ሉቃሳ 9
9
ታማነ ናምኡ ሀዋረት ኪተትዶሶና
(ማቶ 10:5-15፤ ማር 6:7-13)
1የሱሲ ታማነ ናምኡ ሀዋረታ ባኮ ፄግድ፥ ቱና አያናታ ከሳና መላነ ሀርገ ኡባ ፓና መላ ዎልቃነ ማታ እሚስ። 2ፆሳ ካዎተባ ማርካታናዳነ ሀርጋንቾታ ፓናዳ ኪትስ። 3እ ኤንታኮ፥ “ፃምአ ግድን ኦጎሮ ግድን ካ ግድን ሚሸ ግድን ላምድ ማእያ አፍላ ግድን ኦገስ ግድ አይኮካ ኦይኮፍተ።#ሉቃ 10:4-11. 4ሄ ካታማፐ ህንተ ከያና ጋካናዉ እማተን ህንተ ገልዳ ኬን ጋምእተ። 5ኦንካ ህንተና ሞኮና እፅኮ ሄ ካታማፐ ከይሸ ኤንታዉ ማርካ ግዳና መላ ህንተ ቶሁዋን ደእያ ባና ፕትድ ከይተ።” 6ኤንትካ ኪተትዳይሳዳ ከይድ ዎንገላ ኦድሸነ ዱማ ዱማ ጉታታን ሀርጋንቾታ ፓሸ አዶሶና።
7ጋልላ ቢታ ሃርያ ሄሮዲስ የሱሲ ኦዳባ ኡባ ስእዳ ዎደ ዳጋምስ። አይስ ጊኮ፥ እስ እስ አሳት ዮሃንስ ሀይቆፐ ደንዶና አገና ያጎሶና።#ማቶ 16:14፤ ማር 8:28፤ ሉቃ 9:19. 8ባጋት፥ “ኤልያስ ቆንጭስ” ጎሶና፤ ሀራት ቃስ፥ “በን ናበታፐ እሶይ ሀይቆፐ ደንድስ” ያግድ ኦደቶሶና። 9ሽን ሄሮዲስ፥ “ታኒ ዮሃንሳ ቆያ ቃንፅሳዳ ዎስ። ያትን፥ ሀይሳ ያገትድ እያባ ኦደተይ፥ እ ኦኔ?” ያግድ ባ አይፈን በአናዉ ኮዬስ።
እቻሹ ሙኩሉ አሳ
(ማቶ 14:13-21፤ ማር 6:30-44፤ ዮሀ 6:1-14)
10ታማነ ናምኡ ሀዋረት ጉየ ስም ይድ፥ ኤንቲ ኦዳባ ኡባ የሱሳስ ኦድዶሶና። እ ኤንታና ኤክድ ቤተሳይዳ ካታማፐ ጋፃ ኤፍስ። 11ሽን ዳሮ አሳይ የሱሳ ግደይሳ ኤርድ እያ ካልዶሶና። እ ኤንታ ሞክ ኤክድ ፆሳ ካዎተባ ታማርስስ፤ ፓፃናዉ ኮየይሳታካ ፓስ።
12ሳእ ኦማርስያ ዎደ ታማነ ናምኡ ሀዋረት እያኮ ሺቅድ፥ “ኑ ደኤይ መላ ቢታ ግድያ ግሾ አሳይ ዱማ ዱማ ጉታታነ ካታማታ ብድ፥ ካነ አቅያ በሲ ኮያና መላ አሳ ሞይዛ” ያግዶሶና።
13ሽን እ፥ “ኤንታዉ ምያባ ህንተ እምተ” ያግስ።
ኤንቲ፥ “ኑስ ደኤይ እቻሹ ኡይነ ናምኡ ሞሎ ግድያ ግሾ፥ ሀ አሳስ ግድያ ካ ኑኒ ብድ ሻሞና እፅኮ ግደና” ያግዶሶና። 14ሄ በሳን እቻሹ ሙኩሉ ግድያ አደት ደኦሶና።
የሱሲ ባ ታማረታኮ፥ “እሻታማን እሻታማን ሻክ ሻክ አሳ ኡትስተ” ያግስ።
15እያ ታማረት፥ እ ኪትዳይሳዳ አሳ ኡትስዶሶና። 16እ እቻሹ ኡይነ ናምኡ ሞሎታ ኤክድ፥ ሳሎ ፄልድ፥ ፆሳ ጋላትድ፥ መንድ አሳ ኡባ ጋና መላ ባ ታማረታስ እሚስ። 17ኡባይ ምድ ካልዶሶና። ኤንታፈ አትዳ ቲፈይ ታማነ ናምኡ ጋይታ ኩመ ግድስ።
ጰፅሮሳ ማርካተ
(ማቶ 16:13-19፤ ማር 8:27-29)
18የሱሲ ባ ፃላላ ዎስሽን፥ እያ ታማረት እያኮ ይዶሶና። እ፥ “አሳይ ታና ኦና ጎና?” ግድ ኦይችስ።
19ኤንቲ ዛሪድ “እሶት እሶት፥ ‘ፃማቅያ ዮሃንሳ፥ ባጋት ኤልያሳ፥ ሀራት ቃስ፥ በን ናበታፐ እሶይ ሀይቆፐ ደንድስ’ ያጎሶና” ያግዶሶና።#ማቶ 14:1፥ 2፤ ማር 6:14-15፤ ሉቃ 9:7-8.
20እ ዛሪድ፥ “ያትን ህንተ ታና ኦና ጌቲ?” ያግስ። ጰፅሮስ፥ “ኔኒ ፆሳፈ ኪተትዳ ክርስቶሳ” ያግድ ዛርስ።#ዮሀ 16:20-28፤ ማር 8:30—9:1.
21የሱሲ ሀይሳ ኦደስካ ኦዶፕተ ግድ ምንድ ኦድስ። 22ቃስካ የሱሲ፥ “አሳ ናእ ዳሮ መቱዋ ኤካና። ቢታ ጭማታ፥ ካህነ ሀላቃታነ ህገ አስታማረታ ኩሸን አድ እመታና። ኤንቲ እያ ዎና፥ ሽን እ ሄን ጋላስ ሀይቆፐ ደንዳና” ያግስ።
23የሱሲ አሳ ኡባኮ፥ “ታና ካላናዉ ኮየይ ኦንካ ደእኮ ባና ካዶ፥ ባ ማስቃልያ ጋላስ ጋላስ ቶክድ ታና ካሎ።#ማቶ 10:38፤ ሉቃ 14:27. 24ባ ሸምፕዉ አሻናዉ ኮያ ኡባይ እዮ ይሴስ፥ ባ ሸምፕዉ ታ ግሾ ግድ ይስያ ኦንካ እዮ አሼስ።#ማቶ 10:39፤ ሉቃ 17:33፤ ዮሀ 12:25. 25አስ አላመ ኡባ ሃርድ፥ ግዶሽን፥ ባ ሸምፕዉ ይስያባ ዎይኮ ቆህያባ ግድኮ እያ አይ ማዲ? 26ኦንካ ታናንነ ታ ቃላን ዬላትኮ፥ አሳ ናእ ባ ቦንቹዋራ ሄሳዳካ አዋ ቦንቹዋራነ ጌሻ ኪታንቾታ ቦንቹዋራ ያ ዎደ እያን ዬላታና። 27ታ ህንተዉ ቱማ ኦዳይስ፤ ሀይሳን ኤቅዳይሳታ ግዶፈ ፆሳ ካዎተ በኦናሽን ሀይቆና አሳት ደኦሶና” ያግስ።
የሱሳ ማላይ ላመትስ
(ማቶ 17:1-8፤ ማር 9:2-8)
28የሱሲ ሄ ኦዳ ኦድን፥ ሆስፑን ጋላሳፐ ጉየ፥ ጰፅሮሳ፥ ያይቆባነ ዮሃንሳ ባራ ኤክድ ዎሳናዉ ዙማ ቦላ ከይስ።#2 ጰፅ 1:17-18. 29እ ዎሳ ቦላ ደእሽን እያ አይፈ ካረይ ላመትስ፤ አፍላይካ ቦፅድ፥ አዋ መላ ጶልስ። 30ናምኡ አሳት፥ ኤንትካ ሙሰራነ ኤልያሳራ ቦንቾን ቆንጭድ፥ 31የሩሳላመን ፖለታናዉ ደእያባ፥ ሄስካ፥ እ ሀ አላምያፐ ሻከታናባ እያራ ኦደቶሶና። 32ጰፅሮሳነ እያራ ደኤይሳታ ስኮይ ኤፍን፥ ኤንቲ ስኮፈ ባርክያ ዎደ እያ ቦንቹዋነ እያራ ኤቅዳ ናምኡ አሳታ በእዶሶና። 33አሳት የሱሳፐ ሻከትድ ባና ሀንሽን፥ ጰፅሮስ የሱሳኮ፥ “ጎዳዉ፥ ኑ ሀይሳን ግድኮ ኑስ አይ መላ ሎኦ! እስኖ ነዉ፥ እስኖ ሙሰስ፥ እስኖ ኤልያሳስ ኦድ፥ ሄ ሻቃራ ሻቃሮስ” ያግስ። ሽን እ አይ ግዳኮ ኤረና።
34እ ያግድ ኦደትሽን ሻራይ ይድ ኤንታና ካምስ። ኤንቲ ሄ ሻራ ግዶ ገልሸ ባብዶሶና። 35ሻራ ግዶፈ፥ “ታ ዶርዳ ናአይ ሀይሳ እያ ስእተ” ግያ ቃል ስኤትስ።#እሳ 42:1፤ ማቶ 3:17፤ 12:18፤ ማር 1:11፤ ሉቃ 3:22. 36ቃል ስኤትዳፐ ጉየ፥ የሱሲ ባርካ ደእሸ በንትስ። ሄ ዎደ ኤንቲ በእዳባ ኦደስካ ኦዶና፥ ባንታ ዎዛናን ኦይክድ ስእ ግዶሶና።
ቱና አያን ኦይክዳ ናአ
(ማቶ 17:14-18፤ ማር 9:14-27)
37ዎንተ ኤንቲ ዙማ ቦላፈ ዎያ ዎደ ዳሮ አሳይ ይድ እያራ ጋሄትዶሶና። 38ሄ ዎደ አሳ ግዶፈ እስ አስ፥ “አስታማርያዉ፥ ታ እስ ናኣ ያዳ በአርክ። 39ቱና አያናይ ቆፖና ኦይክድ ዋስሴስ፤ ጎፖንቶ የግስድ ቃከረስ፥ አሳተ ቆህድ ኡንኤድ የዴስ። 40ነ ታማረት ከሳና መላ ዎሳስ፥ ሽን ኤንቲ ዳንዳእቦኮና” ያግድ ዎስስ።
41የሱሲ፥ “አማኖይ ባይና ጌላ የለታቶ፥ አዉደ ጋካናዉ ታ ህንተራ ዳነ፥ ህንተና ዳንዳአኔ? ነ ናኣ ባዳ ሃ ኤካያ” ያግስ።
42ናኣ ኤክድ ያ ዎደ ቱና አያናይ ሳአን ሆል የግድ ኮኮርስስ። ሽን የሱሲ ቱና አያና ሀንቅድ ናኣፐ ከስስ። ናኣካ ናኣ አዋስ እሚስ። 43አሳ ኡባይ ፆሳ ግታ ዎልቃን ማላለትዶሶና። ኤንቲ እ ኦዳባን ማላለትሽን፥ የሱሲ ባ ታማረታኮ፥ 44“ሀይሳ ታ ህንተዉ ኦደይሳ ሎይ ስእተ፤ አሳ ናእ ሞርከታ ኩሸን አድ እመታና” ያግስ። 45ሽን እ ግዳባይ ኤንታፈ ጌምዳ ግሾ፥ አኬክቦኮና። ሄሳ ግሾ፥ ዛሪድ ኦይቻናዉ ባብዶሶና።
ኡባፈ አይ ኦኔ?
(ማቶ 18:1-5፤ ማር 9:33-37)
46የሱሳ ታማረት፥ “ኑ ግዶን ግታ ግዳናይ ኦኔ?” ግድ ፓላማ ኦይክዶሶና።#ሉቃ 22:24. 47የሱሲ ኤንታ ዎዛና ቆፋ ኤርድ ዮጋ ናኣ ባ ማታን ኤስድ፥ 48“ሀ ዮጋ ናኣ ታ ሱንን ሞክያ ኦንካ ታና ሞኬስ፥ ታና ሞከይ ታና ኪትዳይሳ ሞኬስ፥ ህንተ ኡባፈ ጉፀይስ፥ እ ግታ ግዳና” ያግስ።#ማቶ 10:40፤ ሉቃ 10:16፤ ዮሀ 13:20.
49ዮሃንስ፥ “ጎዳዉ፥ እስ አስ ነ ሱንን ቱና አያናታ ከስሽን በእድ፥ እ ኑራ ግዶና ግሾ ድግዳ” ያግስ።
50የሱሲ ዛሪድ፥ “ህንተራ ኤቀቶናይስ፥ እ ህንተ ባጋ። ሄሳ ግሾ፥ እያ ድጎፍተ” ያግስ።
የሱሲ ሳማረን እፀትስ
51የሱሲ ሳሎ ብያ ዎደይ ማታትዳ ግሾ፥ የሩሳላመ ባናዉ ቃንፅድ ደንድስ። 52ሳማረ ቢታን ደእያ እስ ጉታ ብድ፥ ኡባባ እያዉ ጊግሳና መላ አሰ ያ ኪትስ። 53ሽን እ በይ የሩሳላመ ግድያ ግሾ፥ ኤንቲ እያ ሞክ ኤክቦኮና። 54የሱሳ ታማረት ያይቆባራነ ዮሃንሳራ ሄሳ በእድ፥ “ጎዳዉ፥ ሳሎፐ ታም ዎድ ኤንታ ሞ ጋና መላ ነ ኮያይ” ያግዶሶና።#2 ካዎ 1:9-16. 55ሽን የሱሲ ጉየ ስም ኤንታ ሀንቀትድ፥ “ህንተ ጋርሳን አይብ አያን ደእያኮ ህንተ ኤረከታ። አሳ ናእ አሰ አሻናዉ ይስፐ አትሽን፥ ይሳናሳ ግደና” ያግስ። 56ያፐ ደንድድ ሀራ ጉታ ብዶሶና።
የሱሳ ካሎይ ጭግስያ ጋተ
(ማቶ 8:19-22)
57ኤንቲ ኦገራ ብሽን፥ እስ አስ፥ “ነ ብያ ሶ ኡባ ታ ካላና” ያግስ።
58የሱሲ ዛሪድ፥ “ዎርካናታስ ኦል፥ ሳሎ ካፎታስ ኬ ደኤስ፥ ሽን አሳ ናእ ባ ሁጰ ሸምፕስያ በሲ ባዋ” ያግስ።
59ሀንኩዋኮ፥ “ኔኒ ታና ካላ” ያግስ። ሽን ኡራይ፥ “ጎዳዉ፥ ኮይሮታዳ ታ አዋ ሞጋዳ ያና” ያግስ።
60ሽን የሱሲ፥ “ሀይቅዳይሳት ሀይቅዳይሳታ ሞጋና መላ ኤንታዉ አጋጋ፤ ኔኒ ባዳ ፆሳ ካዎተ ሳባካ” ያግስ።
61ቃስ ሀራ አስ፥ “ጎዳዉ፥ ታ ነና ካላና፥ ሽን ኮይሮታዳ ታ ሶ አሳ ሳሮዳ ያና” ያግስ።#1 ካዎ 19:20.
62የሱሲ ዛሪድ፥ “ኮፀ ኦይክድ ጉየ ፄልያ ኦንካ ፆሳ ካዎተስ በሰና” ያግስ።
Currently Selected:
ሉቃሳ 9: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
