Hawaareta 17
17
Phawuloosi Teselonqen
1Phawuloosaranne Sillaasera Amfipholisaranne Apholonara aadhidi Teselonqe bidosona. Yan ayhude woosa keethi de7ees. 2Phawuloosi kaseysada yaa gelis. Hessan heedzu saaminta Xoossaa qaalape asaas odis. 3Kiristoosi waaye ekanawunne hayqope dendanaw besseysa entaw qoncisidi odishe, “Yesuusi ha taani hintew odeysi Kiristoosa” yaagis. 4Entafe issoti issoti oday tuma gideysa ma7idi Phawuloosaranne Sillaasera issifidosona. Hessadaka, Xoossaa goyinniya daro Girike asaynne daro bonchetida maccasatika entara issifidosona.
5Shin Ayhudeti qanaatidi issi issi oosoy bayna iita asata ogepe shiishidosona. Kataman buqethi kessidosona; Phawuloosanne Sillaase asaas aathidi immanaw koydi Yaasona keethaa teqidosona. 6Phawuloosinne Sillaasey entaw bentonna ixin, Yaasonanne issi issi ammaneyisata katamaa halaqatako goochi efidi, “Haysati biitta ubbaa buqeysati ha77i nuuko yidosona. 7Yaasoni enta ba son wothis. Haysati, ‘Yesuusa geetetiya hara kawoy de7ees’ gidi Qeesare kiitaa menthosona” yaagidi dhoqu gida qaalan odidosona.
8Shiiqida asaynne katama halaqati hessa si7idi hananaba dhaydosona. 9Halaqati Yaasonanne harata waasera billidosona.
Phawuloosi Beeriyan
10Ammaneysati Phawuloosanne Sillaase qammara Beeriya yeddidosona. Beeriya gakidi, ayhude woosa keethi gelidosona. 11Beeriya asay Teselonqe asaape aadhida suureta. Enti qaala kumetha wozanape ekidosona; Phawuloosi gidaysi tuma gideysa shaaki eranaw gallas gallas Geeshsha Maxaafata pilgoosona. 12Hessa gisho, entafe daroti, Giriketapeka bonchetida daro maccasatinne daro addeti ammanidosona.
13Shin Teselonqen de7iya Ayhudeti Phawuloosi Xoossaa qaala Beeriyanka odidaysa si7ida wode Beeriya yidi asaa buqidosona. 14Hessafe guye, ammaneysati ellesidi Phawuloosa abba mati yeddidosona. Shin Sillaaseynne Ximotiyoosi Beeriyan attidosona. 15Phawuloosa moyzida asati Ateena gathidosona. He asati Sillaaseynne Ximotiyoosi bantaw danda7etida mela ellesidi baako yaana mela Phawuloosi kiitida kiita ekidi Beeriya simmidosona.
Phawuloosi Ateenan
16Phawuloosi Ateenan Sillaasenne Ximotiyoosa naagishe, kataman eeqi kumidaysa be7idi yilotis. 17Hessa gisho, ayhude woosa keethan Ayhudetaranne Xoossa goyinniya Ayhude gidonna asaara qassi baara gahetiya asaara ubba gallas palamees. 18Epiqoroosenne Istoyke geetetiya cugatape issi issi eranchoti Phawuloosara palamidosona. Entafe issoti issoti, “Ha yooyamay ay odanaw koyii?” yaagidosona.
Harati Phawuloosi Yesuusabaanne hayqope I dendidaysa bantaw odida gisho, “Ooratha xoossataba odiya daanees” yaagidosona.
19Phawuloosa oykidi Ariyospagoosa geetetiya shiiqo bessaa efidi, “Ha neeni tamaarsiya oorathabay aybeko nuna erisikii? 20Ayis giiko, neeni nuus oorathaba odaasa; hiza hessi aybeko nuuni eranaw koyoos” yaagidosona. 21Ateena asa ubbaynne yan de7iya imatha asay oorathaba odetonanne si7onna pee7okona.
22Phawuloosi Ariyospagoosa sinthan eqidi, “Ateena asato, xoossatas ubbaban hinte daro yayyeysa taani be7ayis. 23Taani hinte katamaara yuuyashe hinte goyinniya bessata be7iya wode, ‘Eretonna Xoossaas’ geetetidi xaafetida yarsho bessa demmas. Ha hinte eronnashin goyinneysa taani hintew odayis. 24Sa7anne sa7an de7iya ubbaba medhida Xoossay, salonne sa7a Goday, asi keexida keethan deenna.#1 Kawo 8:27; Isa 42:5; Hawa 7:48. 25I de7o, shemponne ubbaba asa ubbaas immiya gisho paci de7iya asada asa maade koyenna. 26Xoossay asa koche ubbaa issi addiyafe medhidi biitta ubban wothis. Yaatidi enti daana wodiyasinne bessaas zawa immis. 27I hessa oothiday asi iya koyana melanne pilgidi demmana melasa. Hanikoka I nuupe geemmibeenna. 28Hintefe issi issi yexeysati, ‘Nuuni iya nayta’ gidaysada, ‘Nuuni iyan paxa de7oos, qaaxoos.’ 29Hiza, nuuni Xoossaa nayta gidiya gisho, ‘Xoossay asa hiillatethaninne qofan worqafe woyko birape woyko shuchafe oosetidaba daanees’ yaagidi qopanaw bessenna. 30Hessa gisho, Xoossay beni wode asay eronna oothidaysa aggidi aadhis. Shin ha77i ubba bessan de7iya asay nagarape simmana mela kiitees. 31Ayis giiko, Xoossay ba doorida addiyan sa7an de7iya asa ubbaa bolla xillo pirda pirdanaw qamma giigisi wothis. Iya hayqope denthidi hessa asa ubbaas tumayis” yaagis.
32Entafe issi issi asati hayqope dendoba Phawuloosape si7idi, iya bolla qelqisidosona. Shin harati, “Nuuni hessa neepe gujidi si7anaw koyoos” yaagidosona. 33Hessa gisho, Phawuloosi enta giddofe keyis. 34Shin issi issi addeti Phawuloosara gaketidi ammanidosona. Enta giddofe Ariyospagoosan shiiquwan de7iya Diyonasiyoosa geetetiya addey, Damarso geetetiya issi maccasiyanne harati de7oosona.
Currently Selected:
Hawaareta 17: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
