ሉቃሳ 4

የሱሲ ፓጨተ

(ማቶ 4:1-11፤ ማር 1:12-13)

1የሱሲ ጌሻ አያናን ኩምድ ዮርዳኖሰ ሻፋፐ ስምዳ መላ አያናይ እያ መላ ብታ ኤፍስ። 2ያን ኦይታሙ ጋላስነ ቃማ ፃላሄን ፓጨትስ። ሄ ጋላሳታን አይኮካ ሞና ጋምእዳ ግሾ ዉርሰን ኮሻትስ።

3ፃላሄይ እያኮ፥ “ኔኒ ፆሳ ናአ ግድኮ አነ ሀይስ ሹቻይ ኡይ ግዶ ጋዳ ኪታ” ያግስ።

4የሱሲ ዛሪድ፥ “አስ ኡይ ፃላላን ዴና ጌተትድ ፃፈትስ” ያግስ።#ዛረ 8:3.

5ሄሳፈ ጉየ፥ ፃላሄይ የሱሳ አዱሳ ደረ ቦላ ከስድ ሀ አላምያ ካዎተታ አይፈ ቅጵ ዛራናዉ በስስ። 6ፃላሄይ፥ “ሀ ኡባስ ማታይነ ቦንቾይ ታዉ እመትስ። ታኒ ዶስዳ ኦደስካ እምያ ግሾ ነዉ እማና። 7ሄሳ ግሾ፥ ኔኒ ታዉ ጎይንኮ ኡባይ ነዉ ግዳና” ያግስ።

8የሱሲ ዛሪድ፥ “ነ ጎዳ፥ ነ ፆሳ፥ እያ ፃላላ ጎይና ጌተትድ ፃፈትስ” ያግስ።#ዛረ 6:13.

9ዉርሰን ፃላሄይ የሱሳ የሩሳላመ ኤፍድ ፆሳ ኬስ ሁጵያ ቦላ ኤስድ፥ “ኔኒ ፆሳ ናአ ግድኮ አነ ዱገ ሳአን ነና የጋ። 10አይስ ጊኮ፥

“ ‘ነና ናግያ ኪታንቾታ

ፆሳይ ነ ግሾ ኪታና።#ማዝ 91:11-12.

11ኤንቲ ነ ቶሆይ ሹቻን በቶና መላ፥

ባንታ ኩሽያን ቁ ኦድ ነና ደንና’ ጌተትድ ፃፈትስ”

ያግስ።

12የሱሲ ዛሪድ፥ “ነ ጎዳ ፆሳ ፓጮፋ ጌተትድ ፃፈትስ” ያግስ።#ዛረ 6:16.

13ፃላሄይ የሱሳ ፓጭያ ዉርስዳፐ ጉየ ሀራ እንጀ ዎደ ደማና ጋካናዉ እያፐ ሻከትስ።

የሱሲ ጋልላን ታማርሶ ዶመ

(ማቶ 4:12-17፤ ማር 1:14-15)

14የሱሲ አያና ዎልቃን ኩምድ ጋልላ ስምስ። እያ ሱንይ ሄራን ደእያ ቢታ ኡባን ከይስ። 15እ አይሁደ ዎሳ ኬ ገልድ ታማርስስ፤ አሳ ኡባይ እያ ጋላትዶሶና።

16ያፐ እ ድጭዳ ካታማ ናዝረተ ይስ። ካሰ ሜዘትዳይሳዳ ሳምባታ ጋላስ አይሁደ ዎሳ ኬ ገልስ። ናባባናዉካ ደንድ ኤቅስ። 17ናብያ እሳያሳ ማፃፋይ እያዉ እመትን፥ ዶይድ፥ ሀይሳዳ ያግድ ፃፈትዳይሳ ደምስ፦

18“ጎዳ አያናይ ታ ቦላ ደኤስ፥

ማንቆታስ ዎንገላ ኦዳና መላ

ፆሳይ ታና ዶርስ።

ቃሸትዳይሳታስ ብለተ፥

ቆቅዳይሳታ ፄልሳናስነ

ኡንኤትዳይሳታ ብርሻና መላ፥#እሳ 61:1-2.

19ፆሳይ ኬሀናዉ ቆፕዳ ላይ ኦዳና መላ ታና ኪትስ”

ያግስ።

20ሄሳፈ ጉየ፥ ማፃፋ ፃፅድ ሀጋዘይሳስ እምድ ታማርሳናዉ ኡትስ። አይሁደ ዎሳ ኬን ደእያ አሳት ኡባይ ጫድ ፄሎሶና። 21እ፥ “ሀይስ ህንተ ሀይን ህንተ ስእያ ሀ ማፃፋ ቃላይ ሀች ፖለትስ” ያግስ።

22ኡባይ እያባ ዳርስድ ኦደቶሶና። ቃስ እያ ዶናፐ ከይያ አ ኬሀተን ኩምዳ ቃላን ማላለትሸ፥ “ሀይስ ዮሰፋ ናኣ ግደነዬ?” ያግዶሶና።

23እ፥ “ ‘ነኖ ለ አዋዉ ነና አሻ፥ ቅፍርናሆማን ነ ኦዳባ ኑ ስኦይሳ ቃስ ሀይሳን ነ ካታማን ኦ’ ግያ ሌምሱዋን ህንተ ታና ጋናይሳስ ስይ ባዋ” ያግስ። 24ቃስ፥ “ቱማ ኦዳይስ፤ ናበይ ባ የለትዳ ቢታን ቦንቸተና።#ዮሀ 4:44.

25“ታ ህንተዉ ቱማ ኦዳይስ፤ ሳሎይ ሄ ላይነ ባጋ ጎርደትን ምኖ ኮሽ ቢታ ኡባን ደእያ ኤልያሳ ዎደ ዳሮ አምኤት እስራኤለን ደኦሶና።#1 ካዎ 17:1. 26ኤልያስ ኤንታፈ እስነኮካ ኪተትቤና። ሽን ሳራፕታን ደእያ አምኤኮ ኪተትስ።#1 ካዎ 17:8-16. 27ናብያ ኤልሳ ዎደ እስራኤለን ዳሮ ባሮ ሀርጋንቾት ደኦሶና። ሽን ሶረ ኡራ ንእማነፐ አትሽን፥ ኦንካ ፓፅቤና” ያግስ።#2 ካዎ 5:1-14.

28አይሁደ ዎሳ ኬን ደእያ አሳ ኡባይ ሄሳ ስእዳ ዎደ ዳሮ ይሎትዶሶና። 29ባንታ ኡትዳ በሳፈ ደንድድ ደረ ቦላ ኬፀትዳ ካታማፐ ጋፃ ከስድ ሱግ የዳናዉ አፎ ዶና ኤፍዶሶና። 30ሽን እ ኤንታ ግዶራ ካንድ አስ።

የሱሲ ቱና አያና ከስስ

(ማር 1:21-28)

31ያፐ ጋልላ ቢታን ደእያ ቅፍርናሆማ ካታማ ብስ። ያን ሳምባታ ጋላስ አሳ ታማርስስ። 32እ ታማርሰይ ማታራ ግድያ ግሾ ኡባይ እያ ትምርትያን ማላለትዶሶና።#ማቶ 7:28-29፤ ማዝ 91:11-12.

33አይሁደ ዎሳ ኬን ቱና አያናይ ኦይክዳ ኡራይ ደኤስ። 34እ፥ “ናዝረተ የሱሳ ኑና አይስ ዋይሳይ ኑፐ ሃካ፤ ኔኒ ይዳይ ኑና ይሳናሰዬ? ኔኒ ኦነኮ ታኒ ኤራይስ። ኔኒ ፆሳፈ ይዳ ጌሻ” ያግድ ዋስስ።

35የሱሲ ቱና አያናኮ፥ “ስእ ጋዳ ሀ ኡራፐ ከያ” ያግድ ሀንቅስ። ቱና አያናይ ኡራ አሳ ኡባ ስንን ሆል የግድ አይኮካ ቆሆና የድድ ከይስ።

36አሳ ኡባይ ማላለትዶሶና። ዎልኮ፥ “ሀኖስ፥ ሀይስ አይብ ትምርቴ? ቱና አያናታ ማታንነ ዎልቃን ኪቴስ፤ ኤንትካ ከዮሶና” ያግዶሶና። 37እያ ሱንይ ሄራ ኡባን ከይስ።

የሱሲ ዳሮ ሀርጋንቾታ ፓስ

(ማቶ 8:14-17፤ ማር 1:29-34)

38ሄሳፈ ጉየ፥ የሱሲ አይሁደ ዎሳ ኬፈ ከይድ ስሞና ሶ ገልስ። ስሞና ማቸ አይያ ምኖ ቆፆ ምሻ ሀርገን ሳከታሱ። እዮ ፓና መላ የሱሳ ዎስዶሶና። 39እ ሂፃኮ ሺቅ ሆክድ እ ሀርግያ ሀንቅስ። ምሻይ አግን ኤለሳ ደንዳዳ ኤንታ ሞካሱ።

40አዋይ ዉላና ሀንሽን ዱማ ዱማ ሀርግያን ኦይከትዳ አሳ እያኮ ኤህዶሶና። እ እሱዋ እሱዋ ቦላ ባ ኩሽያ ዎድ ፓስ። 41ቱና አያናት ቃስ፥ “ኔኒ፥ ፆሳ ናኣ” ግድ ዋስሸ ዳሮ አሳፐ ከይዶሶና። ሽን እ ኤንታና ሀንቅስ። እ ክርስቶሳ ግደይሳ ኤንቲ ኤርያ ግሾ፥ እስባካ ኦደቶና መላ ድግስ።

42ቡሮ ዎንትያ ዎደ የሱሲ እስ ጌማ በሲ ብስ። አሳይ ኮይሸ እ ደእያ በሳ ይዶሶና። ኤንታፈ እ ሻከትድ ቦና መላ ድጋናዉ ኮይዶሶና። 43ሽን እ፥ “ታኒ ሀራ ካታማታ ባዳ ፆሳ ካዎተ ዎንገላ ማርካታናዉ በሴስ። ታ ኪተትዳይ ሄሳሳ” ያግስ። 44ይሁዳ ቢታን ደእያ አይሁደ ዎሳ ኬን ሳባክስ።

Currently Selected:

ሉቃሳ 4: GFBEVF

Highlight

Copy