यूहन्‍ना 19

1येका बाद पिलातुस न यीशु तैं लि जैके कोड़ा मरवैनी। 2अर सिपयों न वेको मजाक उड़ौणु खुणि वेतैं राजा की तरौं कांडों को एक मुकुट बूणी के वेका मुण्ड़ मा पेनै, अर वेतैं बैंगनि#19:2 वे जमना मा राजा-महाराजा लोग अर सेठ लोग बैंगनि कपड़ा पैरदा छा। कपड़ा भि पेनै। 3अर ऊ बार-बार वेका समणि ऐके बोन्‍न लगि गैनी, “हे यहूदियों का राजा तेरी जै हो।” अर वेतैं थपड़यौण लगि गैनी।

4तब पिलातुस फिर से भैर ऐ अर ऊंकू बोलि, “देखा, मि वेतैं तुमरा समणि भैर लेके औणु छौं ताकि तुमतै मालूम ह्‍वे जौ, कि मिन वेमा कुई भि दोष नि पै।” 5तब यीशु उन्‍नि बैंगनि कपड़ा अर मुण्ड़ मा कांडों को मुकुट पैरि के भैर ऐ। तब पिलातुस न ऊंकू बोलि, “ये मनखि तैं देखा।”

6अर जन्‍नि मुख्य पुरोहितों न अर मन्दिर का पैरादारों न यीशु तैं देखि, ऊ चिल्‍लै-चिल्‍लै के बुलण लगि गैनी, “वेतैं क्रूस पर चड़ै द्‍या, वेतैं क्रूस पर चड़ै द्‍या।” पर पिलातुस न ऊंकू बोलि, “तुम ही येतैं लि जा, अर क्रूस पर चड़ा किलैकि मितैं वेमा कुई दोष नि दिखेन्दु।” 7तब यहूदियों न वेतैं जबाब देई, “हमरु भि नियम-कानून च अर वे नियम-कानून का मुताबिक उ मरे जाण लैख च, किलैकि येन अफ तैं परमेस्वर को पुत्र ठैरै।” 8अर जब पिलातुस न या बात सुणी त उ और भि जादा डौऽरी गै। 9अर उ फिर से राजमहल का भितर गै अर यीशु तैं पूछी, “तू कख बटि अईं?” पर यीशु न वेतैं कुई जबाब नि देई। 10तब पिलातुस न वेकू बोलि, “तू मि बटि बात किलै नि कनि? क्या तू नि जणदी, कि त्वेतै छुड़ण को अधिकार मि मा च, अर त्वेतै क्रूस पर चड़ौणु को भि अधिकार मि मा च?” 11तब यीशु न जबाब देई, “अगर तुमतै परमेस्वर#19:11 कुछ कागज्दों मा इख मा “मथि बटि” लिख्यूं च। की तरफा बटि यू अधिकार नि दिये जान्दु, त तुमरो मि पर कुई भि अधिकार नि होन्दु। इलै जैन मितैं तुमरा सुपुर्द कैरी, वेको पाप और भि जादा बड़ु च।”

12जब पिलातुस न यू सुणी, त यीशु तैं छुड़णे की कोसिस कैरी पर यहूदियों न चिल्‍लै-चिल्‍लै के बोलि, “अगर जु तुम ये मनखि तैं छोड़ि दिल्या, त फिर तुम महाराजा को विरोध करण वळा छाँ, किलैकि जु कुई भि अफ तैं राजा बणादु उ महाराजा को विरोध करदु।”

13अर यू सब बातों तैं सुणी के पिलातुस यीशु तैं भैर लेके ऐ, अर न्याय आसन पर बैठि गै। यू न्याय आसन ढुंगो को एक चबूतरा पर छौ, अर वे चबूतरो को नौ इब्रानी भाषा मा “गब्बता” छौ।

14अर यू दिन फसह का त्योवार की तयारी को दिन छौ। अर उबरि दिन की करीब बारह बजणी छै। तब पिलातुस न यहूदियों खुणि बोलि, “देखा तुमरो राजा।” 15पर ऊ चिलाण लगि गैनी, “वेतैं लि जा, वेतैं लि जा, वेतैं क्रूस पर चड़ै द्‍या।” पिलातुस न ऊंकू बोलि, “त क्या मि तुमरा राजा तैं क्रूस पर चड़ै द्‍यूं?” तब मुख्य पुरोहितों न जबाब देई, “महाराजा का अलावा हमरु कुई दुसरो राजा नि च।” 16अर आखिरी मा पिलातुस न यीशु तैं क्रूस पर चड़ौणु खुणि वेतैं रोमी सिपयों का सुपुर्द कैरी दिनी।

यीशु तैं क्रूस पर चड़ये जाण

(मत्ती 27:32-44; मर 15:21-32; लूका 23:26-39)

17तब ऊ यीशु तैं लेके चलि गैनी। अर यीशु खुद अपणी क्रूस तैं उठे के एक जगा मा गै। अर वीं जगा को नौ “खोपड़ि की जगा”#19:17 गुलगुता पाड़ दूर बटि मनखि की खोपड़ि तरौं दिखेन्दु, इलै वेकू “खोपड़ि की जगा” बुल्दिन। छौ, जैकू इब्रानी भाषा मा गुलगुता बुल्दिन। 18अर उख ऊंन यीशु तैं क्रूस पर चड़ै। अर वेका दगड़ा दुई और मनखियों तैं भि क्रूस पर चड़ै, एक तैं इनै अर दुसरा तैं उनै अर यीशु तैं बीच मा।

19अर पिलातुस न एक पाटि मा यीशु का कियां अपराध तैं लिख्वे के क्रूस का मथि लगवै दिनी। अर वे पर इन लिख्यूं छौ, “नासरत को यीशु, यहूदियों को राजा।” 20अर जु लिख्यूं छौ, वेतैं भौत सरा यहूदी लोगु न पैड़ी। किलैकि जिं जगा पर यीशु तैं क्रूस पर चड़ये गै छौ, वा जगा यरूशलेम नगर का नजदीक ही छै, अर यू इब्रानी, लतीनी अर यूनानी भाषा मा लिख्यूं छौ। 21तब यहूदियों का मुख्य पुरोहितों न पिलातुस कू बोलि, “यहूदियों को राजा इन नि लिखा, पर इन लिखा कि, ‘येन बोलि की मि यहूदियों को राजा छौं।’” 22तब पिलातुस न बोलि, “एक बार जु मिन लिख्यालि, उ लिख्यालि।”

23जब सिपयों न यीशु तैं क्रूस पर चड़ै दिनी, तब ऊंन वेका कपड़ों तैं ले अर चार भागों मा बांटि दिनी, ताकि हरेक सिपै खुणि एक-एक ह्‍वे जौ। अर उन्‍नि ऊंन कुरता भि लेई पर यू कुरता त सिल्युं नि छौ, बल्किन मथि बटि मूड़ी तक पूरु बणयूं छौ। 24इलै ऊंन आपस मा बोलि, “हम येतैं नि चिरद्‍या पर पांसा डालि के दिखद्‍यां, कि यू कै को जि होन्दु।” अर सिपयों न उन्‍नि कैरी। अर यू त इलै ह्‍वे, ताकि पवित्रशास्‍त्र की लिखीं बात पूरि ह्‍वे जौ। अर वा इन च, कि

# भजन 22:18 “ऊंन मेरा कपड़ा आपस मा बांटि दिनी,

अर मेरा कुरता खुणि पांसा डालि।”

यीशु की अपणी माँ की जिमेदारी

25अर वे बगत यीशु का क्रूस का नजदीक वेकी माँ, वेकी मौसि, अर क्लोपास की घरवळी मरियम अर मगदला गौं की मरियम खड़ि होईं छै। 26जब यीशु न अपणी माँ अर अपणा प्रिय चेला तैं उख खड़ु होयुं देखि, तब वेन अपणी माँ खुणि बोलि, “माँ, देख आज बटि यू तेरु नौनु च।” 27अर वेन वे चेला खुणि भि बोलि, “देख, आज बटि या तेरी माँ च।” अर वे दिन बटि ही उ चेला वींतैं अपणा घौर लि गै।

यीशु की मौत

(मत्ती 27:45-56; मर 15:33-41; लूका 23:44-49)

28येका बाद यीशु यू जाणि गै, कि वेको काम पूरु ह्‍वे गै। अर जन पवित्रशास्‍त्र मा लिख्यूं च, उ भि पूरु ह्‍वे जौ इलै वेन बोलि, #भजन 22:15“मितैं तिस लगि।” 29अर उख सिरका को भोरयूं एक भाँडु रख्युं छौ। इलै ऊंन एक स्पंच तैं #भजन 69:21सिरका मा भिजे अर जुफा की फौंकि मा रखी के वेका गिच्‍चा पर लगै। 30तब यीशु न वे सिरका तैं चुसी के बोलि, “पूरु ह्‍वे गै।” अर मुण्ड़ झुकै के वेन अपणा पराण छोड़ि दिनी।

यीशु की पंणकोखि पर भाले की मरण

31अर उ यहूदियों को सब्त की तयारी को दिन छौ। अर सब्त का दिन लांश क्रूस पर नि रौ, इलै यहूदी लोगु न पिलातुस बटि बिन्ती कैरी कि, “ऊंका टंगड़ा तोड़ि द्‍या, अर जब ऊ मोरि जा, तब ऊंतैं उतारि द्‍या।” किलैकि उ सब्त को दिन एक खास सब्त को दिन छौ। 32इलै सिपयों न जैके जु यीशु का दगड़ा क्रूस पर चड़ये गै छा, ऊं दुईयों का टंगड़ा तोड़ि दिनी। 33पर जब ऊ लोग यीशु का समणि ऐनी, त ऊंन देखि कि उ त पैलि ही मोरि गै। इलै ऊंन वेका टंगड़ा नि तोड़िनि। 34तब एक सिपै न वेकी पंणकोखि पर भाले की मारी, अर तुरन्त उख बटि ल्वे अर पाणि निकळण लगि गै। 35-37अर इन इलै ह्‍वे, ताकि पवित्रशास्‍त्र मा लिख्यूं वचन पूरु ह्‍वे जौ। अर वु वचन इन च कि,

# निर्ग 12:46; भजन 34:20 “वेकी कुई भि हड्‍डी तुड़ै नि जालि।”

अर पवित्रशास्‍त्र का एक हैंकी जगा मा इन भि लिख्यूं च कि,

# जकर्या 12:10 “जैतैं ऊंन भालळ मारी, वु लोग वेतैं दिखला।”

अर जैन यू सब होन्दु देखि, वेन ही या गवै देई अर वेकी गवै सच्‍चि च। अर उ खुद ही जणदु च, कि उ सच्‍च ही बोन्‍नु च। अर वेन या गवै इलै देई, ताकि तुम भि बिस्वास कैरा।

यीशु तैं कबरुन्द रखै जाण

(मत्ती 27:57-61; मर 15:42-47; लूका 23:50-56)

38अर अरिमतिया नगर मा यूसुफ नौ को एक मनखि छौ, जु की यीशु पर बिस्वास करण वळु छौ। पर यहूदियों की डौऽर की वजै से ईं बात तैं छिपै के रखदु छौ।

तब उ पिलातुस का पास जैके बिन्ती करण लगि गै, कि उ यीशु की लांश तैं लि जौ। अर पिलातुस बटि इजाजत मिलण का बाद उ ऐके यीशु की लांश तैं लि गै। 39अर #यूहन्‍ना 3नीकोदिमुस जु कि राति का बगत पैलि यीशु तैं मिलणु कू गै छौ, उ भि वेका दगड़ा मा छौ अर उ लगभग तैंतिस किलो गंधरस अर एलवा नौ की खुशबुदार चीजों को एक घोळ तैं मिलै के अपणा दगड़ा मा लेके ऐ। 40तब ऊंन यीशु की लांश तैं उठे, अर यहूदी लोगु की दफनौण की रीति का मुताबिक वे पर खुशबुदार चीजों तैं लगै के कफन मा लपेटि दिनी।

41अर जख यीशु तैं क्रूस पर चड़ये गै छौ, वीं जगा का नजदीक ही एक बगिचा छौ। वे बगिचा मा एक नई उड़्यार की बणि कबर छै, जैमा कभि भि कैतैं नि रखै गै छौ। 42अर उ यहूदियों को सब्त की तयारी को दिन छौ, अर वा कबर समणि पर ही छै, इलै ऊंन यीशु का सरील तैं वीं कबर मा ही रखी दिनी।

Currently Selected:

यूहन्‍ना 19: GBM

Highlight

Copy