ዮሃንሳ 15
15
ዎይነ ኡባነ ታሸታ
1“ታኒ ቱማ ዎይነ ኡባ። ጎሻንቾይ ታ አዋ። 2እ፥ ታ ቦላ ደእያ አይፈ አይፎና ታሽያ ኡባ ካሬስ። አይፍያ ታሽያ ካሰፐ አድ አይፋና መላ ሄ ታሽያ እ ጊግሳና። 3ታኒ ህንተዉ ኦድዳ ቃላ ግሾ ህንተ ጌሽ። 4ታናን ደእተ፤ ታንካ ህንተናን ደአና። ዎይነ ታሸይ ኡባራ ዶና እፅኮ ሄ ታሸይ ባርካ አይፈ አይፋናዉ ዳንዳኤና። ሄሳዳካ፥ ህንተካ ታናን ደኦና እፅኮ አይፈ አይፋናዉ ዳንዳኤከታ።
5“ታኒ ዎይነ ኡባ፤ ህንተ ታሸታ። ታናን ደኤይስነ ታኒ እያን ደኤይስ፥ እ ዳሮ አይፈ አይፋና። ታ ባይና ህንተ ፃላላ አይኮካ ኦናዉ ዳንዳኤከታ። 6ታናን ዶና ኡራይ ታሽያዳ ካረን የግትድ መላና። ሄሳ መላ ታሸት ሺቅድ ታማን የገታና፥ ፁገታና። 7ህንተ ታናን ደእኮ፥ ታ ቃላይካ ህንተናን ደእኮ፥ ህንተ ኮይያባይ አይባ ግድኮካ ዎስተ፤ ህንተ ኤካና። 8ህንተ ዳሮ አይፈ አይፍያ ታ ታማረ ግድኮ፥ ሄሳን ታ አዋይ ቦንቸታና። 9አዋይ ታና ዶሰይሳዳ ታንካ ህንተና ዶሳይስ፤ ታ ሲቁዋን ደእተ። 10ታኒ ታ አዋ ኪታ ናጋዳ እያ ሲቁዋን ደእዳይሳዳ ህንተካ ታ ኪታ ናግኮ ታ ሲቁዋን ዳና።
11“ታ ኡፋይሳይ ህንተናን ግዳና መላነ ህንተ ኡፋይሳይ ፖሎ ግዳና መላ ታኒ ህንተዉ ሄሳ ኦዳስ። 12ታ ኪታይ ሀይሳ፤ ታኒ ህንተና ዶስዳይሳዳ ህንተካ እሶይ እሱዋ ዶስተ።#ዮሀ 13:34፤ 15:17፤ 1 ዮሀ 3:23፤ ይሁ 5. 13ባ ሸምፑዋ ባ ላግያስ አድ እመይሳፈ አያ ግታ ሲቆይ ባዋ። 14ታኒ ህንተና ኪትዳባ ኡባ ኦኮ ህንተ ዶሰትዳይሳታ።
15“አይለይ ባ ጎዳይ ኦያባ ኤሮና ግሾ ታኒ ህንተና ህዛፐ ጉየ አይለታ ጊከ። ሽን ታ አዋፐ ስእዳ ኡባ ታኒ ህንተዉ ኦድዳ ግሾ ህንተና ዶሰትዳይሳታ ጋስ። 16ታኒ ህንተና ዶራስፐ አትሽን፥ ህንተ ታና ዶርበከታ። ህንተ ብድ ዮና አይፈ አይፋና መላ ታኒ ህንተና ሹማስ። ያንኮ፥ ታ አዋይ ህንተ ታ ሱንን ዎስዳባ ኡባ እማና። 17ታ ኪታይ ሀይሳ፦ እሶይ እሱዋ ዶስተ።
አላመይ የሱሳ ታማረታ እፃና
18“አላመይ ህንተና እፅኮ ኮይሮትድ ታና እፅዳይሳ አኬክተ። 19ህንተ አላምያባ ግድያኮ አላመይ ህንተና ዶሳና። ሽን ታኒ ህንተና አላመፐ ዶርዳ ግሾነ ህንተ አላምያባ ግዶና ግሾ አላመይ ህንተና እፄስ። 20‘አይለይ ባ ጎዳፐ አና’ ጋዳ ታኒ ህንተዉ ኦድዳይሳ አኬክተ። ኤንቲ ታና ጎድዳባ ግድኮ ህንተናካ ጎዳና። ኤንቲ ታ ቃላ ናግዳባ ግድኮ ህንተ ቃላካ ናጋና።#ማቶ 10:24፤ ሉቃ 6:40፤ ዮሀ 13:16. 21ሽን ኤንቲ ታና ኪትዳይሳ ኤሮና ግሾ ሀ ኡባ ታ ጋሶን ህንተ ቦላ ኦና። 22ታኒ ያዳ ኤንታዉ ኦዶናባ ግድያኮ ናጋራ ግደና። ሽን ሀእ ኤንቲ ኦዳ ናጋራስ ጋሶያባይ ባዋ። 23ታና እፀይስ ታ አዋካ እፄስ። 24ኦንካ ኦቦና ኦሶ ታ ኤንታ ግዶን ኦቦናባ ግድያኮ ኤንታዉ ናጋራ ግዶና አታና። ሽን ሀእ ኤንቲ ታኒ ኦዳ ኦሱዋ በእድ ታናካ ታ አዋካ እፅዶሶና። 25ሽን ኤንታ ህግያን፥ ‘ታና ጮ እፅዶሶና’ ጌተትድ ፃፈትዳይስ ፖለታና መላ ሄስ ሀንስ።#ማዝ 35:19፤ 69:4.
26“አዋፐ ያ ቱማ ቆንጭስያ አያና ታ ህንተዉ ኪታና። እ ህንተና ምንና፥ ታባ ማርካታና። 27ህንተካ ኮይሮፐ ዶምድ ታራ ደእያ ግሾ ታባ ማርካታና።
Currently Selected:
ዮሃንሳ 15: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
