यूहन्ना 10
10
यीशु ही अच्छु चरवाह च
1तब यीशु न फिर से बोलि, “मि तुम बटि सच्चि ही बोन्नु छौं, कि जु भेड़ों का गुठ्यार का भितर द्वारा बटि नि जान्दु, बल्किन मा कै हैंकी तरफा बटि जान्दु, उ त चोर-डाकु च। 2पर जु कुई द्वार बटि भितर जान्दु, उ भेड़ को चरवाह च। 3अर पैरेदार वे खुणि द्वार तैं खोली देन्दु च, अर भेड़ वे चरवाह आवाज तैं पछ्याणदिन। अर उ अपणी भेड़ों को नौ ले लेके बुलान्दु अर ऊंतैं भैर लि जान्दु। 4जब उ अपणी सभि भेड़ों तैं भैर ले औन्दु, तब चरवाह ऊंका अगनै-अगनै चलदु च, अर भेड़ वेका पिछनै-पिछनै। किलैकि भेड़ वेकी आवाज तैं पछ्याणदिन। 5पर ऊ दुसरो का पिछनै नि जालि, बल्किन वेकी आवाज तैं सुणी के दूर भगेली। किलैकि ऊ वेकी आवाज तैं नि पछ्याणदिन।”
6यीशु न यू उदारण ऊं लोगु तैं सुणै पर जु कुछ वेन ऊं लोगु कू बोलि, वु ऊंका समझ मा नि ऐ, कि यीशु ऊंकू बोन्नु क्या च। 7इलै यीशु न ऊंकू फिर से बोलि, “मि तुम बटि सच्चि ही बोन्नु छौं, कि भेड़ों खुणि द्वार मि ही छौं। 8अर जथगा भि मिसे पैलि ऐनी, ऊ सभ्या का सभि चोर अर डाकु छिन, पर भेड़ों न ऊंकी आवाज नि सुणी। 9द्वार मि ही छौं अर जु कुई मेरा द्वारा भितर परवेस करदु, उ बचयै जालु। अर उ भैर-भितर औणु-जाणु रालु अर वेतैं चारो मिललु। 10अर चोर त केवल चोरी करणु खुणि, जान से मरणु खुणि अर नास करणु खुणि ही औन्दु। पर मि त इलै अयूं छौं, कि तुमतै जीवन मिलु, अर भरपूरी से मिलु।
11“अच्छु चरवाह मि छौं। अर अच्छु चरवाह अपणा भेड़ों का बानो अपणी जान भि दे देन्दु। 12पर मजदूर जु नऽ त चरवाह च, अर ना ही भेड़ों को मालिक, उ भेड़िया#10:12 भेड़िया एक खतरनाक जानबर च तैं औन्द देखि के भेड़ों तैं छोड़ि के भागी जान्दु। अर भेड़िया झपटी के ऊंतैं पकड़दु अर तितर-बितर कैरी देन्दु। 13अर उ त इलै भागी जान्दु, किलैकि उ मजदूर ही च अर वेतैं भेड़ों की कुई चिन्ता नि होन्दी।
14“अच्छु चरवाह मि छौं। अर जन पिता मितैं जणदु, अर मि पिता तैं जणदु, ठिक उन्नि मि भि अपणी भेड़ों तैं जणदु छौ, अर मेरी भेड़ भि मितैं जणदी छिन। 15अर भेड़ों का बानो मि अपणी जान दे देन्दु।
16“मेरी और भि भेड़#10:16 इख मा यीशु इन बोन्नु च कि जु लोग यहूदी नि छिन वु भि मितैं स्वीकार कैरी सकदिन। छिन, जु कि ये गुठ्यार की नि छिन। अर यू जरुरी च, कि मि ऊंतैं भि अपणा गुठ्यार मा लेके औंऽऽ। तब ऊ भि मेरी आवाज तैं सुणला, अर तब एक ही झुण्ड अर एक ही चरवाह होलु।
17“पिता मि बटि इलै प्यार करदु, किलैकि मि अपणी जान देन्दु छौं, ताकि मि वेतैं फिर से पै द्यूं। 18अर कुई भि मि बटि मेरी जान तैं निकाळि नि सकदु, पर मि वेतैं अफि देन्दु छौं। अर मितैं वे देणु को अधिकार च, अर वेतैं फिर पौण को भि अधिकार च। अर इन करण की आज्ञा मेरा पिता न मितैं देई च।”
19अर यों बातों का बाना यहूदियों मा फिर से फूट पोड़ि गै। 20अर ऊं मदि भौत सरा मनखि बुलण लगि गैनी कि, “वे पर त खबेस लग्यूं च, अर उ त बौल्या च, तुम वेकी छुईंयों तैं किलै सुणद्यां?” 21पर दुसरा लोगु न बोलि, “जै मनखि पर खबेस लग्यूं हो, उ इन्दरि बात नि बोलि सकदु। क्या कभि खबेस अन्धा का आंखा खूब कैरी सकदु च?”
यहूदियों को यीशु तैं नकरण
22अर यरूशलेम मा मन्दिर स्थापना को त्योवार मणै जाणु छौ। अर उ ह्यूँद को मैना छौ। 23तब यीशु मन्दिर मा सुलैमान नौ का बरण्डा मा घूमणु छौ।
24तब यहूदी यीशु का चौतरफि ऐके जमा ह्वे गैनी अर वे बटि पूछी, “तू हमतै कब तक दुविधा मा रखलि? अगर तू मसीह छैई, त हमतै साफ-साफ बतै दे।” 25यीशु न ऊंकू बोलि, “मिन तुम मा बोलियालि छौ, पर तुम बिस्वास नि करद्यां। अर जौं कामों तैं मि अपणा पिता का दियां अधिकार से करदु छौं, उई मेरा गवा छिन। 26पर तुम बिस्वास नि करद्यां, किलैकि तुम मेरी भेड़ों मदि नि छाँ। 27मेरी भेड़ मेरी आवाज तैं पछ्याणदिन, मि ऊंतैं जणदु छौं। अर ऊ मेरा पिछनै-पिछनै चलदिन। 28अर मि ऊंतैं सदनि को जीवन देन्दु छौं। अर फिर ऊ कभि नास नि होलि अर कुई भि ऊंतैं मि मा बटि छिनी नि सकदु। 29अर मेरु पिता जैन ऊंतैं मि मा सौप्युं च, उई सबसे महान च। अर कुई भि ऊंतैं पिता बटि छिनी नि सकदु। 30मि अर पिता एक ही छां।”
31तब यहूदियों न फिर से वे पर मरणु कू ढुंगा उठैनि। 32पर यीशु न ऊंकू बोलि, “मिन त अपणा पिता की तरफा बटि भौत सरा भला काम कैरिके दिखैनि। अर ऊं मदि कौं कामों का बानो तुम मि पर ढुंगे मरण चन्द्यां?” 33तब यहूदियों न वेतैं जबाब देई, “कै भला काम का बाना ना पर तू परमेस्वर की बुरै करदी, अर तू मनखि ह्वेके अफ तैं परमेस्वर बतौन्दी, इलै हम त्वे पर ढुंगे मरण चन्द्यां।” 34तब यीशु न ऊंकू बोलि, “तुमरा ही पवित्रशास्त्र मा इन लिख्यूं च कि,
#
भजन 82:6
“‘मिन बोलि, तुम ईश्वर छाँ?’
35“अर जौं मा परमेस्वर को वचन पौंछी, ऊं खुणि वेन ईश्वर बोलि। (अर पवित्रशास्त्र की बात झूठ्ठी नि ह्वे सकदी)। 36अर मितैं पिता न पवित्र ठैरै के दुनियां मा भेजि च। इलै मिन बोलि कि ‘मि परमेस्वर को पुत्र छौं,’ क्या इलै ही तुम बुल्द्यां कि, ‘तू परमेस्वर की बुरै कनि छैई?’ 37अगर जु मि अपणा पिता का कामों तैं नि करदु, त तुम मेरु बिस्वास नि कैरा। 38अर अगर मि करदु छौं, त चै तुम मेरु बिस्वास कैरा या नि कैरा, पर ऊं कामों पर त बिस्वास कैरा, ताकि तुम जाणि अर समझि सैका, कि पिता मि मा, अर मि पिता मा बसदु छौं।”
39तब ऊंन यीशु तैं फिर से पकड़णे की कोसिस कैरी, पर उ ऊंका हाथ बटि बचि के निकळि गै। 40अर उ यरदन गाड का पल्या छाला फिर से चलि गै, जख यूहन्ना पैलि बपतिस्मा देन्दु छौ, अर उखि रौण लगि गै। 41तब भौत सरा लोग वेका पास ऐनी, अर बोन्न लगि गैनी, “यूहन्ना न त कुई भि चमत्कार नि कैरी, फिर भि वेन जु कुछ भि ये मनखि का बारा मा बोलि छौ, उ सब सच्च छौ।”
42अर उख भौत सरा मनखियों न यीशु पर बिस्वास कैरी।
Currently Selected:
यूहन्ना 10: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
