Ап. керӧммез 2
2
1Сибаліс «Витдаслун» нима вежалун#2:1 вежалун ─ праздник. Веритіссес, ӧтікӧ юрын видзӧмӧн, быдӧнныс ӧксисӧ ӧтлаӧ. 2Сэк енӧжсяняс видзчисьтӧг кыліс жыв вына тӧвлӧн шы. Сія шыыс тыртіс быдсӧн керкусӧ, кытӧн нія пукалісӧ. 3Сэтӧн мыччисисӧ жыв бикыввез. Нія янсалісӧ да торйӧн лэдзчисисӧ быд морт вылӧ. 4Быдӧнныс тырисӧ Вежа Лолӧн. Нія пондісӧ сёрнитны мӧдік кыввез вылын Лов сетӧм сьӧрті.
5Ерусалимас сэк ӧксисӧ Енлӧ юрбитісь иудейез. Нія локтісӧ быд муись, быд отир коласісь. 6Шысӧ кылӧмсянь сэтчӧ ӧксис уна отир. Быдӧннысӧ диво кутіс, быдыс ны коласісь эд кыліс нылісь сёрнитӧмсӧ аслас кыв вылын. 7Нія дивуйтчӧмӧн ӧтамӧдныслӧ баитісӧ: «Баитіссес абу я быдӧнныс Галилеяись? 8Кыдз нӧ мийӧ быдӧнным кыламӧ нылісь сёрнитӧмсӧ асланым кыв вылын? 9Мийӧ ӧксим Парфияись, Мидияись, Еламись, Месопотамияись, Иудеяись, Каппадокияись, Понтісь, Асияись#2:9 Асия ─ Учӧт Азияись му, 10Фригияись, Памфилияись, Египетісь, Киринея дынын Ливия муэзісь, мукӧдыс ─ Римись. Ӧтіккез шогмим иудейезӧн, мӧдіккез пондім веритны ны моз. 11Мукӧдыс локтісӧ Критісь да Аравияись. Нія миян кыввез вылын висьтасьӧны Енлӧн ыджыт керӧммез йылісь». 12Нія эзӧ вермӧ вежӧртны лоӧмсӧ. Быдӧнныс дивуйтчӧмӧн ӧтамӧдныслӧ баитісӧ: «Мый нӧ эта сэтшӧмыс?» 13А мукӧдыс сералӧмӧн баитісӧ: «Нія чӧскыт вина юӧмась, кодӧсь тай».
Петралӧн отирлӧ сёрнитӧм
14Петраыс дасӧтік апостолкӧт сувтіс. Сія горӧн висьталіс отирыслӧ: «Иудеяись отир да Ерусалимын быд олісь! Кывзӧ менчим кыввезӧс, видзӧ нійӧ тӧдвыланыт! 15Тіян юраныт: нія кодӧсь пӧ. Нія абу кодӧсь, ӧні эд асыв кад, ӧкмысӧт час. 16Ӧні лоис Енсянь юӧртісь Иоильлӧн висьтавлӧм сьӧрті:
17─ Ен висьталӧ: "Медбӧрья луннэзӧ
кисьта Ассим Лолӧс быд морт вылӧ.
Сэк тіян зоннэзныт, тіян ныввезныт
Месянь юӧртны пондасӧ.
Зоннэзныт пондасӧ адззыны Месянь мыччалӧммез#2:17 мыччалӧм ─ видение.
Пӧриссезныт пондасӧ адззывлыны лоан вӧттэз.
18Нія луннэзӧ Ассим Лолӧс кисьта раббезӧ вылӧ:
и ай морттэз вылӧ, и инькаэз вылӧ.
Нія пондасӧ Месянь юӧртны.
19Мыччала адззывлытӧмсӧ#2:19 адззывлытӧм ─ чудо вылын, енӧжын,
да пассэз#2:19 пас ─ знак, знамение ─ улын, му вылын.
Мыччала вир, би да тшын петӧм.
20Шондіыс пемдас,
тӧлісьыс рӧмнас лоас вир кодь.
Сія лоас Дӧсвидзисьлӧн ыджыт да югыт лун локтытӧдз.
21И быдыс, кин корас Дӧсвидзисьсӧ нимнас, мезмас"».
22«Израиль отир! Кывзӧ этнӧ кыввесӧ! Назаретісь Исуссӧ Ачыс Еныс ыстӧм вӧлі тіянлӧ. Асьныт эд тӧдат: Аслас Ыстӧм йылісь тіянлӧ висьталӧм могись Еныс Сы пыр мыччавліс вына адззывлытӧм керӧммез да ыджыт пассэз. 23Енлӧн лӧсьӧтӧм да шуӧм сьӧрті коліс аркмыны. Исусыс вӧлі сетӧм тіян киӧ. Тійӧ Исуссӧ вийит, ентӧдтӧммезлӧн#2:23 ентӧдтӧммез ─ язычники киэзӧн крест вылӧ дорит. 24Но Еныс Сійӧ ловзьӧтіс, кулан выныслісь домӧттэсӧ орлаліс. Кулан выныс эд эз вермы видзны Исуссӧ. 25Сы йылісь Давидыс висьталӧм сідз:
─ Ме пыр адзза Дӧсвидзисьсӧ одзам.
Сія пыр мекӧт веськыт ладорам,
медбы ме эг усь.
26Сысянь гажмис менам сьӧлӧмӧ,
гаж кылыс петӧ менам ӧмись.
Менам вывтырӧ бурсӧ видзчисьтӧн шоччисьӧ.
27Тэ эд он коль менчим лолӧс кулӧммез коласын.
Ассит Вежатӧ он коль сісьмыны.
28Тэ сетін меным тӧдны оланӧ вайӧтан туйсӧ.
Тэнчит чужӧмтӧ казялӧм коста
менчим сьӧлӧмӧс тыртан гажнас.
29Воннэзӧ! Лэдзӧ меным веськыта висьтавны Давид айным йылісь тӧдӧмӧс. Давидыс кулӧм да вӧлі дзебӧм. Сылӧн шойнаыс#2:29 шойна ─ могила ӧнӧдз сулалӧ миян дынын. 30Давидыс вӧлӧм Енсянь юӧртісь, сійӧн сія тӧдӧм Енлісь висьталӧмсӧ. Еныс кыв сетӧм#2:30 кыв сетны ─ поклясться пыр кӧсйисьӧм Давидыслӧ, шуӧм пуксьӧтны Сылӧн юралан пукӧс#2:30 юралан пукӧс ─ престол, трон вылӧ Юралісьсӧ сы увтырись. 31Давидыс одзлань висьтавлӧм Кристос-Мездӧтісьыс ловзьӧм йылісь сідз: Сылӧн лолыс пӧ оз кольччы кулӧммез коласын да Сылӧн вывтырыс оз сісьмы. 32Сійӧ Исуссӧ Еныс ловзьӧтіс. И Сійӧ мийӧ быдӧнным адззылім. 33Еныс Сійӧ лэбтіс веськыт ладорас. Исусыс босьтіс Айыслісь кӧсйӧм Вежа Ловсӧ да кисьтіс миян вылӧ. Лоӧмсӧ тійӧ ӧні адззат да кылат. 34Давидыс абу кайӧм енӧжас. Ачыс тай сідз баитӧм:
─ Висьталіс Дӧсвидзись Ен менам Дӧсвидзисьлӧ:
"Пукав Мекӧт веськыт ладорам,
35кытчӧдз ог уськӧт кок увтат Тэ вылӧ лэбтісиссесӧ#2:35 кинкӧ вылӧ лэбтісись ─ враг".
36Сідзкӧ, Израильын быд морт бура тӧд: Еныс сувтӧтіс Дӧсвидзисьӧн да Кристос-Мездӧтісьӧн сійӧ Исуссӧ, Кӧдӧ тійӧ дорит пу бердӧ!»
37Петралӧн кыввес зубыта сидзисӧ отир сьӧлӧмӧ. Нія юалісӧ Петраыслісь да мӧд апостоллэслісь: «Воннэз, мый миянлӧ керны?» 38Петраыс висьталіс нылӧ: «Бергӧтчӧ умӧль керӧммезныт дынісь да Кристос Исус нимӧн пыртчӧ, медбы Еныс проститіс умӧль керӧммезнытӧ. Сэк Сія козьналас тіянлӧ Вежа Ловсӧ. 39Эта кӧсйӧмыс сетӧм тіянлӧ, тіян челядьлӧ, сетӧм ыліссезлӧ да и быдӧнныслӧ, кӧднӧ корас Дӧсвидзись Енным».
40Петраыс уна мый висьтасис отирыслӧ. Сія нійӧ корис-тшӧктіс: «Мездісьӧ ӧння кадӧ лэдзчисьӧм отир дынісь, медбы ныкӧт эд сюрӧ мыжйыны». 41Сылісь кыввесӧ сьӧлӧманыс босьтіссес пыртчисӧ. Сія лунӧ веритіссес дынӧ ӧтлаасисӧ куим сюрс гӧгӧр морт.
Веритіссезлӧн олан
42Веритіссес пыр олісӧ апостоллэз велӧтӧм сьӧрті, ӧксьывлісӧ чеглавны нянь да кеймыны. 43Уна мыччалан пассэз да адззывлытӧммез керсисӧ апостоллэз пыр Ерусалимын. Сійӧн быд мортлӧн вӧлі полӧм. 44Веритіссес быдӧнныс вӧлісӧ ӧтлаын, нылӧн быдӧс вӧлі ӧтласа. 45Нія вузавлісӧ ассиныс муэсӧ, пажытьсӧ, а сьӧмсӧ янсӧтлісӧ быдӧнныслӧ, кинлӧ мымда коліс. 46Ӧтікӧ юрын видзӧмӧн быд лун ӧксьывлісӧ Вежа Керкуын. Горттэзын ӧтлаӧ ӧксьӧмӧн чеглавлісӧ нянь да сёйисӧ осьта гаж сьӧлӧмӧн. 47Нія ошкисӧ Енсӧ. Отирыс нійӧ радейтісӧ. Дӧсвидзисьыс быд лун мездӧтіс отирсӧ, и веритіссес содісӧ.
Корись мортӧс веськӧтӧм
Currently Selected:
Ап. керӧммез 2: БЮ19
Highlight
Share
Copy
Want to have your highlights saved across all your devices? Sign up or sign in
