Medhetethi 15
15
Xoossay Abramera Caaqida Caaquwa
1Hessafe guye, Goday Abrames amuhon qoncidi,
“Abrame babofa, taani new gondalle,
Ne woytoy gita” yaagis.
2Shin Abramey, “Abeeti Ubba Haariya Godaw, neeni immiya woytoy taw aysee? Taw yeloy baawa; buroo tana laattanay Damasqo Eli7azara gidennee? 3Abramey, neeni taw yelo immaboonna gisho ta keethan de7iya ta aylley tana laattana” yaagis.
4Goday iyako, “Ha aylley nena laattenna, shin ne gulbatape keyana ne na7ay nena laattana” yaagis. 5Yaagi simmidi iya kare kessidi, “Pude salo xeella, neeni xoolintota paydanaw danda7iko payda, hiza ne sheeshayka hessada gidana” yaagis.
6Abramey Godaa ammanis; Goday iyaw hessa xillotethi oothidi ekis.
7Qassika Goday iyako, “Neeni ha biitta laattana mela Kaldaaweta biittafe Uure katamaape nena kessida Goday tana” yaagis.
8Shin Abramey iyako, “Abeeti Ubba Haariya Godaw ha biitta ta laatanaysa aybin ero?” yaagis.
9Goday iyako, “Heedzu laythi gidida issi ussi, issi deeshi, issi dorsenne hessadaka hollenne gorille taw ekada ya” yaagis. 10Abramey hessata ubba Xoossas ehidi kafoti attishin, harata qanxidi nam7u kessi shaakidi issuwa issuwa ginan wothis. 11Ankoti he ashuwa maanaw bollafe wodhidosona; shin Abramey enta goodis.
12Awi wullana haniya wode Abrame wolqaama dhiskoy shoci yeggis. Daganthiya wolqaama dhumi iya bolla wodhis. 13Goday Abrameko, “Ne sheeshay allaga biittan bete asi gididi daanaysa loythada era; enti aylletethan oyddu xeetu laythi naaqeti haaretana. 14Shin entana aylletethan haariya deriya ta pirdana; enti he biittafe keyishe daro shalo ekidi keyana. 15Nena gidiko, neeni ne mayzatako sarotethan baana. Neeni daro cimada moogetana. 16Ne sheeshay buroo oyddantho yeletethan ha biitta simmana. Ayis giiko, Amooreta nagaray pirdetana likiya buroo gakibeenna” yaagis.
17Awi wullin sa7i dhuma linxi gin, cooce tama cuyinne tama lacoy bentidi shaaketida ashuwa giddora aadhis. 18He gallas Goday Abrames, “Gibxe shaafape doomidi Efraxiisa shaafa gakanaw de7iya biitta ubbaa taani ne sheeshas immana. 19He biittay Qeenata biitta, Qenezata biitta, Qadimooneta biitta, 20Hiteta biitta, Parzeta biitta, Raafaymeta biitta, 21Amooreta biitta, Kanaaneta biitta, Gergeseta biittanne Yaabuseta biitta” yaagidi caaqis.
Currently Selected:
Medhetethi 15: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
