Марк 11

Исус пырӧ Ерусалимӧ

(Мт. 21:1-11; Лк. 19:28-40; Ин. 12:12-19)

1Ерусалимлань матыстчигӧн Исус велӧдчысьясыскӧд воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн 2Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ. 3Юаласны кӧ, мыйла тайӧс вӧчанныд, вочавидзӧй, мый сійӧ колӧ Господьлы. Сэки дзик пыр сетасны осёлсӧ, медым вайӧдны татчӧ».

4Мӧдӧдӧмаяс мунісны, аддзисны дзиръя дорӧ домалӧм том осёлӧс да разисны сійӧс. 5Кодсюрӧ сэні сулалысьяс пиысь юалісны: «Мый вӧчанныд? Мыйла разянныд осёлсӧ?» 6Велӧдчысьяс вочавидзисны, кыдзи Исус тшӧктіс. Сэки лэдзисны босьтны осёлӧс. 7Том осёлӧс вайӧдісны Исус дінӧ, шлапкисны осёл вылӧ паськӧмнысӧ, сэсся Исус пуксис сы вылӧ. 8Унаӧн вольсавлісны ассьыныс паськӧмнысӧ туй вылас, мукӧдыс чегъялісны туй бокысь пу вожъяс да тшӧтш пукталісны туй вылас. 9Водзас да бӧрас мунысьяс горзісны:

– Осанна!

Бурсиӧма Господь нимӧн Локтысьӧс!

10Бурсиӧма миян Давид батьлысь локтан юралӧмсӧ,

Господь нимӧн локтан юралӧмсӧ!

Ошкӧм Медвылыссалы!

11Ерусалимӧ воӧм мысти Исус пырис крамӧ. Ставсӧ видзӧдалӧм бӧрын сёр рытнас муніс дас кыкнан велӧдчысьыскӧд Вифанияӧ.

Инжир пу ёрӧм

(Мт. 21:18-19)

12Мӧд луннас Вифанияысь мунігас Исуслӧн кынӧмыс пондіс сюмавны. 13Ылысянь Сійӧ аддзис коръя инжир пу да муніс видзӧдлыны, оз-ӧ сюр сэтысь тусьтор. Матыстчис пу дінас да аддзис сӧмын коръяссӧ, ӧд эз на во тусь гӧрддзасян кадыс. 14Исус шуис пуыслы: «Ӧнісянь оз пондыны сёйны тэнсьыд вотӧстӧ». Велӧдчысьясыс кывлісны тайӧс.

Крамысь вузасьысьясӧс вӧтлалӧм

(Мт. 21:12-17; Лк. 19:45-48; Ин. 2:13-17)

15Сэсся найӧ локтісны Ерусалимӧ. Крамӧ пырӧм бӧрын Исус пондіс вӧтлавны сэтысь вузасьысь-ньӧбасьысьясӧс. Пӧрлӧдліс сьӧм вежысьяслысь пызанъяссӧ да гулюӧн вузасьысьяслысь пуклӧсъяссӧ, 16эз лэдз крам пырыс нуны нинӧмтор. 17Сійӧ велӧдіс найӧс шуалӧмӧн: «Абу-ӧ гижӧма, мый Менам керкаӧй кутас шусьыны став войтыръяслӧн кевмысян керкаӧн? А ті сыысь лёк вӧчысьяслы дзебсянін вӧчинныд».

18Аркирейяс Индӧдӧ велӧдысьяскӧд кывлісны тайӧс да кутісны мӧвпавны, кыдзи эськӧ вины Исусӧс. Найӧ полісны Сыысь, ӧд став йӧзыс шензисны Сылӧн велӧдӧмысь.

19Рытнас Исус петіс карсьыс.

Косьмӧм инжир пу

(Мт. 21:20-22)

20Асывводзнас инжир пу дінті мунігӧн аддзисны: сійӧ вужйӧдзыс косьмӧма. 21Петырлы тӧд вылас уси Исуслӧн шуӧмыс. Сійӧ шуис Исуслы: «Велӧдысьӧй, видзӧдлы! Инжир пуыд, кодӧс Тэ ёрин, косьмӧма». 22Исус шуис налы: 23«Эскӧй Енлы. Веськыда висьтала тіянлы: шуас кӧ кодкӧ тайӧ керӧсыслы: ”Кыпӧдчы да шыбитчы саридзас”, лоӧ тадзи. Сӧмын мед став сьӧлӧмнас майшасьтӧг эскас, мый шуӧмыс инас. 24Та вӧсна висьтала тіянлы: мый коранныд кевмысиганыд, эскӧй, мый сійӧ лоӧ тіянлы, и лоӧ тадзи. 25Кевмысьны сувтіганыд прӧститӧй тіян водзын мыжмӧмаӧс, медым енэжвыв Батьныд прӧститас тіянлысь мыжъяснытӧ. 26Онӧ кӧ прӧститӧй, сэки енэжвыв Батьныд тіянлысь мыжъяснытӧ оз прӧстит».

Исуслӧн вын йылысь юасьӧм

(Мт. 21:23-27; Лк. 20:1-8)

27Найӧ бара локтісны Ерусалимӧ. Кор Исус ветлӧдліс крамӧд, Сы дінӧ матыстчисны аркирейяс, Индӧдӧ велӧдысьяс да юрнуӧдысьяс. 28Найӧ юалісны: «Кутшӧм вынӧн Тэ ставсӧ тайӧс вӧчан? Коді Тэнӧ пуктіс тайӧс вӧчнысӧ?» 29Исус воча шуис: «Ме тшӧтш тіянлысь ӧтитор юала. Вочавидзанныд кӧ, висьтала, кутшӧм вынӧн ставсӧ тайӧс вӧча. 30Иоанлӧн пыртӧмыс вӧлі Енсянь али мортсянь? Вочавидзӧй Меным». 31Найӧ ас костаныс сёрнитісны: «Шуам кӧ: ”Енсянь”, Сійӧ шуас: ”Мыйла сылы энӧ эскӧй?” 32Гашкӧ, шуам: ”Мортсянь”?» Но найӧ полісны йӧзсьыс, ӧд Иоанӧс ставныс збыльысь пророкӧ пуктісны. 33Найӧ вочавидзисны: «Огӧ тӧдӧй». Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».

Currently Selected:

Марк 11: КБ

Highlight

Copy