Иоанн 11
11
Лазарь нүгшэбэ
1Мария Марфа эгэшэ дүүнэртэеэ Бэтаани тосхондо суг һуудаг Лазарь гэжэ нэрэтэй нэгэ хүн үбдэбэ. 2Мария Эзэнэй хүлдэ һайхан үнэртэй ургамалай шүүһэ түрхеэд, толгойнгоо үһөөр хүлыень аршаһан эхэнэр мүн#11:2 Энээн тухай бүри тодорхойгоор һүүлдэ хэлэгдэхэ (12:1–8 харагты).. Мариягай Лазарь гэжэ дүү хүбүүниинь үбдэһэн байгаа. 3Эгэшэ дүү хоёрынь:
– Эзэн аа, Танай энхэрлэн хайрладаг хүнтнай үбдөөд байна, – гэжэ Иисүүстэ дуулгаба. 4Тиигэжэ дуулаад:
– Энэ үбшэн Лазариие үхүүлхын тула бэшэ, харин Бурханиие алдаршуулхын тула, тиин Бурханай Хүбүүнэй алдар солоёо элирхэйлхын тула болоо, – гэжэ Иисүүс хэлэбэ.
5Марфа, Мария, Лазарь гурбанда Иисүүс дуратай байгаа. 6Теэд Лазариин үбдэжэ байһан тухай дуулабашье, Иисүүс аяар хоёр үдэрэй туршада байһан газарһаа хүдэлбэгүй. 7Удаань Иисүүс шабинартаа:
– Гэдэргээ Иудейдээ бусая, – гэбэ.
8– Багша аа, һаяхан Иудейн зон Таниие шулуудажа алахаяа һэдээ бэлэй, харин Та дахин тиишэ ошохоёо һанаба гүт? – гэжэ шабинарынь асууба.
9Иисүүс тэдэндээ иигэжэ хэлэбэ:
– Нэгэ үдэр соо арбан хоёр час бэзэ? Үдэр ябаһан хүн бүдэржэ унахагүй, дэлхэй һаруул байна бшуу. 10Харин һүни ябаһан хүн бүдэрэн унаха, юундэб гэбэл, дэлхэй гэрэлгүй байна бшуу. – 11Иисүүс саашань үргэлжэлүүлбэ:
– Манай нүхэр Лазарь унтана, Би һэреэхэеэ ошохомни.
12– Эзэн аа! Хэрбээ Лазариин унтажа байбалнь, тэрэнэй бэень һайн болохо хаяа, – гэжэ Иисүүстэ шабинарынь хэлэбэ.
13Лазарь унтана гэхэдээ, наһа бараа гэһэн удхатайгаар Иисүүс хэлээ, харин шабинарынь Тэрэ миин лэ нойрсоно гэжэ һанаа бшуу. 14Тиихэдэнь шабинартаа хандан:
– Лазарь наһа бараа, – гэжэ Иисүүс сэхыень хэлэбэ. – 15Теэд тэндэ байлсаагүйдөө таанарай түлөө баярланаб – таанар Намда түргөөр этигэхэт. Зай, Лазарьта ошоё!
16Эхир гэжэ ара нэрэтэй Фома хүбүүн:
– Хамта ошолсоё, хамта үхэнэ бэзэбди! – гэжэ бэшэ шабинартаа хэлэбэ.
Иисүүс Лазариие амидыруулба
17Лазарь аяар дүрбэн үдэрэй саада тээ нүгшөөд, агы нүхэндэ хэбтэнэ гэжэ Иисүүс Бэтаанида ерээд мэдэбэ. 18Бэтаани гээшэнь Иерусалимһаа холо бэшэ, гурбан модо шахуу газарта байгаа. 19Дүүгэйнгээ наһа барахада уйдан гашуудажа байһан Марфа Мария хоёрой һанаа заһахаяа олон еврейнүүд тэдэнэйдэ ошобо. 20Иисүүс ерэнэ гэжэ дуулаад, Марфа угтахаяа гараба. Мария гэртээ үлэбэ.
21-22– Эзэн аа! Хэрбээ Танай эндэ байгаа һаа, ахамни наһа барахагүй бэлэй! Теэд Танай гуйһан бүхы юумые Бурхан мүнөөшье Танда үгэхэ гэжэ би мэдэнэб, – гэжэ Иисүүстэ Марфа хэлэбэ.
23– Шинии аха дахин амидырха, – гэбэ Иисүүс.
24– Амидыралгын үедэ, һүүлшын Үдэртэ ахамни бодохо гэжэ би мэдэнэб, – гээд Марфа харюусаба.
25– Би хадаа Амидыралга гээшэб, Ами наһан гээшэб. Намда этигэдэг хүн үхөөшье һаа, амиды болохо. 26Намда этигэлтэй амидарһан ямаршье хүн хэзээдэшье үхэхэгүй. Ши энээндэ этигэнэ гүш?
27– Этигэнэб даа, Эзэн! Та Бурханай табисууртат, энэ дэлхэйдэ ерэхэ ёһотой Бурханай Хүбүүнта гэжэ би этигэнэб.
28Тиигэжэ хэлээд, Марфа Мария эгэшэдээ ошожо һэмээхэнээр:
– Багша эндэ ерээд байна, шамайе ерэ гэнэ, – гэбэ.
29Эгэшэнь түргэн бодожо, Иисүүстэ ошобо. 30Иисүүс тиихэдэ тосхондо үшөө хүрөөгүй, Марфын угтаһан газарта зогсожо байгаа. 31Гэртэнь Мариягай һанаа заһажа байһан еврейнүүд эхэнэрэй түргэхэн бодожо, газаашаа гарахые обёорон, энэмнай дүүгэйнгээ хүдөөлүүлһэн агы нүхэнэй хажууда уйлахаяа ошобо гэжэ һанаад, хойноһоонь ошолсобо. 32Мария Иисүүсэй байһан газарта ерэхэдээ, хүлдэнь һүгэдэн унажа:
– Эзэн аа! Хэрбээ Танай эндэ байгаа һаа, дүүмни наһа барахагүй бэлэй! – гэбэ.
33Мариягай, мүн Мариятай хамта ерэлсэһэн еврейнүүдэй уйлажа байхые хараад, Иисүүс айхабтар ехээр гашуудан гуниглаба.
34– Таанар тэрэниие хаана хүдөөлөөбта? – гэбэ.
– Эзэн аа, ошоё, бидэ харуулхабди, – гэжэ харюусабад. 35Иисүүс уйлашаба.
36– Харыт, Иисүүс тэрээндэ ямар ехэ дуратай байгааб! – гэлдэбэ еврейнүүд.
37Тэдэнэй зариманиинь бэе бэедээ:
– Һохор хүниие Иисүүс харадаг болгоо һэн. Лазариие амиды байлгажа шадахагүй байгаа аал? – гэбэ.
38Иисүүс бүри ехээр сэдьхэлээ хүдэлгэн, шулуугаар бүглөөтэй агы нүхэндэ дүтэлбэ.
39– Шулууень эндэһээ абагты! – гэбэ Иисүүс.
– Эзэн аа! Үнэр орошоод байна ёһотой. Аяар дүрбэн үдэр эндэ хүдөөлүүлээтэй байнал, – гэжэ наһа барагшын эгэшэ Марфа хэлэбэ.
40– Хэрбээ шүтэжэ ябаа һаа, Бурханай алдар солые үзэхэш гээд шамда Би хэлээ бэшэ һэн гү? – гэжэ Иисүүс Марфада харюусаба.
41Шулууень зайлуулба. Иисүүс Тэнгэри өөдэ хараад:
– Эсэгэ аа, Намайе дуулаһандатнай баясхалан хүргэнэб. 42Та Намайе хододоо дуулажа байдагта гэжэ Би мэдэнэб. Намайе Та эльгээгээт гэжэ эндэ зогсогшо хүнүүдэй этигэхынь тула Би тиигэжэ хэлээб! – гэжэ 43Иисүүс хэлээд:
– Лазарь, тэндэһээ гаража ерэ! – гэжэ шангаар захирба.
44Наһа бараһан хүниинь агы нүхэн сооһоо гаража ерэбэ. Хүдөөлүүлхэдээ орёодог бүдөөр хүл гарнуудынь орёогдонхой, нюурынь баһал бүдөөр боолгоотой байгаа.
– Боолтыень тайлагты, һаадгүй ябаад ошог! – гэжэ Иисүүс хэлэбэ.
Фарисейнүүд Иисүүсые алаха гэжэ нюусаар хэлсэбэ
45Марияда ерэһэн еврейнүүдэй олониинь Иисүүсэй юу бүтээһыень хараад, Тэрээндэ этигэбэ. 46Гэбэшье зариманиинь фарисейнүүдтэ ошожо, Иисүүсэй юу хэһэн тухайнь дуулгаба.
47Түрүү санаартан ба фарисейнүүд Дээдын Зүблэл зарлаба.
– Зай, яахамнай гээшэб? Энэ хүн олон янзын дүлгэ тэмдэгүүдые харуулна. 48Иимэ юумэ саашадаашье харуулха арга Тэрээндэ олгоо һаамнай, бултадаа Тэрээндэ этигэдэг болохонь. Тиихэдэнь Римэйхид ерээд, Һүмыемнай, бүхы зонииемнай үгы хэхэл, – гэжэ тэдэ хэлсэбэ.
49Энэ жэлдэ ахамад санаарта байһан Кайафа:
50– Таанар юушье ойлгоногүйт! Хэрбээ бүхы еврей зоной түлөө гансал хүнэй үхөө һаа, таанарта дээрэ байха гэжэ өөһэдөө ойлгоногүй гүт? – гэжэ тэдэндэ хэлэбэ.
51Кайафа өөрэһөөн тиигэжэ хэлээ бэшэ, харин энэ жэлдэ ахамад санаарта байхадаа уридшалан мэдээд: Иисүүс хүнүүдэй түлөө үхэхэ гээ бэлэй. 52Гансашье еврей зоной түлөө бэшэ, харин дэлхэй дээгүүр эндэ тэндэ бутаран тарашаһан Бурханай бүхы үхибүүдые суглуулан нэгэдхэхын түлөө үхэхэ. 53Тиин тэрэ үдэрһөө хойшо ахамад санаарта ба фарисейнүүд Иисүүсые яажа алахамнайб гэжэ бододог болобо.
54Тиимэ ушарһаа Иисүүс еврейнүүдэй дунда Өөрыгөө мэдүүлэнгүйгөөр ябадаг болоо. Сүл губиин хажууда оршоһон Эпрааим хотодо ошожо, шабинартайгаа хамта байба.
55Еврейнүүдэй Паасха ойртожо байгаа. Һайндэрэй урдахана арюудхуулдаг заншалаа сахижа, орон нютагайнь олон зон Иерусалим ерэбэ. 56Һүмэ дотор сугларһан хүнүүд Иисүүсые бэдэрэн, өөһэд дундаа:
– Таанар юун гэжэ бодонобта? Һайндэртэ ерэхэгүй гү? – гэжэ хөөрэлдэбэ. 57Түрүү санаартан болон фарисейнүүд:
– Иисүүсые барижа хаахымнай тула, Тэрэнэй хаана байһые мэдэһэн хүн бүхэн бидэндэ дуулгаха ёһотой, – гэһэн захиралта гаргаба.
Currently Selected:
Иоанн 11: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
