Иоанн 6
6
(Мт 14:13-21; Мк 6:32-44; Лк 9:10-17)
1Энээнэй һүүлдэ Иисүүс Галилейн гэхэ гү, али Тибериадай нуурай нүгөө эрьедэ гараба. 2Хойноһоонь олон зон дахалдаба, юундэб гэхэдэ, үбшэн хүнүүдые гайхамшаг аргаар Иисүүсэй эмнэн эдэгээхые үзэһэн хараһан байна бшуу. 3Иисүүс шабинартаяа хамта хада дээрэ гаража һууба. 4Еврейнүүдэй Паасхын һайндэр болохонь ойртожо байгаа. 5Иисүүс урдаһаань олон зоной ерэжэ ябахые хараад, Филипптэ хандан:
– Эдэ зониие эдеэлүүлхэ хилээмэ хаанаһаа худалдажа абахамнайб? – гэжэ хэлэбэ. 6Иисүүс юу хэхэеэ мэдэжэ байгаад, Филиппые туршан тиигэжэ хэлээ бшуу.
7– Хоёр зуун динари#6:7 Динари – римэй жэжэ мүнгэн, хүлһэншэ хүдэлмэришэнэй нэгэ үдэрэй ажалай салин болодог байгаа. мүнгөөр хилээмэ худалдажа абаад, зүһэм зүһэмөөршье хубаагаа һаа, бултанда хүртэхэгүйл, – гэжэ Филипп харюусаба.
8Шабинарайнь нэгэн, Симон Пётрой дүү Андрей:
9– Эндэ байһан нэгэ хүбүүндэ таба монсогор ешмээн хилээмэн, хатааһан хоёр загаһа бии. Теэд иимэ олон хүндэ энэнь яажа хүртэхэб даа? – гэжэ хэлэбэ.
10– Хүнүүдые һуулгагты, – гэжэ Иисүүс захирба.
Тэрэ газартань үдхэн ногоон ургажа байгаа. Тэндэнь табан мянга шахуу ганса эрэшүүл байлсаа. 11Иисүүс хилээмыень абаад, Бурханда баясхалан хүргэжэ, тэндэ һуугшадта хубаан үгэбэ. Мүн загаһыень баһал хүн бүхэндэ дураарнь хубаажа үгэбэ. 12Хүнүүдэй эдеэлжэ садахадань, Иисүүс:
– Үлөөшэ хилээмэеэ бултыень суглуулагты, юушье бү орхигты, – гэжэ шабинартаа хэлэбэ.
13Таба монсогор ешмээн хилээмэнһээнь үлэһэн зүһэмүүдые арбан хоёр түрсүүг дүүрэтэр шабинарынь суглуулба. 14Иисүүсэй хэһэн иимэ гайхамшаг хэрэгүүдые хараад:
– Энэмнай дэлхэйн зондо ерэхэ ушартай байһан ёһоороол тэрэ Лүндэншэ байна! – гэжэ хүнүүд хэлсэбэ.
15Эдэ хүнүүд Намайе барижа, баалалтаар хаан болгожо табихаяа байна гэжэ ойлгоод, Иисүүс гансаараа дахин хада өөдэ гараба.
Иисүүс уһан дээгүүр ябана
16Үдэшэ болоходо Иисүүсэй шабинарынь нуурай эрьедэ ошобо. 17Онгосодо һуугаад, нуурай нүгөө бэедэ оршодог Капернаум хото тамаран ошобо. Харанхы болобошье, Иисүүс үшөө ерээдүй байгаа. 18Тэрэ үедэ шанга һалхин боложо, нуур ехээр долгилбо. 19Нуурай эрьеһээ таба-зургаан модо газарта онгосоороо тамаржа ошоод, шабинарынь Иисүүсэйнгээ нуурай уһан дээгүүр алхалан, онгосодонь дүтэлжэ ябахые хараба. Тэдэн ехээр айжа мэгдэбэ.
20– Энэ Биб, бү айгты! – гэбэ Иисүүс. 21Шабинарынь Иисүүсые онгосодоо һуулгаха һанаатай байба, теэд онгосонь тэрэ дороо зориһон эрьедээ хүрэжэ ерэшэбэ.
Иисүүс – Амидаралай хилээмэн мүн
22Нүгөөдэрынь нуурай саана үлэһэн хүнүүд үсэгэлдэр гансахан лэ онгосо байгаа бэлэй гэжэ һанаба. Теэд Иисүүс шабинартайгаа хамта тэрэ онгосодо һуугаагүй, һурагшадынь амяараа тамаран ошоо гэжэ тэдэ зон мэдэжэ байгаа. 23Тиихэдэ Тибериадаһаа зон хэдэн онгосонуудта һуугаад, Эзэнэй Бурханда баясхалан хүргэһэнэй һүүлдэ олошоруулагдаһан хилээмэ зоной эдиһэн газарта тамаран ерэбэ. 24Теэд тэндэнь Иисүүсшье, шабинарыньшье байбагүй, тиимэһээ тэндэ байһан зон онгосонуудта һуугаад, Иисүүсые бэдэржэ, Капернаум руу тамаран ошобо. 25Нуурай нүгөө эрьедэ тэдэнэр тамаран ерэжэ, Иисүүсые олоод:
– Багша аа, Та хэзээ иишэ ерэһэн байбат? – гэжэ асууба.
26Иисүүс тэдэндэ иигэжэ харюусаба:
– Таанар гайхамшаг дүлгэ тэмдэгүүдые үзэһэн хараһанһаа бэшэ, харин хилээмэ эдижэ садаһан дээрэһээл Намайе бэдэрнэт гэжэ таанадта үнэн зүбые хэлэнэб. 27Теэд таанар саг зуурын эдеэндэ һаналаа бү табигты, харин мүнхын амидарал олгодог эдеэндэ һаналаа табигты. Тиимэ амидаралые таанарта Хүн түрэлхитэнэй Хүбүүн үгэхэ, Бурхан Эсэгэ Тэрээндэ эрхэ засагаа үршөөгөө юм.
28– Бурханай заабари бэелүүлхын тула бидэ юу хэхэ ёһотойбибди? – гэжэ тэдэнь асууба.
29– Бурханай эльгээһэн хүндэ таанар этигэгты, тиихэдээл Бурханай хэрэгые бүтээһэн болохот, – гэжэ Иисүүс харюусаба.
30– Теэд ямар дүлгэ тэмдэгыетнай хараад, бидэ Танда этигэхэ болонобди? Та юу хэхэбта? – гэжэ тэдэ асууба. – 31Манай үбгэ эсэгэнэр сүл губида ябахадаа, манна#6:31 Манна (еврей үгэ) – еврей зоной сүл губяар ябахадаа ехээр үлдэжэ, Бурхан Моисей хоёрые зэмэлэн гэмэрэлдэхэдэ, Бурхан тэнгэриһээ хүүрхэй сагаан юумэ эльгээбэ. Еврейнүүд тэрэниие хилээмэнэй орондо эдижэ, «манна» гэжэ нэрлээ. Гар 16:31 хара. эдидэг байгаа. «Тэнгэриһээ тэдээндэ хилээмэн үгтөө», – гэжэ Нангин Бэшэг соо бэшэгдэнхэй.
32Тиихэдэнь Иисүүс:
– Би таанарта үнэн зүбые хэлэнэб: Бурханай хилээмэ таанарта Моисей үгөөгүй, тиимэ ёһотой хилээмэ Минии Эсэгэ Бурхан таанарта үгэдэг. 33Юундэб гэбэл, Бурханай хилээмэн Тэнгэриһээ буужа ерээд, энэ дэлхэйн зондо ажамидарал үгэгшэ мүн, – гэжэ харюусаба.
34– Эзэн аа, бидэндэ тиимэ хилээмэ хододоо үгэжэ байгыт! – гэжэ тэдэнь хэлэбэ.
35– Би Өөрөө ажамидаралай хилээмэн гээшэб. Намда ерэдэг хүн хэзээдэшье үлэн хооһон байхагүй, Намда этигэдэг хүн хэзээдэшье ундаа хүрэхэгүй. 36Теэд энээниие өөһэдөө үзэһэн хараһаншье һаа, этигэнэгүйт гэжэ таанарта хэлээ һэм. 37Минии Эсэгын Намда үгэһэн хүн бүхэн Намда ерэхэ. Намда ерэһэн хүниие Би намнахагүйб. 38Юундэб гэхэдэ, Өөрынгөө дураар юумэ хэхэеэ Би тэнгэриһээ буужа ерээ бэшэб, харин Намайе эльгээһэн Эсэгын дура хүсэлые бэелүүлхэеэ ерээб. 39Намайе эльгээһэн Эсэгын дура хүсэлынь иимэ: Тэрэнэй Намда үгэһэн хүнүүдэй нэгыеньшье хосороонгүйгөөр, һүүлшын Үдэртэ бүгэдые амидыруулха. 40Юундэб гэбэл, Минии Эсэгын дура хүсэлынь иимэ: Бурханай Хүбүүе харадаг, Тэрээндэ этигэдэг хүн бүхэн мүнхэ наһатай байха. Тиин һүүлшын Үдэр Би тэдэниие амидыруулхаб.
41Би Тэнгэриһээ буужа ерэһэн хилээмэн гээшэб, – гэжэ Иисүүсэй хэлэхэдэнь, тэндэ сугларагшадай дунда гэмэрэлдээн болобо.
42– Энэмнай Иосифой хүбүүн Иисүүс ха юм? Тиимэ бэшэ аал? Бидэ Тэрэнэй эсэгыеньшье, эхыеньшье мэдэхэбди. Теэд «Би тэнгэриһээ буужа ерээб», – гэжэ энэ юундэ хэлэнэб? – гэлдэбэ тэдэнь.
43– Таанар бү гэмэрэлдэгты. 44Минии Эсэгэ хэниие Намда ерүүлнэб, тэрэл хүн Намда ерэжэ шадаха. Иимэ хүниие һүүлшын Үдэртэ Би амидыруулхаб. 45«Бүхы хүнүүдые Бурхан һургаха», – гэжэ лүндэншэд бэшэһэн байна. Эсэгын үгэ дуулажа, Тэрэнэй һургаал ойлгожо абаһан хүн Намда ерэхэ. 46Теэд Эсэгые хэншье хараагүй юм. Тэрэниие Бурханһаа Ерэгшэл гансаараа хараа. 47Таанарта үнэн зүбые хэлэнэб: Намда этигэдэг хүн мүнхэ наһанда хүртөөд байна. 48Би ажамидаралай хилээмэн гээшэб. 49Таанарай үбгэ эсэгэнэр сүл губида ябахадаа, ман эдибэшье, үхэһэн байна. 50Харин тэнгэриһээ буужа ерэһэн хилээмэһээ эдиһэн хүн хэзээдэшье үхэдэггүй. 51Би Тэнгэриһээ буужа ерэһэн амиды хилээмэн гээшэб. Энэ хилээмые эдиһэн хүн мүнхэ наһатай болохо. Тэрэ хүндэ Минии үгэхэ хилээмэн хадаа Минии бэемни гээшэ, тиин энэ бэеэ бүхы дэлхэйн ажамидаралай түлөө Би үгэнэб.
52Тиихэдэнь еврейнүүдэй хоорондо гани халуун арсалдаан болобо:
– Энэ хүн хайшан гээд өөрынгөө бэеые манда эдюулхэнь гээшэб?!
53Иисүүс харюусаба:
– Хүн түрэлхитэнэй Хүбүүнэйл бэе эдидэг һаа, Тэрэнэйл шуһа уудаг һаа, амидаралгын шанартай байхат гэжэ таанарта үнэн зүбые хэлэнэб. 54Минии бэе эдидэг, Минии шуһа уудаг хүн мүнхэ наһатай болобо – тиин тэрэ хүниие Би һүүлшын Үдэртэ амидыруулхаб. 55Минии бэе хадаа ёһотой эдеэн гээшэ, Минии шуһа хадаа ёһотой унда гээшэ. 56Минии бэе эдидэг хүн, Минии шуһа уудаг хүн Минии досоомни байна, Би баһал тэрэнэй досоонь байнаб. 57Намайе эльгээһэн Эсэгэмни мүнхэдөө амидаралгын шанартай юм. Тэрэ Минии амидаралай эхин болоно. Энээндэл адли, Би Намайе эдидэг хүнэй амидаралай эхин байхаб. 58Тэнгэриһээ бууһан хилээмэн – энэ байна. Үбгэ эсэгэнэрэйтнай эдеэд үхэһэн хилээмэн иимэ бэшэ һэн. Харин энэ хилээмэ эдидэг хүн мүнхэ наһатай байна.
59Капернаумай мүргэлэй гэр соо һургаалаа номноходоо, Иисүүс тиигэжэ хэлэдэг һэн.
Зарим шабинарынь Иисүүсые орхёод арилба
60Эдэ үгэнүүдые шагнаһан олон шабинарынь:
– Энэнь жэгтэй һонин һургаал байнал! Шагнахыншье аргагүйл! – гэлсэбэ.
61Тэрэнэй үгэнүүд шабинарайнь дура гутааба гэжэ мэдээд, Иисүүс тэдэндээ иигэжэ хэлэбэ:
– Эдэ үгэнүүдни таанад соо һэжэг түрүүлнэ гү? 62Теэд Хүн түрэлхитэнэй Хүбүүнэй түрүүшээр байһан орондоо дэгдэн бусахые харахадаа, юун гэхэбта? 63Ажамидарал гансал Һүлдэһөө эхи абадаг, харин хүнэй бэе эндэ юушье хэжэ шадахагүй. Таанадта Минии хэлэһэн үгэнүүд хадаа Һүлдэ, Ажамидарал гээшэ. 64Теэд заримантнай Намда этигэнэгүйл.
Хэн Тэрээндэ этигэнэгүйб, хэн Тэрээниие барижа үгэхэб гэжэ Иисүүс анханһаа мэдээд байгаа. 65Иисүүс саашань үргэлжэлүүлэн хэлэбэ:
– Эсэгымни үршөөлгүйгөөр хэншье Намда ерэжэ шадахагүй гэжэ би таанадта хэлээ һэнби.
66Энээнһээ хойшо Иисүүсэй олон шабинарынь Тэрэниие орхёод, саашадаа Тэрээнтэй ябалсаагүй. 67Өөрын арбан хоёр шабиһаа Иисүүс һураба:
– Магад, таанаршье Намайе орхихо һанаатай гүт?
68– Эзэн аа, бидэ ондоо хэндэ ошохомнай гээшэб? Тандал мүнхэ наһа олгодог үгэнүүд байна ха юм. 69Та Бурханай Арюун Хүбүүнта гэжэ бидэ этигэнэбди, мэдэнэбди, – гэжэ Симон Пётр харюусаба.
70– Би Өөрөөл Арбан хоёр таанадые шэлэжэ абаа бэшэ һэн гүб! Теэд таанадай нэгэн шолмос байна! – гэжэ Иисүүс харюусаба.
71Иигэжэ Симон Искариодой хүбүүн Иуда тухай Иисүүс хэлэһэн байна. Тэрэ Арбан хоёрой нэгэниинь байһан аад, һүүлээрнь Иисүүсые барижа үгэхэ.
Currently Selected:
Иоанн 6: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
