Ап. керӧммез 6
6
1Апостоллэз гӧгӧр лунісь лунӧ содіс уна велӧтчись. Сэк грек кыв вылын баитісь иудейез пондісӧ норасьны еврей кыв вылын баитісь иудейез вылӧ, дӧваэзныслӧ пӧ быд лунся коланасӧ етшажык сетавлӧны. 2Сэк даскык апостолыс ӧктісӧ быдӧс велӧтчиссесӧ да шуисӧ нылӧ: «Мийӧ ӧні тӧждісям сёян сеталӧм йылісь. Сійӧн Енлісь Кывсӧ огӧ ештӧ висьтасьны. Оз ков сідз керны. 3Воннэзӧ, сійӧн бӧрйӧ ас колассиныт сизим мортӧс, кӧдна йылісь отирыс бурӧ баитӧны. Нія ась лоасӧ мывкыдаӧсь да тыраӧсь Вежа Лолӧн. Нійӧ сувтӧтам керны этӧ уджсӧ. 4А асьным пыр пондам кеймыны да висьтасьны Кывсӧ». 5Сідз висьталӧмыс вӧлі быдӧнныс сьӧрті. Нія бӧрйисӧ ёна веритісь, Вежа Лолӧн тыра Стефанӧс, Филипӧс, Прокорӧс, Никанорӧс, Тимонӧс, Парменӧс да Антиокияись Николайӧс, кӧда одзжык вуджлӧм иудейез веритӧмӧ. 6Нійӧ сувтӧтісӧ апостоллэз одзӧ. Бӧрйӧммес вылӧ киэзнысӧ пуктӧмӧн апостоллэс кеймисӧ ны понда.
7Енлӧн Кылыс паськаліс. Ерусалимас лоис унася-уна велӧтчись. Нельки вежауджаліссес коласісь унаӧн пондісӧ веритны Кристосыслӧ.
Стефанӧс кутӧм
8Стефаныс ёна веритіс. Сы вылын вӧлі Енсянь сетӧм вын. Отир коласын сія аркмӧтліс ыджыт адззывлытӧммез да пассэз. 9Киринеяись да Александрияись сідз шусяна «мезмӧм раббезлӧн синагогаись» киннэзкӧ, эшӧ Киликияись да Асияись локтӧм иудейес пондісӧ Стефаныскӧт етшасьны. 10Но Стефаныс ныкӧт баитіс мывкыда кыввезӧн да Вежа Лов вынӧн. Мӧддэслӧн кыввезныс вӧлісӧ вынтӧмӧсь. 11Сэк нія отирыс коласісь мукӧдсӧ велӧтӧмась баитны вӧвлытӧмыс йылісь. Нійӧ тшӧктӧмась висьтавны: «Мийӧ пӧ кылім, кыдз сія умӧльтіс Моисейсӧ да Енсӧ». 12Нія ызйӧтӧмась отирсӧ, пӧриссесӧ да Туйдӧтӧ велӧтіссесӧ кутны Стефансӧ. Мӧддэс уськӧтчисӧ Стефаныс вылӧ да кутісӧ, сэсся нуӧтісӧ сійӧ иудейезлӧн Судитан чукӧр одзӧ. 13Сэтчӧ вайӧтісӧ весись баитіссесӧ. Нія висьталісӧ: «Сія дугдывтӧг баитӧ умӧль кыввез миян Вежа Керку йылісь да Моисейлӧн Туйдӧт йылісь. 14Мийӧ эд асьным кылім сылісь баитӧмсӧ: Назаретісь Исусыс разяс пӧ Вежа Керкусӧ да вежас Моисейсянь миянлӧ кольччӧм тшӧктӧммесӧ». 15Судитанінас быд пукалісь морт видзӧтіс Стефаныс вылӧ. Сылӧн чужӧмыс вӧлі ангеллӧн кодь.
Стефанлӧн сёрни
Currently Selected:
Ап. керӧммез 6: БЮ19
Highlight
Share
Copy
Want to have your highlights saved across all your devices? Sign up or sign in
