लूका 19

अधिकारी जक्‍कई अर यीशु

1यीशु यरीहो नगर का बाटा बटि ह्‍वेके जाणु छौ। 2अर उख जक्‍कई नौ को एक मनखि छौ। जु की चुंगी लेण वळो को अधिकारी छौ अर यू भौत सेठ छौ। 3अर उ यीशु तैं दिखण चाणु छौ कि आखिर मा उ छैई कु च, पर भीड़ जादा होण की वजै से उ वेतैं देखि नि सकणु छौ, किलैकि उ नाटु छौ। 4इलै उ यीशु तैं दिखणु का बाना भागी के अगनै गै अर एक गूलर का डाळा पर चैड़ि गै, किलैकि यीशु वे ही बाटा बटि औण वळु छौ। 5जब यीशु वीं जगा पर पौंछी, त वेन मथि देखि के वेकू बोलि, “जक्‍कई, झट मूड़ी उतर, किलैकि यू जरुरी च कि मि आज तेरा घौर मा रौ रौंऽऽ।” 6अर उ झट मूड़ी उतरि गै अर बड़ी खुशी से यीशु तैं अपणा घौर लि जाणु खुणि वेको स्वागत कैरी, तब ऊ चलि गैनी। 7अर यू देखि के भीड़ का लोग न बबड़णान्द-बबड़णान्द बोलि, “अरे, यू त एक पापि मनखि का घौर मा रुकणु कू जाणु।”

8अर जक्‍कई न खड़ु ह्‍वेके यीशु कू बोलि, “प्रभु मि अपणी अधि धन-दौलत गरीबों तैं द्‍यूलु अर जौं बटि मिन अन्यो कैरिके लेई ऊंतैं मि चार गुणा वापिस द्‍यूलु।” 9तब यीशु न वेकू बोलि, “आज ये घौर का लोगु तैं छुटकारु मिली गै, किलैकि यू भि अब्राहम की पीढ़ी मदि एक च। 10किलैकि मनखि को पुत्र हरच्यां लोगु तैं खुजै के बचौणु खुणि ही अयूं च।”

दस सिक्‍कों को उदारण

(मत्ती 25:14-30)

11यीशु अर वेका चेला यरूशलेम नगर का नजदीक छा, अर एक बड़ी भीड़ वेका पिछनै चलणी छै। अर सब लोग यीशु की बातों तैं सुनणा छा, अर इन समझणा छा कि अब परमेस्वर को राज तुरन्त दिखैण वळु च। इलै यीशु न ऊंतैं एक और उदारण देके बोलि, 12“एक बार एक राज वंश को मनखि राज्य पर अधिकार पौण का बाना दूर देस कू चलि गै, ताकि वे अधिकार तैं पैके वापिस ऐ जौ। 13अर वेन जाण से पैलि नौकरों मा बटि दस नौकरों तैं अपणा पास बुलै अर ऊंतैं दस सोना का सिक्‍का#19:13 इख मा “मीना” लिख्यूं च अर एक मीना की कीमत ऊं दिनों मा तीन मैनो की ध्याड़ि होन्दी छै। दिनी, अर बोलि, ‘जब तक मि वापिस नि ऐ जौ, तब तक यों से व्यापार कर्यां।’ 14पर वे नगर का लोग ये मनखि बटि नफरत करदा छा, इलै वेका पीठ पिछनै लोगु न वे खुणि यू रैबार भेजि कि, ‘हम नि चन्द्‍यां कि यू हम पर राज कैरो।’

15“पर फिर भि जब वु राज को अधिकार पैके वापिस लौटी। अर जब ऐ गै, त वेन ऊं दस नौकरों तैं बुलै जौं तैं वेन सोना का सिक्‍का दियां छा, ताकि इन पता चलु कि ऊंन ऊं सिक्‍कों बटि कथगा कमै कैरी। 16तब पैलु नौकर ऐ अर वेन बोलि, ‘साब, तुमुन जु सिक्‍का मितैं दियां छा वामा बटि मिन दस सिक्‍का और कमैनि।’ 17अर वेन वेकू बोलि, ‘सबास मेरा नौकर, भौत अच्छु तू भौत कम मा भि भरोसा लैख बणि रै, इलै मि त्वेतै दस नगरों पर अधिकार देन्दु।’ 18तब दुसरा न ऐके बोलि, ‘साब, तुमुन जु सिक्‍का मितैं दियां छा वामा बटि मिन पांच सिक्‍का और कमैनि।’ 19अर वेन वेकू बोलि, ‘तू भि पांच नगरों को अधिकारी ह्‍वे जा।’ 20तब एक और मनखि न ऐके बोलि, ‘साब, जु सिक्‍का तुमुन मितैं दे छौ वु यू च, अर मिन येतैं अंगोछा मा गेड़ मारी के रखियालि छौ। 21अर मि तुम बटि डऽरदु छौ अर मि जणदु छौ कि तुम सक्‍त मनखि छाँ, किलैकि जख तुम नि रखद्‍यां उख बटि तुम उठौन्दा छाँ, अर जख तुमुन बुतयूं नि च उख तुम लवै करद्‍यां।’ 22तब वे मालिक न वेकू बोलि, ‘हे निकमा नौकर, मि तेरा बुलयां का मुताबिक तेरु न्याय करलु, जब त्वेतै पता छौ कि मि सक्‍त मनखि छौं, अर जख मि रखदु नि छौं उख बटि उठौन्दु अर जख मेरु बुतयूं नि उखे मि लवै करदु, 23त फिर तिन मेरा यू धन सौकार का पास जमा किलै नि कैरी? ताकि जब मि औन्दु त वेका दगड़ा-दगड़ि ब्याज भि पौन्दु।’ 24अर जु वे मालिक का पास खड़ा होयां छा वेन ऊंकू बोलि, ‘वे सोना का सिक्‍का तैं वे बटि ले ल्या, अर वेतैं दे द्‍या जैमा दस सिक्‍का छिन।’ 25अर ऊं लोगु न मालिक कू बोलि, ‘साब, वेमा त पैलि सोना का दस सिक्‍का छिन।’ 26अर मालिक न बोलि, ‘मि तुम बटि बोन्‍नु छौं कि, जु कुई परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च त वे बटि वु ज्ञान भि छिनै जालु। 27पर अब मेरा वु दुसमन जु नि चाणा छा कि मि ऊं पर राज कैरुं, ऊंतैं इख ला अर मेरा समणि मारी द्‍या।’”

यीशु को राजा का रुप मा यरूशलेम नगर मा जाण

(मत्ती 21:1-11; मर 11:1-11; यूहन्‍ना 12:12-19)

28अर यों बातों तैं बुलण का बाद यीशु ऊंका अगनै-अगनै यरूशलेम नगर की ऊकाळ चड़ण लगि गै।

29अर जब उ जैतून नौ का पाड़ पर बैतफगे अर बैतनिय्याह गौं का पास पौंछी, त वेन अपणा दुई चेलों तैं इन बोलि के भेजि कि, 30“समणि का गौं मा जा, अर उख पौंछदि तुमतै एक गधा को बच्‍चा बन्धयूं मिललु, जै पर अभि तक कुई नि बैठि वेतैं खोली के इख ला। 31अर अगर कुई तुम बटि पूछलु, किलै खुलणा छाँ रे येतैं? त इन बुलयां कि, ‘प्रभु तैं येकी जरुरत च।’”

32तब वु चेला चलि गैनी, अर जौं चेलों तैं यीशु न भेजि अर जन वेन ऊंकू बोलि छौ, ऊंन जैके ठिक उन्‍नि पै। 33अर जब वु गधा का बच्‍चा तैं खुलणा छा त वेका मालिकों न ऊंतैं पूछी, “किलै खुलणा छाँ रे ये बच्‍चा तैं?” 34अर ऊंन बोलि, “प्रभु तैं येकी जरुरत च।” 35अर तब ऊ वेतैं यीशु का पास लेके ऐनी, अर ऊंन गधा का बच्‍चा पर अपणा कपड़ा डालि के यीशु तैं वेमा बैठे दिनी। 36अर जब उ बच्‍चा पर बैठि के जाणु छौ, तब भीड़ का लोग न वेका आदर-सम्मान का खातिर अपणा कपड़ों तैं बाटा मा बिछै।

37अर जब उ जैतून नौ का पाड़ की उन्दार मा पौंछी, त वेका चेलों न अर वेका पिछनै चलण वळा लोगु की भीड़ न आनन्दित ह्‍वेके ऊँची आवाज मा परमेस्वर को गुणगान कैरी। किलैकि ऊंन भौत सा चमत्कारिक कामों तैं देखि छौ। तब ऊंन बोलि,

38“#भजन 118:26धन्य च उ राजा जु प्रभु का नौ से औन्दु,

अर स्वर्ग मा शान्ति, अर सबसे महान परमेस्वर की बडै हो।”

39तब भीड़ मा बटि कुछ फरीसी दल का लोगु न वेकू बोलि, “गुरुजी, अपणा चेलों तैं झिड़क।” 40अर यीशु न ऊंतैं जबाब देई, “मि तुमतै बतै देन्दु कि अगर जु यू चुप ह्‍वे जाला, त ढुंगा चिलाण लगि जाला।”

यरूशलेम नगर खुणि यीशु को विलाप

41अर जब यीशु यरूशलेम नगर का नजदीक पौंछी, त वे नगर तैं देखि के उ रुंण लगि गै। 42अर वेन बोलि, “कास, आज का दिन पर अगर तू यू समझि जान्दी कि त्वेतै शान्ति कै बटि मिलण, मगर देख अब त यू सब बात तेरी आंख्यों बटि छिपी छिन। 43किलैकि वु दिन औण वळा छिन, जब तेरा दुसमन नगर का चौतरफि नाकाबन्दी कैरी द्‍याला, तब तुमरो नगर बटि बैर-भितर औण-जाण बन्द ह्‍वे जालु। 44अर वु तुमरा द्‍वारा करीं चिणैं तैं ढोळि द्‍याला, इख तक की वु त्वेतै अर त्वेमा रौण वळा बाल-बच्‍चों को भि नास कैरी द्‍याला, अर तुमरो छत्यनास ह्‍वे जालु। किलैकि तिन वे मौका तैं नि पछ्याणी जब त्वे पर किरपा करै गै।”

यरूशलेम मन्दिर मा यीशु

(मत्ती 21:12-17; मर 11:15-19; यूहन्‍ना 2:13-22)

45तब यीशु यरूशलेम मन्दिर मा जैके व्यापार करण वळो तैं इन बोलि के भैर निकळण लगि गै कि, “पवित्रशास्‍त्र मा इन लिख्यूं च कि, परमेस्वर बुल्दु,

46 # यिर्म 7:11; यशा 56:7 “‘मेरु घौर प्रार्थना को घौर होलु,

पर तुमुन येतैं डकैतों को उड़्यार बणैयालि।’”

47अर यीशु हर दिन मन्दिर मा उपदेस देणु रै, पर मुख्य पुरोहित, शास्‍त्री अर कुछ खास लोग वेतैं जान से मरणे की फिराक मा लग्यां छा। 48मगर ऊंकी समझ मा नि ऐ कि यू काम कनकै करै जौ, किलैकि सब लोग यीशु की बातों तैं ध्यान से सुणदा छा।

Currently Selected:

लूका 19: GBM

Highlight

Copy