Иоан 11

Исус ловзьӧдӧ Лазарӧс

1Вифания сиктын оліс Лазар нима морт, сійӧ висис. Сэні олісны тшӧтш Лазарлӧн Марья да Марпа чойясыс. 2Буретш тайӧ Марьяыс бӧрынджык мавтас Господьӧс чӧскыд дука выйӧн да чышкалас Сылысь коксӧ аслас юрсиӧн.

Висьысь Лазар вӧлі Марьялӧн вокыс. 3Чойяс мӧдӧдісны мортӧс висьтавны Исуслы: «Господьӧй, Тэнад муса ёртыд висьӧ». 4Тайӧс кылӧм бӧрын Исус шуис: «Тайӧ висьӧмыс абу кулӧм вылӧ, но Енмӧс ошкӧм вылӧ. Та пыр воссяс Ен Пилӧн дзирдлуныс». 5Марпа, сылӧн чойыс да Лазар вӧліны мусаӧсь Исуслы. 6Кор Исус тӧдмаліс Лазарлӧн висьӧм йылысь, Сійӧ кольччыліс на кык лун кежлӧ сэтчӧ, кӧні вӧлі. 7Сэсся Исус шуис велӧдчысьясыслы: «Бӧр мунамӧй Иудеяӧ». 8Велӧдчысьясыс воча шуисны: «Велӧдысь, Иудея муын сӧмын на кӧсйисны вины Тэнӧ изъясӧн, а Тэ бара нин мунан сэтчӧ?» 9Исус вочавидзис: «Лунын ӧмӧй абу дас кык час? Луннас ветлысь оз крукась, ӧд сійӧ аддзӧ тайӧ мувывса югыдсӧ. 10Войнас ветлысь крукасьӧ, ӧд сылӧн югыдыс абу».

11Тайӧс шуӧм бӧрын Исус содтіс: «Миян Лазар ёртным унмовсьӧма. Ме муна сійӧс садьмӧдны». 12Велӧдчысьясыс шуисны Сылы: «Господьӧй, унмовсьӧма кӧ, бурдас». 13Исус сёрнитіс Лазарлӧн кулӧм йылысь, а велӧдчысьясыс мӧвпалісны, мый Исус сёрнитӧ узьӧм йылысь. 14Сэки Исус веськыда шуис налы: «Лазар кулӧма. 15Но тіян вӧсна Ме нимкодяся, мый эг вӧв сэні, ӧд ӧні ті понданныд эскыны. Локтӧй, мунамӧй сы дінӧ». 16Сэки Фома, кодӧс шуисны Двӧйнипӧлӧн, шуис мукӧд велӧдчысьыслы: «Мунам да Сыкӧд ӧтлаын кулам».

17Локтӧм бӧрас Исуслы висьталісны, Лазарӧс пӧ нёль лун сайын нин дзебисны. 18Вифания сикт вӧлі Ерусалимсянь матын, кык-куим верст ылнаын. 19Уна иудей вӧлі локтӧмаӧсь Марпа да Марья ордӧ, медым пальӧдны кулӧм вок вӧснаыс налысь шогсӧ.

20Марпа кыліс Исуслӧн локтӧм йылысь да петіс Сылы воча. Марья пукаліс гортас. 21Марпа шуис Исуслы: «Господьӧй, вӧлін кӧ Тэ тані, менам вокӧй эськӧ эз кув. 22Но весиг ӧні тӧда: мый коран Енмыслысь, Сійӧ сетас Тэныд». 23Исус вочавидзис: «Ловзяс тэнад вокыд». 24Марпа шуис Сылы: «Тӧда, сійӧ ловзяс медбӧръя лунӧ, кор ловзясны кулӧмаяс». 25Исус шуис: «Ме эм Ловзьӧдысьыс да Олӧмыс. Меным эскысь весиг кулӧм бӧрас кутас овны. 26Быдӧн, коді олігас эскӧ Меным, некор оз кув. Эскан-ӧ таӧ?» 27Марпа шуис: «Эска, Господьӧй! Ме эска, мый Тэ – Кристос, Ен Пи, кодлы колӧ вӧлі локны муюгыдас».

28Тайӧс шуӧм бӧрын Марпа муніс Марья чойыс дінӧ да гусьӧн висьталіс сылы: «Велӧдысьным тані, тэнӧ корӧ». 29Тайӧс кылӧм мысти Марья дзик пыр чеччис да муніс Исус дінӧ. 30Исус абу на вӧлі пырӧма сиктас, Сійӧ вӧлі сэні, кӧні паныдасис Марпакӧд. 31Иудейяс, кодъяс вӧліны Марьякӧд керкаын да пальӧдісны сылысь шогсӧ, аддзисны Марьялысь тэрмасьӧмӧн мӧдӧдчӧмсӧ да петісны сы бӧрся. Найӧ чайтісны, мый сійӧ мунӧ дзебанінӧ бӧрдны.

32Марья локтіс Исус дінӧ. Кор аддзис Сійӧс, уськӧдчис Сы водзӧ да шуис: «Господьӧй, вӧлін кӧ Тэ тані, вокӧй эськӧ эз кув». 33Марьялысь да сыкӧд локтӧм иудейяслысь бӧрдӧмсӧ аддзӧмысь Исуслӧн сьӧлӧмыс нормис. Сійӧ сьӧкыда ышловзис 34да юаліс: «Кытчӧ ті пуктінныд сійӧс?» Сылы вочавидзисны: «Господьӧй, лок видзӧдлы». 35Исуслӧн синваыс петіс. 36Сэки иудейяс ас костаныс сёрнитісны: «Видзӧдлӧй, кутшӧм муса Сылы вӧлӧма Лазарыс». 37Ӧткымынӧн шуисны: «Сійӧ бурдӧдіс синтӧмӧс. Эз ӧмӧй Сійӧ вермы Лазарӧс видзны кулӧмысь?»

38Исус локтіс дзебанін дорӧ нормӧм сьӧлӧмӧн. Дзебаніныс вӧлі кырта горсйын, а пыранінсӧ вӧлі тупкӧма изйӧн. 39Исус шуис: «Вештӧй изсӧ». Кулӧм Лазарлӧн Марпа чойыс шуис: «Господьӧй, сійӧ дуксьӧма нин, ӧд нёльӧд лун нин дзебанінын». 40Исус шуис Марпалы: «Эг ӧмӧй тэныд шулы, мый эскан кӧ, аддзан Енлысь дзирдлунсӧ?»

41Сэки вештісны изсӧ дзебанінысь, кӧні куйліс кулӧм Лазар. Енэжӧ видзӧдлӧмӧн Исус шуис: «Батьӧй, Ме аттьӧала Тэнӧ, мый Тэ кылін Менӧ. 42Ме тӧда, мый Тэ век кылан Менӧ. Но тайӧс Ме шуи тані сулалысь йӧзыс вӧсна, медым найӧ эскисны, мый Тэ Менӧ мӧдӧдін». 43Та бӧрын Исус гораа горӧдіс: «Лазар, пет сэтысь!» 44Кулӧм Лазар петіс. Сылысь ки-коксӧ вӧлі гартлӧма дзебан дӧраясӧн, чужӧмсӧ гартыштӧма чышъянӧн. Исус шуис: «Разьӧй дӧраяссӧ, мед мунас».

Исусӧс кӧсйӧны вины

(Мт. 26:1-5; Мк. 14:1-2; Лк. 22:1-2)

45Унаӧн иудейясысь, кодъяс волісны Марья дінӧ да аддзылісны, мый Исус вӧчис, пондісны эскыны Исуслы. 46Мукӧдыс мунісны фарисейяс дінӧ да висьталісны налы, мый Исус вӧчис.

47Аркирейяс да фарисейяс чукӧртісны веськӧдлан котыр да сёрнитісны: «Мый миянлы вӧчны? Тайӧ Мортыс уна шензьӧданатор вӧчӧ. 48Лэдзам кӧ Сылы водзӧ тадзи вӧчны, ставныс кутасны эскыны Сылы. Сэки локтасны римсаяс да бырӧдасны миянлысь вежаиннымӧс да войтырнымӧс». 49Каиаф нима морт, коді сійӧ вонас аркиреяліс, шуис налы: «Ті нинӧм онӧ вежӧртӧй. 50Ті ӧмӧй онӧ гӧгӧрвоӧй, мый миянлы бурджык лоӧ, кулас кӧ ӧти морт войтыр вӧсна, дзоньнас войтырыс бырӧм дорысь». 51Тайӧ кывъяссӧ Каиаф эз шу ассяньыс, но аркиреялігас водзвыв висьталіс, мый Исус кулас войтырыс вӧсна, 52и оз сӧмын тайӧ войтырыс вӧсна, но медым ӧтлаӧ чукӧртны Енлысь разалӧм ныв-писӧ.

53Тайӧ лунсяньыс найӧ шуисны вины Исусӧс. 54Та вӧсна Исус эз нин ветлы восьсӧн Иудея муӧд. Сійӧ муніс сэтысь овтӧминлань Ефраим карӧ да кольччис сэтчӧ велӧдчысьясыскӧд.

55Матыстчис иудейяслӧн Ыджыд лун. Сиктъясысь унаӧн локтісны Ерусалимӧ, медым сӧстӧммӧдчыны Ыджыд лун водзвылын. 56Найӧ корсисны Исусӧс, крамын сулаліганыс сёрнитісны ӧта-мӧдныскӧд: «Кыдзи ті чайтанныд, локтас оз Сійӧ татчӧ Ыджыд лун кежлӧ?» 57Аркирейяс да фарисейяс водзвыв тшӧктісны йӧзыслы, мый аддзас кӧ кодкӧ Исусӧс, мед юӧртас та йылысь, медым найӧ вермисны кутны Исусӧс.

Currently Selected:

Иоан 11: КБ

Highlight

Copy