ሉቃሳ 1
1
1ቦንቾ ተዎፍሎሳ፥ ኑ ግዶን ፖለትዳባስ ዳሮት፥ ባንታዉ ዳንዳኤትዳ መላ ፃፍዶሶና። 2ሄ ታርክያ ኤንቲ ፃፍዳይ ኮይሮፐ ዶምድ አይፈ ማርካትነ ቃላ ሀጋዘይሳት ኑስ ኦድዳይሳ። 3ታካ ታ ባጋራ ኮይሮፐ አኬካ ፄልዳፐ ጉየ፥ ሄ ታርክያ ሀኖታ ማራያዳ ነዉ ፃፎይ ሎኦ ግድድ በንትስ። 4ሄስካ፥ ነ ታማርዳባይ ቱማ ግደይሳ ኤርሳናሳ።
ፃማቅያ ዮሃንሳ የለተ
5ይሁዳ ካዋ ሄሮዲሳ ዎደ አብያ ያራፐ ግድዳ ዛካርያሳ ጌተትያ አይሁደ ካህነይ ደኤስ። እያ ማችያካ አሮና ሼሻፐ። እ ሱንይካ ኤልሳቤፆ።#1 ታር 24:10. 6ናምአይካ ጎዳ ዎጋነ ኪታ ኡባ ናግድ ቦረይ ባይና ፆሳ ስንን ፅሎተን ደእዶሶና። 7ሀኖፐ አትሽን፥ ኤልሳቤፃ ማይን ግድዳ ግሾ ኤንታዉ ናእ ባዋ፤ ናምአይካ ቃስ ጭምዶሶና።
8እስ ጋላስ ዛካርያስ ባ ግሹዋ ማራን ፆሳ ስንን ካህነተን ሀጋዜስ። 9ካህነተ ዎጋን ፆሳ ኬ ገልድ እፃነ ጩይሳናዉ እያ ሳም ጋክስ። 10እፃነይ ጩያ ዎደ አሳይ ካረን ዎሴስ።
11ጎዳ ኪታንቾይ ያርሾ ያርሽያ በሳፈ ኡሻቻ ባጋራ ኤቅድ በንትስ። 12ዛካርያስ እያ በእዳ ዎደ ዳጋምድ ዳሮ ያይስ። 13ሽን ኪታንቾይ እያኮ፥ “ዛካርያሳ ያዮፋ፤ ነ ዎሳይ ስኤትስ። ነ ማችያ ኤልሳቤፃ አደ ናአ የላና፥ እያ ዮሃንሳ ጋዳ ነ ሱንና። 14እ ነዉ እንጀነ ኡፋይስ ግዳና፤ ዳሮት እያ የለተን ኡፋይታና። 15ጎዳ ስንን እ ግታ ግዳና፤ ዎይነ ኡሽ ግድን ሀራ ማይያ ኡሻ ኡየና። ባ አየ ኡሎን ደእሸ ጌሻ አያናን ኩማና።#ታይቦ 6:3. 16እስራኤለ አሳታፐ ዳሮታ ባንታ ጎዳ፥ ፆሳኮ ዛራና። 17አዋታ ዎዛና ናይታኮ ዛራና፥ ኪተቶናይሳታ ፅሎታ ጭንጫተኮ ዛራና መላ፥ ጎዳስ በሲያ ደረ ጊግሳናዉ ኤልያሳ አያናንነ ዎልቃን ጎዳ ስንን ባና” ያግስ።#ምልክ 4:5-6.
18ዛካርያስ ኪታንቹዋኮ፥ “ታ ሄሳ አይብን ኤራኔ? ታራነ ታ ማቸራ ጭምዳ” ያግስ።
19ኪታንቾይ ዛሪድ፥ “ታኒ ፆሳ ስንን ኤቅያ ጋብሬለ። ሀ ምሽራቹዋ ነዉ ኦዳናዉ ፆሳፈ ኪተታስ።#ዳነ 8:16፤ 9:21. 20ሄኮ፥ ዎድያ ናግድ ፖለትያ ታ ቃላ ነ አማኖና እፅዳ ግሾ፥ ሀይስ ፖለታና ጋካናዉ ኔኒ ሙመ ግዳና፥ ኦደታናዉካ ዳንዳአካ” ያግስ።
21ሄ ዎደ ዛካርያስ ፆሳ ኬ ገልድ ጋምእዳ ግሾ፥ አይብ ሀንደ ግድ አሳይ ካረን ናግሸ ጋምእስ። 22እ ካረ ከይድ ኤንታና ኦድሳናዉ ዳንዳእቤና። ማል በሶፐ አትሽን፥ ኦደታናዉ ዳንዳኦናይሳ በእዳ ዎደ ቆንጨ በእዳይሳ ኤርዶሶና።
23ዛካርያስ ባ ሀጋዙዋ ፖልድ ሶ ስምስ። 24ሄሳፈ ጉየ፥ እያ ማችያ ኤልሳቤፃ ቃንታሱ። እቻሹ አጌና ኩመ ባና ገንዳ ጋምአሱ። 25እያ፥ “ጎዳይ ባ ማሮታን ታ ቦርያ አሳ ግዶፈ ድጋናዉ በእድ ሀ ዎድያን ሀይሳ ኦስ” ያጋሱ።
የሱሳ የለተይ ኮይሮትድ ኦደትስ
26ኤልሳቤፃ ቃንትን ኡሱፑን አጌናን፥ ፆሳይ ኪታንቹዋ ጋብሬለ ጋልላ ቢታን ደእያ ናዝረተ ካታማ ኪትስ። 27ካዋ ዳዊታ ሼሻፐ ግድዳ ዮሰፋ ጌተትያ ኡራስ ኦይሸትዳ ጌላኤኮ ኪትስ። ሄ ጌላእያ ማይራሞ ጌተታዉሱ።#ማቶ 1:18. 28ኪታንቾይ ኢኮ ብድ፥ “ዳሮ ዶሰትዳረ፥ ሳሮይ ነዉ ግዶ፥ ፆሳይ ኔራ ደኤስ፤ ኔኒ አንጀትዳሮ” ያግስ።
29ማይራማ እያ ኦዳን ዳሮ ዳጋማዳ፥ “ሀይስ አይብ ሳሮ” ጋዳ ሄታሱ። 30ኪታንቾይ ዛሪድ፥ “ማይራመ፥ ባቦፋ፤ ኔኒ ፆሳ ስንን ሳባ ደማዳሳ። 31ሄኮ ኔኒ ቃንታና አደ ናአ የላና፥ እያ ሱን የሱሳ ጋዳ ሱንና።#ማቶ 1:21. 32እ ግታ ግዳና፥ ኡባፈ ቦላ ፆሳ ናኣ ጌተትድ ፄገታና። ጎዳ ፆሳይ እያ አዋ ዳዊታ አራታ እያዉ እማና።#2 ሳሜ 7:12-13፥ 16፤ እሳ 9:7. 33እ ያይቆባ ሼሻ ቦላ መርናዉ ካዎታና፤ እያ ካዎተስ ዛው ባዋ” ያግስ።
34ማይራማ ኪታንቹዋኮ፥ “ሄስ ዋንድ ሀናኔ? ታ አደ ኤርከ” ያጋሱ።
35ኪታንቾይ ዛሪድ፥ “ጌሻ አያናይ ነ ቦላ ዎና፥ ኡባፈ ቦላ ፆሳ ዎልቃይ ነ ቦላ ኩያታና። ሄሳ ግሾ፥ የለትያ ጌሻ ናአይ ፆሳ ናኣ ጌተታና። 36ሄኮ፥ ነ ዳብያ ኤልሳቤፃ ባ ጭማተ ላይን አደ ናአ ቃንታሱ። እያ ማይን ጌተትዳሮ፥ ሽን ሀእ ኡሱፑን አጌና ኦይካሱ። 37ፆሳ ፆንያባይ ባዋ”#መ 18:14. ያግስ።
38ማይራማ፥ “ሄኮ፥ ታኒ ጎዳ አይልዉ፥ ነ ቃላዳ ታዉ ሀኖ” ያጋሱ። ሄሳፈ ጉየ፥ ኪታንቾይ ኢፐ ሻከትስ።
39ማይራማ ሄ ሳምንታን ደንዳዳ ይሁዳ ቢታን ደእያ እስ ደረይ ዳርያ ካታማ ባሱ። 40ዛካርያሳ ሶ ገላዳ ኤልሳቤፆ ሳሮሱ። 41ኤልሳቤፃ ማይራም ሳሮዋ ስእዳ ዎደ እ ኡሉዋን ደእያ ናአይ ኡፋይሳን ጉፕስ። ኤልሳቤፃ ጌሻ አያናን ኩማዳ፥ 42ባ ቃላ ቁ ኦዳ፥ “ኔኒ ማጫሳ ግዶፈ አንጀትዳሮ፥ ነ ቃንትዳ ናአይካ አንጀትዳይሳ። 43ሀኖሽን፥ ታ ጎዳ አየ፥ ኔኒ ታኮ ያና መላ ታኒ ኦኔ? 44ሄኮ ነ ሳሮዋ ታ ስእዳ ዎደ ታ ኡሉዋን ደእያ ናአይ ኡፋይሳን ጉፕስ። 45ጎዳይ ፖላና ግድ እምዳ ቃላ አማንዳራ፥ እያ አንጀትዳሮ” ያጋሱ።
ማይራም ማዝሙርያ
46ማይራማ ሀይሳዳ ያጋሱ፦
“ታ ሸምፕያ ጎዳ ቦንቻዉሱ፥#1 ሳሜ 2:1-10.
47ታ አያናይ ልያ ፆሳን ኡፋይቴስ።
48እ ባ አይለ ካዉሻተ በእስ።
ሀችፈ ዶምድ የለተ ኡባይ ታና አንጀትዳሮ ጋና።#1 ሳሜ 1:11.
49አይስ ጊኮ፥ ዎልቃማ ግድዳ እ፥ ታዉ ግታባ ኦስ።
እያ ሱንይ ጌሻ።
50እያ ቦንቸይሳታ ቦላ፥
እያ ማሮተይ መርናፐ መርና ጋካናሳ።
51ባ ቀስያን ምኖባ ኦስ፥
ባንታ ዎዛናን ኦቶርተይሳታ ላልስ።
52ዎልቃማ ካዎታ አራታፐ ካዉሽስ፤
ባንታና ካዉሽዳይሳታ ካቦይስ።#እዮ 5:11፤ 12:19.
53ኮሻትዳይሳታ ሎኦባን ካልስስ፥
ሽን ዱረታ መላ ኩሸ የድስ።
54ባ ማሮታ ቆፕድ፥
ባ አይልያ እስራኤለ ማድስ።
55ሄስካ ኑ አዋታስ ኦድዳ ቃላ፥
አብራሃመስነ እያ ሼሻስ ግዳይሳ መርናዉ ፖላናሳ”#መ 17:7.
ያጋሱ።
56ማይራማ ኤልሳቤፅ ማታን ሄ አጌና መላ ጋምአዳ ባ ሶ ስማሱ።
ፃማቅያ ዮሃንሳ የለተ
57ኤልሳቤፅስ የሎ ቃማይ ጋክን አደ ናአ የላሱ። 58እ ሾሮትነ እ ዳቦት ጎዳይ ግታ ማሮታ ኦዳይሳ ስእድ፥ ኢራ እስፈ ኡፋይትዶሶና። 59ሆስፑን ጋላሳን ዮጋ ናኣ ቃፃራናዉ ይዶሶና። እያ አዋ ሱንን ዛካርያሳ ግድ ሱንናዉ ኮይዶሶና።#ሌወ 12:3. 60ሽን አይያ፥ “አካይ፥ ዮሃንሳ ጌተታናዉ በሴስ” ያጋሱ። 61ኤንትካ፥ “ነ ዳቦታፐ ሀ ሱንን ፄገትዳይ ኦንካ ባዋ” ያግዶሶና። 62እያ አዋይ ኦና ግድ ሱንነኮ ኤራናዉ ኮይድ እያ ማላ ኦይችዶሶና። 63እ ፃፍያባ ኦይች ኤክድ፥ “እያ ሱንይ ዮሃንሳ” ግድ ፃፍስ። ኡባይ እ ፃፍዳይሳ በእድ ማላለትዶሶና። 64ኢራ ዛካርያሳ እንፃርሳይ ብለትስ፥ ፆሳ ጋላትሸ ኦደተ ኦይክስ። 65ሾሮት ኡባይ ያሻን ኩምዶሶና። ሀ ሀንዳባይ ደረይ ዳርያ ይሁዳ ቢታን ኦደትስ። 66ሄሳ ስእዳ ኡባይ፥ “ሀ ናአይ አይ ሀናንደሻ” ግድ ባንታ ግዶን ኦደትዶሶና። ጎዳ ኩሸይ እያራ ደኤስ።
ዛካርያሳ ማዝሙርያ
67ዮሃንሳ አዋይ ዛካርያስ ጌሻ አያናን ኩምድ ሀይሳዳ ያግድ ትንብተ ኦድስ።
68“እስራኤለ ጎዳይ ጋላተቶ፥
ይድ ባ አሳ ዎዝስ።
69ባ አይልያ ዳዊታ ኬን
አቶተ ካጭያ ደንስ።
70ሄስካ በን ዎደ ጌሻ ናበታ ዶናን ኦደትዳይሳ መላ፥
71እያ አሾይ ኑ ሞርከታፐነ
ኑራ ኤቀትያ ኡባ ኩሽያፐ።
72ሄሳ እ ኦዳይ ኑ አዋታስ ባ ማሮታ በሳናስነ፥
ባ ጌሻ ጫቁዋ ናጋናሳ።
73ኑ አዋ አብራሃመስ ጫቅዳ
ጫቁዋ ቆፓናስነ
74ኑ ሞርከታ ኩሸፐ ከስድ
ያሽ ባይና እያ ሀጋዛና መላሳ።
75ኑ ላይ ኡባን ጌሻተንነ ፅሎተን
ባ ስንን ኑና ኤሳናሳ።
76ቃስ ላ ናአዉ፥ ኔኒ ኡባፈ ቦላ ፆሳ ናበ ጌተታና።#ምልክ 3:1.
ጎዳ ኦግያ ሎይናዉ ነ እያ ስንን ባና።
77ኤንታ ናጋራይ ቁሸትን፥
ኤንቲ አቶተ ደማናይሳ ነ ጎዳ ደርያስ ኦዳና።
78ኑ ፆሳ ሎኦ ማሮተፈ ደንዶይሳን
ዎንታ ፃልቀይ ኑስ ሳሉዋፐ ከይስ።
79ሄስካ ማንነ፥
ሀይቆ ኩያ ጋርሳን ደኤይሳታስ ፖእሳናሳ፥
ኑ ቶሁዋካ ሳሮ ኦግያኮ ዛራናሳ”
ያግስ።#እሳ 9:2.
80ናአይ ድጭስ፥ አያናን ምንስ፥ እስራኤለ አሳስ ቆንጫና ጋካናዉ መላ ቢታን ደእስ።
Currently Selected:
ሉቃሳ 1: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
