखा बिस्वासी भै-बैंणो तैं ऊं लोगु का बारा मा बतै जु यहूदी जाति का नि छा कि ऊंन प्रभु यीशु तैं कनकै अपणा जीवन मा स्वीकार कैरी, अर ईं बात का बाना सब लोग खुश ह्वे गैनी।
4अर जब ऊ यरूशलेम नगर मा पौंछिनी, त बिस्वासी समुदाय का लोगु न, यीशु का खास चेलों न अर अध्यक्षों न ऊंको स्वागत कैरी। तब पौलुस अर बरनबास न यों लोगु तैं बतै, कि परमेस्वर न ऊंका द्वारा लोगु का बीच मा कथगा बड़ा-बड़ा काम करिनी। 5मगर बिस्वासी फरीसी लोगु मा बटि कुछ लोग उठनि अर ऊंन बोलि, “जु लोग यहूदी जाति का नि छिन अर प्रभु पर बिस्वास करदिन ऊं लोगु तैं खतना का रिवाज तैं पूरु करण जरुरी च, अर ऊंतैं इन हुकम देण चयेणु कि ऊ मूसा का दियां नियम-कानून को पालन कैरा।”
6तब खास चेला अर अध्यक्ष लोग ईं बात का बारा मा बात-चित करणु खुणि इकट्ठा ह्वेनि। 7अर जब भौत बहसबाजी ह्वे गै, तब पतरस खड़ु ह्वे अर वेन ऊंकू बोलि, “हे मेरा भै-बैंणो, तुम अच्छी तरौं से जणद्यां की आज से कुछ दिन पैलि परमेस्वर न मितैं तुम लोगु मा बटि चुणी, ताकि मेरा द्वारा ऊं लोगु तैं शुभ समाचार सुणये जौ जु की यहूदी जाति का नि छिन, कि वु लोग भि सुणा अर बिस्वास कैरा। 8अर परमेस्वर जु की सब लोगु का विचारों तैं जणदु, जन वेन हमतै पवित्र आत्मा दिनी, ठिक उन्नि वेन ऊं लोगु तैं भि पवित्र आत्मा दिनी जु यहूदी जाति का नि छिन। अर वेन इन साबित कैरियाली कि वु ऊंतैं भि स्वीकार करदु। 9अर इन कैरिके वेन हम यहूदी लोगु का अर ऊं लोगु का बीच मा कुई भि भेदभाव नि कैरी जु यहूदी जाति का नि छिन। अर यीशु पर बिस्वास करण से ही वेन ऊंका मनों तैं शुद्ध कैरियाली, 10त अब तुम ऊं बिस्वासी लोगु का मथि एक गरु जुवा जन बोझ रखी के परमेस्वर तैं किलै अजमौणा छाँ, अर वु बोझ नऽ त हम लोग न अर ना ही हमरा पितरों न उठे सैकी। 11मगर हमरु त यू बिस्वास च, जन कि प्रभु यीशु की किरपा से आज हम लोगु तैं बचयै गै, ठिक उन्नि ऊं लोगु तैं भि बचयै गै जु यहूदी जाति का नि छिन।”
12अर फिर सभा का सब लोग चुपचाप ह्वेके बरनबास अर पौलुस की गवै तैं सुनण लगि गैनी, कि परमेस्वर न कनकै दुसरि जाति का लोगु का बीच मा ऊंका द्वारा बड़ा-बड़ा काम अर चमत्कार करिनी। 13पौलुस अर बरनबास की गवै खतम होण का बाद याकूब न बोलि, “हे मेरा भै-बैंणो मेरी बात तैं सुणा, 14जन कि भै शमौन पतरस न बतै कि जु लोग यहूदी जाति का नि छिन ऊंमा बटि कुछ लोगु तैं परमेस्वर न पैलि ही सगु बणौणु खुणि कनकै चुण्यालि, 15अर परमेस्वर का रैबर्या भि ईं बात मा सैमत छिन। जन की लिख्यूं च कि,
16 #
आमो 9:11,12 “‘यों सब बातों का बाद मि वापिस औलु,
अर ऐके दाऊद का पोड़यां डेरा तैं फिर से उठौलु।
हाँ, वे ही खण्डर तैं बणौलु,
अर वेतैं फिर से खड़ु करलु,
17ताकि बच्यां लोग अर जु यहूदी जाति का नि छिन,
जौं तैं मेरा लोग होणु खुणि चुणै गै वु सब प्रभु तैं खुज्या।
18अर जु परमेस्वर भौत सालों पैलि बटि यों बातों तैं बतौन्दी औणु च,
उई परमेस्वर यू सब बात बुल्दु।’
19“इलै मि इन सोचदु, कि जु लोग यहूदी जाति का नि छिन ऊंमा बटि जथगा भि लोग परमेस्वर की तरफा औणा छिन, ऊं लोगु तैं हम लोग दुख नि द्या, 20बल्किन अब इन कैरा कि ऊं लोगु खुणि एक चिठ्ठी लिखा। अर ऊं लोगु तैं वु खाणु कू मना कैरा जु मूरत का अगनै चड़ये जान्दु, अर ऊंतैं गळत सम्बन्ध बणौण से भि दूर रौण कू लिखा। अर इन भि लिखा कि तुम लोग गौळा दबै के मुरयां जानबरों की सिकार नि खयां, अर ना ही कै जानबर को ल्वे खयां-पीयां।
21“किलैकि भौत सालों बटि मूसा का दियां नियम-कानून हरेक सब्त का दिन पर प्रार्थना भवनों मा पढै जाणा छिन, अर वेकी बातों को परचार करण वळा लोग भि नगर-नगर मा पैलि बटि होन्दी औणा छिन।”
जु यहूदी नि छिन ऊं खुणि चिठ्ठी
22अर बिस्वासी समुदाय का सब लोगु तैं, खास चेलों अर अध्यक्ष लोगु तैं याकूब की बुलिं बात अच्छी लगिनी। तब ऊं लोगु न इन फैसला कैरी कि हम मा बटि कुछ लोगु तैं चुणी के पौलुस अर बरनबास का दगड़ा मा अन्ताकिया नगर कू भेजि जौ। तब ऊंन यहूदा तैं जैकू बरसब्बा भि बुल्दिन अर सीलास#15:22 सीलास को दुसरो नौ सिलवानुस च। तैं चुणी, अर यू लोग बिस्वासी भै-बैंणो का मुखिया छा। 23अर ऊंका हाथ ऊंन एक चिठ्ठी भेजि जैमा इन लिख्यूं छौ कि:
सीरिया मुलक, किलिकिया मुलक, अर अन्ताकिया नगर मा रौण वळा हमरा प्यारा भै-बैंणो, तुम जु दुसरि जातियों मदि छाँ, तुम सब लोगु तैं बिस्वासी समुदाय का लोगु की तरफा बटि अर खास चेलों अर अध्यक्षों की तरफा बटि हमरु, सलाम।
24दगड़्यों, हमुन सुणी कि हमरा इख बटि कुछ लोगु न ऐके तुमतै अपणी बातों का द्वारा भरमै, अर तुमरा मनों तैं बड़ी उळझण मा डालियेली। पर सुणा, हम तुमतै बतै देन्द्यां कि हमुन ऊं लोगु तैं इन्द्रयो कुई भि आदेस नि दे छौ। 25इलै हमुन एक मन ह्वेके इन फैसला कैरी, कि कुछ लोगु तैं चुणी के अपणा प्रिय भै बरनबास अर पौलुस का दगड़ा मा तुमरा पास भेजा। 26अर यू चुण्यां मनखि वु छिन जौन प्रभु यीशु मसीह का खातिर अपणी जान की बाजी भि लगै दिनी। 27इलै हमुन यहूदा अर सीलास तैं भेजि, ताकि वु खुद भि तुमतै चिठ्ठी मा लिखी बात बतै द्या। 28किलैकि या बात पवित्र आत्मा अर हमतै अच्छी लगि, कि जु कुछ भि खास बात छिन ऊंका अलावा हम लोग तुम पर जादा नियम-कानूनों को भार नि डाला।
29बस तुम लोग इन कैरा कि,
मूरत का अगनै चड़ये जाण वळी चीजों से,
ल्वे खाण-पीण से,
अर गौळा दबै के मुरयां जानबरों की सिकार से,
अर दुसरा का दगड़ा मा गळत सम्बन्ध बणौण से,
इन्दरि सब बातों से तुम दूर रा, अर जब तुम यों सब बातों से दूर रैल्या, त तुमरो भलु ही होलु।
“‘अच्छा त फिर सलाम, प्रभु तुमतै आसीस द्यो।’”
30अर वीं चिठ्ठी मा यों बातों तैं लिखण का बाद ऊंन पौलुस, बरनबास अर ऊं चुण्यां लोगु तैं अपणा इख बटि विदा कैरी। अर जब यू लोग अन्ताकिया नगर मा वापस पौंछिनी, त ऊंन बिस्वासी समुदाय का लोगु तैं इकट्ठा कैरी अर वा चिठ्ठी ऊंतैं दे दिनी। 31अर चिठ्ठी मा लिखीं बातों तैं पैढी के ऊंतैं भौत आनन्द मिली, किलैकि वामा वीं शिक्षा का बारा मा लिख्यूं छौ जै से ऊं लोगु की हिम्मत बढी।
32यहूदा अर सीलास खुद भि परमेस्वर का रैबर्या छा, इलै ऊंन भौत सरी बातों का द्वारा बिस्वासी भै-बैंणो की हिम्मत बढै, अर बिस्वास मा ऊंतैं और भि जादा मजबूत कैरी। 33अर ऊ कुछ दिनों तक ऊंका इख ही रैनी। अर वेका बाद बिस्वासी लोगु न ऊंतैं अपणा इख बटि शान्ति से विदा कैरी, ताकि चुण्यां मनखि वापिस अपणा भेजण वळा लोगु का पास चलि जा। 34[पर सीलास का मन मा इन इच्छा छै कि उ उखि रौ।] 35मगर पौलुस अर बरनबास अन्ताकिया नगर मा ही रुकी गैनी, अर उख ऊंन भौत सा लोगु तैं प्रभु को वचन सिखै, अर शुभ समाचार को परचार कैरी।
पौलुस अर बरनबास का बीच मा वाद-विवाद
36अर कुछ दिनों का बाद पौलुस न बरनबास कू बोलि, “बरनबास भै, इन करद्यां कि जौं-जौं नगरों मा हमुन प्रभु को वचन सुणै, उख जैके बिस्वासी भै-बैंणो बटि मिलद्यां अर दिखद्यां कि ऊंका हाल समाचार कन छिन।” 37अर बरनबास इन चान्दु छौ, कि यूहन्ना जै खुणि मरकुस बुल्दिन वेतैं दगड़ा लि जौ। 38मगर पौलुस वेतैं अपणा दगड़ा मा नि लि जाण चाणु छौ, किलैकि मरकुस पंफूलिया मुलक मा ऊंतैं #खास चे 13:13छोड़ के चलि गै छौ, अर सेवा का काम मा ऊंको साथ नि दिनी। 39अर ईं बात तैं लेके पौलुस अर बरनबास का बीच मा भौत खतरनाक बहसबाजी ह्वे गै, अर ऊ दुईया का दुई अलग ह्वे गैनी। तब बरनबास मरकुस का दगड़ा पाणि का जाज मा बैठि के साइप्रस टापू कू चलि गै। 40अर पौलुस न सीलास तैं चुणी। अर बिस्वासी भै-बैंणो न प्रार्थना कैरिके ऊंतैं प्रभु का सुपुर्द कैरी दिनी, ताकि ऊं पर प्रभु की किरपा बणि रौ। तब ऊ उख बटि चलि गैनी। 41अर सीरिया मुलक अर किलिकिया मुलक बटि ह्वेके वेन बिस्वासी समुदाय का भै-बैंणो तैं ऊंका बिस्वास मा मजबूत कैरी।
Currently Selected:
खास चेलों 15: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
