Lujia 22

Ersai Alane Giezhi Shanlian Giezho

(Mat 26:1-5, 14-16; Mak 14:1-2, 10-11; Yah 11:45-53)

1Jiulidaosan Jie giezhi urusan Tanmien Jie kuzhewo. 2Fugie buwa, jinwun hanjiala bexinlase ayise yan banfaghala Ersai alase gou wo giezhi sumulazho.

3Ingiekude Jialie kun Yudani sudoro Ibilisi orowo. Hheshi 12 gie tuji dundadu nie wo. 4Yuda fugie buwa, mechi sagheisan kunlare Ersai matugie ghudandukui shanlian giele echiwo. 5Hhela bayasuzhi Yudade baer ogikui dain giewo. 6Yuda tunyi oludene bexinla wikude Ersai ghudanduku jihui ereizho.

Jiulidaosan Jie Zhunbei Giezho

(Mat 26:17-25; Mak 14:12-21; Yah 13:21-30)

7Tanmien Jie kuzhezhi Jiulidaosan Jieni ghoni zharuku udude 8Ersa Beduru Yaheiya ghualani peizhi kieliewo, "Ta matande Jiulidaosan Jieni ijiuni zhunbei giele echi. Matan ijienduye." 9Hhela asawo, "Bijien khala zhunbei giene?" 10Ersa kieliewo, "Ta chenshide orokude nie tunzi usu qilasan kunyi penjine. Ta hhei daghazhi hhe orosan gie doura orodene 11giei zhanguijide kielie, 'Loushi chade asazho, "Bi tujilarene Jiulidaosan Jieni daoghaku gie khala wo?"' 12Hhe tande lou jiere man qiendaghasan nie fugie gieni uzheghane. Ta hhende zhunbei gie." 13Hhela echidene chanlasan Ersa kieliesanghala niekielien wo. Ingie hhela hhende Jiulidaosan Jieni zhunbei giewo.

14Shihou kuzhese Ersa shitularene hhantu xi souwo. 15Ersa hhelade kieliewo, "Bi shouku gieku melie tanre hhantu Jiulidaosan Jieni ijieku hende duran wine. 16Bi tande kielieye. Jiulidaosan Jie Hudai gojiade chengun olutula bi pse hhei ulie ijiene." 17Ersa beizii agi daore Hudade mafan kieliedene hhelade kieliewo, "Ta enei man ghughazhi ochindu. 18Bi tande kielieye, enedu khuinase bi pse putoujiuni ulie ochizhi Hudai gojia ireku shihou kune." 19Ingie ginanyi barei mafan kieliedene ghulu hhelade ogi kieliewo, "Eneshi tande oluzhi ogisan mii beye wo. Ta mii jilazhi enei gie." 20Ijie baludene qingiezhi beizii barei kieliewo, "Ene beizishi mii chusunghala shini yenjisan kielien wo. Tande oluzhi usurusan wo. 21Ingieliuzhe, uzhe, mini ghudandune giesan kun mii shida souzhi mare hhantu ijiezho. 22Huda jiejin giesan mutun Kunnikewon duya ijienema, hhei ghudandusan kunde gou widawo!" 23Hhela nieniedene asazho, "Imutu shiqini kien giene?"

24Hhelai dunda kien zui fugie wo giezhiye nienieji zhenjinduzho. 25Ersa hhelade kieliewo, "Niman kunlai dunda honshan noyenla qienli bareizhi kunlai gonjiliuzhe hhelai gouni ogisan kun giezhi uruzho. 26Ta niekielien pusho, tai dunda zui fugieni zui meilashi, lindao danlane giesan kun ushilachen kun mutun gie. 27Kien fugie wo? Xi sousan kun fugie onu ushilachen kun fugie wo? Xi sousan kun fugie woba. Ingieliuzhe bishi tai dunda ushilachen kun wo. 28Kunla mini fandui giezhi alane giese ta izhi mare hhantu wo. 29Huda made gonjiku qienlini ogiku mutun bi ye tande qienlini ogiye. 30Ta marezhe hhantu mini gojiade ijiezhi ochine. Ta baozo jiere souzhi Isilieni 12 gie paini gonjine."

Beduru Ulie Tanikuni Melie Kieliezho

(Mat 26:31-35; Mak 14:27-31; Yah 13:36-38)

31"Ximun, Ximun! Ibilisi tai boudei shierlaku mutun shierlane giezhi Hudade xiahua giewo. 32Ingiese bi chade oluzhi chii xianxin gieku bu fura giezhi onxian giewo. Chi geizhen giedene gaijiulane khiduzhegha." 33Beduru kieliewo, "Ezhan, bi chimare hhantu bafanzide orozhi fuguseye zhunbei gie goudazho!" 34Ersa kieliewo, "Beduru, bi chade kielieye, enedu tigha kheilatula chi mii 3 hui ulie renjine."

Baer Qibao Khudogho Barei

35Ingie pse kieliewo, "Bi tai echighakude baer, qibao, maheiye uwo. Tande yama chaizhoye?"

Hhela kieliewo, "Uye."

36 Ersa kieliewo, "Ede baer, qibao bichenla barei, khudogho wise jienne huizhi agi. 37Bi tande kielieye hhei zuirende sanawo giezhi jinwun jiere mii zhiizhi kieliesanla kenjin gholune. Enbene, mii zhiizhi kieliesan ene zhen gholuzho." 38Hhela kieliewo, "Ezhan, enende ghua khudogho wo."

Ersa kieliewo, "Kuruwo."

Ganlanshande Onxian Gieku

(Mat 26:36-46; Mak 14:32-42)

39 Ersa eqighanku mutun Ganlanshande echise tujilaniye daghazho. 40Hhe oronde kurudene hhelade kieliewo, "Ta onxian gie, pse miine." 41Ingiedene nie tashi bendasan qimutu gholo echidene xiutuliezhi onxian giezho, 42"Ada, chi duran bise ene shouku giekui made bu iregha! Ingieliuzhe mii duranghala bu gie, chii duranghala gie." 43Ingiekude nie qienxien asiman jierese iredene hhende nenli ogiwo. 44Ersai zhughe otuzhi pse hende onxian giezho. Koniesun chusun mutun zemin jiere luizho. 45Onxian gie balu bosizhedene tujilai hhende echiwo. Hhela hende munan giedene hhunturazho. 46Ersa hhelade kieliewo, "Ta yangiezhi hhunturazho? Bosizhedene onxian gie, pse miine."

Ersani Bareizho

(Mat 26:47-56; Mak 14:43-50; Yah 18:3-11)

47Zhen kieliekude 12 gie tuji dundadu Yuda giesan nie kun iban kunni uduru irewo. Ersai shida irezhi orene giezho. 48Ersa hhende kieliewo, "Yuda, chi Kunnikewonni orekughala ghudandunu?" 49Zhouwini tujila ene shiqinyi uzhedene kieliewo, "Ezhan, bijien khudoghoghala chizhise olunulie?" 50Hhelai dundase nie kun zui fugie buwai hojii borun chighinyi chizhi agiwo. 51Ersa kieliewo, "Bu eghi!" Ingie hhe kunni chighinyi moi goudaghawo. 52Ingie hhei bareile iresan fugie buwa, mechii sagheisan kun, zhanlaolade kieliewo, "Ta khudogho, banbanlai bareidene mii qiandao mutun bareile irewu? 53Niudunie bi mechide tanre hhantu wo, ulie bareine. Ede tai shihou wo, kharani qienlii bareizho."

Beduru Ersai Ese Renjizho

(Mat 26:57-58, 69-75; Mak 14:53-54, 66-72; Yah 18:12-18, 25-27)

54Hhela Ersai bareidene zui fugie buwai giede lai echiwo. Beduru gholose daghazho. 55Kunla ghoronde khan teidene izhonde hhantu souse Beduruye hhantu wo. 56Nie hoji oqin khanni gonse Beduruni xianxide uzhe tanidene kieliewo, "Ene kunye Ersare hhantuku wo." 57Beduru ese renjizhi kieliewo, "Funi, bi hheni tani dane." 58Goujicha beidene nie kun Bedurui chanla kieliewo, "Chishiye hhelare hhantuku kun wo." Beduru kieliewo, "Gujiu, bi pusho." 59Chabudu nie xioshi daodene pse nie kun kieliewo, "Ene kenjinshi hhelare hhantuku kun enbene. Hhe yeshi Jialili kun wo." 60Beduru kieliewo, "Gujiu, chi yan kieliekui bi ulie mejiene!" Zhen kieliekude tigha kheilawo. 61Ingie Ezhan ochira Beduruni uzhewo. Beduru Ezhan kieliesan enedu tigha kheilatula chi mii 3 hui ulie renjine giesei sumula ire 62khizhi echidene nango giezhi hende wilawo.

Ersani Xilun Giezho

(Mat 26:67-68; Mak 14:65)

63 Ersai uzhesan kunla xilun giezhi eghizho. 64Nudunyini huighadene asazho, "Chii kien eghisei kielie?" 65Hhela pse olon zannan kielienghala hhei sugiezhi shizheghazho.

Ersani Zui Fugie Fayende Echighazho

(Mat 26:59-66; Mak 14:55-64; Yah 18:19-24)

66Ogheise bexinlani zhanlao, fugie buwa, jinwun hanjiala man hhantulazho. Hhela Ersai laidene zui fugie fayende echi 67kieliewo, "Chishi Mexiha enbese bijiende kielie." Ersa kieliewo, "Bi tande kieliese taye xianxin ulie giene. 68Bi tande asase taye ulie kieliene. 69Enedu khuinashi Kunnikewon Nenlitu Hudai borun miende soune." 70Ingiese hhela man kieliewo, "Qinse chishi Hudai kewon enbenu?" Ersa hhelade kieliewo, "Bi enbene giezhi ta kieliezho." 71Ingie hhela kieliewo, "Pse yan ganzhen kerene? Hhe goyane kieliesei matan qinsi chenliewo!"

Currently Selected:

Lujia 22: sce

Highlight

Copy