Иоан 12

Исусӧс мавтыштӧм

(Мт. 26:6-13; Мк. 14:3-9)

1Ыджыд лунӧдз квайт лунӧн водзджык Исус воис Вифания сиктӧ. Сэні оліс Лазар, кодӧс Исус ловзьӧдіс. 2Сэні Исуслы лӧсьӧдісны рытъя сёян. Марпа кесъяліс. Исускӧд сёйысьяс пӧвстын вӧлі и Лазар.

3Марья босьтіс литра джын зэв дона нард вый да мавтіс Исуслысь коксӧ, сэсся чышкаліс найӧс юрсинас. Керкаас ӧвтіс чӧскыд дукӧн. 4Велӧдчысьяс пӧвстын вӧлі Иуда, Симон-Искариотлӧн пиыс, коді сэсся вузалас Исусӧс. Сійӧ шуис: 5«Мыйла тайӧ выйсӧ эз вузавны куимсё динарысь? Сьӧмсӧ эськӧ позис гӧльяслы сетны». 6Дерт, Иуда эз тӧждысь гӧльяс вӧсна. Сійӧ шуис тадзи, ачыс вӧлі гусясьысь да. Сы ордын вӧлі ӧтувъя сьӧм кудйыс, кытысь сійӧ босьтлывліс аслыс. 7Исус шуис: «Ӧвсьы сыысь! Тайӧ аньыс видзис выйсӧ Менӧ дзебигкежлӧ. 8Гӧльяс пыр лоасны тіянкӧд, а Ме ог пыр ло».

9Иудейясысь унаӧн тӧдмалісны Исуслӧн Вифания сиктӧ воӧм йылысь. Найӧ локтісны сэтчӧ эз сӧмын Исус понда, но медым аддзывны тшӧтш Лазарӧс, кодӧс Исус ловзьӧдіс кулӧмысь. 10Аркирейяс шуисны вины тшӧтш Лазарӧс, 11ӧд Лазар вӧсна уна иудей ӧтдортчисны наысь да кутісны эскыны Исуслы.

Исус пырӧ Ерусалимӧ

(Мт. 21:1-11; Мк. 11:1-11; Лк. 19:28-40)

12Мӧд луннас гажӧдчыны чукӧртчӧм йӧз кылісны, мый Исус локтӧ Ерусалимӧ. 13Пальма росъяс босьтӧмӧн найӧ петісны Исуслы воча да горзісны:

– Осанна!

Бурсиӧма Господь нимӧн Локтысьӧс,

Израильлысь Ӧксысӧ!

14Исус аддзис том осёлӧс да пуксис сы вылӧ. Ӧд тадзи гижӧма:

15– Эн пов, Сион ныв#12:15 Видзӧд Мт. 21:5.!

Видзӧд, Ӧксыыд локтӧ,

пукалӧ осёл чань вылын.

16Сэки велӧдчысьясыс эз на гӧгӧрвоны тайӧс. Но Исуслӧн дзирдлуныс воссьӧм бӧрын налы тӧд выланыс уси, мый тадзи вӧлі гижӧма Сы йылысь, и татшӧм ногӧн найӧ паныдалісны Сійӧс.

17Найӧ, кодъяс вӧліны Исускӧд, кор Сійӧ чукӧстіс Лазарӧс дзебанінысь да ловзьӧдіс сійӧс, висьталісны йӧзыслы 18тайӧ шензьӧданатор йывсьыс. Та вӧсна йӧзыс чукӧрӧн петісны Исуслы воча. 19Фарисейяс сёрнитісны ас костаныс: «Аддзанныд, ми нинӧм огӧ вермӧй вӧчны. Став йӧзыс мунӧны Сы бӧрся».

Исус висьталӧ Аслас кулӧм йылысь

20Гажӧдчан кад дырйи Енлы юрбитны локтӧмаӧсь вӧлі тшӧтш кымынкӧ грек. 21Найӧ матыстчисны Филип дінӧ, коді вӧлі Випсаидаысь, галилеяса карысь, да шыасисны: «Ыджыдӧй, ми кӧсъям аддзывны Исусӧс». 22Филип муніс да висьталіс та йылысь Ӧндрейлы. Сэсся Ӧндрей Филипкӧд висьталісны та йылысь Исуслы.

23Исус шуис налы: «Воис кад – воссьыны Морт Пилӧн дзирдлуныслы. 24Веськыда, веськыда висьтала тіянлы: шобді тусь кӧ муӧ усьӧм бӧрас оз кув, сэки ӧтка тусьӧн кольӧ. Кулас кӧ, уна тусь ваяс. 25Тэныд кӧ муса олӧмыд, воштан сійӧс. Мустӧмтан кӧ ассьыд олӧмтӧ тайӧ муюгыдас, видзан сійӧс помтӧм олӧмӧ. 26Меным кесъялысь мед локтӧ Ме бӧрся. Кӧні Ме лоа, сэні тшӧтш лоӧ Менам кесъялысьӧй. И Меным кесъялысьӧс Батьӧй бурӧ пуктас.

27Ӧні Менам сьӧлӧмӧй ёна майшасьӧ. Мый Меным шуны? Батьӧй, мезды Менӧ тайӧ кадсьыс! Но дзик тайӧ кад кежлас Ме локті. 28Батьӧй, восьт Аслад нимлысь дзирдлунсӧ!»

Сэки енэжсянь кыліс гӧлӧс шы: «Ме восьті нин да нӧшта на восьта». 29Сэні сулалысь йӧзыс тайӧс кылӧм бӧрын шуалісны, тайӧ пӧ гым. Мӧдъяс шуалісны, андел пӧ Сыкӧд сёрнитіс. 30Исус шуис: «Тайӧ висьталӧмыс эз вӧв Меным, а тіянлы. 31Ӧні тайӧ муюгыдсӧ лоӧ мыждӧма, муюгыдас ыджыдалысьсӧ лоӧ вӧтлӧма. 32Му вылысь Менӧ кыпӧдӧм бӧрын Ме ставнысӧ Ас дінӧ сибӧда». 33Тайӧ висьталӧмнас Сійӧ гӧгӧрвоӧдіс, кутшӧм ногӧн Сійӧ кулас.

34Йӧзыс шуисны Сылы: «Ми тӧдам Индӧдысь, мый Кристос помтӧг олӧ. Сідзкӧ, мыйла Тэ шуан, Морт Пиӧс пӧ кыпӧдасны? Коді сійӧ Морт Пиыс?» 35Сэки Исус шуис налы: «Этшаник кад югыдыс лоас на тіянкӧд. Сідзкӧ, ветлӧй югыдыс дырйи, медым пемыдыс эз пӧдты тіянӧс. Пемыдас ветлысь оз тӧд, кытчӧ мунӧ. 36Кытчӧдз югыдыс тіянкӧд, эскӧй югыдыслы. Сэки лоанныд югыдыслӧн ныв-пиӧн». Тайӧс висьталӧм бӧрын Исус ылыстчис на дінысь да саяліс.

Йӧзыс оз эскыны Исуслы

37Сы мында шензьӧданатор Исус вӧчис йӧзыс водзын, но найӧ эз эскыны Сылы. 38Тадзи инісны Исай пророклӧн кывъясыс:

– Господьӧй, коді эскис миян висьталӧмӧ?

Кодлы петкӧдчис Господьлӧн вына киыс?

39Найӧ эз вермыны эскыны, кыдзи висьтавліс на йылысь Исай:

40– Енмыс тупкис налысь синнысӧ,

чорзьӧдіс налысь сьӧлӧмнысӧ,

медым эз аддзыны синнаныс,

эз гӧгӧрвоны сьӧлӧмнаныс

да эз бергӧдчыны Мелань,

медым Ме бурдӧді найӧс.

41Исай шуис тайӧ кывъяссӧ, ӧд сійӧ аддзыліс Исуслысь дзирдлунсӧ да висьталіс Сы йылысь.

42Юралысьяс пӧвстысь унаӧн эскисны Исуслы. Но фарисейясысь полӧмнысла найӧ эз лысьтны висьтавны та йылысь веськыда, медым эз вӧтлыны найӧс синагогаысь. 43Ӧд Енлӧн ошкӧм дорысь налы мусаджык вӧлі йӧзлӧн ошкӧмыс.

44Исус гораа шыасис: «Меным эскысь оз Меным эскы, а Менӧ Мӧдӧдысьлы. 45Менӧ аддзысь Менӧ Мӧдӧдысьӧс аддзӧ. 46Ме эм югыдыс. Ме локті му вылӧ, медым Меным эскысь эз коль пемыдас. 47Менсьым кывъясӧс кылысь кӧ оз эскы, Ме сійӧс ог мыжды. Ме ӧд локті муюгыдсӧ мездыны, а эг мыждыны. 48Коді оз сибӧд Менӧ да оз босьт Менсьым кывъясӧс, сылӧн эм аслас мыждысь: Менам висьталӧм кывйӧй медбӧръя лунӧ мыждас сійӧс. 49Ме висьталі эг Ассянь. Менӧ мӧдӧдысь Батьӧй Ачыс велӧдіс Менӧ, мый шуны-юӧртны. 50Ме тӧда, мый Сылӧн тшӧктӧмыс вайӧ помтӧм олӧм. Сідзкӧ, Менам висьталӧмӧй – Батьлӧн шуӧм серти висьталӧм».

Currently Selected:

Иоан 12: КБ

Highlight

Copy