Yohaanisa 11

Alaazara Hayquwa

1Bitaane gutan Alaazara geetetiya issi addey hargetis. Bitaaney Mayraamanne I michiya Marta de7iya guta.#Luqa 10:38-39. 2He Mayraama Godaa tohuwa shitto tiyada ba binaanan iya tohuwa quchidaaro. Hargetiday I ishaa Alaazara.#Yoha 12:3. 3Hessa gisho, micheti, “Godaw, ne doseysi hargetis” gidi Yesuusako kiittidosona.

4Yesuusi hessa si7ida wode, “Ha hargey, Xoossaynne iya Na7ay bonchetana melape attishin, hayqos gathiya harge gidenna” yaagis.

5Yesuusi Marta, I michiwunne Alaazara dosees. 6Shin Alaazari hargidaysa Yesuusi si7idi ba de7iya bessan nam7u gallas gam7is. 7Hessafe guye, Yesuusi ba tamaaretako, “Zaaridi Yihuda biitta boos” yaagis.

8Iya tamaareti zaaridi, “Astamaariyaw, guutha wodepe kase Ayhudeti nena shuchan caddidi wodhanaw koydosona; ha77ika yaa baanee?” yaagidosona.

9Yesuusi, “Issi gallasan tammanne nam7u saatey de7ees gidenneyee? Gallas hemetiya asi ha alamiya poo7uwa be7iya gisho dhubetenna. 10Shin qamma hemetiya oonika poo7oy bayna gisho, dhubetees” yaagis. 11Yesuusi hessa gidaape guye entako, “Nu dosiya Alaazari dhiskis, shin iya denthanaw taani baana” yaagis.

12Iya tamaareti zaaridi, “Godaw, I dhiskidaba gidiko iyaw lo77ana” yaagidosona.

13Yesuusi Alaazari hayqidaysa odis, shin entaw coo dhisko daanis. 14Hessa gisho, Yesuusi geeshshidi entako, “Alaazari hayqis. 15Hinte ammanana mela taani he bessan de7onaysas hinte gisho ufaytayis. Ane yedhite; iyako boos” yaagis.

16Hessafe guye, Didimoosa#11:16 Didimoosa: Guussay mente guussu. geetetiya Toomasi ba lagge tamaaretako, “Astamaariyara hayqanaw nuka boos” yaagis.

Yesuusi Dendonne De7o

17Yesuusi gakiya wode Alaazari moogetin oyddu gallas gidis. 18Bitaaney Yerusalaamepe heedzu kilo mitire mela haakees. 19Daro Ayhudeti Martanne Mayraamo enta ishay hayqidaysas minthethanaw yidosona.

20Marta Yesuusi yidaysa si7ada iya mokanaw keyasu, shin Mayraama son attasu. 21Marta Yesuusako, “Godaw, neeni haysan de7idaba gidiyako ta ishay hayqennashin. 22Shin ha77i gidikoka neeni woossiyaba Xoossay new immanaysa taani erayis” yaagasu.

23Yesuusi, “Ne ishay hayqope dendana” yaagis.

24Marta iyako, “Wursetha gallas I hayqope dendanaysa erayis” yaagasu.

25Yesuusi iiko, “Taani dendonne de7o; tana ammaniya oonika hayqikoka de7on daana. 26Qassi de7on de7eynne tana ammaniya oonika hayqenna. Hessa neeni ammanay?” yaagis.

27Marta zaarada, “Godaw, ee taani ammanayis! Neeni Xoossaa Na7aa, alamiya yaanaw de7iya Kiristoosa gideysa taani ammanayis” yaagasu.

28Marta hessa gidaape guye, bada ba michiw geeman xeegada, “Astamaarey yidi nena koyees” yaagasu. 29Mayraama hessa si7ida wode ellesa denda eqada Yesuusako basu. 30He saaten Yesuusi Martara gahetida bessan de7ees; buroo gutaa gakibeenna. 31Mayraamo minthethishe iira son de7iya Ayhudeti, iya denda eqada ellesada kare keydaysa be7idi, duufo bada yeekanaw haniya daanin iyo kaallidi keyidosona.

32Mayraama Yesuusi de7iyasuwa bada iya be7ida wode iya tohuwa bolla kundada, “Godaw, neeni haysan de7idaba gidiyako ta ishay hayqennashin” yaagasu.

33Yesuusi Mayraamanne iira de7iya, Ayhudeti yeekeysa be7idi, ba wozanan daro seeletidi, 34“Awun moogidetii?” yaagidi oychin, “Godaw, yada be7a” yaagidi zaaridosona.

35Yesuusi afuxis. 36Hessa gisho, Ayhudeti, “I Alaazara ay mela dosiyako be7ite” yaagidosona.

37Shin entafe issoti issoti, “Haysi qooqiya xeelisidaysi ha addey hayqonna mela oothanaw danda7eneshin?” yaagidosona.

Alaazari Hayqope Denduwa

38Qassika Yesuusi seeletidi, Alaazari moogetida duufuwa bis. He duufoy shuchan gordetida gongolo. 39Yesuusi, “Shuchaa denthite” yaagidi kiittis.

Marta, “Godaw, I hayqosaape oyddu gallas gidida gisho, ha77i xinqana” yaagasu.

40Yesuusi Martako, “Ne ammaniyaba gidiko Xoossaa bonchuwa be7anaysa taani new odabikina?” yaagis. 41Enti shucha denthin Yesuusi salo pude xeellidi, “Aawaw, tana ne si7ida gisho nena galatayis. 42Ne ubba wode tana si7eysa taani erayis. Shin haysan eqida asay neeni tana kiittidaysa ammanana mela taani enta gisho haysa gayis” yaagis. 43Yesuusi hessa gidaape guye, ba qaala dhoqu oothidi, “Alaazara, haa keya!” yaagis. 44Hayqida addey ziidhetida mela kusheynne tohoy shalon qashetidi de7ishin iya ayfey karey goozetida mela duufuwape keyis. Yesuusi enta, “Birshite, bo giite!” yaagis.

Kiristoosa Bolla Maqetidosona

(Maato 26:1-5; Mar 14:1-2; Luqa 22:1-2)

45Hessa gisho, Mayraamiko yida Ayhudetape daroti Yesuusi oothidaysa be7idi iya ammanidosona. 46Shin entafe issoti issoti Farsaawetako bidi Yesuusi oothidaysa entaw odidosona. 47Hessafe guye, kahine halaqatinne Farsaaweti shanguwa shiishidi, “Ha addey daro malaatata oothiya gisho nu ay oothinoo? 48Nuuni iya si77i gidi aggiko asa ubbay iya ammanana. Qassi Roome biitta asati yidi nu xoossa keethaanne nu deriya dhaysana” yaagidosona.

49Entafe issoy Qayyaafa geysi, he laythi kahine halaqa gididaysi, “Hinte aykoka ereketa! 50Asa ubbay dhayeysafe asa ubbaa gisho issi asi hayqeysi lo77o gideysa ereketii?” yaagis. 51I hessa baape gibeenna. Shin he laythi kahine halaqa gidiya gisho, Yesuusi Ayhude asaa gisho hayqanaw besseysa tinbite odis. 52Qassi Yesuusi Ayhude asaa xalaalas gidonashin laaletidi de7iya Xoossaa asa ubbaa issife shiishanawunne issi asi oothanaw hayqana.

53He gallasape doomidi enti iya wodhanaw maqetidosona. 54Hessa gisho, Yesuusi Ayhudeta giddon qoncen simeretibeenna. Shin mela biitta matan de7iya Efreema gutaa bis. Ba tamaaretara he bessan gam7is.

55Ayhudeti bonchiya Paasika gallasay matis. Qassi daro asay bantana geeshshanaw Paasika bonchiya gallasay gakanaape sinthe he biittafe Yerusalaame bidosona. 56Enti xoossa keethan eqidi Yesuusa yuussaa naagiya gisho, “Ay qopeetii? Yesuusi baaliya bonchanaw yeennee?” yaagidi issoy issuwa oychidosona. 57Kahine halaqatinne Farsaaweti Yesuusa oykanaw, I de7iyasuwa eriya oonika bantaw odana mela kiittidosona.

Currently Selected:

Yohaanisa 11: GFBLVF

Highlight

Copy