ሉቃሳ 7
7
ማቶ ሀላቃ አማኖ
(ማቶ 8:5-13፤ ዮሀ 4:43-54)
1የሱሲ ሄሳ ኡባ አሳ ስንን ታማርስድ ኦንግዳፐ ጉየ፥ ቅፍርናሆማ ካታማ ብስ። 2ሄ በሳን እስ ማቶ ሀላቃይ ደኤስ። እ ዳሮ ዶስያ አይለይ ሀርገትድ ሀይቆስ ጋክስ። 3እ የሱሳባ ስእዳ ዎደ ባ አይልያ ፓና መላ እያ ዎሶ ግድ እስ እስ አይሁደ ጭማታ የሱሳኮ ኪትስ። 4ኪተትዳይሳት፥ የሱሳኮ ብድ፥ “ነ እያዉ ሀይሳ ኦናዉ በሴስ። 5አይስ ጊኮ፥ ሀ ኡራይ ኑ አሳ ዶሴስ፥ አይሁደ ዎሳ ኬካ ኬፅስ” ግድ ምን ዎስዶሶና 6የሱሲካ ኤንታራ ብስ።
ማቶ ሀላቃ ሶኮ ማትያ ዎደ ባ ላገታ እያኮ ኪትድ፥ “ጎዳዉ፥ ታ ካራፐ ጋርሳን ነ ገላናዉ ታ በሶና ግሾ፥ ዳቡሮፓ። 7ታካ ታና ነ ስን ሺቃናዉ በሲያ አስ ጋዳ ቆፕከ። ሽን ነ እስ ቃላ ኦዳ፤ ታ አይለይ ፓፃና። 8ታዉ ታፐ ቦላራ ሀላቃይ ደኤስ፥ ታፐ ጋርሳን ታ ኪትያ ዎታዳረት ደኦሶና። እሱዋ፥ ‘ባ’ ጊኮ ቤስ፥ ሀንኩዋ፥ ‘ሃያ’ ጊኮ ዬስ። ታ አይልያኮ፥ ‘ሀኖ ኦ’ ጊኮ ኦስ” ያግስ።
9የሱሲ ሄሳ ስእዳ ዎደ ማላለትስ። ጉየ ስሚድ ባራ ያ አሳኮ፥ “ታኒ ህንተዉ ቱማ ኦዳይስ፤ ሀር አቶሽን እስራኤለንካ ሀይሳ መላ ግታ አማኖ ደማብከ” ያግስ። 10ኪተትዳ አሳት ሶ ስምያ ዎደ አይለይ ፓፅን ደምዶሶና።
አምኤ ናአ
11ጉ ዎደፐ ጉየ የሱሲ ናይነ ካታማ ብስ። እያ ታማረታራነ ሀራ ዳሮ አሳት እያራ ብዶሶና። 12እ ካታማ ገላና ሀንያ ዎደ አሀ ቶክዳ ዳሮ አሳት ካታማፐ ከዮሶና። ሀይቅዳ ናአይ ባ አየስ እሱዋ፥ እያካ አምኦ ግዳዳ ደአዉሱ። ካታማ አሳፐ ዳሮት ኢራ ደኦሶና። 13ጎዳይ እዮ በእዳ ዎደ ቃትድ፥ “ዬኮፋ” ያግስ።
14ሺቅድ ሀላ ቦችን ቶክዳ አሳት ኤቅዶሶና። የሱሲ፥ “ላ፥ ያላጋዉ ደንዳ” ያግስ። 15ሀይቅዳይስ ደንድ ኡትድ ኦዳ ኦይክስ። የሱሲ ናኣ ኤክድ አየስ እሚስ።
16አሳ ኡባይ ያሸትድ፥ “ግታ ናበይ ኑ ግዶን ደንድስ፤ ፆሳይ ባ አሳ በእስ” ያግድ ፆሳ ጋላትዶሶና። 17እያ ሱንይ ይሁዳንነ ሄ ሄራን ደእያ ቢታ ኡባን ስኤትስ።
የሱሳነ ፃማቅያ ዮሃንሳ
18ፃማቅያ ዮሃንሳ ታማረት ሄሳ ኡባ ዮሃንሳስ ኦድዶሶና። እ ኤንታ ግዶፈ ናምአታ ፄግድ፥ 19“ያና ጌተትዳይ ነነዬ? ዎይኮ ሀራ ናግኖ?” ያግድ ኦይችተ ግድ ጎዳኮ ኪትስ።
20አሳት “የሱሳኮ ብድ፥ ፃማቅያ ዮሃንስ፥ ‘ያና ጌተትዳይ ነነዬ? ዎይኮ ሀራ ናግኖ?’ ጊተ ግድ ኑና ኔኮ ኪትስ” ያግዶሶና።
21ሄ ሳተንካ የሱሲ ዳሮ አሳ ሀርግያፈ ፓስ። ቱና አያናታ ከስስ፥ ቆቅዳ አይፍያካ ፄልስስ። 22ዮሃንሳ ማታፐ ኪተትድ ይዳይሳታኮ፥ “ብድ ህንተ በእዳይሳነ ስእዳይሳ ዮሃንሳስ ኦድተ። አይፈ ቆቀት ፄሎሶና፥ ጉንዳት ብርሸትድ ሄመቶሶና፥ ባሮ ሀርጋንቾት ጌዮሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፥ ማንቆታስ ዎንገላይ ሳባከቴስ።#እሳ 35:5-6፤ 61:1. 23ታናን በቶና ኦንካ አንጀትዳይሳ።”
24ዮሃንስ ኪትዳይሳት ብዳፐ ጉየ የሱሲ አሳስ ዮሃንሳባ ያግድ ኦድስ፦ “ህንተ አይ በአናዉ መላ ቢታ ከይደቲ? ጫርኮይ ቃያ ማታ በአናሰዬ? 25ያትን፥ አይ በአናዉ ከይደቲ? ኮይሰ ማኦ ማእዳ አሳ በአናሰዬ? ኮይሰ ማኦ ማእዳይሳትነ ሳእ እንጀትዳ አሳይ ካዎ ጋን ደኦሶና። 26ያትን፥ አይ በአናዉ ከይደቲ? ናብያ በአናሰዬ? ኤ፥ ታ ያጋይስ፦ ህንተ በአናዉ ከይዳይ ናበፐ አይሳ።
27“ ‘ነ ኦግያ ነ ስንን ጊግስያ
ታ ኪታንቹዋ ኔፐ ስን ታ ኪታና’#ምልክ 3:1.
ጌተትድ ፃፈትዳይ እያሳ። 28ታ ህንተዉ ኦዳይስ፤ ማጫሳፐ የለትዳይሳታ ግዶፈ ዮሃንሳፐ አይ ባዋ። ፆሳ ካዎተን ኡባፈ ጉፀይስ፥ እ ኡባፈ ግታ ግዳና” ያግስ።
29ሀር አቶሽን፥ የሱሳ ቃላ ስእዳ ቃራፃ ቃንፅሰይሳት ኡባይ ዮሃንሳ ኩሸን ፃማቀትድ ፆሳይ ፅሎ ግደይሳ ቆንጭስዶሶና።#ማቶ 21:32፤ ሉቃ 3:12. 30ሽን ፋርሳወትነ ህገ አስታማረት ዮሃንሳ ኩሸን ፃማቀቶና እፅድ ፆሳ ዞርያ ለቅስዶሶና።
31የሱሲ ካልድ ሀይሳዳ ያግስ፦ “ህዛ፥ ሀ ዎድያ የለተ አይብራ ዳንሶ? ኤንትካ ኦና ዳኖና? 32ግያ ግዶን ኡትድ ዎል ፄግድ፥ ‘ኑ ህንተዉ ሱሱልኤ ፑንን፥ ህንተ የፀከታ። ኑ ሳቢድ ዘሌልን፥ ህንተ ዬከከታ’ ግያ ናይታ ዳኖሶና። 33ፃማቅያ ዮሃንስ ሞናነ ኡዮና ይን፥ ‘ኢታ አያናራ ደኤስ ግደታ።’ 34አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ግደታ። 35ህዛ፥ ጭንጫተ ቱማተይ እያ ናይታ ኡባ ማታን ኤረትስ” ያግስ።
የሱሳ ሽቶ ትይዳ እስ ማጫስዉ
36እስ ፋርሳወይ የሱሳ ካ ሙዛናዉ ባ ሶ ፄግስ። እ ፋርሳውያ ሶ ብድ ጋይታ ቦላ ኡትስ። 37ሄ ካታማን እስ ናጋራንቾ ማጫስ፥ የሱሲ ፋርሳውያ ሶን ግብራ ቦላ ደኤይሳ ስእዳ ዎደ ዳሮ አልኦ ጵልቃፀ ሽቶ ኤካዳ ያሱ።#ማቶ 26:7፤ ማር 14:3፤ ዮሀ 12:3. 38የሱሳፐ ጉየ ባጋራ፥ እያ ቶሁዋ ማታን ኤቃዳ ዬካሸ እያ ቶሁዋ ባ አፉራ ላኮዉሱ። ባ ብናናራ እያ ቶሁዋ ቁቻሸነ ዬራሸ ሽቶ ትያሱ።
39ግብራ ጊግስዳ ፋርሳወይ ሄሳ በእዳ ዎደ ባ ዎዛናን፥ “ሀይስ ናበ ግድያኮ ሀ ማጫስያ፥ እያ ቦችያራ ኦነኮ ቃስ እያ ናጋራንቾ ግደይሳካ እ ኤራናሽን” ያግስ።
40የሱሲ፥ “ስሞና፥ ታ ነዉ ኦድያባይ ደኤስ” ያግስ።
እ፥ “አስታማርያዉ፥ ታዉ ኦዳ” ያግስ።
41የሱሲ እያኮ፥ “ናምኡ አሳት እስ ኡራፐ ሚሸ ታልእዶሶና። እሶይ እቻሹ ፄቱ ብራ ሀንኮይ ቃስ እሻታሙ ብራ ታልእዶሶና። 42ናምአይካ ታልእያ ጭጋናዉ ፆነትን፥ ናምአታስካ ታልእያ ማርስ። ህዛ፥ ሀ ናምአታፐ ሄ ኡራ ዳሮ ዶሳናይ ነዉ ኦና ዳን” ያግስ።
43ስሞን፥ “ዳሮ አጮይ ማረትዳ ኡራይ ዳሮ ዶሳና ዳኔስ” ያግስ። የሱሲ፥ “ነ ቱማ ፕርዳዳሳ” ያግስ። 44ሄሳፈ ጉየ፥ የሱሲ ማጫሴኮ ስም ፄልድ፥ ስሞናኮ፥ “ሀኖ ማጫስዉ በአይ? ታኒ ነ ሶ ገልን ሀር አትሽን፥ ነ ታዉ ቶሆ ሃ እማባካ፥ ሽን እያ ታ ቶሁዋ ባ አፉን ላኮዳ ባ ብናናን ቁቻሱ። 45ኔኒ ታና ዬራ ኤካባካ፥ ሽን እያ ታ ነ ሶ ገሎሳፐ ዶማዳ ታ ቶሁዋ ዬሮ አጋቡኩ። 46ኔኒ ታ ሁጵያን ዛይተ ትያባካ፥ ሽን እያ ታ ቶሁዋ ሽቶ ትያዉሱ። 47እያ ታና ዳሮ ዶስዳ ግሾ፥ እ ዳሮ ናጋራይ አቶ ጌተትስ። ጉ ናጋር አቶ ጌተትዳ ኡራይ ጉራ ዶሴስ።”
48የሱሲ ማጫሴኮ፥ “ነ ናጋራይ አቶ ጌተትስ” ያግስ።
49እያራ እስፈ ጋይታን ኡትድ ምያ እማት፥ “ናጋራ አቶ ያገይ፥ እ ሀይስ ኦኔ?” ያግድ ባንታ ዎዛናን ቆፕዶሶና።
50የሱሲ ማጫሴኮ፥ “ነ አማኖይ ነና አሽስ፤ ሳሮ ባ” ያግስ።
Currently Selected:
ሉቃሳ 7: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
