Lujia 21

Guafu Baer Teiku

(Mak 12:41-44)

1 Ersa qiorunne qila bayan kunla mechii baer teiku xianzide baer teikuni uzhezho. 2Pse nie nanxin guafu hhende ghua fenfenzi baer teisei uzhewo. 3Ersa kieliewo, "Bi tande shuhua kielieye, ene nanxin guafu soyuji kunlase olon teiwo. 4Kunla olonsene teiwo. Guafude yama uwoma, udu daoku baerlane man teiwo."

Mechini Cheikuni Melie Kieliezho

(Mat 24:1-2; Mak 13:1-2)

5Niezhan kunla mechini seighan tashi, Hudade ogisan mureghala zhonhon giesei kielienduzho. Ingiese Ersa kieliewo. 6"Ta chanlasan enelai hhe shihou kuzhese cheizhi tashi jiere tashi nieda ulie jiene."

7Hhela Ersade asazho, "Loushi, yan xienzide ene shiqinla fashen giene? Enela fashen giekude yan zunji wine?" 8Hhe kieliezho, "Ta xioxin giezhi kunlai bu piendagha. Olon kunla mii niereghala iredene bishi hhe enbene, ede shihou kuzhewo giese ta bu dagha. 9Ta eghinduzhi londasan xioxini sonosuse bu ayi. Ene shiqin xien fashen gienema, duya baraku deigo ulie kuzhene." 10Pse hhelade kieliewo, "Minzu minzula eghindune, gojia gojiala eghindune. 11Zemin fugiede gojiolune, gochude oliesuku inzhanku gien wine, asiman jierese fugie ghudureqi irezhi ayighane."

12"Ene shiqin iretula kunla tai heizhi bareidene huitan, bafanzide jiuine. Mii yenyinghala tai honshan, shenzhanlai melie lai echine. 13Hheshi made ganzhen beiku jihui wo. 14Panjichen kunde matugie huida giekui melieshi zhunbei bu gie. 15Bi tande duitoulatai tai kieliezhi dao daku kielien, agheli ogine. 16Lien ada, ana, gaijiu, qingu, zhanlienlaye tai ghudanduzhi niezhanlani alane. 17Mii yenyinghala kunla man tai henjine. 18Ingieliuzhe tai niekozi usunye ulie widane. 19Ta izhigie rennai giese goyane jiuine."

20"Budui iredene Yelusalenyi wiqikui ta chanlase hhe widaghaku udu ghujinlasei mejiene. 21Ingiekude Yudayade sousan kunla, ulade piile echi. Chenshini kunla ghadane khirei. Xianni kunla chenshide bu oro. 22Enezighan udushi faiku udu wo. Jinwun jiere huaisan kielienyi gholughane. 23Hhe udude kewosi laisan, gogoghasanlade gou widawo! Zemin jiere zeinan wo, Hudai hokuku ene bexinlai jiere irezho. 24Hhela khudogho doura fugune, pse bareidene go gojiade lai echine. Niman kunni udu kurutula niman kun iredene Yelusalenni tai pindaghane."

Kunnikewon Ireku

(Mat 24:29-31; Mak 13:24-27)

25"Hhe shihou kuzhese naran, sara, hodunla bienjizhi zunji uzheghane. Haide lan jiulizhi onghonose zemin jieredu gojiala man jindazhi matugiekui mejie dazho. 26Asimanyi lilianla gojioluse duya matui gholune gie kunla ayidene injirene. 27Ingiekude Kunnikewon nenli, famanude olien jierese irekui kunla chanlane. 28Ene shiqin kaishi giese bosizhedene qiorunne qila. Tai shuiku udu chadashiwo."

29 Ersa hhelade bilazhi kieliewo, "Ta uhuago mutun, psedu mutunlai uzhe. 30Mutun lachen keikui ta uzhese khaluncha orokui mejiene. 31Taye niekielien wo. Ta ene shiqinla fashen giesei chanlase Hudai gojia chadashisei mejiene. 32Bi tande shuhua kielieye, ene idaini kunla fugutula ene shiqinla man gholune. 33Asiman zemin widaliuzhe mii kielien kenjin ulie widane."

Chan Jinxin Giendu

34"Ta jinxin giendu. Pse ta hunnerei daghazhi ochizhi ijiekude, duyani shiqinghala munan giezhi zhugheitai kunzhi giekude hhe udu irene. Hhe shihou irese onghala zhaghasun bareiku niekielien wo, mejie dakude irene. 35Hhe udu irekude zemin jiereshiku kunlade man irene. 36Ta chan onxian giezhi jinxin giendu. Qingiese ene shiqin irekude holuzhi andadene Kunnikewonni melie bei shidane."

37 Ersa niudunie mechide kunlade surughazho. Niexiinie Ganlanshande echizhi souzho. 38Bexinla man eqiemagha eqie mechide Ersa jianjisei chenliele irezho.

Currently Selected:

Lujia 21: sce

Highlight

Copy