መተ 10
10
ኖሄ ሼሻ
1ኖሄ ናይታ፥ ሴማ፥ ካማነ ያፈታ የለተይ ሀይሳፈ ካልድ ፃፈትዳይሳ። ዮ ሃፈ ጉየ፥ ኤንታዉ አደ ናይት የለትዶሶና።
2ያፈታ አደ ናይት፥ ጎመራ፥ ማጎገ፥ ማዳያ፥ ያዋና፥ ቱባላ፥ ሞሳሀነ ትራሳ።
3ጎመራ አደ ናይት፥ አስካናዛ፥ እርፋታነ ቶጋርማ።
4ያዋና አደ ናይት፥ ኤልሻ፥ ታርሰሳ፥ ክፅማነ ሮዳ።
5ሀይሳቲ ዩሾይ አባን ተቀትዳ ቢታን ደእያ ያፈታ ሼሻታስ ማይዛታ። ኤንቲ ባንታ ቢታን ቢታን፥ ባንታ ዶናን ዶናንነ ባንታ ካዎተን ካዎተን ሻከትድ ደእያ ደረታ።
6ካማ አደ ናይት፥ ኩሻ፥ ግብፀ፥ ሊበነ ካናነ።
7ኩሻ አደ ናይት፥ ሳባ፥ ሀውላ፥ ሳብታ፥ ራእማነ ሳብታካ።
ራእመ አደ ናይት፤ ሳባነ ደዳና።
8ኩሽ ናምሩደ የልስ፤ ናምሩደይ ሀ ሳአን ኮይሮ ዎልቃማ ኦላንቾ ግድስ። 9ጎዳ ማደን ዎልቃማ ሻንካንቾ ግድስ። አሳይ፥ “ናምሩደዳ ጎዳይ ነና ዎልቃማ ሻንካንቾ ከሶ” ግድ አንጀይ ሄሳ ግሾሳ። 10እያ ካዎተስ ኮይሮ ካታማት ሳናኦራ#10:10 ሳናኦራ፦ ዎይኮ ባብሎነ ቢታን ደእያ ባብሎነ፥ ኤረካ፥ አርካዳነ ካልነ። 11እ ሄ ቢታፈ አሶረ ብድ፥ ናናወ፥ ረሆቦታነ ካላሀ ኬፅስ። 12ቃስ ናናወፐነ ካላሀ ካታማፐ ግዶን ረሴና ኬፅስ።
13ምፅራይም፥ ሉደታ፥ አናምመታ፥ ላሀበታ፥ ናፍቱሄታ፥ 14ፓትሮሳታነ ፍልስፄመ ኮቻ የልዳ ካስሉሄማታነ ቃፍቶረታ ማይዛ። 15ካናነይ ባ ባይራ ናአ ስዶናነ ሄታ የልስ። 16ቃስ ካናነ ሼሻት ያቡሰታ፥ አሞረታ፥ ገርገሰታ፥ 17ህወታ፥ አርከታ፥ ሲናታ፥ 18አርዋደታ፥ ፃማራታነ ሀማታታ የልስ። ሄሳፈ ጉየ፥ ካናነ ሼሻት ዱማ ዱማ በሲ ላለትዶሶና። 19ካናነ ቢታ ዛዋይ ስዶናፐ ዶምድ፥ ጋራራነ ጋዛራ ጋክድ፥ ሶዶመነ ጋሞራ፥ አዳማነ ፃቦይማ ብድ፥ ላሻአ ጋክ ኤቅስ። 20ሀይሳቲ ካማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተ ደኤስ።
21ሴማስ ናይት የለትዶሶና። እ ያፈታስ ባይራ እሻነ ኤቦራ ናይታ ኡባስ ማይዛ። 22ሴማ አደ ናይት፥ ኤላማ፥ አሶረ፥ አርፋክሳደ፥ ሉደነ አራመ።
23አራመ አደ ናይት፥ ኡፃ፥ ሁላ፥ ገተራነ ማሸካ።
24አርፋክሳድ ሳላ የልስ። ሳል ኤቦራ የልስ።
25ኤቦራስ ናምኡ አደ ናይት የለትዶሶና። ሳአን ደእያ አሳይ እያ ዎደ ሻከትዳ ግሾ እሱዋ ፐለጋ#10:25 ፐለጋ፦ እብራወ ዶናን ሀ ሱን ብርሸይ “ሻከተ” ጉሱ። ግድ ሱንስ። እያ እሻ ሱንይ ዮቅፃና።
26ዮቅፃና ሼሻት ሀይሳታ። ኤንትካ አልሞዳዳ፥ ሳለፋ፥ ሀሰርሞታ፥ ያራሀ፥ 27ሀዶራማ፥ ኡዛላ፥ ድቅላ፥ 28ኦባላ፥ አብማላ፥ ሳባ፥ 29ኦፍራ፥ ሀውላነ ዮባባ። ሀይሳቲ ኡባይ ዮቅፃና ሼሻታ።
30ኤንቲ ደእዳ ሄራይ ሜሳፐ ብድ ዶሎሀ ባጋራ ደእያ ደረይ ዳርያ ሳፋራ ቢታ ጋኬስ። 31ሀይሳቲ ኡባይ ሴማ ሼሻታ፤ ኤንታዉ ዱማ ዱማ ዶን፥ ዱማ ዱማ ቢትነ ዱማ ዱማ ካዎተ ደኤስ።
32ሀይሳቲ ኡባይ ባንታ ሼሻን ሼሻንነ ባንታ ካዎተን ካዎተን ፃፈትዳ ኖሄ ናይታ። ዮ ሃፈ ጉየ ካዎተት ሀይሳታፐ ሳአ ኡባ ላለትዶሶና።
Currently Selected:
መተ 10: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
