Yohaanisa 13
13
Yesuusi Ba Tamaareta Toho Meecis
1Paasika bonchiya gallasay gakanaape sinthatidi ha alamiya aggidi Aawako biya wodey gakidaysa Yesuusi eris. Ha alamiyan de7iya ba asaa ubba wode dosis; wursethi gakanawuka enta dosis.
2Yesuusaranne iya tamaaretara issife kaho moosona. Hessafe kase Xalahey Simoona na7aa Asqoroota Yihudi Yesuusa aathidi immanaada iya wozanan iita qofa wothis. 3Yesuusi Aaway ubbaba iya kushen wothidaysa, I Xoossaa matape yidaysanne simmidi iyako baanaysa eris. 4Yesuusi gayta bollafe dendidi bolla bagga ma7uwa qaari wothidi, pooxa ekidi ba xeessan marxafis. 5Hessafe guye, haathe meecha miishen tigidi, ba tamaareta tohuwa meeccis; qassi ba xeessan dancida pooxan quchis.
6Yesuusi Simoona Phexroosako yaa wode Phexroosi, “Godaw, ne ta tohuwa meeccanee?” yaagis.
7Yesuusi zaaridi iyako, “Taani ootheysa ne ha77i eraka, shin guyepe akeekana” yaagis.
8Yaatin, Phexroosi, “Ne ta tohuwa ubbaraka meeccaka” yaagis.
Yesuusi iyako, “Taani ne tohuwa meecconna ixiko newunne tawunne issifetethi baawa” yaagis.
9Phexroosi Yesuusako, “Godaw, yaatiko, ta tohuwa xalaala gidonashin ta kushiyanne ta huuphiya meecca” yaagis.
10Yesuusi zaaridi, “Bolla meecetida oonika tohope haraba meecetanaw koshshenna; iyaw ubbasoy geeshshi. Hinte geeshshi, shin ubbay geeshshi gideketa” yaagis. 11Yesuusi bana aathidi immana uray ooneko eriya gisho, “Hinte ubbay geeshshi gideketa” yaagis.
12Enta tohuwa meeccidaape guye, Yesuusi ba ma7uwa zaari ma7is. Simmi gayta bolla uttidi entako, “Taani hintew oothidaysa akeeketii?#Luqa 22:27. 13Hinte tana astamaarenne Godaa geeta; taani hinte geysa gidiya gisho lo77o gideta. 14Taani hintew Godanne astamaare gidashe hinte tohuwa meecciko hinteka issoy issuwas hessada oothanaw bessees. 15Hiza, taani hintew oothidaysada hinteka oothana mela hintew leemiso gidas. 16Taani hintew tuma odayis; aylley ba godaape, kiitetidaysi kiittidaysafe aadhenna.#Maato 10:24; Luqa 6:40; Yoha 15:20. 17Hinte hessa eridi oothiyaba gidiko anjetidaysata.
18“Taani hintena ubbaa giike; taani dooridaysata erayis. Shin Geeshsha Maxaafan, ‘Ta barsidaysi ta kushiya saxis’ geetetidaysi tuma gidanaw bessees.#Maz 41:9. 19‘Taani Tana Gideysa’ hinte ammanana mela hessi hananaape sinthatada hintew odayis. 20Taani hintew tuma odayis; taani kiitida oonaka mokiya uray tana mokees. Tana mokiya oonika tana kiittidaysa mokees” yaagis.#Maato 10:40; Mar 9:37; Luqa 9:48; 10:16.
Yesuusa Aathidi Immana Ura
(Maato 26:20-25; Mar 14:17-21; Luqa 22:21-23)
21Yesuusi hessa odidaape guye, ba wozanan daro un7etidi, “Taani hintew tuma odayis; tana hintefe issoy aathidi immana” gidi qoncisidi odis.
22I oodeba odiyako iya tamaaretas eretonna ixin issoy issuwa xeellidosona. 23Iya tamaaretape issoy, Yesuusi doseysi, Yesuusa matan uttis. 24Hessa gisho, Simoon Phexroosi iya qam7otidi, “I oona giyako ane oycha” yaagis.
25Hessa gisho, he tamaarey Yesuusako shiiqidi haythan, “Godaw, I oonee?” yaagis.
26Yesuusi zaaridi, “Taani uythaa woxen tushada barseysa” yaagis. Qassi uythaa menthi ekidi, woxen tushidi, Simoona na7aa Asqoroota Yihuda barsis. 27Yihudi uythaa baaridaape guye, Xalahey ellesidi Yihudan gelis. Yesuusi iyako, “Neeni oothanaw qopidaba ellesada ootha” yaagis. 28Shin gayta bolla uttidaysatape oonika Yesuusi hessa ayis iyako gidaako eribeenna. 29Yihudi miishe oykiya gisho, iya tamaaretape issoti issoti Yesuusi iya, “Paasika bonchiya gallasaas bantaw koshshiyaba shamma woyko manqotas muxaata imma gis” yaagidi qopidosona.
30Yihudi uythaa baarida mela ellesidi kare keyis. He wode sa7i qamma.
Phexroosi Yesuusa Kaddanaysi Odetis
31Yihudi kare keydaape guye, Yesuusi, “Ha77i Asa Na7ay bonchetis; Xoossayka iya baggara bonchetis. 32Xoossay iya baggara bonchetiko I ba huuphen Asa Na7aa bonchana; qassi I hessa ellesidi oothana. 33Ta nayto, taani hintera daro wode gam7ike. Hinte tana koyana, shin taani Ayhudetas odidaysa mela, ‘Hinte taani biya bessaa baanaw danda7eketa.’#Yoha 7:34. 34Taani hintew immiya ooratha kiitay haysa; issoy issuwa dosite. Taani hintena dosidaysada hinte issoy issuwa dosanaw bessees.#Yoha 15:12, 17; 1 Yoha 3:23; 2 Yoha 5. 35Hinte issoy issuwara dosetiko hinte ta tamaare gideysa asa ubbay erana” yaagis.
36Simoon Phexroosi Yesuusako, “Godaw, neeni aw bay?” yaagis.
Yesuusi zaaridi, “Taani biya bessaa neeni ha77i kaallanaw danda7aka, shin guyepe tana kaallana” yaagis.
37Phexroosi, “Godaw, taani nena ha77i kaallanaw ayis danda7ikina? Taani ne gisho, hayqanawuka giiga uttas” yaagis.
38Yesuusi zaaridi, “Ta gisho hayqanaw tuma giiga uttadii? Taani new tuma odayis; kuttoy waassanaape sinthe neeni tana heedzu toho kaddana” yaagis.
Currently Selected:
Yohaanisa 13: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
