Lujia 11

Onxian Giekuni Surughazho

(Mat 6:9-15; 7:7-11)

1Niudude Ersa nie oronde onxian giezho. Onxian giezhi baludene nie tuji Ersade kieliewo, "Ezhan, Yaheiya tujiladene sughasan mutun chiye bijiende onxian giekui surugha." 2Ersa hhelade kieliewo, "Ta onxian giekude ingiezhi kielie,

'Ada, chi nierene zhiguishigha.

Chii gojiai iregha.

3Niudunieku ijiuni niudunie bijiende ogi.

4Bijienni zuini mienlie.

Bijiende zui fanjisan kunlai bijienye mienliewo.

Bijienyi shiikude bu echigha.'"

5 Ersa hhelade kieliewo, "Tai dunda kien nie kun banyedei zhanlienne giede echi zhanlien, made ginansene ghuran ghuizhi ogi. 6Bijienni giede nie zhochen irewoma, ijiuni widawo giese 7hhe gie sudorose mii bu pofansagha. Wijienlani man khazhi kewosilare hhantu kijiezho. Bosizhi chade ogiku chijia wo giene. 8Bi tande kielieye, ene kun zhanlien wo giezhi ulie oginema, ninkounin keresei uzhese bosizhedene ogine."

9"Tande bi kielieye, ta xiahua gie, tande ogine. Erei, ereizhi olune. Wijienni eghi, tande niene. 10Xiahua giechen kunlade ogine. Ereichen kunla ereizhi olune. Wijienni eghichen kunlade niene. 11Tai dunda ada danlachen kien kewon zhaghasun kerese moghei ogine? 12Endeghei kerese xiezi ogichen kun uwola? 13Ta gou wiliuzhe kesiladene gouni ogikuni mejiene, asiman jieredu Ada xiahua giechen kunlade Shenlinni genjia ulie oginu?"

Hudai Lilianghala Ibilisini Tou Khighazho

(Mat 12:22-30; Mak 3:20-27)

14 Ersa nie kunyi sudorose yaba sheitanni tou khighawo. Ingie hhe yaba kielien kielie qiise kunla man ghanirazho. 15Ingie niezhan kunla kieliezhi hhe sheitanni touzi Biexibui kouizhi sheitan touzho giewo. 16Pse niezhan kunla hhei shiizhi asiman jierese iresan ghudureqi xienjigha giezho. 17Ersa hhela yan sumulasei mejiedene kieliewo, "Alinie gojia goyalane eghinduse hontan gholune. Alinie giei kunla goyalane eghinduse bixindane. 18Ta kieliese bi Biexibui kouizhi sheitan touzho, Ibilisi goyalane eghinduse hhei gojia matugie beine? 19Bi Biexibui kouizhi sheitan touse tai tujila kienyi kouizhi sheitan touzho? Ingiese tai tujila zhenmin giese tanughun codazho. 20Bi Hudai nenlighala sheitan touse Hudai gojia tande irezho. 21Nie uqine qiendaghasan kun giene sagheise dunxila man pinnan wo. 22Hhense lilian pse fugietu kun ire, hhei eghizhi kouisan uqilaini agi echi, dunxilani man ghughawo. 23Mii miende ulie beise mii duitou wo. Mare ulie hhantulachen kunshi sandachen kun wo."

24"Nie zannan ruhher kunni jierese likai giedene usu witu oronde izhigie yozhi hhamuraku oron ereizho. Ereizhi olu dadene kieliewo, 'Bi yen khizhesan hhe giedene echine.' 25Khareizhi echi nie uzhese shuzhi goudagha jiezho. 26Ingie khizhi echi dolon doghun ruhheryi uduruzhi ire souwo. Ingiese hhe kunni qinkon melieshidakude pse ese kuruwo."

Zhenzhenji Fuqi

27 Ersa zhen kieliekude kunlai dundase nie bierei fugiede waradazhi kieliewo, "Chini laizhi gogoghazhi fugiedaghasan kunde fuqi wine!" 28Ersa kieliewo, "Hudai kielienni zunjizhi giesan kunde zhenzhen fuqi wine."

Yunusini Ghudureqi

(Mat 12:38-42)

29Kun olodokude Ersa pse kieliewo, "Ene idai kunla yale intu doghun wo. Ghudureqi kerezhoma, Yunusii ghudureqise chugo xienjighaku ghudureqi uwo. 30Yunusi Niniwi kunlade oluzhi ghudureqi gholusan mutun Kunnikewonye ene idaini kunlade ghudureqi gholune. 31Panjiku udude nanfanni bierei honshan bosizhedene ene idaini kunlade zui jinjine. Hhe gholose Sulumaneni aghelini chenliele irewo. Uzhe, enende Sulumanese pse fugieni wine. 32Panjiku udude Niniwi kunla bosizhezhi ene idai kunlai zuini jinjine. Niniwi kunla Yunusi chonjisei chenliedene geizhen giewo. Uzhe, Yunusise pse fugieni enende wo!"

Beyeni Zhula

(Mat 5:15; 6:22-23)

33"Zhulai jienjidene jiude niuighachen kun uwo. Ighaghala komorochen kunye uwo. Zhula teiku teizi jiere teise kunla orozhese chujieghene. 34Nudunchiishi beyeni zhula wo. Nudunchii goushi beyechii man gieghan wo. Nudunchii gou wise beyechii man khara wo. 35Goyane xianxide uzhe, pse sudorodu gonchii kharalane. 36Chii jiere kharani goujighanida wi man gieghanshi zhula chini zhouisan mutun gieghan wo."

Jinwun Loushilani Sugiezho

(Mat 23:1-36; Mak 12:38-40)

37 Ersa kielien kieliekude nie Falisai kun Ersai xinlawo. Ingie Ersa echidene xi jiere souwo. 38Ersa khane ese wagha ijiese hhe Falisai kun ghudure wo giezho. 39Ezhan hhende kieliewo, "Ta Falisai kun beizi, jiezi mienzii wagha arughazhoma, tai sudoro jin qianlaku okhoni duruzho. 40Ta yama mejie dachen kunla, tani ghadanedui zhayaghasan Huda tani sudorodui ese zhayaghawu? 41Ta sudorodedu dunxilane jiahui kunlade ogi. Qingiese tande man ganjin wo."

42"Ingiezhoma, ta ene Falisai kunlade gou widawo! Ta bohe, huajio, yanyanji cailasene Hudade ushirei ogizhoma, gundande gieku, Hudade orekuni zhunshi ulie giene. Enelai ta indan giekui wo, psedulaiye ulie giekui pusho."

43"Ta ene Falisai kunlade gou widawo! Ta huitanni undu wizide soukude xiqi wo. Geidoude kunla tande kielien asakude xiqi wo. 44Tande gou widawo! Ta hao witu meza niekielien wo. Kunla mejie dazhi taine."

45Nie jinwun loushi Ersade kieliewo, "Loushi, chi ingiezhi kieliese bijienyiye jiuren gieghazho." 46Ersa kieliewo, "Ta jinwun loushiladeye gou widawo! Ta kunlai jiere bazilie daku qimutu gundu danzii beilieghadene goya kha ghurunghalane goujida banman ulie giene. 47Tande gou widawo! Tai xienrenla alasan xienzhilade ta meza giezho. 48Ingiese hhela giesei ta ganzhen beizhi zanchen giezho. Hhela alawo, ta meza giezho. 49Hudade agheli olonshi ingiezhi kieliewo, 'Bi xienzhi, peisan kunlai hhelade echighane. Hhela niezhanlai heine, niezhanlai alane.'"

50"Ingiese duyai zhayaghasanse alasan soyuji xienzhilai chusunni guini man ene idai kunlai jiere teine. 51Jiushi Hhabini alasanse qiizhi izhi sidagha gieku teiziji dajien dunda Sajialiyai alasan zuini guini man ene idai kunlai jiere teine. Enbene, bi tande kielieye, ene guini ene idai kunlai jiere teine. 52Ta jinwun loushilade gou widawo! Ta Hudai taniku yeshii agizhi echidene goyalane ese orowo, orone giechen kunlaiye ese oroghawo."

53 Ersa enense ghadane khireise jinwun hanjia, Falisai kunla Ersai hende fandui giedene unqi olon asazhi 54kieliensei babin ereine giezho.

Currently Selected:

Lujia 11: sce

Highlight

Copy