Yohaanisa 9
9
Qooqe Gididi Yeletida Ura
1Yesuusi bishe yeletoosape qooqe gididi de7iya issi addiya be7is. 2Iya tamaareti, “Astamaariyaw, ha addey qooqe gididi yeletana mela nagara oothiday oonee? I oothideye woyko iya yelidaysati oothidona?” yaagidi oychidosona.
3Yesuusi, “Xoossaa oosoy iya bolla qoncana melape attishin, I woyko iya yelidaysati nagara oothida gisho gidenna. 4Sa7i gallas de7ishin tana kiittidaysa oosuwa nu oothanaw bessees. Oonika oothanaw danda7onna qammay yees. 5Taani alamiyan de7ashe alamiyas poo7o” yaagis.#Maato 5:14; Yoha 8:12.
6Yesuusi hessa gidi sa7an cuttis. Ba cuchan guutha biitta laakothidi he urqan qooqe addiya ayfiya tiyis. 7Yaatidi, “Bada Salihoome (Salihoome guussay Kiitetidaysa guussu) geetetiya teqetida haathan ne ayfiya meeceta” yaagis. Hessa gisho, addey bidi ba ayfiya meecetidi xeellishe simmis.
8Addiya shoorotinne addey kase woossishin be7ida asay, “Haysi uttidi woossiya addiya gidenneyee?” yaagidosona.
9Issi issi asay, “Haysi iya” yaagidosona.
Harati qassi, “Akay, haysi iya daaneesipe attishin, iya gidenna” yaagidosona.
Shin addey, “Ee, tana” yaagis.
10Enti iyako, “Yaatin ne ayfey waanidi xeellidee?” yaagidi oychidosona.
11I zaaridi, “Yesuusa geetetiya addey guutha urqa laakothidi ta ayfiya tiyidi, ‘Salihoome bada ne ayfiya meeceta’ yaagin, taani bada meecetada xeella aggas” yaagis.
12Enti iyako, “I awun de7ii?” yaagidi oychidosona.
Addey, “Taani erike” yaagis. 13Enti kase qooqe, shin ha77i xeellida addiya Farsaawetako efidosona. 14Yesuusi urqa laakothidi addiya ayfiya pathida gallasay Sambaata gallas. 15Hessa gisho, addey waanidi xeellidaako Farsaaweti iya zaari oychidosona. Addey entako, “I ta ayfiyan guutha urqa tiyis. Ta ayfiya meecetada ha77i xeellayis” yaagis.
16Farsaawetepe issoti issoti, “Haysa oothida addey Sambaata higgiya naagonna gisho Xoossaa matape yibeenna” yaagidosona.
Shin harati, “Nagarancho asi haysa mela malaata waati oothanaw danda7ii?” yaagidi banta giddon shaaketidosona.
17Hessa gisho, Farsaaweti addiyako, “I ne ayfiya xeelisida gisho ne iyabaa woygay?” yaagidosona.
Addey, “I nabe” yaagis.
18Ayhude halaqati, iya aayiwunne aawa xeegidi oychana gakanaw, addey kase qooqe gididaysanne ha77i I xeelleysa ammanibookona. 19Enti iya aayiwunne iya aawako, “Hinte ‘Qooqe gididi yeletis’ giya hinte na7ay haysee? Yaatin, ha77i waanidi xeellidee?” yaagidi oychidosona.
20Iya yelidaysati, “Haysi nu na7aa gididaysanne qooqe gididi I yeletidaysa nu eroos. 21Shin ha77i I waanidi xeellidaako qassi iya ayfiya ooni pathidaako nuuni eroko. Iya oychite. I bana erida asi gidiya gisho babaa odanaw danda7ees” yaagidosona. 22Iya yelidaysati hessa giday Ayhudetas yayyida gishosa. Ayis giiko, Ayhudeti, Yesuusi I Kiristoosa yaagidi markatiya asi de7iko he uraa ayhude woosa keethafe hilanaw koyrottidi zore qachidosona. 23Iya yelidaysati, “I bana erida asi; iya oychite” yaagiday hessasa.
24Hessa gisho, qooqe gididi yeletida addiya enti zaari xeegidi, “Tumaa odanaw Xoossan caaqa; ha addey nagarancho gideysa nu eroos” yaagidosona.
25Addey zaaridi, “I nagarancho gideysa, ta erike. Taani qooqe gideysanne ha77i xeelleysa he issiba erayis” yaagis.
26Enti zaaridi, “I new ay oothidee? I ne ayfiya waati pathidee?” yaagidosona.
27I entako, “Taani hintew odas, shin si7ibeeketa. Ayis zaari si7anaw koyeetii? Hinteka iya tamaare gidanaw koyeetiyee?” yaagis.
28Enti iya cayidi, “Ne he uraa tamaare gida; nuuni Muse tamaare. 29Xoossay Muses odidaysa nuuni eroos, shin hari attoshin ha uray I awupe yidaakoka nu eroko” yaagidosona.
30Addey entako, “I awupe yidaako hinte eronnaysi malaalsiyaba, shin I ta ayfiya pathis. 31Xoossaa boncheysanne I koyaba oothiya uraa Xoossay si7eesipe attishin, nagaranchota si7enna. 32Saloy sa7i medhetoosape qooqe gididi yeletida asa ayfe pathiday oonika baawa. 33Ha addey Xoossafe kiitetiboonaba gidiyako issibaaka oothanaw danda7enna” yaagis.
34Enti zaaridi, “Neeni nagaran yeletada diccidaysi nuna tamaarsanaw koyay?” yaagidosona. Iya ayhude woosa keethafe hilidosona.
Wozana Qooqetethi
35Yesuusi enti addiya kessidaysa si7ida wode iya demmidi, “Asa Na7aa ammanay?” yaagidi oychis.
36Addey Yesuusako, “Godaw, taani iya ammanana mela I oonee? Taw odarkii?” yaagis.
37Yesuusi addiyako, “Neeni iya be7adasa; ha neera odeteysi iya” yaagis.
38Addey zaaridi, “Godaw, ammanayis” yaagidi Yesuusas goyinnis.
39Yesuusi, “Qooqeti xeellana melanne xeelleysati qooqana mela taani pirdanaw ha alamiya yas” yaagis.
40Iyara de7iya guutha Farsaaweti hessa si7idi, “Nu qooqeyee?” yaagidi oychidosona.
41Yesuusi, “Hinte qooqe gidiyako hintew nagara gidenna. Shin ha77i hinte xeelloos giya gisho hinte, hinte nagaran de7eeta” yaagis.
Currently Selected:
Yohaanisa 9: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
