መተ 21
21
ይሳቃ የለተ
1ጎዳይ ባ ኦድዳይሳዳ ሳሮ አንጅስ፤ ባ ገልዳ ቃላካ ፖልስ። 2ሳራ ቃንታዳ ፆሳይ ግዳ ዎደይ ጋክን ጭምዳ አብራሃመስ አደ ናአ የላሱ። 3አብራሃመይ ሳራ የልዳ ናአ ሱን ይሳቃ ግድ ሱንስ። 4አብራሃመይ ባ ናአ ይሳቃ ፆሳይ ኪትዳይሳዳ የለትዳ ሆስፑን ጋላሳን ቃፃርስ። 5እያ ናአ ይሳቅ የለትያ ዎደ፥ አብራሃመስ ላይ ፄታ። 6ሳራ፥ “ፆሳይ ታዉ ሚቸ እሚስ፤ ቃስ ሀይሳ ስእያ ኡባይ ታራ ሚጫና” ያጋሱ። 7ቃስካ ሳራ፥ “ሳራ አብራሃመስ ናአ የላዳ ንና ግዳይ ኦኔ? ግድኮካ ታኒ ሀእ እያዉ እ ጭምዳ ዎደ ናአ የላስ” ያጋሱ።#21:7 ሚቸ፦ “ይሳቃ” ጉሳይ “እ ሚጬስ” ጉሱ።
እስማኤላነ አጋር ጎደተ
8ጉ ናአይ ድጭድ፤ ን ዱስ፤ አብራሃመይ ይሳቅ ን ዱዳ ጋላስ ዎልቃማ ግብራ ጊግስስ። 9ሽን ግብፀፈ ይዳ አጋራ አብራሃመስ የልዳ ናአይ ይሳቃ ቶችሽን ሳራ በአሱ። 10ሳራ አብራሃመኮ፥ “ሀ አይለ ናአይ ታ ናአ ይሳቃራ ኡባካ ላቶና ግሾ፥ ጋንድዉነ እ ናኣ ከሳዳ ጎዳ” ያጋሱ።
11ሄ ኦዳይ ባ ናአ ቦችያ ግሾ፥ አብራሃመይ ዳሮ መቶትስ። 12ሽን ፆሳይ አብራሃመ፥ “ነ ኮቻይ ይሳቃ ባጋራ ፄገታና ግሾ ነ ናኣስነ ነ አይሌስ ዳሮ መቶቶፓ፤ ሳራ ነዉ ኦድያባ ኡባ ስአ። 13ቃስ እካ ነ ኮቸ ግድያ ግሾ አይለ ናአ ታኒ ግታ ደረ ኦና” ያግስ።
14ዎንታ ጉራ አብራሃመይ ደንድድ ጉ ካነ ኮዳን ሃ ኩንድ፥ አጋሮ ቶስድ፥ እ ናአ እዮ እድንድ ከስ ጎድስ። እያ ባዳ፥ በርሳበ መላ ቢታን ዳቡራሱ። 15-16ሃይ ኮዳፈ ዉርዳ ዎደ እያ፥ “ናአይ ሀይቅሽን፥ ኡታዳ በእከ” ጋዳ፥ ናአ እስ ቡረ ጋርሳን የጋዳ፥ ናምኡ ፄቱ ዋ ግደይሳ መላ ባዳ ኡታ አጋሱ። ያን ኡታዳ፥ ባ ቃላ ቁ ኦዳ ዬካሱ።
17ፆሳይ ናአ ዋሱዋ ስእስ። ፆሳ ኪታንቾይ አጋሮ ሳሎፐ ፄግድ፥ “አጋረ፥ ዋናዲ? ፆሳይ ናአ ዬሁዋ ስእዳ ግሾ ባቦፋ፤ 18ዳንዳ ኤቃዳ፥ ናአ ደንዳ ነ ኩሽያን ኦይካ፤ ታኒ እያ ግታ ደረ ኦና” ያግስ። 19ፆሳይ እዮ ሃ ኦላ በስን፥ ባዳ ኮዳን ሃ ኩንዳ ናኣ ኡሻሱ። 20ናአይ ድጭያ ዎደ ኡባን ፆሳይ እያራ ግድስ። እ መላ ቢታን ደእድ፥ ዶንገን ዱክያ አሰ ግድስ። 21እ ፓራና መላ ቢታን ደእሽን፥ እያ አይያ ግብፀፈ እያዉ ማቾ እማሱ።
ሳሮተ ጫቆ
22ሄ ዎደ፥ አብመለከይ፥ ባ ቶራ ሞጮና ፍኮላራ አብራሃመኮ ብድ፥ “ኔኒ ኦያባ ኡባን ፆሳይ ኔራ ደኤስ። 23ኔኒ ታ ቦላ ዎይኮ ታ ናይታ ቦላ ዎይኮ ታ ዘረ ቦላ ጭማዳ ገነ ኦና መላ፥ ሀእ ሀይሳን፥ ፆሳ ስንን ታዉ ጫቃ። ታኒ ነዉ ኬህዳይሳዳ፥ ኔንካ ታስነ ኔኒ በተተን ደእዳ ሀ ቢቴስ ኬሀ” ያግስ።
24አብራሃመይ፥ “ታኒ ጫቃይስ” ያግስ።
25ሄ ዎደ፥ አብራሃመይ፥ አብመለከ አይለት ኤክዳ ሃ ኦላባ አብመለከስ ማጋንስ። 26ሽን አብመለከይ፥ “ሄሳ ኦን ኦዳኮ ታኒ ኤርከ። ኔንካ ቃስ ታዉ ኦዳባካ፤ ታኒ ሀች ጋካናዉ ሄሳ ስአብከ” ያግስ።
27ሄሳፈ ጉየ፥ አብራሃመይ ዶርሳታነ ሚዛታ ኤህድ፥ አብመለከስ እምን፥ ኤንቲ ናምአይ ጫቅዶሶና። 28አብራሃመይ ላፑን ኡዞ ዶርሳታ ዉድያፐ ሻክስ፤ 29አብመለከይ አብራሃመ፥ “ሀ ኔኒ ዱማ ሻካ ዎዳ ላፑን ኡዞ ዶርሳታ አይስ ሻካዲ?” ያግድ ኦይችስ።
30አብራሃመይ፥ “ታኒ ሀ ሃ ኦላ ቦክዳይሳስ ማርካ ግዳና መላ፥ ሀ ላፑን ኡዞ ዶርሳታ ታፐ ኤካ” ያግስ።
31ሄሳን ሄ ናምኡ አሳት ጫቅዳ ግሾ፥ ሄ በሳይ ባርሳበ (ጫቆ ሃ ኦላ ዎይኮ ላፑን ሃ ኦላ)።
32በርሳበን ጫቁዋ ጫቅዳፐ ጉየ፥ አብመለከይነ እያ ቶራ ሞጮናይ ፍኮል ደንድድ፥ ፍልስፄመ ቢታ ስምዶሶና። 33አብራሃመይ ባርሳበን ታማርሲክ ጌተትያ ም ቶክስ። ሄሳን ጎዳ፥ መርና ፆሳ ፄግድ እያዉ ጎይንስ። 34አብራሃመይ ፍልስፄመ ቢታን ዳሮ ዎደ ደእስ።
Currently Selected:
መተ 21: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
