Luqaasa Mishiraachcho 22
22
Yesusa Bolla Maqeteth
(Mato 26:1-5; 14:16; Mar 14:1-2; Yoha 11:45-53)
1He wode Paaziga geetettiza ukeththara bonchchettiza ba7aaley mati uttides.#Kessa 12:1-27 2Qeeseta halaqatinne xaafeti hankko dere asaas babbiza gishshas Yesusa dhayssana oge koyida.
Yesusa Aaththi Immanaas Yuhuda Zoreteth
(Mato 26:14-16; Mar 14:10-11)
3Yesusa kaalliza tammanne nam7atappe Asqoronto dere as Yuhuda geetettizayssan Xala7ey gelides. 4Yuhudaykka qeeseta halaqataakkonne Xoossa Keeththa alaafetakko biidi isttas Yesusa wostti aaththi immanakko isttara zorettides. 5Isttika hessan ufayettidi miishshe immanaas izara giigida. 6-7Yuhudaykka istta qofaa dosides; Yesusa isttas asi be7ontta aaththi immanaas injje wode naagishin Paaziga dorsaa shukkidi ukeththara bonchchiza ba7aale gallassi gakkides.
Yesusi Bana Kaallizaytara Paaziga Kawo Muus
(Mato 26:17-25; Mar 14:12-21; Yoha 13:21-30)
8Yesusikka bana kaallizayta, «Paaziga kawo maanaas biidi nuus giigsite» giidi Phexroosanne Yohannisa kiittides.
9Isttika, «Nu awan giigsana mala koyay?» gida.
10Izikka zaaridi, «Intte gede Yerusalaame katama gelishin haaththa oto tookkida asi inttena demmana; intteka izi biidi geliza keeththe gakkanaas iza kaallite. 11Keeththaades, ‹Astamaarey tana kaallizaytara Paaziga kawo maanaas imaththa keeththi awan dizee?› gees giite. 12Izikka imaththas giigettida aahoso inttena bessana; izi bessizason giigsite» gides. 13Isttika biidi Yesusi gida mala keeththaa demmidi Paaziga heen giigsida.
Godaa Kawo Eko Woga
(Mato 26:26-30; Mar 14:22-26; 1Qoro 11:23-25)
14-15Wodey gakkida mala Yesusi Hawaaretara quma maaddan uttidi, «Tani waaye beyanaappe kasetada hayssa Paazigaa inttenara issife maanaas keeha amottadis. 16Ta inttes tumu gays; Xoossa Kawoteththan hayssa birsheththi polettana gakkanaas hayssa Paazigaa nam7anththo ta inttenara miikke» gides.
17Woyneppe oosettida ushshaa xuu7ara ekkidi Xoossaa galati simmidi, «He7ite; wurikka izappe uyite» giidi isttas immides. 18«Ta inttes tumu gays; hayssafe guye Xoossa Kawoteththi yaana gakkanaas nam7anththo ha woyne ushshaafe uyikke» gides.
19Ukeththaa ekkidi Xoossaa galatides; izappe isttas menththi immidi, «Hayssi intte gishshas imettana ta asho leemiso gidiza gishshas hayssa ubba wode tana qoppanaas ooththite» gides. 20Izaththoka kawoppe guye ushshaa xuu7a denththidi, «Hayssi ushshay intte gishshas ta suuththaan hanana ooraththa caaqo woga.#Er 31:31-34
21«Gido attiin tana aaththi immanaade kushey ta kushera issife maaddan dees.#Maza 41:9 22Asa Nay kasetidi iza gishshas hananayssi wuri uttida mala izi baana; gido attiin iza aaththi immizaades aayye ana!» gides.
23Isttika hessa ooththanay oonee? giidi ba giddon issoy issaa oyshereththida.
24Qasseka, «Ooni oonappe aadhdhizaakko» giidi ba giddon issoy issaara palamettida.#Mato 18:1; Mar 9:34; Luqa 9:46 25Yesusikka istta, «Dere haariza kawoti ba dere asaa wolqqara haareettessinne isttika lo7o kawota geetettidi xeygetteettes.#Mato 20:25-27; Mar 10:42-44 26Intte gidikko hessaththo hanopite; inttefe gita gididaadey woykko ta ooppeka aadhdhays giza asi ubbaafe qeeri naa mala gido; haarizaadey haarettizaade mala gido.#Mato 23:11; Mar 9:35 27Quma eqqidi mizidaadefenne uttidi mizaadefe ooni aadhdhizee? Uttidi mizaade gidennee? Tani qasse intte giddon ashkara mala days.#Yoha 13:12-15
28«Intte gidikko taappe shaakettontta ta waayishin ta matan eqqidayta. 29Ta Aaway tana kawoththidayssa mala tanikka ta kawoteththaan inttena kawoththana. 30Hessika ta kawoteththan ta maaddafe intte maana malanne uyana mala; qasseka ta kawoteththa algan uttidi tammanne nam7u Isra7eele nayta bolla pirdanaassa» gides.#Mato 19:28
Phexroosi Iza Kaddanayssa Yesusi Kasetidi Yootides
(Mato 26:31-35; Mar 14:27-31; Yoha 13:36-38)
31Qasseka Yesusi Simoona xeygidi, «Simoonaa! Xala7ey inttena gistte mala suragganaas woossides. 32Gido attiin tani neeppe ammanoy dhayontta mala ne gishshas Xoossaa woossadis; nekka simmida wode ne ishata minththeththa» gides.
33Simoonikka zaaridi, «Godoo! Ta nenara qashettanaassinne hayqqanaas giiga uttadis» gides.
34Yesusikka zaaridi, «Phexroosaa! Hach kuttoy issito waassanaas, ‹Ta iza erikke› gaada heedzdzuto ne tana kaddana» gides.
35Qasseka Yesusi istta, «Ta inttena kase caammay, korojoynne qaraxiitey baynda kiittida wode inttes aazi paccidee?» gi oychchides. Isttika, «Aykkoyka paccibeenna» gida.#Mato 10:9-10; Mar 6:8-9; Luqa 9:3; 10:4
36Izikka zaaridi, «Ha7i gidikko korojoykka, qaraxiiteykka dizaadey oykko; giththa mashshay bayndaadey ba may7o bayzidi shammo. 37Ta inttes tuma gays; ‹Makkallatara izi issife taybettides› geetetti kase xaafettida qaalay ta bolla polettana bessees; ta gishshas xaafettidayssas poloy tumappe gakkides» gides.#Isa 53:12
38Iza kaallizayti qasse, «Godoo! Hekko nam7u giththa mashshati hayssan deettes» gida. Izikka iza gishshas, «Hayssi gidana» gides.
39Kase izas lose gidida mala pude Dabrazayte geetettiza zuma bolla kezi bides. Iza kaallizaytikka iza kaalli bida. 40Hee gakkida mala, «Intte paacen gelontta mala woossite» gides. 41Yesusi bana kaallizaytappe asi shuch olidi gaththanaaso mala haakki biidi gulbati woossides. 42«Ta Aawawu! Ne shene gidikko hanno metoyo taappe digga; gido attiin ne sheney hanoppe attiin ta sheney hanoppo» giidi woossides. 43Saloppe Kiitanchchay qonccidi Yesusa minththeththides. 44Izikka keehi xuugettidi woossishin iza asateththaafe caway suuththa mala gukkides.
45Woosappe dendidi bana kaallizaytakko bides. Isttika izas mishettidi qoppishin dhiskoy efidaashe Yesusi isttako yiidi, 46«Ays dhiskeetii? Intte paacen gelontta mala ha7i dendidi woossite» gides.
Yesusi Aadhdhi Imeteththinne Oyketeth
(Mato 26:47-56; Mar 14:43-50; Yoha 18:3-11)
47Izi buro haasayan dishin Yesusa kaallizaytappe issoy Yuhuda geetettizayssi banara daro asaa kaaleththi ekki yiidi Yesusa yeeranaas izakko shiiqides. 48Gido attiin Yesusi iza, «Yuhudaa! Tana Asa Naa yeeron aaththa immay?» gides.
49Yesusa yuuyi aadhdhi diza asay hanoza lo7eththi xeellidi, «Godoo! Haytantta mashshara buththinoo?» gida. 50Isttafe issoy qeeseta alaafe ashkaraza ushachcha hayth mashshara qanxxides.
51Yesusi istta, «Intte ha7i taas aggite!» giidi ashkaraza hayth bochchidi paththides.
52Qasseka iza oykkana yida qeeseta halaqata Xoossa Keeththa alaafetanne cimata, «Panga oykkiza asa mala giththa mashshanne durqqa ekkidi yidetii? 53Gallas gallas ta inttenara Xoossa Keeththan dishin ta bolla kushe woththibeekketa; hayssi dhumay kawotida intte wode» gides.
54Hessafe guye Yesusa oykki ekkidi qeeseta halaqaso gelida; Phexroosikka Yesusa haahora kaallides. 55Asay qeeseta halaqa gibbe giddon tama eeththidi ho7ishe issi bolla uttidaashe Phexroosikka isttara issife uttides. 56Issi garadeya Phexroosi tama ho7izaytara uttidayssa beyadanne tishshi histta xeellada, «Hayssi addezikka Yesusara dees!» gadus.
57Phexroosikka, «Hanne maccassayee! Ta iza erikke» giidi kaddides.
58Guuth gam7ishin hara issaadey iza be7idi, «Nekka izara dizaytappe issaa gidikkii?» gides. Phexroosikka, «Haysso tani isttara diikke!» gides.
59Issi saate mala gam7ishin hara asi qasseka, «Galila as gidiza gishshas sidhey baynda hayssi izara dees» gides.
60Phexroosikka qasse, «Haysso ne gizaade ta erikke!» gides. Hinno gi kessontta dishin kuttoy waassides. 61Godaykka Phexroosakko yishe xeelliin Phexroosi, «Hach kuttoy waassanaas ne tana heedzdzuto kaddana» giidi Goday kase yootoo qaalay iza wozinan karppi gides. 62Phexroosikka kare kezidi hiqimi yeekkides.
63Yesusa qachchidi naagiza asatikka iza bolla qidhi qidhi kaa7ishe shocereththida. 64Iza ayfe goozidi, «Ne nabe gidikko nena shociday oonakko ane era!» giidi oychchida. 65Hara daro cashsha qaalara kawushshida.
Yesusa Ayhudata Pirda Duulata Sinth Efida
(Mato 26:59-66; Mar 14:55-64; Yoha 18:19-24)
66Gadey wontiin dere Cimati, qeeseta halaqatinne Muse wogaa tamaarsizayti duulata shiiqidi Yesusa duulatakko shiishshida. 67Isttika Yesusa, «Ne Kirstoosaa? Ane nuus yoota» gida. Yesusikka, «Ta inttes yootidaakkoka tana ammanekketa. 68Ta inttena oychchidaakko taas zaarekketa. 69Gido attiin ha7ippe doommidi Asa Nay wolqqama Xoossa ushachchan uttana» gides.
70He wode wurikka, «Histtiin ne Xoossa Naa?»#22:70 Xoossa Naa? giza oyshay issi issi bagga Gamoththo qaalan Xoossa nay? geetetti oyshettees. giidi oychchida. Izikka, «Ta Xoossa Naa gididayssa intteka geeta» gides.
71Isttika, «Hekko izi ba doonara markkattishin nu hayththara siyidos; hayssafe hara markka aazas koshshizee?» gida.
Currently Selected:
Luqaasa Mishiraachcho 22: GM
Highlight
Share
Copy
Want to have your highlights saved across all your devices? Sign up or sign in
The Word for the World International
