Иоанн 8

1Иисүүс Элеон хада дээрэ гараһан байна. 2Эртэ үглөөгүүр Иисүүсэй дахин Һүмэ ерэхэдэ, бүхы зоной Тэрээндэ ерэхэдэнь, Иисүүс номнол айладхаба. 3Тиихэ үедэнь Хуули заадаг багшанар ба фарисейнүүд өөрынгөө эрэдэ урбаһан нэгэ эхэнэрые Иисүүстэ асарба. Тэрэ эхэнэрые зоной урда байлгаад, 4Иисүүстэ хандан:

– Багша аа, энэ эхэнэрые эрэдээ урбажа байхадань, бидэ балшыса баряабди, – гэбэд. – 5Иимэшүүлые шулуугаар шэдэжэ хэһээхэ ёһотой гэжэ Моисей өөрынгөө Хуули дотор захяа һэн. Харин Та юу гэжэ хэлэхэбта?

6Хуули заадаг багшанар ба фарисейнүүд юундэ тиигэжэ асуугааб гэбэл, Иисүүсые туршан үгэ алдуулаад, хожомынь гэмнэхэеэ һанаһан байгаа бшуу. Теэд Иисүүс доошоо тонгойгоод, хургаараа юушьеб газар дээрэ бэшэжэ байба. 7Тэдэнь юумэ асуугаад һалабагүй, тиихэдэнь Иисүүс толгойгоо үргөөд, тэдэндэ хандажа:

– Таанарай хэнтнай нүгэл хэзээдэшье хээгүйб, тэрэ хүнтнай энэ эхэнэрые түрүүн шулуудаг лэ! – гэбэ.

8Тиигээд Иисүүс дахин уруугаа хараад, газар дээрэ юумэ бэшэһэнээ үргэлжэлүүлбэ. 9Иисүүсэй тиигэжэ хэлэхыень дуулаад, тэндэ сугларһан зон хойно хойноһоо һубарилдан тараба, эгээн ехэ наһатайшуулынь түрүүн гаража ошоо. Удаань Иисүүс эхэнэртэй хоюулан лэ үлэбэ. 10Иисүүс толгойгоо өөдэнь үргөөд, эхэнэрһээ:

– Эхэнэр аа, бэшэ зон хаанаб? Шамайе хэншье зэмэлээгүй гү? – гэжэ асууба.

11– Хэншье зэмэлээгүй даа, Эзэн аа, – гэжэ тэрэ эхэнэр харюусаба.

– Баһа Бишье шамайе зэмэлнэгүйб. Яба, дахин нүгэл бү хэ, – гэбэ Иисүүс.#8:11 Зарим нэгэн урданай бэшэгүүдтэ 7:53–8:11 хэһэг үгы байдаг, нүгөө заримандань ондоо газарта дайралдадаг.

Иисүүс болбол дэлхэйе гэрэлтүүлэгшэ Гэрэл туяа мүн

12Иисүүс дахин тэдэнтэй хөөрэлдэбэ:

– Би дэлхэйе гэрэлтүүлэгшэ Гэрэл туяа гээшэб. Минии хойноһоо дахаһан хүн харанхы соогуур төөрижэ ябахагүй, харин амидарал олгодог гэрэл туяатай болохо.

13– Та Өөр тухайгаа Өөрөө гэршэлэн хэлэнэт. Тиимэһээ Танай гэршэлгэ үнэн бэшэ, – гэжэ фарисейнүүд хэлэбэ.

14Иисүүс харюусаба:

– Хэрбээ Өөр тухайгаа Минии Өөрөөшье хэлээ һаамни, Минии үгэнүүдтэ этигэхэдэ болохо, юундэб гэбэл, Би хаанаһаа ерэһэнээ, хайшаа ошохо байһанаа мэдэнэб, харин таанар Минии хаанаһаа ерэһые, хайшаа ошохыемни мэдэнэгүйт. 15Таанар хүнүүдтэл адли шүүбэрилнэт, харин Би хэнииешье шүүбэрилнэгүйб. 16Теэд хүниие шүүбэрилбэлни, Минии зарга шүүбэри үнэн зүб байха һэн, юундэб гэхэдэ, Би гансаараа шүүбэрилнэ бэшэб, Намайе эльгээһэн Эсэгэмни Намтай хамта байна. 17Тиин хоёр хүнэй гэршэлгэ үнэн зүб юм гээд таанарай Хуули дотор бэшээтэй. 18Бидэ болбол хоёр гэршэбди: Намайе эльгээһэн Эсэгэ бидэ хоёр Минии тухай гэршэлнэбди.

19– Теэд Танай эсэгэ хаанаб? – гэжэ тэдэ һураба.

– Таанар Намайешье, Минии Эсэгыешье мэдэнэгүйт. Хэрбээ таанар Намайе мэдээ һаа, Минии Эсэгыешье мэдэхэ һэнта, – гэжэ Иисүүс харюусаба.

20Һүмэдэ мүнгэ алта үргэдэг газарай хажууда зогсон номножо байхадаа, Иисүүс тиигэжэ хэлээ һэн. Хэншье Тэрээниие барижа тушаагаагүй, ушарынь нэрлэбэл, Тэрэнэй сагынь үшөө ерээдүй байгаа.

«Минии ошохо газарта таанар ошожо шадахагүйт»

21Иисүүс баһа иигэжэ хэлээ:

– Би һаяар ябахамни. Таанар Намайе бэдэрхэт, теэд нүгэлтэйгөө үхэхэт. Минии ошохо газарта таанар ошожо шадахагүйт.

22– «Минии ошохо газарта таанар ошожо шадахагүйт» гээшэнь ямар удхатайб? Али Энэмнай бэеэ хорложо үхэхэеэ һанаба гү? – гэжэ еврейнүүдэй ахамадууд хөөрэлдэбэ.

23– Таанар доодо дэлхэйн ха юмта, харин Би дээрэһээ ерээб. Таанар энэ дэлхэйн хүнүүд гээшэт, Би энэ дэлхэйн бэшэб. 24«Таанар нүгэлнүүдтэйгөө үхэхэт!» гэжэ Би таанарта хэлээб. «Би байгааб, байнашьеб»#8:24 8:58 хара. гэхэдэмни үнэншөөгүй һаа, бултадаа нүгэлтэйгөө үхэхэт! – гэжэ Иисүүс харюусаба.

25– Тиихэдээ Та хэн гээшэбта? – гэжэ тэдэ асууба.

– Би хододоо Өөрыгөө хэн гээд нэрлэдэг һэнбиб, Тэрэл гээшэб, – гэжэ Иисүүс харюусаба. – 26Таанар тухай хэлэхэ, таанарые гэршэлэн зэмэлхэ олон юумэн Намда бии, теэд Намайе эльгээһэн Эсэгэһээ дуулаһанаал энэ дэлхэйнхидтэ хэлэнэб, харин Намайе эльгээгшэ үнэн зүб юм.

27Эсэгэ тухайгаа Тэрэ хэлэнэ гэжэ ахамадууд ойлгобогүй. 28Иисүүс үргэлжэлүүлэн:

– Хүн түрэлхитэнэй Хүбүүниие таанарай дээшэнь дэгдүүлхэдэ, Минии «Би» байһые, Өөрынгөө дураар юушье хэдэггүй байһые, Эсэгынгээл һургаһан ёһоор хэлэдэг байһыем таанар ойлгохот. 29Намайе эльгээгшэ ходо Намтай, Тэрэ Намайе гансаарыемни орхёогүй, юундэб гэбэл, Би Тэрэнэйнгээл дура хүсэлые бэелүүлнэб, – гэбэ.

30Иисүүсэй иигэжэ хэлэхэдэ, Тэрээндэ олон зон этигэбэ.

Бурханай үхибүүд гү, али шолмосой үхибүүд гү?

31Удаань Иисүүс Тэрээндэ этигэһэн еврейнүүдтэ иигэжэ хэлэбэ:

– Хэрбээ таанар Минии һургаалай ёһоор ябаа һаа, үнэхөөрөөл Минии шабинар болохот. 32Тиихэдээ таанар үнэн зүйлые ойлгохот, үнэн зүйл таанарые сүлөөлхэ.

33– Бидэнэр Абраһаамай үри һадаһад гээшэбди, хэзээдэшье хэнэйшье барлагууд байгаагүйбди! «Таанар эрхэ сүлөөтэй болохот» гэхэдээ Та ямар юумэн тухай хэлэнэбта? – гэжэ тэдэнь һураба.

34Иисүүс тэдэндэ иигэжэ харюусаба:

– Би таанарта үнэн зүбые хэлэнэб: нүгэл хэгшэ хүн бүхэн нүгэлэй барлагынь мүн. 35Барлаг болбол гэр бүлэ соо үни байдаггүй, харин хүбүүниинь хододоо гэр бүлэдөө үлэдэг. 36Таанарта Хүбүүнэй эрхэ сүлөө үгөөл һаа, таанар үнэхөөрөөл сүлөөтэй хүнүүд болохот. 37Таанар Абраһаамай үри һадаһад гээшэт гэжэ Би мэдэнэб, теэд таанар Намайе алаха һанаатайт, юундэб гэхэдэ, Минии үгэнүүд таанарай зүрхэ сэдьхэлдэ байра олоногүй бшуу. 38Би Өөрынгөө Эсэгындэ юу хараһан, үзэһэн тухайгаа таанарта хэлэнэб, харин таанар өөрынгөө эсэгэһээ дуулаһан юумэеэ хэнэт.

39– Манай үбгэ эсэгэ Абраһаам юм! – гэжэ тэдэ харюусаба. Иисүүс тэдэндэ хэлэбэ:

– Үнэхөөрөө Абраһаамай үри һадаһан байгаа һаа, таанар Абраһаамдал адли хэрэгүүдые бүтээхэ һэнта. 40Харин таанар Намайе алахаяа һананалта, Бурханһаа дуулаһан үнэн зүйл таанарта хэлэһэн хүниие алахаяа һананалта! Теэд Абраһаам иимэ юумэ хэдэг байгаа гү?! 41Үгы даа, таанар өөрынгөөл эсэгэдэ адли юумэ хэнэт!

– Бидэ нүгэл хилэнсэдэ түрөө бэшэбди! Манай ори ганса эсэгэ – Бурхан юм! – гэлсэбэ тэдэ.

42Иисүүс тэдээндэ харюусаба:

– Хэрбээ Бурхан таанарай эсэгэ байгаа һаа, таанар Намда дуратай байха һэнта, юундэб гэбэл, Би Бурханһаа иишээ ерээб, Бурхандаа бусахаб. Би Өөрһөөн ерээгүйлби – Намайе Бурхан эльгээгээл! 43Юундэ таанар Минии хэлэһэн үгые ойлгохо, дуулаха шадалгүй байнабта! 44Таанарай эсэгэ шолмос, тиимэһээ эсэгынгээ бүхы дура хүсэлыень бэелүүлхэ зорилготойт. Танай эсэгэ анханһаа нааша хүнүүдые аладаг, үнэн зүйлые үзэжэ ядадаг байһан, ушарынь хэлэбэл, тэрээндэтнай үнэн зүйл гэжэ байгаагүйл. Худал юумэ хэлэхэдээ, тэрэтнай өөрынгөө түрэлхи хэлэн дээрэ дуугардаг һэн, юундэб гэбэл, худалша, худал юумэ үүдхэгшэ байһан байна. 45Харин үнэн зүб юумэ Минии хэлэхэдэ, таанар Намда этигэнэгүйт. 46Нүгэл хээ гэжэ Намайе таанарай хэнтнай гэршэлэн харуулжа шадахаб? Минии үнэн зүб юумэ хэлэхэдэ, таанар юундэ Намда этигэнэгүйбта? 47Бурханай мэдэлдэ байгша болбол Бурханай хэлэһэн үгэнүүдые дуулаха ёһотой. Таанар Намайе дууланагүйт, юундэб гэхэдэ, Бурханай мэдэлдэ бэшэ байнат.

Иисүүс ба Абраһаам

48Еврейнүүд Иисүүстэ иимэ харюу үгэбэ:

– Таниие ада шүдхэртэ барюулһан самаряан хүн гэжэ бидэ зүб хэлсэдэг байнабди.

49– Би ада шүдхэртэ барюулаагүйб: Би Өөрынгөө эсэгые хүндэлнэб, харин таанар Минии нэрэ гутаанат. 50Би Өөртөө алдар соло бэдэрнэгүйб, теэд Намда алдар соло бэдэрэгшэ ондоо Нэгэн бии, Тэрэл шиидхэнэ. 51Таанарта үнэн сэхэ хэлэнэб: Минии һургаалаар ябадаг хүнүүд хэзээдэшье үхэхэгүй!

52– Та ада шүдхэртэ барюулһан хүн байнат гэжэ одоол бидэ лаб мэдэбэбди, – гэлдэбэд, – Абраһаам наһа баранхай, мүн баһа лүндэншэдшье нүгшэнхэй. Харин Та «минии һургаалаар ябадаг хүнүүд хэзээдэшье үхэхэгүй» гэнэт. 53Наһа бараһан манай үбгэ эсэгэ Абраһаамһаа Та ехэ гээшэ гүт? Али наһаяа дүүрэһэн лүндэншэдһөө ехэ гээшэ гүт? Та хэнби гэжэ Өөр тухайгаа һананабта?

54– Хэрбээ Би Өөрөө Өөрыгөө алдаршуулжа байгаа һаа, Минии алдар нэрэ юуншье бэшэ. Теэд Намайе Минии Эсэгэ алдаршуулна, таанар Тэрээниие өөһэдымнай Бурхан гэжэ нэрлэнэт! 55Теэд таанар Минии Эсэгые мэдэнэгүйт, харин Би Тэрэниие мэдэнэб. Хэрбээ Би Тэрэниие мэдэхэгүйб гээ һаа, Би таанартайл адли худалша болохо һэм. Теэд Би Тэрэниие мэдэхэб, Тэрэнэй хэлэдэг үгэнүүдые бэелүүлнэб. 56Танай үбгэ эсэгэ Абраһаам Минии ерэхэ үдэрые харахаб гэжэ һанахадаа баярладаг бэлэй, тиин ерэһэн үдэрыемни хараад, баяртай золтой байгаа һэн!

57– Та табиншье наһа хүрөөгүй аад, Абраһаамые хараһан болоно гүт?! – гэжэ еврейнүүд жэгшэбэ.

58– Таанарта үнэн зүбые хэлэнэб: Би Абраһаамай үшөө түрөөдүйдэ байгааб, байнашьеб#8:58 Би байгааб, байнашьеб – Хуушан Хэлсээн соо олон ушарта Бурхан иимэ үгөөр Өөрөө Өөрыгөө нэрлэнэ. Иимэ маягаар Иисүүс Өөрынгөө Эсэгэ Бурхантай нэгэн хамта байһые батална. Гар 3:14, мүн Ин 8:28; 13:19; 18:5 хара., – гэжэ Иисүүс харюусаба.

59Тиихэдэнь еврейнүүд Иисүүсые шулуудажа алаха гэжэ шулуунуудые бариба. Теэд Иисүүс тэдэнһээ зайлажа, Һүмэһөө гаража ошобо.

Currently Selected:

Иоанн 8: BurBBL2024

Highlight

Copy