खास चेलों 6
6
सात मददगारों तैं चुनण
1ऊं दिनों मा जब बिस्वासी लोगु की संख्या भौत बढणी छै, त यूनानी भाषा बुलण वळा बिस्वासी लोग, इब्रानी भाषा बुलण वळा बिस्वासी लोगु की सिकैत करण लगि गैनी, कि हर रोज मिलण वळा खाण-पीण का समान मा हमरि विधवा जनानियों का दगड़ा मा भेदभाव किये जाणु च। 2तब बारह चेलों न बिस्वासी समुदाय का लोगु तैं बुलै के बोलि, “यू ठिक नि च कि हम परमेस्वर का वचन को परचार तैं छोड़ि के खिलाण-पिलाण की सेवा मा लग्यां रा। 3इलै हे मेरा भै-बैंणो, अपणा बीच मा बटि सात खास लोगु तैं चुणा जौं तैं लोग अच्छु मणदा हो, बल्किन मा वु पवित्र आत्मा अर अकल मा भि भरपूर हो, ताकि हम ऊंतैं ये काम की जिमेदारी द्या। 4मगर हम लोग प्रार्थना करण मा, अर वचन की सेवा का काम तैं पूरु करण मा हरेक बगत लग्यां रौला।”
5अर या बात बिस्वासी समुदाय का सब लोगु तैं ठिक लगि, अर ऊंन स्तिफनुस तैं चुणी, अर यू अच्छु बिस्वासी अर पवित्र आत्मा से भरपूर छौ। अर येका दगड़ा-दगड़ि ऊंन फिलिप्पुस, प्रुखुरुस, अर नीकनोर अर तीमोन तैं, अर परमिनास, अर अन्ताकिया नगर का नीकुलाउस तैं चुणी जु कि यहूदी बणि गै छौ। 6अर यों तैं यीशु का खास चेलों का समणि खड़ु किये गै। अर ऊंन यों सातों पर हाथ रखी के प्रार्थना कैरी।
7अर इनकै परमेस्वर को वचन और भि जादा फैलदी गै, अर यरूशलेम नगर मा बिस्वासी लोगु की गिनती और भि जादा ह्वे गै। अर भौत सा पुरोहितों न बिस्वास कैरी अर यू भि ऊंका दगड़ा मा मिली गैनी।
स्तिफनुस पर सतौ
8अर स्तिफनुस पर परमेस्वर की बड़ी किरपा अर सामर्थ छै, इलै उ अदभुत काम अर चमत्कारिक चिन्न कैरिके दिखान्दु छौ। 9मगर उख एक प्रार्थना भवन छौ जैमा वु लोग औन्दा छा जु की गुलामी से आजाद होयां छा। तब यों लोगु का बीच मा बटि कुरेनी, सिकन्दरिया अर किलिकिया अर आसिया मुलकों का कुछ लोग स्तिफनुस का दगड़ा मा वाद-विवाद करणु खुणि खड़ा ह्वेनि। अर वाद-विवाद करण लगि गैनी, 10पर यू लोग वेका ज्ञान की बातों को जबाब नि दे सकिनी, किलैकि स्तिफनुस पवित्र आत्मा की सामर्थ मा ह्वेके बोन्नु छौ।
11तब ऊंन चुपके से कुछ लोगु तैं उकसै कि ऊ इन बोला कि, “हमुन येतैं परमेस्वर का खिलाप मा अर नियम-कानून देण वळा मूसा का खिलाप मा बुरै का शब्द बुल्द सुणी।” 12तब ऊ अध्यक्ष अर शास्त्रियों तैं भड़कौण लगि गैनी, अर ऊंन स्तिफनुस तैं पकड़ी अर न्याय समिति का समणि लेके गैनी। 13तब ऊंन झूठ्ठा गवा खड़ा करिनी। अर झूठ्ठी गवै देण वळा ऊं लोगु बोलि कि, “यू मनखि त हमरा पवित्र मन्दिर अर नियम-कानूनों का विरोध मा ही बोन्नु रौन्दु। 14अर हमुन येतैं इन भि बुल्द सुणी कि, नासरत गौं को यीशु हमरा मन्दिर तैं बरबाद कैर दयालु, अर ऊं रीति-रिवाजों तैं भि बदल दयालु जु हमतै मूसा न दिनी।” 15तब न्याय समिति का सब लोगु न स्तिफनुस का मुख जनै एक-टक ह्वेके देखि, त ऊंतैं वेकी मुखडी स्वर्गदूत का जन दिखै।
Currently Selected:
खास चेलों 6: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
