Лука 11

(Мт 6:9-13; 7:7-11)

1Нэгэтэ хаанашьеб Иисүүсэй зальбаржа дүүргэһэнэй һүүлээр:

– Эзэн аа, Иоаннай шабинараа һургаһан шэнгеэр Бурханда яажа зальбархые манда заажа хайрлыт, – гэжэ шабинарайнь нэгэн гуйба. 2Иисүүс шабинартаа хэлэбэ:

– Бурхандаа иигэжэ мүргэгты:

Эсэгэмнай! Нангин нэрэтнай алдаршахань болтогой.

Хаан түрэтнай мандахань болтогой,

3ажамидаралаймнай хоол

үдэр бүхэндэ мандаа үгэжэ байгаарайт.

4Манда мууе хэһэн алибаа хүниие

манай хүлисэдэгтэл адляар

бидэнэйшье нүгэл хилэнсые хүлисыт даа.

Горидолго хорхойтуулгада маниие бү оруулыт даа!

5Иисүүс тэдээндээ хэлэбэ:

– Танай нэгэн хани нүхэртэй байгаа һэн гэлэй. Һүниин тэндэ та нүхэртөө ошожо: «Ханимни, намдаа гурбан монсогор хилээмэ зээлеэр үгыш, 6харгыдаа ябаһан нэгэ нүхэрэйнгөө орожо ерэхэдэ, табиха юумэгүй байбаб», – гэбэт гэлэй. 7Тиихэдэтнай нүхэртнай үүдэнэйнгээ саанаһаа: «Хүндэ хашаргаан бү гарга: үүдэмни бүхөөр шэбхэдээтэй, үхибүүдни намтаяа унтаридаа оронхой; бодожо шамда хилээмэ үгэхэ аргамгүй», – гэжэ танда харюусаба гэлэй. 8Тиигээд тэрэ нүхэртнай һэшхэлээрээ боложо, хилээмэ үгөөгүйшье һаа, эреэд һалахагүйдэтнай бодожо, эреэшыетнай дууһан үгэхэ баатай болохо гэжэ таанадта хэлэхэ байнаб. 9Тиимэһээ эригты, тиихэдэтнай танда үгэхэл; бэдэрэгты, тиихэдээ олохот; үүдэ тоншогты, тиихэдэтнай танда нээхэ. 10Юундэб гэбэл, эриһэн алишье хүн абадаг, бэдэрһэн хүн олодог, тоншоһон хүндэ үүдэ нээжэ үгэдэг. 11Хүбүүнэйнгээ загаһа эрихэдэнь, могой барюулха эсэгэ таанарай дунда байха аал?#11:11 Зарим эхэ бэшэгүүд соо энэ 11-дэхи зүйлэй эхиндэ: «хилээмэ эрихэдэ, тэрээндээ шулуу үгэхэ, үгышье һаа, загаһа…» гэжэ нэмээтэй байдаг. 12Үгышье һаа, хүбүүнэйнгээ үндэгэ эрихэдэ, тэрээндээ хорото абаахай үгэхэ эсэгэ байха аал? 13Хэрбээ нүгэл шэбэлтэй таанадай үхибүүдтээ һайн юумэ үгэжэ шададаг байхадатнай, Огторгойн Эсэгэ гуйһан хүн бүхэндэ Арюун Һүлдэеэ бүришье дуратайгаар үршөөхэл!

Иисүүс ба Бээлзэбүүл

14Иисүүс нэгэ хүндэ шэгэһэн хэлэгүй ада шүдхэрые бэеһээнь зайлуулба. Ада шүдхэрэй гарахада, тэрэ хүн дуугардаг болошобо. Улад зон ехэтэ гайхалдаба:

15– Иисүүс Бээлзэбүүлэй, ада шүдхэрнүүдэй ноёной хүсөөр лэ ада шүдхэрнүүдые дарана, – гэжэ тэдэнэй зариман хэлэбэ. 16Нүгөөдэ зариманиинь Иисүүсые туршажа, Бурханай заяаһан хүн байһанаа тэнгэриһээ баталагдаһан гайхамшагта дүлгэ тэмдэг харуулыт даа гэбэ. 17Тэдэнэй бодол тааһан Иисүүс хэлэбэ:

– Хэдэн бүлэг боложо хубааралдаад, хоорондоо хёморолдоһон алишье хаан орон хооһорон, бутаран һалаха. Тиин нэгэ гэр бүлын гэшүүдынь эбээ таһаран хэрэлдэбэл, тэрэ гэр бүлэ һалаха, һарниха болоно. 18Хэрбээ шолмосой хаан оронойхин өөһэдынгөө урдаһаа эсэргүүсэн бодобол, хаан орониинь хэр удаан тогтоборитой бүтэн байхаб? Харин таанад шүдхэрнүүдэй Бээлзэбүүл ноёной хүсөөр ада шүдхэрнүүдые хүнэй бэеһээ зайлуулна гэжэ Нам тухай хэлсэнэт. 19Хэрбээ Би танай хэлэһэн ёһоор Бээлзэбүүлэй хүсөөр ада шүдхэрнүүдые хүнэй бэеһээ зайлуулдаг байбал, танай шабинар хэнэй хүсөөр тэдэниие намнажа гаргадаг гээшэб? Шабинарайтнай хэжэ байһан хэрэгүүд буруу байһыетнай баталха! 20Хэрбээ Бурханай хүсөөр ада шүдхэрнүүдые дарадаг һаамни, тэрэ Бурханай хаан түрын эндэтнай тогтоод байһые баталха.

21Хэрбээ нэгэ хүсэтэй хүнэй буу зэбсэг барижа, ордон гэрээ хамгаалаа һаань, зөөри зөөшэнь бүтэн байха. 22Бүри хүсэтэй хүн тэрээндэ добтолжо ороод, тэрэниие диилээ һаа, бүхы найдалынь болохо буу зэбсэгыень буляаха, зөөрииень олзолхо байна.

23Минии тала баряагүй хүн Намда эсэргүү гээшэ. Намтай хамта ургаса суглуулаагүй хүн тэрэ ургасые үрижэ һалгаана.

Ада шүдхэрэй бусалган

24Хүнэй бэеһээ гараһан ада шүдхэр уһагүй сүл губяар тэнэжэ, амар заяа бэдэрээд, олохогүйдөө: «Байһан гэртээ бусахам», – гэдэг. 25Бусажа ерэхэдэнь, хуушан гэрэйнь бог хамагдаһан, сэбэрлэгдэһэн байдаг. 26Тиигээд тэрэ ада шүдхэр ябажа, өөрһөөн һураггүй хоротой долоон ада шүдхэр абаад, һөөргөө тэндэ шэгэн орожо байрладаг. Тиигэхэдэнь тэрэ хүниинь урдынхидаа орходоо бүри ехээр тамаа үзэдэг, – гэжэ Иисүүс хэлэбэ.

Үнэн бодото жаргал

27Иимэ юумэ хэлэжэ байхадань, зоной дундаһаа нэгэ эхэнэр:

– Хэбэл соогоо Таниие абажа ябаһан, хүхөөрөө тэжээһэн эхэ жаргалтай! – гэжэ хоолойгоо шангадхан дуугарба.

28– Бурханай үгэ шагнаад, тэрэниие наринаар сахидаг хүнүүд үлүү ехэ жаргалтай! – гэжэ Иисүүс харюудань хэлэбэ.

Бурханай харуулһан дүлгэ тэмдэг

29Тиигээд зоной улам олоор сугларжа эхилхэдэ, Иисүүс иигэжэ айладхаба:

– Оршон үеын зон муу мэхэтэйшүүл байна. Тэдэнэр Бурханһаа дүлгэ тэмдэг харуула гэнэ. Теэд Иона лүндэншэтэй ушарһан гайхамшагта дүлгэ тэмдэгһээ ондоо дүлгэ тэмдэг тэдэндэ үгтэхэгүй. 30Иона лүндэншын Нинэвээ хотынхидтэ дүлгэ тэмдэг болоһондол адляар Хүн түрэлхитэнэй Хүбүүн энэ үеынхидтэ дүлгэ тэмдэг болохо юм. 31Зарга шүүбэриин болохо Үдэр Урда зүгэй хатан энэ үеын хүнүүдтэй хамта бодожо, тэдэниие буруушааха. Тэрэ хатан Соломоон хаанай сэсэн үгые шагнахаяа газарай мухарһаа ерэһэн байгаа бшуу. Теэд мүнөө эндэ Соломоонһоо бүри шухала нэгэн байна. 32Зарга Шүүбэри болохо Үдэр Нинэвээ хотынхид тус үеынхидтэй бодожо, тэдэниие буруушааха. Ионын номнол шагнаад, тэдэнэр нүгэлһөөн зайлажа, Бурханда хандаһан байгаа бшуу. Теэд эндэ байгаашань Ионаһоо бүри шухала нэгэн байна!

Бэеын гэрэл туяа

33Зула аһаагаад, хэншье тэрэнээ далда газар табидаггүй, али амһартаар хабхалдаггүй, харин ороһон хүнэй гэрэлыень харахын тула үндэр табюур дээрэ табидаг! 34Нюдэн болбол бэеын гэрэл, дэн юм. Нюдэнэйшни арюун гэрэлтэй байгаа һаа, бүхы бэешни гэрэлтэй гэгээн байха; харин нюдэнэйшни бүрхэг һаа, бүхы бэешни хабхартан байха. 35Тиимэһээ досоохи гэрэл туяагаа балартуулхагүй гэжэ оролдо! 36Хэрбээ бүхы бэешни һаруултаад, тэрээн соошни нэгэшье харлаһан газарай үгы һаань, хамаг бэешни зулын ялагар гэрэлээр гэрэлтүүлэгдэһэн шэнги, зосоо газаагүй гэрэлтэн толорхол.

Иисүүс фарисейнүүдые ба Хуули заадаг багшанарые гэмнэнэ

37Иисүүсэй хэлэжэ дүүргэхэдэ, нэгэ фарисей хоол барихыень уриба. Иисүүс гэртэнь орожо һууба. 38Хоол барихынгаа урда тээ гараа угаахагүйдэнь фарисей ехээр гайхаба. 39Тиихэдэнь Иисүүс тэрээндэ иигэжэ хэлээ:

– Фарисейнүүд, таанар аяга, табагай газаахииень аршажа арилгадагта, харин досоогоо таанад эд хүрэнгэдэ шуналтай, нүгэлтэй байнат. 40Тэнэг мунхаг амитад! Юумэнэй газаа тала бүтээһэн Бурхан дотор талыеньшье бүтээгээ бэшэ гү? 41Зүгөөр аяга табаг соогоо байһан юумэнһээ үгытэйшүүлтэй хубаалсажа үгэлсэжэ байбал, таанадые газаа досоогүй арюун сэбэр болоо гэжэ Бурхан тоолохо һэн! 42Фарисейнүүд, таанад гашуудал үзэхэт! Ургуулһан хангалта ургамалай, мүн огородойнгоо эдеэнэй арбанайнь нэгэл хубиие Бурханда үргэдэгта, харин тэрээнтэй зэргэ хүнүүдые хууранат, Бурханда дурагүй байнат. Тиихэдэ таанад бусад зондо үнэн зүбөөр хандаха, мүн арбанайнгаа нэгэ хубиие Бурхандаа үгэжэ байха ёһотойт. 43Фарисейнүүд, таанад гашуудал үзэхэт! Мүргэлэй гэртэ урдуур һууха дуратайт, олон зоной дунда мэндэшэлүүлхэ дуратайт. 44Таанад гашуудал үзэхэт! Таанад ямаршье тэмдэггүй хүүр мэтэт, хүнүүд гэшхэһэнээш мэдэнгүй дээгүүртнай ябадаг!

45– Багша аа, иигэжэ хэлэхэдээ, Та манииешье доромжолнот! – гэжэ Хуули заадаг багшанарай нэгэн Иисүүстэ хэлэбэ. 46Харин Иисүүс:

– Хуули заадаг багшанар, таанадшье гашуудал үзэхэт. Хүнүүдтэ даашагүй ашаа үргэлүүлээд, тэрэ ашаагаа зөөхэдэнь хүндэ туһалха гэжэ хургаараашье хүдэлгэдэггүйт! 47Таанад гашуудал үзэхэт! Таанад үбгэ эсэгэнэрэйнгээ алаһан лүндэншэдтэ үзэсхэлэнтэ гоё субаргануудые баринат. 48Тиигэхэдээ таанад үбгэ эсэгэнэрэйнгээ харата хэрэг зүбшөөһэнөө харуулнат, үгы һаа, тэдэнэйнгээ алаһан лүндэншэдтэ субаргануудые барихагүй байгаат. 49Бүхы юумые уридшалан мэдэдэг Бурхан танай нүгэлтэ хэрэгүүд тухай: «Лүндэншэдые болон мэдээсэгшэдые тэдээндэ эльгээхэб, зүгөөр тэдэнэймни заримыень алаха, заримыень намнаха», – гэжэ хэлэһэн байгаа. 50Тиин дэлхэйн анха бии болохоһоо хойшо бүхы лүндэншэдэй адхарһан шуһан энэ оршон үеын угсаатанһаа нэхэгдэхэ: 51Аабэлэй шуһанһаа эхилээд, үргэлэй шэрээ ба Нангин Газарай хоорондо һүнөөгдэһэн Захарияагай шуһан хүрэтэр нэхэгдэхэ. Тиимэ даа, бүхы тэрэ адхарһан шуһанай түлөө энэ үеын зон хэһээлтэдэ орохо! 52Хуули заадаг багшанар, таанад гашуудал үзэхэт! Таанад эрдэм ухаанай ордондо орохо үүдэнэй түлхюур абаһан аад, тэндэ өөһэдөөшье ороогүйт, орохо гэһэн хүнүүдтэшье һаалта хээт, – гэжэ зэмэлбэ.

53Иисүүсэй тэрэ гэрһээ гаража ошоходонь, Хуули заадаг багшанар болон фарисейнүүд Иисүүсые ехэ шэрүүнээр шүүмжэлжэ оробо, тэрэ сагһаа хойшо олон табан юумэ һуража, 54буруу юумэ хэлүүлжэ бариха арга боломжонуудые бэдэрдэг болобо.

Currently Selected:

Лука 11: BurBBL2024

Highlight

Copy