Lujia 10
10
Daghasan Kunlane Peizhi Echighazho
1Ene shiqinse khuinashi Ezhan pse 72 gie kun sunghudene goyane echiku go chenshi go oronlade ghuaghuaji melie peizhi echighawo. 2Hhelade kieliewo, "Zhonjia olon wo, wiliechi choghon wo. Ta zhonjiani ezhanyi xiahua giezhi wiliechilai peidene zhonjiane ghuragha gie. 3Ta echindu. Bi tai peizhi echighase ghoni ghughanlai zhanghei dunda echighasan niekielien wo. 4Qienbao, kuabao, maheine bu barei. Mo jiere kunlai chujieghese kielien bu asa. 5Alinie giede orose ta man pinnan onu giezhi xien asa. 6Kunla tai jienliese hhelade pinnan irene, ulie jienliese pinnan tai jiere irene. 7Ta alinie giede souse izhigie nie giede sou. Kunla yan ochizhi ijiekuni ogise yan kere. Eneshi wilie giechen kunde ogikuni enbene. 8Alinie chenshide tai jienliezhi yan beilase yan ijie. 9Hhendedu gientulani goudaghazhi 'Hudai gojia chadashiwo.' giezhi kielie. 10Alinie chenshide tai ulie jienliese geidoude echidene kielie, 11"Tai aghinni turailiuzhe kon jieresene kui boughazhi fandui giene. Ingieliuzhe Hudai gojia chadashisei ta mejiendu." giezhi. 12Bi tande kielieye, panjiku udude hhe chenshi shouiku zeinan Sodomase da fugie wo. 13Gelaxin, Bosaida, tande gou widawo. Tai dunda giesan nenlitu shiqinni Tuilo, Xidunde giewoshi hhela eqighanse madei zhodene jierene funiesun teizhi zemin jiere soudene geizhen giewo. 14Panjiku shihoude ta shouiku zeinan Tuilo, Xidunse da fugie wo. 15Jiabainun,
Chii undudaghazhi asiman jiere khireighanu?
Chii dozoheide anda boughane!"
16"Kun tai kielienyi chenliese mini kielienyi chenliezho. Tai kielienyi ulie chenliese mini kielienyi ese chenliezho. Mii ulie jienliese mii peisan Hudai ese jienliezho."
17Hhe 72 gie kun bayasuzhi kharei ire kieliewo, "Ezhan! Chii niereghala giese sheitanlaye bijienyi feiwo."
18 Ersa hhelade kieliewo, "Bi chujieghese Ibilisi asiman jierese shanjien mutun anda bou irewo. 19Bi tande moghei, xiezilai taizhi duitoulai soyuji lilianse injizhi daoku qienli ogiwo. Yanliuzhe tai hei dane. 20Ingieliuzhe sheitanla tai feiwo giese bu bayasudene nierelaitai asiman jiere jilasande bayasundu."
Hudade Bayasuzhi Kieliewo
(Mat 11:25-27; 13:16-17)
21Ene shihoude Ersade Shenlin durudene bayasuzhi kieliewo, "Asiman zeminni Ezhan, Ada, chii mafan gieghawo. Chi ene shiqinlani agheli, erlintu kunlade niuighazhi ga kewosi mutun kunlade mejieghawo. Ada, enbene, eneshi chi duranghalane giesan wo. 22Soyujilashi man Adami made ogisanwo. Adase chugo kewonni kiema ulie mejiene. Kewon, pse kewon yenyi mejieghasan kunse chugo Adani kiema ulie mejiene."
23 Ersa kharei ochira tujiladene danlin kieliewo, "Ta ede uzhesei uzhese tande fuqi wine. 24Bi tande kielieye, olon xienzhi, honshanla ta uzhesei uzhene giezhoma, uzhe dazho. Ta chenliesei chenliene giezhoma, chenlie dazho."
Samaliyai Gou Kun
25Nie jinwun loushi bosizhe Ersai shiizhi asazho, "Loushi, bi matui giese chanqiku aminni jienliene?" 26Ersa kieliewo, "Guijin jiere yan huaizho? Chi yan onshiwo?" 27Hhe kieliewo, "Chi qienbuji zhughe, qienbuji jinshen, qienbuji lilian, qienbuji sumulakughalane Ezhan Hudadene ore. Pse goyadene mutun giebeidene ore." 28Ersa kieliewo, "Chi kieliesan oluzho. Chi qingiezhi giese amiturane." 29Hhe kun goyane olusei mejieghane giezhi Ersade asawo, "Kienshi mini giebei wo?"
30 Ersa kieliewo, "Nie kun Yelusalense Yeligede boukude qiandaolani khade orowo. Eghizhi fugughakude kudene jienlaini agi echi benda jiewo. 31Ingie nie buwa hhe mose bou, hhei chujieghedene mo bienzighun yo daowo. 32Pse nie Liwi kun hhende ire chujieghedene ye mo bienzighun yo daowo. 33Ingie nie Samaliya kun mo yokude hhende ire, ubali xiizhi 34shidani echi shankouni tosun, jiughala waghazhi bouizhi goudaghadene enzheghe jiere achi lishede echi zhaogu giewo. 35Khuichudu ghua miengui lisheni ezhande ogizhi kieliewo, 'Chi enei uzhezhi zhaogu nie gie. Baer ulie kuruse bi pse irese ogiye.'" 36Ersa kieliewo, "Chi sumula, ene ghurulie dundase alinieshi qiandaolai khade orosan kunni giebei wo?" 37Jinwun loushi kieliewo, "Hhe ubali xiisan kun wo." Ersa kieliewo, "Chi ye echidene qingiezhi gie."
Mada Mereiyenghalani Giede
38 Ersa tujilaghalane Yelusalenni mo jiere echikude nie aghinde orowo. Hhende nie biereini niereni Mada giene. Ersai jienliezhi giedene echiwo. 39Giedeni nie oqinjiu wine. Niereini Mereiyen giene. Ersai kon shida souzhi goude kielienyini chenliezho. 40Mada zhochen ushilazhi hende munan gie Ersade ire kieliewo, "Ezhan, chi ene oqinjiuimi ulie gonjinu? Enende souzhi jin mini wilie gieghazho. Ede chi kieliezhi made banman giegha!"
41Ezhan kieliewo, "Madaya, chi olon wilie giene giezhi munan giezhoma, 42zhunyonishi nie wo. Mereiyen gounii sunghuwo, kiema agizhi echi dane."
Currently Selected:
Lujia 10: sce
Highlight
Share
Copy
Want to have your highlights saved across all your devices? Sign up or sign in
© 2020-2024 River Street Publishing.
