Эхин 35
35
Яковай Бэт-Ээл бусалга
1Бурхан Яковта иигэжэ айладхаба:
– Зай, Бэт-Ээл хүрэтэр нүүгээд, тэндээ һуурижа! Олон жэлэй урда тээ Эсаав ахаһаа зугадан тиишээ ошоходошни, Би шамда үзэгдөө һэм. Ши тэндэ ошоод, Намайе хүндэлэн, үргэлэй шэрээ зохёон бари!
2Тиимэһээ Яков гэр бүлэдөө болон өөрын бүхы зондо иигэжэ хандаба:
– Таанадта байһан бурхадай дүрсэнүүдые абажа хаягты, удаань бэеэ угаагаад, хубсаһа хунараа һэлгэгты. 3Удаань эндэһээ хүдэлэн, Бэт-Ээл руу нүүхэбди. Тэндэ би Бурханда үргэлэй шэрээ барихаб. Тэрэ болбол зоболондо ороһон үедэмни туһалаа, минии ябаһан газарта намтай хамта байлсаа.
4Албата зониинь абажа ябаһан бүхы бурхадай дүрсэнүүдые, шэхэнэйнгээ сахаригуудые абаад, Яковта үгэбэ. Эдэ бүгэдые Яков Шэхээм хотодо дүтэ байһан нэгэ сарса модон доро булаба.
5Тэдэнэй аян замдаа гарахада, оршон тойронхи хотын зон гэнтэ Бурханһаа айжа эхилбэ. Тиигэжэ Яковай хүбүүдэй хойноһоо хэншье дахажа, тэдээндэ добтолбогүй.
6Яков бүхы зоноо, мал һүрэгөө абан, Ханаһаан орон нютагай Лүүз, ондоогоор хэлэбэл, Бэт-Ээл гэдэг газар ерэжэ һуурижаба. 7Тэндээ тэрэ үргэлэй шэрээ бүтээбэ. Тиигээд Яков энэ газараа «Эль-Бэт-Ээл», оршуулбал, «Бэт-Ээлэй Бурхан» гэжэ нэрлэбэ. Юундэб гэбэл, урдань Яковай Эсаав ахаһаа тэрьедэхэ үедэ эгээл тэндэ Бурхан Өөрыгөө Яковта элирхэйлээ бэлэй.
8Тиихэдэ Рэбээккаае хүхэеэ хүхүүлжэ хүн болгоһон хүгшэн Дэбоораа наһа баража, тэрэниие Бэт-Ээлэй урда талада байдаг нэгэ сарса модоной дэргэдэ газар малтажа, хүдөөлүүлээ бэлэй. Тэрэ газар «Аллоон-Бахуут», оршуулбал, «Гашуудалай сарса модон» гэжэ нэрэшээ һэн.
9Яковай иигэжэ Месопотамиһаа бусажа ерэхэдэ, Бурхан тэрээндэ дахин үзэгдэжэ, дахин үреэбэ. 10Бурхан тэрээндэ иигэжэ айладхаа:
– Мүнөө болотороо ши эхэ, эсэгынгээ үгэһэн «Яков» гэжэ нэрээр ябааш. Харин энэ сагһаа эхилэн, ши Минии үгэһэн «Израиль» нэрэтэй болобош.
11Бурхан тэрээндэ үшөө иигэжэ айладхал буулгаа:
– Би Түгэс Хүсэтэ Бурхамби. Үри хүүгэдээр үнэр үдхэн боложо, тоо томшогүй олон уг удамтай байхаш болтогой! Шинии уг удамһаа нэгэ ехэ үндэһэ яһатан бии болоод, тэдэнһээ үдэн, хэдэн улас бии болохо. Шинии үри хүүгэдһөө хожомынь олон хаашуул түрэхэ. 12Абраһаам болон Исаагта үмсэ болгон үгэхөөр найдуулһан тэрэ орон нютагые Би шамда үргэхэб. Тиигээд тэрэ газар шинии үхи хүүгэдээр үеһөө үедэ дамжан байдаг угай газар болохо.
13Тиигээд Бурханай хажууһаань холодоходо, 14Яков Бурханай тэрээнтэй хөөрэлдэһэн газарта шулуун хүшөө бодхоогоод, унда болон олива модоной тоһо дээрэнь сүршэбэ. 15Тиигээд Яков тэрэ газараа «Бэт-Ээл», оршуулбал, «Бурханай үргөө» гэжэ нэрлэбэ.
Бэньямиинэй түрэлгэ ба Рахээлэй наһа баралга
16Удаань тэдэ Бэт-Ээлһээ хүдэлжэ, Эпраатаһаа, ондоогоор хэлэбэл, Бэтлэһээм хотоһоо, нилээд ябаад байхадань, Рахээл үхибүү түрэхэеэ үбдэжэ эхилбэ. Энэ удаа Рахээл угаа хүндөөр үбдөө. 17Иигэжэ үхибүү түрэхөөр зобожо байха үедэнь хүүгэдэй хүйһэ хүндэдэг хүгшэн тэрээндэ иигэжэ хэлэбэ:
– Бү ай! Ши үшөө нэгэ хүбүүтэй болобош!
18Гэбэшье Рахээл тэсэнгүй, ами табижа байхадаа һаяхан түрэһэн хүбүүндээ «Бэн-Онии», оршуулбал, «Минии зоболонгой хүбүүн» гэжэ нэрэ үгөөд, наһа бараба. Зүгөөр эсэгэнь хүбүүндээ ондоо нэрэ – «Бэньямиин», оршуулбал, «Эсэгэ болохо минии баруун талада һууха хүбүүн» гэжэ нэрэ үгэбэ.
19Тиигэжэ Рахээлэй наһа барахада, Яков һамганайнгаа шарил Эпраата, ондоогоор хэлэбэл, Бэтлэһээм ошохо харгын хажууда хүдөөлүүлээд, 20булаша хүүр дээрэнь шулуун хүшөө бодхобо. Мүнөөшье хүрэтэр Рахээлэй хүүр дээрэ табиһан нангин шулуун тэндэ байдаг зандаа.
21Израиль нэрэтэй болоһон Яков аян замдаа саашаа ябаад, Мигдаал-Ээдэр гэдэг газарта дүтэ майханаа зохёон һуурижаба.
22Тэндэ байхадаа ууган хүбүүн Рэүбээн эсэгынгээ бага һамган Билһаатай унтаа. Энээн тухай эсэгэнь мэдэбэ.
Яковай хүбүүд
Яков арбан хоёр хүбүүдтэй бэлэй. 23Лэһаа һамганһаань Яковай ууган хүбүүн Рэүбээн, Симеон, Левий, Иуда, Иссахаар ба Зэбүлүүн гараа. 24Рахээл һамганһаань Иосиф ба Бэньямиин гараа. 25Рахээлэй зараса эхэнэр Билһааһаа Даан ба Напталии гараа. 26Лэһаагай зараса эхэнэр Зилпааһаа Гаад ба Ашээр гараа. Эдэ хүбүүдэйнь олонхинь Яковай Месопотамида байхада түрөө бэлэй.
Исаагай наһа баралга
27Тэрэ үедэ Яковай эсэгэ Исаак Кирьяат-Арбаагай, ондоогоор нэрлэбэл, Хэброон хотын ойрохоно Мамрээдэ ажаһууһан юм. Урдань Исаак Абраһаам эсэгэтэеэ хамта тэндэ ажаһуужа байһан юм. Яков тэндэ ошожо, эсэгэтэеэ уулзаба.
28-29Исаак үндэр наһа наһалжа, зуун наятайдаа наһа бараба. Тэрэ үбгэртэрөө ябаад, үзэхэ юумэеэ үзөөд, хараха юумэеэ хараад, элинсэг хулинсагуудтаа мордоо бэлэй. Эсаав Яков хоёр хүбүүдынь эсэгэеэ хүдөөлүүлбэ.
Currently Selected:
Эхин 35: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
