Иоанн 7
7
(Мт 14:22-33; Мк 6:45-51)
Иисүүс ба тэрэнэй аха дүүнэр
1Удаань Иисүүс Галилейгээр ябаба. Иудейдэ ошохогүй гэжэ Тэрэ шиидэбэ, юундэб гэхэдэ, Иудейн ахамадууд Тэрэниие алаха һанаатай байгаа. 2Еврейнүүдэй Отог урса табилгын һайндэрэй найр болохоёо байба. 3Аха дүүнэрынь Иисүүстэ хэлэбэ:
– Та эндэһээ гараад, Иудей ошогты! Танай бүтээдэг гайхамшаг хэрэгүүдые тэндэ ажаһуудаг һурагшадтнай хараг лэ. 4Өөрынгөө үйлэ хэрэгые нюусаар хэдэг хүн алдар сууда гарахагүй бшуу. Харин Танай тиимэ гайхамшаг үйлэ хэрэгүүд тухайтнай бүхы дэлхэйн зон мэдэг лэ!
5Иисүүсэй аха дүүнэрыньшье Тэрээндээ этигэдэггүй байгаа. 6Иисүүс аха дүүнэртээ иигэжэ харюусаба:
– Минии саг үшөөл ерээдүй байна. Таанарта ямаршье саг таараха. 7Дэлхэйн хүнүүд таанарта дурагүйлхэхэгүй, харин Намда тэдэ дурагүйлхэдэг, тэдэ хүнүүдэй үйлэ хэрэгэйнь ёро муутай байһые Би гэршэлэн харуулна ха юмбиб. 8Таанар һайндэртөө ошогты. Би тэрэ найрта ошохогүйб, Минии саг үшөө ерээдүй байна.
9Иисүүс тиигэжэ хэлээд, Галилейдэ үлэбэ.
Иисүүс найр дээрэ
10Аха дүүнэрэйнгээ һайндэртэ ябаһан хойно Иисүүс баһа тиишэ бэеэ мэдүүлэнгүй ошобо. 11Еврейнүүдэй ахамадууд найрай үедэ Иисүүсые бэдэрбэ, хаана байнаб гэжэ һурагшалба. 12Иисүүс тухай ехэ арсалдаан улад зоной дунда болобо. Зарим нэгэниинь: «Энэ һайн хүн», – гэлдэбэ. Нүгөө зариманиинь: «Үгы, энэ хүн улад зониие мэхэлнэ», – гэжэ буруушааба. 13Теэд засагаархидһаа айжа, Иисүүс тухай сэхэ руунь хэншье хэлээгүй.
14Һайндэрэй хахад сагынь үнгэршэхэдэ Иисүүс Һүмэ соо бии боложо, һургаалаа номнобо. 15Еврейнүүдэй ахамадууд гайхалсан:
– Энэ хүн хаанашье һураагүй аад, иимэ ехэ юумэ хаанаһаа мэдэнэб? – гэлсэбэ.
16Иисүүс харюусаба:
– Энэ Минии бэшэ, харин Намайе эльгээһэн Бурханай һургаал юм. 17Тэрэнэй дура хүсэл дүүргэхэ һанаатай хүн һаа, энэ Бурханай һургаал гээшэ гү, али Би Өөрэһөөн хэлэжэ байна гүб гэжэ мэдэдэг болохо. 18Өөрэһөөн хэлэһэн хүн өөрыгөө магтуулхаяа оролдоно, харин Намайе эльгээһэн Бурханиие алдаршуулхаяа оролдогшо үнэн зүбые хэлэнэ, тэрэнэй зүрхэ сэдьхэлдэ худал юумэн байхагүй. 19Моисей таанарта Хуули үгөө бэшэ аал? Теэд таанарай хэнтнайшье тэрэ Хуули сахинагүйл! Юундэ таанар Намайе алахаяа һананабта?
20– Та досоогоо ада шүдхэртэй байнат! Хэн Таниие алахаяа байнаб? – гэжэ зон харюусаба.
21Иисүүс харюудань иигэжэ хэлэбэ:
– Би нэгэл гайхамшаг хэрэг хэбэб, тиихэдэмни таанар бултадаа ехээр гайхалдаалта. 22Бишыхан хүбүүдэйнгөө бэлгэ отолуулха ёһо заншал таанарта Моисей захяа һэн (үнэндөө Мойсейһээ урда, үбгэ эсэгэнэр тиигэжэ захяа), тиигээд таанар субботодошье отолуулна ха юмта. 23Моисейн Хуули эбдэхэгүй гэжэ хүниие субботодо отолуулжа байхадаа, субботодо хүнэй бэеые сүм эдэгээхэдэмни таанар Намда яахадаа ехээр сухалданабта? 24Таанар гадаада талыень обёороод лэ, халирхайгаар бү шиидхэгты, харин үнэн зүб шиидхэбэри гаргагты!
25Иерусалимда байгшадай зариманиинь иигэжэ хэлэбэ:
– Энэл хүниие засаг баригшад алахаяа һанана бэшэ аал? 26Теэд харыта, Энэ хүн һургаалаа нюунгүй сэхэ номнонол. Хэншье Тэрэниие хориногүйл… Энэ хүн үнэхөөрөө Бурханай табисуурта байна гэжэ, магад, засагаархиншье ойлгоо хаяа? 27Теэд Энэ хүн хаанаһааб гэжэ бидэ мэдэнэбди. Харин Бурханай табисууртын ерэхэдэ, Тэрэ хаанаһааб гэжэ хэншье мэдэхэгүйл.
28Тиихэдэнь Иисүүс һургаалаа Һүмэ дотор номножо байгаад:
– Таанар Намайе мэдэнэ гүт? Минии хаанаһаа ерэһэн тухай баһа мэдэнэ гүт? Би Өөрэһөөн ерээ бэшэб. Намайе эльгээгшэдэ этигэжэ болохо, зүгөөр таанар Тэрээниие мэдэхэгүйт. 29Харин Би Тэрээниие мэдэхэб, ушарынь нэрлэбэл, Би Тэрээнһээ ерээб, Намайе Тэрэ эльгээгээ, – гэжэ шангаар дуугарба.
30Тиигэжэ хэлэхэдэнь Иисүүсые засагаархин барижа хаахаяа һанаба, теэд хэншье Тэрээнэй ойро хүрэбэгүй, юундэб гэхэдэ, Тэрэнэй сагынь үшөө ерээдүй байгаа. 31Теэд олон юрын зон Тэрээндэ этигэһэн байна.
– Бурханай табисуурта ерэхэдээ, Энэ хүнһөө үлүү ехэ дүлгэ тэмдэг харуулжа шадаха аал? – гэжэ тэдэ зон хэлсэбэ.
32Иисүүс тухай арад зоной дунда арсалдаанай боложо байхые фарисейнүүд дуулаба. Түрүү санаартан ба фарисейнүүд Тэрэниие барижа хаагты гэжэ Һүмын харуулшадые эльгээбэ. 33Иисүүс тэрэ үедэ:
– Үшөө нэгэ заа таанартай суг байлсахамни, тиигээд Намайе эльгээһэн Эсэгэдээ ошохоб. 34Таанар Намайе бэдэрхэт, теэд олохогүйт; Минии байха газарта ерэжэ шадахагүйт, – гэжэ хэлэбэ.
35Тиихэдэнь еврейнүүд өөһэд дундаа хөөрэлдэбэ:
– Үгы, бидэнэй Тэрэниие олохогүй ямар газарта Энэмнай ошохоёо түхеэрбэб? Али грегүүдэй дунда тарашоод байһан манай улад зондо ошожо, грегүүдые һургахаяа һанаба гү? 36«Таанар Намайе бэдэрхэт, теэд олохогүйт», «Минии байха газарта таанар ошожо шадахагүйт» гэхэдээ, ямар удхатайгаар Тэрэ хэлэбэб?
Амидаралта уһан
37Иисүүс һайндэрэй һүүлшын эгээл ехэ үдэрынь зондо иигэжэ айладхаба:
– Ангаһан хүн Намда ерээд, ундаа харяаг! 38Намда этигэдэг хүн тухай Нангин Бэшэг соо «Тэрэнэй зүрхэнһөө амидаралта урадхал уһан урдаха» гэжэ бэшэгдэнхэй.
39Иисүүс тиигэжэ хэлэхэдээ, Арюун Һүлдэ тухай хэлэбэ гээшэ: Иисүүстэ этигэһэн хүнүүд хожомынь Арюун Һүлдэтэй болохо ёһотой байгаа. Тэрэ үедэ Арюун Һүлдэ үшөө үгтөөдүй һэн, юундэб гэхэдэ, Иисүүс алдар солодо хүртөөгүй байгаа.
40Сугларһан зоной зариман Иисүүсэй үгэнүүдые шагнаад:
– Энэмнай хүнүүдтэ ерэхэ ёһотой тэрэ Лүндэншэ байнал! – гэлсэбэ. 41Нүгөөдэ зариманиинь:
– Энэмнай Бурханай табисуурта байнал! – гэлсэбэ.
– Теэд Бурханай табисуурта Галилейһээ ерэхэ аал? – гэжэ бэшэ зариманиинь буруушааба. – 42Бурханай табисуурта болбол Давидай үри һадаһан мүн, Давидай түрэһэн Бэтлэһээм хотоһоо ерэхэ ёһотой гэжэ Нангин Бэшэг соо хэлээтэй ха юм.
43Тиин зон Иисүүс тухай арсалдан, тэдэнэй һаналнуудынь тудалдаба. 44Зариманиинь Иисүүсые барижа тушаахаяашье һанаба, теэд Тэрээндэ хэншье гар хүрэбэгүй.
45Һүмын харуулшадай түрүү санаартанда, фарисейнүүдтэ бусажа ерэхэдэнь:
– Юундэ таанар Тэрээниие наашань асараагүйбта? – гэжэ һураба.
46– Энэ хүндэ адляар нэгэшье хүн хэзээдэшье номноогүйл! – гэжэ харуулшад харюусаба.
47– Тэрэ хүн иихэдээ таанарыешье мэхэлбэ гү? – гэжэ фарисейнүүд харуулшадһаа асууба. – 48Теэд ахамадуудай дундаһаа гү, али фарисейнүүдэй дундаһаа нэгэшье хүн Тэрээндэ этигээ аал? 49Хуули мэдэдэггүй харанхы мунхаг зон лэ Тэрээндэ этигэбэ гээшэ, тэдэ зон Бурханай хараалда хүртөө!
50Нэгэтэ Иисүүстэй ерэжэ уулзаһан тэдэнэй нэгэн болохо Никодим бэшэндээ иигэжэ хэлэбэ:
51– Хүниие гэмнэхэ гээ һаа, түрүүн тэрэ хүнэй хэлэһые шагнангүйгөөр, зэмыень тодоруулангүйгөөр шиидхэбэри гаргахые манай Хуули зүбшөөдэг юм гү?
52– Зай, ши тиихэдээ баһал Галилейһээ хаяаш? Ши өөрөө Нангин Бэшэг шудала, тиибэл Галилейһээ нэгэшье лүндэншэ гарахагүй гэжэ өөрөө мэдэхэш, – гэжэ тэдэнь харюусаба.
Иисүүс ба эрэдээ урбаһан эхэнэр
53Удаань бултадаа гэр гэртээ хариба.
Currently Selected:
Иоанн 7: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
