Hawaareta 19
19
Phawuloosi Efesoonan
1Aphiloosi Qorontoosan de7ishin, Phawuloosi qommo baggara aadhidi Efesoona bis. Yan issi issi ammaniya asata demmis. 2Entako, “Hinte ammanida wode Geeshsha Ayyaana ekidetii?” yaagidi oychis.
Enti, “Akay, ekibooko; hari attoshin, Geeshsha Ayyaani de7iyabaka si7ibooko” yaagidosona.
3Phawuloosi entako, “Yaatin, aybin xammaqetidetii?” yaagis.
Enti, “Nuuni Yohaanisa xinqaten xammaqetida” yaagidi zaaridosona.
4Phawuloosi, “Yohaanisi baape guyera yaa Yesuus Kiristoosan asay ammanana mela asaas odishe, nagarape simo bessiya xinqaten xammaqis” yaagis.#Maato 3:11; Mar 1:4, 7-8; Luqa 3:4, 16; Yoha 1:26-27.
5Enti hessa si7ida wode Godaa Yesuus Kiristoosa tamaare gidanaw xammaqetidosona. 6Phawuloosi ba kushiya enta bolla wothida wode Geeshsha Ayyaanay enta bolla wodhin, dumma dumma doonan odetidosona; qassi tinbite odidosona. 7He bessan tammanne nam7a gidiya asati de7oosona.
8Phawuloosi ayhude woosa keethi gelidi, Xoossa kawotethaaba yayyonna palamishenne loythi qoncisishe entara heedzu ageena gakanaw gam7is. 9Shin entafe issoti issoti dhube gididi daro asaa sinthan Godaa ogiya cayidi ammanonna ixidosona. Phawuloosi ammaneyisata entafe shaaki ekidi Xiranoosa geetetiya timirte keethan ubba gallas enta tamaarsis. 10Phawuloosi nam7u laythi gakanaw qaala odis. Hessa gisho, Iisen de7iya asa ubbay, Ayhudetinne Ayhude gidonnaysati Godaa qaala si7idosona.
Asqewa Nayta
11Xoossay Phawuloosa kushen wolqaama malaatata oothis. 12Hessa gisho, asay iya asatethaa bochida maarabe woyko ma7o harganchotas efoosona. Entika paxoosona; tuna ayyaanati entafe keyoosona.
13Tuna ayyaanata kessishe yuuyiya Ayhudetape issoti issoti, “Phawuloosi sabbakiya Yesuusa sunthan keyite gidi hintena kiittoos” yaagidi, tuna ayyaanati oykida asaa bolla Godaa Yesuusa sunthaa xeegidosona. 14Kahine halaqaa Asqewa geetetiya issi Ayhude addiyas hessa oothiya laapun nayti de7oosona.
15Shin tuna ayyaanay entako, “Taani Yesuusaka Phawuloosaka erayis, shin hinte oonantee?” yaagis.
16Tuna ayyaani oykida addey enta bolla gupi wodhidi, enta madunxisidi, he keethafe kallo baqatana gakanaw wolqaamis. 17Efesoonan de7iya Ayhudetinne Ayhude gidonnaysati ubbay hessa si7idi daro yayyidosona. Godaa Yesuusa sunthay daro bonchetis. 18Ammaneysatape daroti banta oothida iita oosuwa paaxishenne qoncen odishe yoosona. 19Marotape daroti banta maxaafata shiishidi asa ubbaa sinthan xuuggidosona. He maxaafata gatiya tayboy ishatamu mukulu bira santime#19:19 Bira santime: Maato 26:15 xeellite. gidis. 20Hessada hanidi Xoossa qaalay diccishenne dalgishe bis.
Efesoonan Ooshshi Keyis
21Hessi hanidaape guye Phawuloosi, “Taani Yerusalaame ba simmada Roome baanaw bessees” yaagidi Maqedooneranne Akayara aadhidi Yerusalaame baanaw qofa qachis. 22Qassi bana maaddeysatape nam7ata Ximotiyoosanne Erasxoosa Maqedoone kiittidi, baw Iisen guutha wode gam7is.
23He wode Godaa ogiya gisho Efesoonan wolqaama kachi keyis. 24Issi bira oothiya Dimexiroosa geetetiya uray Arxemisi eeqa keetha misiliya birape oothidi daro wodhe demmees. 25Hessa gisho, hessa mela ooso ootheyisata issife shiishidi, “Asaw, nu duretethay ha oosuwan gideysa hinte ereeta. 26Haysi Phawuloosi, ‘Asa kushen oosetidaysati xoossata gidokona’ yaagidi, Efesoonaninne guutha biittatape attishin, kumetha Iise ubban de7iya daro asaa odi ammanthidaysanne balethidaysa hinte be7idetanne si7ideta. 27Meto gididay, nu oosoy kadheteysa xalaala gidonashin, Iisenne biitta ubban de7iya asi goyinniya gita xoosse Arxemisi keethay bonchetonna atteysanne I gitatethay kundanaysa” yaagis.
28Asay hessa si7ida wode shenen xuugetidi, “Efesoona Arxemisa gita” yaagidi waassidosona. 29He waasoy katama ubbaa gakis. Phawuloosara hemetiya Maqedoone asata, Gaayoosanne Arxirokoosa oykidi goochishe kaassa bessaa woxidosona. 30Phawuloosi asay shiiqida bessa gelanaw koyis, shin ammaneysati iya diggidosona. 31Iise biitta halaqatape Phawuloosa lagge gidida issoti issoti Phawuloosako kiittidi, “Kaassa bessa qoncen keyada bentofa” gidi iya woossidosona.
32Shiiqida asaas hananabay dhayis; dariya bagga asay hari attoshin ayis shiiqidako eronna gisho, issoy issibas waassiya wode hankoy harabas waassees. 33Ayhudeti Iskindire geetetiya addiya aathidi bessin, issi issi asay I gaanaba odidi iya sinthe aathidosona. I asay si77i gaana mela ba kushen malli bessidi, asaas mootetanaw eqis. 34Shin Iskindirey Ayhude asi gididaysa asay erida wode nam7u saate gidanaysa mela ubbay issi qaalan, “Efesoona Arxemisa gita” yaagidi waassidosona.
35Wursethan, katamaa xaafey asaa si77i oothidi, “Efesoona asaw, Efesoona katamay gita Arxemisi eeqa keethinne salope wodhida I shucha misiliya naagey Efesoona asaa gideysa eronnay oonee? 36Haysa kashi giya asi bayna gisho, hinte si77i gaanawunne dirgidi ayko oothonna agganaw bessees. 37Hinte, ha asata eeqa keetha miishe kaysotonashin woyko nu xoossata cayiboonashin coo ha asata oykidi ehideta. 38Hessa gisho, Dimexiroosinne iyara de7iya oosanchoti asaa mootanaw koyko, pirda keethay dooya de7ees; daynnatika de7oosona; enti mootanaw danda7oosona. 39Shin hinte hara oda koyko, Shango shiiqon oday be7eto. 40Hessa gidonna ixiko hachi hanidabaas Roome kawotethay nuna oychana. Ha buqethaas gaasoy bayna gisho, nuuni gaaso odanaw danda7oko” 41yaagidi shiiquwa laallis.
Currently Selected:
Hawaareta 19: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
