ሉቃሳ 23
23
የሱሲ ጵላፆሳ ስንን
(ማቶ 27:1-2፥ 11-14፤ ማር 15:1-5፤ ዮሀ 18:28-38)
1ሄ በሳን ሺቅዳ ሻንጎት ኡባይ ደንድድ የሱሳ ጵላፆሳኮ ኤፍዶሶና። 2“ሀ ኡራይ ኑ አሳ ባለሽን፥ ካዋስ ጊራ ጊሮና መላ ድግሽንነ፥ ቃስ ‘ታኒ ክርስቶሳ ህንተ ካዋ’ ያግሽን ደምዳ” ያግድ ሞትዶሶና።
3ጵላፆስ የሱሳ፥ “ኔኒ አይሁደታ ካዎ?” ያግድ ኦይችስ።
የሱሲ፥ “ኤ፥ ነ ግዳይሳ መላ” ያግስ።
4ጵላፆስ ካህነ ሀላቃታኮነ አሳኮ፥ “ሀ ኡራ ቦላ ታኒ እስ ባላካ ደማብከ” ያግስ። 5ሽን ኤንቲ፥ “ሀ ኡራይ ጋልላፐ ዶምድ ሀይሳ ጋካናዉ ይሁዳ ኩመ ኢታባስ ደንስ” ያግድ ምን ኦድዶሶና።
6ጵላፆስ ሄሳ ስእዳ ዎደ የሱሲ ጋልላ አሴኮ ኤራናዉ ኮይድ እያ ኦይችስ። 7የሱሲ ሄሮዲሳ ቢታፈ ይዳ አስ ግደይሳ ጵላፆስ ኤርዳ ዎደ ሄሮዲስ ሄ ዎደ የሩሳላመን ደእያ ግሾ እያኮ የድስ።
8ሄሮዲስ የሱሳ በአናዉ ዳሮ ዎደፐ ኮይሸ ደእያ ግሾ፥ እያ በእዳ ዎደ ዳሮ ኡፋይትስ። አይስ ጊኮ፥ እያባ ስእዳ ግሾ ማላልስያባ ኦን በአናዉ አሞትሸ ደኤስ። 9ሄሮዲስ የሱሳ ዳሮ ኦይሾታ ኦይችስ፥ ሽን እ አይኮካ ዛርቤና። 10ካህነታ ሀላቃትነ ህገ አስታማረት ያን ኤቅድ ምንድ እያ ሞቶሶና። 11ሄሮዲሳራነ እያ ዎታዳረታራ የሱሳ ካዶሶናነ ለቅስዶሶና። ቦንቾ አፍላ ማይዝድ ጵላፆሳኮ ዛሪድ የድዶሶና። 12ሄሮዲሳራነ ጵላፆሳራ ካሰ ሞርከሽን ሄ ጋላስ ዎላ ጊግዶሶና።
13ጵላፆስ ካህነ ሀላቃታ፥ አሳ ሃረይሳታነ አሳ ፄግድ፥ 14“ ‘ሀ ኡራይ አሳ ጌላተስ ደንስ’ ግድ ታኮ ኤህደታ። ታካ ህንተ ስንን ፕልጋዳ ህንተ ሺሽዳ ሞቱዋስ አይብ ባላካ ደማብከ። 15ሄሮዲስ፥ ሄሳ አይብ ባላካ እያ ቦላ ደምቦና ግሾ ኑኮ የድስ። ቱማካ ሀ ኡራይ ሀይቆስ ጋያ አይብ ባላካ ኦቤና። 16ሄሳ ግሾ፥ እያ ጋራፋዳ ብላ የዳና” ያግስ። 17ሄሳ እ ግዳይ ፓስካ ባኣለ ዎደ እስ አስ ኤንታዉ ብላናይስ እያዉ አቶናባ ግድያ ግሾሳ።
18ደረይ ኡባይ እስ ቦላ፥ “ሀ ኡራ ገደ ድጋ፥ ኑስ ባርባና ብላ” ያግድ ዋስዶሶና። 19ባርባን ካታማ ግዶን አሳ ኢታባስ ደንድ አሰ ዎድ ቃሸትዳ አስ።
20ጵላፆስ የሱሳ ብላናዉ ኮይድ አሳስ ዛር ኦድስ። 21ግዶሽን፥ አሳይ፥ “ካቃ! ካቃ!” ያግድ ዋስዶሶና። 22ጵላፆስ ሄን፥ “ሀ ኡራይ ቆህዳባይ አይቤ? ዎስ ጋያ ባላ ታ ደማብከ። ሄሳ ግሾ፥ ጋራፋዳ የዳ አጋና” ያግስ።
23ኤንቲ ባንታ ቃላ ቁ ኦድ፥ “ካቀታናዉ በሴስ” ግድ ምን ዋስዶሶና። ኤንታ ዋሶይካ ፆንስ። 24ኤንታ ኦይሻ ግሾ፥ ግድ ጵላፆስ እያ ቦላ ፕርድስ። 25አሰ ኢታባስ ደንዳይሳነ አሰ ዎድ ቃሸትዳይሳ ብላና መላ ዎስዳ ግሾ ሄ ኡራ ኤንታዉ ብልስ። ሽን የሱሳ ኤንቲ ኮይዳባ ኦና መላ ኤንታዉ አድ እሚስ።
የሱሳ ካቀተ
(ማቶ 27:31-44፤ ማር 15:21-32፤ ዮሀ 19:17-27)
26የሱሳ ኦይክድ ኤፍሽን ስሞና ጌተትያ ቀሬና ቢታ አደይ ጋፃረፐ ይሽን፥ ደምድ ማስቃልያ ቶስድ የሱሳ ካልድ ባና መላ ኡንኤዶሶና። 27ዳሮ አሳይነ ባንታ ትራ እጭሸ ዬክያ ማጫሳት እያ ጉየራ ካሎሶና።
28ሽን የሱሲ ኤንታኮ ጉየ ስሚድ፥ “ህንተኖ፥ የሩሳላመ ማጫሳቶ፥ ህንተ ሁጰስነ ህንተ ናይታስ ዬክተፐ አትሽን፥ ታዉ ዬኮፍተ። 29‘ሄኮ ማይንት፥ የሎና ኡሎትነ ንና ንት አንጀትዶሶና’ ህንተ ያጋና ጋላሳይ ያና። 30ሄ ዎደ ደረታ፥ ‘ኑ ቦላ ኩንድተ’፥ ዙማታካ፥ ‘ኑና ካምተ’ ያጋና።#ሆሰ 10:8፤ ቆን 6:16. 31ህዛ፥ ቃየ ም ሄሳ ኦኮ መላ ም ዋታንደሻ?” ያግስ።
32እያራ ዎናዉ ሀራ ናምኡ ዎራንታ ኤፍዶሶና። 33ቀራንዮ#23:33 ቀራንዮ፦ ቀራንዮ ገይስ ግርከ ዶና። አራምከ ዶናን “ጎልጎታ” ዎይኮ “ሁጰ ጉገ” ጉሱ። ቀራንዮ ጌተትያ ሱንይ እመትዳይ የሱሲ ካቀትዳይ አሳ ሁጰ ጉገ ዳንያ በሳን ግድያ ግሾሳ። ሄ በሳይ ሮመ ካዎተይ ዎራንታ ካቅያ በሲ። (ማቶ 27:33፤ ማር 15:22፤ ዮሀ 19:17) ጌተትያ በሳ ጋድ ካቅዶሶና። ዎራንታፐ እሱዋ ኡሻቻ ባጋራ ሀንኩዋ ሀድርሳ ባጋራ ካቅዶሶና። 34የሱሲ፥ “ታ አዋዉ፥ ኤንቲ አይ ኦያኮ ኤሮና ግሾ፥ ኔኒ ኤንታዉ አቶ ያጋ” ያግስ።#ማዝ 22:18.
ኤንቲ እያ አፍላ ቦላ ሳማ የግድ ሻከትድ ኤክዶሶና።
35አሳይ ኤቅድ ፄሎሶና፥ ሽን ደርያ ሃረይሳት፥ “ሀራታ አሽስ፤ ፆሳይ ዶርዳ ክርስቶስ እያ ግድኮ አነ ባና አሾ” ያግድ ለቅስዶሶና።#ማዝ 22:18፤ ማዝ 22:7. 36ዎታዳረት እያኮ ሺቅድ፥ ጫላ ዎይነ ኡሻ እምዶሶና።#ማዝ 69:21. 37ያትድ፥ “ኔኒ አይሁደታ ካዎ ግድኮ ነ ሁጵያ አሻ” ያግድ ለቅስዶሶና።
38እያዉ ሁጰ ባጋራ፥ “ሀይስ አይሁደታ ካዎ” ግያ ፁፈይ ደኤስ። 39ካቀትዳ ዎራንታፐ እሶይ ጫሸ ሳአራ ጎችሸ፥ “አነ ኔኒ ክርስቶሳ ግድኮ፥ ነናካ ኑናካ አሻ” ያግስ።
40ሽን ሀንኮ ዎራንይ፥ “ኔኒ ሀይሳ መላ ፕርዳን ደአሸ ሀር አቶሽን፥ ፆሳስ ያይኪ? 41ኑኒ ኑ ኦዳ ናጋራ ግሾ በሲያ ፕርዳ ኤኮስ፥ ሽን ሀ ኡራይ እስ ኢታባ ኦቤና” ያግድ ሀንቀትስ።
42ቃስካ፥ “የሱሳ፥ ነ ነ ካዎተራ ያ ዎደ ታና ቆፓ” ያግስ።
43የሱሲ፥ “ታ ነዉ ቱማ ኦዳይስ፤ ሀች ኔኒ ታራ ጋናተን ግዳና” ያግስ።
44-45ሄ ጋላስ ኡሱፑን ሳተፐ ብድ ኡዱፉን ሳተ ጋካናዉ አዋይ ፖኡዋ ድግዳ ግሾ፥ ቢታ ኡባ ቦላ ማ ግድስ። ፆሳ ኬ ማጋራጆይ ዳከትድ ናምአን ሻከትስ።#ከሳ 26:31. 46የሱሲ፥ ቃላ ቁ ኦድ፥ “ታ አዋዉ፥ ታ ታ ሸምፕዉ ነ ኩሸን ሼይስ” ያግድ ሀይቅስ።#ማዝ 31:5.
47ማቶ ሀላቃይ፥ ሀንዳይሳ በእድ፥ “ሀይስ ኡራይ ቱማካ ፅሎ” ያግድ ፆሳ ጋላትስ። 48ሀ ሀንያባ በአናዉ ሄ በሳ ሺቅዳ አሳ ኡባይ ሀንዳባ በእዳ ዎደ ባንታ ትራ እጭሸ ባንታ ሶ ስምዶሶና። 49ግዶሽን፥ የሱሳ ማታን ኤርያ አሳ ኡባይ፥ ሄሳዳካ ጋልላፐ ካልድ ይዳ ማጫሳት ሄሳ በእሸ ሃሆን ኤቅዶሶና።#ሉቃ 8:2.
50-51አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተ ዩሳ ናጌስ። ሻንጎታፐ እሱዋ ግድሸ ኤንታ ዞረተንነ ኦሱዋን ዴና። 52ሄ ኡራይ ጵላፆሳኮ ብድ፥ የሱሳ አሀ ሞጋናዉ ታዉ እማ ግድ ዎስስ። 53ጵላፆስ ኤካ ያግን፥ የሱሳ አሀ ዎስድ አፍላራ ፃፅስ። ዛላፈ ዎጭድ ከስዳ ሀራ አስ ሞገቶና ኦራ ዱፎን ዎስ። 54ሳምባት ገላና ሀንያ ግሾ፥ ሄ ጋላሳይ ጊገተ ቃማ።
55ጋልላፐ ደንድድ የሱሳ ካልድ ይዳ ማጫሳት ዮሰፋራ ብድ እያ አሀ ዋት ሞግያኮ ዱፉዋ አኬክድ በእዶሶና። 56ያፐ ስሚድ ሽቶነ ቅባተ ጊግስዶሶና። ህገይ ኪተይሳ መላ ሳምባታ ጋላስ ሸምፕ ፔእዶሶና።#ከሳ 20:10፤ ዛረ 5:14.
Currently Selected:
ሉቃሳ 23: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
