Ап. керӧммез 7
7
1Сэк аркирейыс юаліс: «Сідз я вӧлі?» 2Стефаныс висьталіс: «Айез, воннэз, кывзӧ! Югьялан Еныс мыччасьӧм миян Авраам айлӧ Месопотамияын. Сія вӧлӧм Авраамлӧн Харанӧ мунтӧдз. 3Еныс Сылӧ висьталӧм: "Пет аслат муись, айыт керкуись, коль ассит увтыртӧ и мун мӧдік муӧ. Ме тэныт сійӧ мыччала". 4Сэк Авраамыс петӧм Калдея мусис. Сувтчӧм Харанын. Айыс кулӧм бӧрын Еныс Авраамсӧ вайӧтӧм эта муӧ. Сэтӧн ӧні тійӧ олат. 5Сэтӧн Еныс абу сетӧм Авраамыслӧ мусӧ и кок пыдӧсыс пасьта. Но мусӧ кӧсйӧм сетны сылӧ да сысянь йылӧм увтырлӧ, кӧр сія вӧлӧм эшӧ челядьтӧм. 6Еныс сылӧ висьтавлӧм: "Тэнат увтырыт локтас йӧз муӧ. Лоас йӧз кипод увтын. Мӧдіккез вылӧ пондас уджавны. Нёльсё во нійӧ пондасӧ дзескӧтлыны. 7Но Ме судита сійӧ отирсӧ, кӧда пӧртас нійӧ раббезӧ. Сы бӧрсянь нія петасӧ. Эта муын пондасӧ Меным кысъявны". 8Еныс Авраамыскӧт керӧм вундыштыштан йитӧт#7:8 вундыштыштан йитӧт ─ завет обрезания . Сыбӧрын Авраамыслӧн чужӧм Исак. Кыкьямысӧт лунас Авраамыс Исаксӧ вундыштыштӧм. Исакыссянь чужӧм Яков, а Яковыссянь ─ Израильлӧн даскык ай.
9Яковлӧн зоннэс завидуйтӧмась Ӧсип вонныслӧ, сійӧн вузалӧмась сійӧ Египетӧ. Но Еныс вӧлӧм сыкӧт. 10Сьӧкытісь-шогсьӧмись Еныс Ӧсипсӧ мездӧм. Еныс козьналӧм сылӧ мывкыд, сійӧн фараонлӧ, Египетісь ӧксулӧ, сія лоӧм сьӧлӧмви. Ӧксуыс Ӧсипсӧ сувтӧтӧм Египет муын да аслас керкуын юралісьӧн.
11Сэк Египет да Ханаан муэзӧ локтӧм тшыгьялан кад. Сысянь отирыс пондӧм ӧддьӧн шогсьыны-мырсьыны. Миян айезным абу вермӧмась адззыны сёянсӧ. 12Яковлӧ кывсьӧм, няньыс пӧ эм Египетын. Сэк Яковыс айезнымӧс медодззаись ыстӧм сэтчин. 13Ӧсипыс воннэслӧ казьмӧтчӧм мӧдпырись локтӧмныс коста. Сэксянь фараоныс пондӧм тӧдны Ӧсиплісь увтырсӧ. 14Ӧсипыс корӧм айсӧ увтырнас Египетӧ. Нія вӧлӧмась сизимдас вит#7:14 сизимдас вит ─ 75 морт.
15Яков вуджӧм овны Египетӧ. Сэтӧн кулӧм ачыс, сэсся кулӧмась и миян айезным. 16Нійӧ дзебны нуӧтасӧ Сикемӧ. Сэтчин пуктӧмась дзебсянінӧ, кӧдӧ Авраамыс неблӧм эзысь вылӧ Еммор зоннэзлісь.
17Сибалӧм кад аркмыны кӧсйӧмыслӧ. Ен сійӧ Авраамыслӧ кӧсйӧм кыв сетӧмӧн. Быдӧс аркмӧмӧдз Египетас миян отирыс йылӧм-содӧм. 18Чулалӧм кад. Пондӧм веськӧтлыны виль ӧксу, кӧда абу тӧдӧм Ӧсипсӧ. 19Сія дзескӧтлӧм айезнымӧс, миян увтырлӧ быдмоза ылӧтлӧмӧн керӧм умӧльсӧ. Ӧксуыс тшӧктӧм чапкавны шогмӧм челядьнымӧс, кувтӧдз нійӧ воштыны.
20Сія кадӧ чужӧм Моисей. Сія кагаыс вӧлӧм ӧддьӧн басӧк да Еныслӧ сьӧлӧмви. Куим тӧлісь сьӧрна сійӧ вердӧмась айыс керкуын. 21Кӧр ковсьӧм кагасӧ кольны ӧтнассӧ, сійӧ босьтӧм фараонлӧн нылыс. Сія Моисейсӧ быдтӧм зонӧс моз. 22Моисейсӧ велӧтӧмась Египетлӧн быд мывкыда торӧ. Сія вӧлӧм вына кылын да уджын.
23Моисейлӧ тырӧм нёльдас во. Сэк сылӧ юрас пырӧм адззисьлыны воннэскӧт ─ Израиль отиркӧт. 24Сія казялӧм: ӧтік Израиль мортӧс вартлӧны. Сэк Моисейыс дорйӧм сійӧ. Сія вештісьӧм мортыс понда: вийӧм Египет мортсӧ. 25Сія чайтӧм#7:25 чайтны ─ думать, вежӧртасӧ воннэс, сы ки пырйӧт пӧ Еныс сетӧ нылӧ мезмыны. Но нія сійӧ абу вежӧртӧмась.
26Мӧд лунас Израильлӧн кык морт тышкасьӧмась. Моисейыс сибӧтчӧм ны дынӧ да пондӧм ӧвны: "Тійӧ воннэз, мыйлӧ ӧтамӧднытлӧ умӧльсӧ керат?" 27Тышкасисьыс тойыштӧм Моисейсӧ да висьталӧм: "Кин тэнӧ сувтӧтіс миян вылын юравны да миян коласын бӧрйисьны? 28Тэ тӧн вийин Египет мортсӧ. Он я мӧд тэ и менӧ вийны?"
29Сэтшӧмсӧ кылӧмсянь Моисейыс пышшӧм. Сія локтӧм Мадиам муӧ. Сэтӧн сылӧн чужӧмась кык зон. 30Чулалӧм нёльдас во. Ӧтпыр Моисейыс вӧлӧм Синай керӧс дынын кушмуын. Сэтӧн сылӧ сотчан жельнӧг биын мыччисьӧм Енлӧн ангел. 31Сійӧ казялӧмсянь Моисейсӧ диво кутӧм. Сія сибӧтчӧм видзӧтны. Сэтӧн сія кылӧм Дӧсвидзисьлісь висьталӧм: 32"Ме ─ Ен тэнат айезлӧн: Авраамлӧн Ен, Исаклӧн Ен да Яковлӧн Ен". Моисейсӧ повзьӧмувьяс пондӧм зэгйыны, сія абу лысьтӧм видзӧтны. 33Еныс сылӧ висьталӧм: "Чӧвт коксит кӧмкӧттӧ. Тэ сулалан вежа му вылын. 34Ме адзза: Египетын Менчим отирӧс дзескӧтлӧны. Ме кыла нылісь тӧждісьӧм-ойзӧмнысӧ да локті мездыны нійӧ. Ӧні мун, Ме ыста тэнӧ Египетӧ".
35Израиль отирыс одзжык Моисейсӧ нем туйӧ пуктӧмась сэтшӧм кыввезӧн: "Кин тэнӧ пуктіс юралісьнас да судитісьнас?" Но Еныс сійӧ и сувтӧтӧм Израиль отирыслӧ юралісьнас да мездӧтісьнас. Сувтӧтӧм ангелыс пыр, кӧда мыччасьӧм Моисейыслӧ биӧн сотчан жельнӧгын. 36Моисейыс Египетсис отирсӧ петкӧтӧм. Египет муын, Гӧрд саридзын да кушмуын нёльдас во сьӧрна ветлӧтӧм коста аркмӧтлӧм адззывлытӧммесӧ да пассэсӧ. 37Моисейыс висьтавлӧм Израиль отирыслӧ: "Дӧсвидзись Енныт сувтӧтас тіянлӧ Ассис Юӧртісьсӧ. Сія ме моз лоас воннэзныт коласісь. Сійӧ кывзӧ". 38Моисейыс миян айезкӧт вӧлӧм кушмуын. Синай керӧс вылын сія баитӧм ангелкӧт. Ангелыс пыр сія босьтӧм Енлісь ловья кыввез, медбы юӧртны миянлӧ.
39Миян айезным асныралӧмась: абу кывзісьӧмась Моисейсӧ. Нія сійӧ абутӧм туйӧ пуктӧмась, мӧдӧмась бӧр бертны Египетӧ. 40Ааронлӧ нія висьталӧмась: "Кер миянлӧ еннэсӧ. Ась нія нуӧтӧны миянӧс одзлань. Моисейыс петкӧтіс миянӧс Египетсис. Ӧні мийӧ огӧ тӧдӧ, мый сыкӧт лоис". 41Сэк нія зарниись керӧмась порозӧс. Порозыслӧ вайӧмась езъялан козин#7:41 езъялан козин ─ жертвенный дар, жертва. Нія гажӧтчӧмась асланыс киӧн керӧмныс одзын.
42Еныс бергӧтчӧм ны дынісь, кольӧм нійӧ копрасьны енӧжись кӧдзуввезлӧ#7:42 кӧдзув ─ звезда. Енсянь юӧртіссезлӧн небӧгын гижӧм сідз:
─ Израиль отир! Тійӧ нёльдас во вӧліт кушмуын.
Вайліт я сы коста Меным начкылӧм подасӧ?
Вайліт я Меным езъялан козиннэсӧ?
43Тійӧ новйӧтіт Молоклісь палаткасӧ,
асланыт Ремфан енлісь кӧдзувсӧ.
Молокнытӧ да Ремфаннытӧ
тійӧ керитӧ асланыт киэзӧн,
медбы ны одзын копрасьны.
Сы понда ме тіянӧс ыста Вавилон сайӧ.
44Айезнымлӧн кушмуас вӧлӧм "Висьталан скиния"#7:44 Висьталан скиния ─ Скиния свидетельства; Скинияас вӧлі Йитӧтӧн коробья, а коробья пытшкас куйлісӧ изпӧввез, кӧдна вылын вӧлі гижӧм Енлӧн дас тшӧктӧм. Скинияыс, коробьяыс да изпӧввез Израиль отирлӧ висьтавлісӧ: Еныс ныкӧт.. Сійӧ скиниясӧ Енлӧн тшӧктӧм сьӧрті Моисейыс лэбтылӧм сэтшӧмӧ, кытшӧм сылӧ вӧлі мыччалӧм. 45Миян айезным босьтӧмась сійӧ асланыс айезсянь. Сэсся Навин Исускӧт пыртӧмась эта муӧ. Эта муись отирсӧ Еныс вашӧтӧм. Скинияыс вӧлӧм миян отир дынын Давид луннэзӧдз. 46Давидыс вӧлӧм Еныслӧ сьӧлӧмви. Сія кеймӧм, медбы вермис лэбтыны Яковлӧн Енлӧ оланінсӧ. 47Но Еныслӧ керкусӧ лэбтӧм вӧлись Соломоныс. 48А Медвылісьыс оз ов киӧн керӧм керкуын. Енсянь юӧртісьыс сідз висьталӧм:
49─ Енӧжыс ─ Менам юралан пукӧсӧ,
муыс ─ Менам кок сувтӧтанӧ.
Дӧсвидзисьыс висьталӧм:
"Кытшӧм керку сувтӧтат Меным?
Кытӧн менам шоччисянінӧ?
50Эз разь быдӧс сійӧ аркмӧт Менам киӧ?"
51Асныра йӧз! Сьӧлӧммезнаныт тійӧ ─ ентӧдтӧммез, пеллезныт озӧ кылӧ Енсӧ. Тійӧ айезныт моз пыр Вежа Лолыслӧ паныт лэбтісят. 52Енсянь юӧртіссез коласісь кинӧс эзӧ вашӧтлӧ тіян айезныт? Нія вийлісӧ Енсянь юӧртіссесӧ, Ен сьӧрті веськыта Олісьлісь локтӧмсӧ висьтавліссесӧ. Ӧні тійӧ Сійӧ вузаліт да вийит. 53Ангеллэз отсӧтӧн тійӧ босьтіт Туйдӧт, асьныт тай сы сьӧрті эдӧ олӧ».
Стефанӧс иззэзӧн шупкалӧм
54Стефансӧ кывзікӧ ӧксьӧммес лӧгувьяныс кучиксиныс петісӧ, пиннезнаныс гырскисӧ. 55Вежа Лолыс тыртӧм Стефансӧ. Сія видзӧтіс енӧжас. Сэтчинісь казялӧм Енлісь югьялӧмсӧ да Сыкӧт веськыт ладорас сулалісь Исуссӧ. 56Сія шуис: «Ме адзза оссьӧм енӧжсӧ. Морт Зон сулалӧ Енкӧт веськыт ладорас!»
57Нія чирзӧмӧн горӧтісӧ, тупкалісӧ ассиныс пеллезнысӧ, ӧтлаын уськӧтчисӧ Стефаныс вылӧ. 58Стефансӧ петкӧтісӧ кар сайӧ. Сійӧ пондісӧ шупкавны иззэзӧн. Шупкаліссес ассиныс паськӧмнысӧ тэчисӧ Савл нима том морт коккез дынӧ. 59Иззэзнас шупкалӧм коста Стефаныс кеймис: «Дӧсвидзись Исус, босьт менчим лолӧс!» 60Сія усис пидзӧссэз вылас да горӧтіс: «Эн вайӧт ны вылӧ этӧ лёк керӧмнысӧ». Сідз висьталӧм бӧрын Стефаныс куліс.
Веритіссесӧ вашӧтлӧм
Currently Selected:
Ап. керӧммез 7: БЮ19
Highlight
Share
Copy
Want to have your highlights saved across all your devices? Sign up or sign in
