መተ 2
2
1ሳሎትነ ሳእ ኤንታን ደእያባ ኡባባይ ሀይሳዳ መትድ ፖለትስ። 2ፆሳይ ባ ኦሱዋ ፖልድ፥ ላፑን ጋላሳን ሸምፕስ። 3ፆሳይ ላፑን ጋላሳን ባ ኦያ ኦሱዋ ኦንግድ ሸምፕዳ ግሾ ሄ ጋላሳ አንጅስ፤ ጋላሳታፐ ዱማይስ። 4ሳሎትነ ሳእ ሄሳዳ ሀን መትስ።
አዳመነ ሄዋኖ
ጎዳ ፆሳይ ሳአነ ሳሎታ መዳ ዎደ፥ 5ሳአ ቦላ እር ቡክቦና ግሾነ ኦያ አስ ባይና ግሾ ምነ ማት ዶልቤና፤ አጭያባይካ ባዋ። 6ግዶሽን፥ ሳአፐ ሃ ፑልትድ፥ ቢታ ኡባ ላክሴስ። 7ሄሳፈ ጉየ፥ ጎዳ ፆሳይ ቢታ ባናፐ አሰ#2:7 አሰ፦ አሰ ገይስ እብራወ ዶናን “አዳመ” ጌተቴስ። “አዳመ” ጉሳይ “ቢታ” ጉሱ። መድ እያ ሲራ ደኦ ሸምፖ ፑንድ ገልስስ። ያትን፥ ሄ አደይ ደኦራ ደእያ አሰ ግድስ።
8ጎዳ ፆሳይ ዶሎሀ ባጋራ ኤደነ ጋናተ ጊግስስ፤ ያን ባ መዳ አድያ ዎስ። 9ጎዳ ፆሳይ ፄላናዉ ሎእያ፥ ማናዉካ ማልእያ ኡባ ቆሞ ም ቢታፈ ዶልስስ። ጋናተ ግዶን ደኦ እምያነ ሎኦነ ኢታ ኤርስያ ናምኡ ምታ ዎስ።
10ጋናተ ኡሽያ ሻፋ ሃይ ኤደነፐ ጎጌስ። ሄ ሻፋይ ኤደነፐ ከይድ ኦይዱ ሻፉ ከይድ ሻከቴስ። 11ኮይሮ ሻፋ ሱንይ ፍሶነ። ፍሶነይ ዎርቀይ ደእያ ሀውላ ቢታ ቦላ ጎጌስ። 12ሄ ቢታ ዎርቀይ ጌሻ ዎርቃ። ቃስ አልኦ ሽቶይነ ሹች ያን ደኤስ። 13ናምአን ሻፋ ሱንይ ግዮነ። ግዮነይ ቶጰ ቢታ#2:13 ቶጰ ቢታ፦ በን ቶጰ ቢታይ ሀእ ደእያ ሱዳነፐነ ቶጰፈ ባጋ ኤኬስ። ዩሹዋን ጎጌስ። 14ሄን ሻፋ ሱንይ ፀግሮሳ። ፀግሮስ አሶረፐ ዶሎሀ ባጋራ ጎጌስ። ቃስ ኦይዳን ሻፋይ ኤፍራፂሳ።
15ጎዳ ፆሳይ አስ ኤደነ ጋናተ ኦና መላነ ናጋና መላ እያ ኤፍድ ያን ዎስ። 16ጎዳ ፆሳይ አሰ፥ “ጋናተ ም ቴራ ኡባፈ ኔኒ ማናዉ ዳንዳኣሳ። 17ሽን ሎኦነ ኢታ ኤርስያ ም አይፍያፐ ሞፓ። አይስ ጊኮ፥ ኔኒ እያፐ ምዳ ጋላስ ቱማ ሀይቃና” ያግድ ኪትስ።
18ሄሳፈ ጉየ፥ ጎዳ ፆሳይ፥ “አደይ ባርካ ደኤይስ ሎኦ ግደና። ታኒ እያ ማዳና መላ እያዉ እንጀትያ ላገ መና” ያግስ።
19ጎዳ ፆሳይ መሄታ፥ ዶአታነ ሳሎ ካፎታ ኡባ ቢታፈ መስ። ያትድ፥ ኤንታ ዎይግድ ሱንነኮ በአናዉ አዳመኮ ኤህን፥ አዳመይ ደኦይ ደእያ መተ ኡባ ሱንዳ ሱንይ ኤንታ ሱን ግድድ አትስ። 20ሄሳዳካ፥ አዳመይ መሄታ፥ ሳሎ ካፎታነ ባዞ ዶአታ ኡባ ሱንስ። ሽን አዳመስ እንጀትያነ እያ ማድያ ላገይ በንትቤና።
21ሄሳ ግሾ፥ ጎዳ ፆሳይ አዳመ ዎልቃማ ስኮን የግስ። እ ስኮ ሀይቅዳሽን እያ ምየ መቀፈ እሱዋ ኤክድ፥ ሄ በሳ አሾን ኩንስ። 22ጎዳ ፆሳይ አዳመፐ ኤክዳ መቀ ማጫ ኦድ መስ፤ ያትድ እዮ እያኮ ኤህስ። 23አዳመይ፥ “ሀ መቀያ ታ መቀፈ፥ ሀ አሽያ ታ አሾፐ ኤከትዳሮ። እያ አደፈ ኤከትዳ ግሾ ማጫ#2:23 ማጫ፦ እብራወ ዶናን ማጫ ገይሳራነ አደ ገይሳራ ናምአይ እስኖ። እብራወን “አደ” ገይስ “እሽ” ጌተቴስ፤ “ማጫ” ገይስ “እሻ” ጌተቴስ። ጌተቶ” ያግስ። 24ሄሳ ግሾ አስ ባ አዋነ ባ አይዉ አግድ፥ ባ ማቸራ እስፈ ደኤስ፤ ናምአይ እስ አስ ግዶሶና። 25አዳመይነ ሄዋና ናምአይካ ፅረ ካሎ ደኦሶና፤ ሽን እሶይ እሱዋስ ዬላቶኮና።
Currently Selected:
መተ 2: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
